.jpg)
ឡានទ្រុងដឹកជ្រូកដែលនគរបាលឃាត់ទុកនៅខេត្តស្វាយរៀងខែមុន។ សហការី
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ បានព្រមានចាត់វិធានការផ្លូវច្បាប់ដល់គ្រប់បណ្ដាមន្ទីរកសិកម្ម រុក្ខាប្រមាញ់ និងនេសាទ ក៏ដូចជាការិយាល័យផលិតកម្ម និងបសុព្យាបាលរាជធានី-ខេត្តទាំងឡាយណា ដែលធ្វើឲ្យមានការថ្លោធ្លោយនូវលំហូរចរាចរណ៍សត្វជ្រូករស់ និងផលិតផលជ្រូកខុសច្បាប់គ្រប់ប្រភេទពីប្រទេសជិតខាងចូលមកកម្ពុជា ពិសេសពីប្រទេសវៀតណាម ដែលមានផ្ទុះជំងឺប៉េស្តជ្រូក អាហ្រ្វិក។
យោងសារាចរណែនាំស្តីពី «វិធានការបន្ទាន់ក្នុងការទប់ស្កាត់ការឆ្លងរាលដាលជំងឺប៉េស្តជ្រូក» ចុះថ្ងៃទី ៣០ ខែ ឧសភា ឆ្នាំ ២០១៩ និងដែលភ្នំពេញប៉ុស្តិ៍ទទួលបានកាលពីម្សិលមិញ បានឲ្យដឹងថា លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានគូសបញ្ជាក់ថា រហូតមកទល់ពេលនេះ ជំងឺប៉េស្តជ្រូក អាហ្រ្វិកកំពុងបន្តឆ្លងរីករាលដាលនៅតាមបណ្ដាប្រទេសមួយចំនួនក្នុងតំបន់ និងពិភពលោក។
សារាចរដដែលនេះបានឲ្យដឹងថានៅប្រទេសវៀតណាម មានករណីផ្ទុះជំងឺនេះនៅតាមបណ្ដាខេត្ត-ក្រុងចំនួន ៣៨ ហើយជ្រូកប្រមាណ ១,៥ លានក្បាល ត្រូវបានសម្លាប់ចោល ចាប់តាំងពីមានករណីផ្ទុះលើកដំបូង ដែលត្រូវបានរាយការណ៍ជាផ្លូវការនៅថ្ងៃទី ១៩ ខែ កុម្ភៈ ឆ្នាំ ២០១៩។
នៅក្នុងសារាចរនោះលោក សាខុន បានបន្ថែមថា៖ «នៅប្រទេស វៀតណាម ជំងឺនេះបានឆ្លងរាលដាលយ៉ាងឆាប់រហ័ស ចាប់តាំងពីតំបន់ភាគខាងជើង រហូតមកដល់ភាគកណ្ដាល និងថ្មីៗនេះ បានឆ្លងរាលដាលកាន់តែខ្លាំងឡើងមកខេត្តជាច្រើននៅភាគខាងត្បូង និងជាពិសេសនៅតាមបណ្ដាខេត្ត ដែលមានព្រំប្រទល់ជាប់ជាមួយប្រទេស កម្ពុជា ដែលជាសញ្ញាហានិភ័យខ្ពស់ក្នុងការឆ្លងរីករាលដាលជាលក្ខណៈទ្រង់ទ្រាយធំដល់កម្ពុជា»។
លោក សាខុន បានថ្លែងនៅក្នុងសារាចរថា ដើម្បីទប់ស្កាត់ការឆ្លងរាលដាលជំងឺប៉េស្តជ្រូកអាហ្រ្វិក លោកបានដាក់ចេញនូវវិធានការ ៨ ចំណុច ដែលរួមបញ្ចូលទាំងការទំនាក់ទំនងកិច្ចសហប្រតិបត្តិការជាដៃគូជាមួយបណ្ដាប្រទេសជិតខាងនៅក្នុងតំបន់ ដើម្បីផ្លាស់ប្ដូរព័ត៌មានគ្នាទៅវិញទៅមក ស្ដីពីបច្ចុប្បន្នភាពនៃជំងឺប៉េស្តជ្រូកអាហ្រ្វិក និងផ្សព្វផ្សាយអំពីវិធានជីវសុវត្ថិភាពនានាដល់កសិករ ពាណិជ្ជករ ម្ចាស់កសិដ្ឋានចិញ្ចឹមជ្រូក និងម្ចាស់សត្តឃាតដ្ឋាន ចាប់តាំងពីទីជនបទរហូតដល់ទីប្រជុំជនរាជធានី-ខេត្តនៅទូទាំងប្រទេស កម្ពុជា ឲ្យមានការប្រុងប្រយ័ត្នចំពោះការឆ្លងរីករាលនៃជំងឺនេះ និងរួមគ្នាទប់ស្កាត់ការហូរចូលនៃសត្វជ្រូករស់ និងផលិតផលសាច់ជ្រូកខុសច្បាប់គ្រប់ប្រភេទពីបណ្ដាប្រទេសជិតខាង ជាពិសេសពីប្រទេស វៀតណាម។
ជាមួយគ្នានេះ លោកបានព្រមានផងដែរថា៖ «ក្នុងករណីមិនបានអនុវត្តត្រឹមត្រូវ ឬមានការថ្លោះធ្លោយដោយប្រការណាមួយ មន្ទីរកសិកម្ម រុក្ខាប្រមាញ់ និងនេសាទ ក៏ដូចជាការិយាល័យផលិតកម្ម និងបសុព្យាបាលរាជធានី-ខេត្តនោះ នឹងទទួលខុសត្រូវទាំងស្រុង ចំពោះមុខក្រសួងកសិកម្ម និងចំពោះមុខច្បាប់ជាធរមាន»។
យោងតាមការអះអាងរបស់លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទកាលពីម្សិលមិញបានឲ្យដឹងថា កាលពីប៉ុន្មានខែមុននេះ នៅក្នុងប្រទេសកម្ពុជាក៏មានសេចក្ដីរាយការណ៍អំពីការផ្ទុះឡើងនៃជំងឺប៉េស្តជ្រូកអាហ្រ្វិកនេះផងដែរ នៅក្នុងខេត្តរតនគិរី ប៉ុន្តែ ត្រូវបានមន្ត្រីជំនាញបើកយុទ្ធនាការទប់ស្កាត់ទាន់ពេលវេលា ហើយបច្ចុប្បន្ន ករណីនេះពុំមានការផ្ទុះឡើងជាថ្មីនោះទេ៕
