ស្វាយរៀងៈ លោក វ៉ា គឹមហុង ទេសរដ្ឋមន្ត្រី និងជាប្រធានគណៈកម្មាធិការចម្រុះខណ្ឌសីមា និងបោះបង្គោលព្រំដែនកម្ពុជា-វៀតណាម បានជួបជាមួយភាគីវៀតណាមកាលពីថ្ងៃសៅរ៍ ដើម្បីពិភាក្សាអំពីការបោះតង់របស់ភាគីវៀតណាមនៅព្រំដែនមិនទាន់ឯកភាព តែមិនទាន់មានលទ្ធផលនៅឡើយ។
ប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀងកាលពីព្រឹកថ្ងៃសៅរ៍បានរៀបចំសណ្ដាប់ធ្នាប់ ការពារសុវត្ថិភាពជូនគណៈប្រតិភូមួយដឹកនាំដោយលោក វ៉ា គឹមហុង បានធ្វើដំណើរទៅចូលរួមប្រជុំស្ដីពីកិច្ចការងារព្រំដែន ដែលប្រព្រឹត្តទៅនៅទីបញ្ជាការដ្ឋានកងទ័ពការពារព្រំដែន ម៉ុកបាយស្ថិតក្នុងទឹកដីនៃប្រទេសវៀតណាម។
លោក វ៉ា គឹមហុង បានថ្លែងប្រាប់ភ្នំពេញប៉ុស្តិ៍ឲ្យដឹងកាលពីម្សិលមិញយ៉ាងខ្លីថា កិច្ចប្រជុំនេះបានពិភាក្សាជាមួយភាគីវៀតណាមអំពីការបោះតង់នៅតាមបណ្ដោយតំបន់ព្រំដែន មិនទាន់ឯកភាពរវាងកម្ពុជា និងវៀតណាម។
លោកមានប្រសាសន៍ឲ្យដឹងទៀតថា៖ «អត់មានអីទេ មានតែរឿងបោះតង់បោះអីបន្តិចបន្តួច ខ្ញុំមិនទាន់ចង់និយាយរឿងនេះទេ ដោយសារយើងកំពុងចរចាគ្នារឿងនេះ»។
កាលពីសប្ដាហ៍មុនលោកស្រី កុយ ពិសី អនុប្រធានលេខាធិការដ្ឋានអចិន្រៃ្តយ៍នៃអាជ្ញាធរជាតិទទួលបន្ទុកកិច្ចការព្រំដែនបានថ្លែងថា តង់ដែលវៀតណាមបោះមានជាង ៤០ កន្លែងនៅតំបន់មិនទាន់ឯកភាពគ្នាលើខ្សែព្រំដែន។ ទីតាំងទាំងនោះមិនមែនជាដីវៀតណាម ហើយក៏មិនទាន់ជាដីកម្ពុជា ពេញលេញនោះដែរ ប្រទេសទាំង ២ ត្រូវបន្តពិភាក្សារកចំណុចឯកភាពបន្តទៅទៀត។
លោកស្រីបន្តថា ក្រសួងមហាផ្ទៃបាននិងកំពុងធ្វើការងារនេះ ហើយរឿងនេះជារឿងដែលនិយាយគ្នាបានជាលក្ខណៈទ្វេភាគីមិនមែនជារឿងធំដុំដោះស្រាយមិនចេញ ដែលចាំបាច់ទៅរកគេជួយនោះទេ។ កម្ពុជាបានធ្វើការតវ៉ាតាមរយៈក្រសួងការបរទេស ១ ដងជា ២ ដងទៅវៀតណាមហើយ ហើយវៀតណាមថា ពេលចប់កូវីដ១៩ គេនឹងដកតង់ទាំងនោះចេញ។
លោកស្រីថ្លែងថា៖ «យើងខ្ញុំ និងថ្នាក់ដឹកនាំព្រំដែន ជាពិសេសសម្តេចតេជោ បានដាក់ទាំងជីវិតដើម្បីការពារទឹកដីមួយនេះរហូតមក។ ដូច្នេះគ្រប់ដង្ហើមចេញចូលរបស់ខ្ញុំមិនដែលភ្លេចនូវកាតព្វកិច្ចរបស់ខ្លួនឡើយ គឺការពារឲ្យបានបូរណភាពទឹកដី និងមិនឲ្យបរទេសណាមកបំពានកម្ពុជា ហើយកម្ពុជាក៏មិនបំពានទឹកដីគេវិញដែរ»។
លោក គង់ សុភ័ណ្ឌ អភិបាលខេត្តកណ្ដាលបានប្រាប់ឲ្យដឹងកាលពីម្សិលមិញថា មកទល់ពេលនេះមិនមានអ្វីប្រែប្រួលទេពាក់ព័ន្ធនឹងការបោះតង់របស់វៀតណាមនៅព្រំដែនមិនទាន់ឯកភាពក្នុងខេត្តរបស់លោក។ លោកបញ្ជាក់ថា តង់ដែលវៀតណាមបានបោះនៅតាមព្រំដែនមានសរុប ២៤ កន្លែងនៅលើព្រំប្រទល់ជាង ២៩ គីឡូម៉ែត្រជាមួយខេត្តកណ្ដាល។
ប៉ុន្តែចំណុចដែលមិនទាន់ឯកភាពមានប្រវែងប្រមាណជិត ១២ គីឡូ ដែលនៅលើទីតាំងទាំងនេះ វៀតណាមបានសាងសង់តង់ចំនួន ៩ កន្លែង។ ទោះយ៉ាងណា អាជ្ញាធរមូលដ្ឋានតាមព្រំដែនប្រទេសទាំង ២ បានធ្វើទំនាក់ទំនងគ្នាជាញឹកញាប់អំពីបញ្ហានេះ។
លោកថ្លែងថា៖ «ទី ១ យើងកុំឲ្យគាត់ធ្វើអីខុសបន្ថែម ទី ២ ស្នើឲ្យគាត់ដក ហើយគាត់ចុងក្រោយដូចជាចង់ចាប់ផ្ដើម រៀបរយហើយ។ អាហ្នឹងទំនាក់ទំនងគ្នាថ្នាក់មូលដ្ឋាន។ ប៉ុន្តែដល់មួយរយៈពេលនេះ កូវីដបានកើនឡើងខ្លាំង ជាពិសេសសហគមន៍របស់គាត់កើតកូវីដ។ អ៊ីចឹងគាត់តេមករដ្ឋបាលថ្នាក់មូលដ្ឋានស្រុកឃុំថា គាត់កំពុងប្រឈមការលំបាក និងដាក់ផែនការកុំឲ្យមនុស្សចេញចូល។ អ៊ីចឹងតាមចំណុចទាំងអស់គាត់យកអាទិភាពលើកូវីដ គាត់និយាយមកអ៊ីចឹង ហើយយើងក៏ប្រយ័ត្នអាហ្នឹងដែរ»។
លោកបន្តថា៖ «ប៉ុន្តែបើសិនចប់កូវីដហើយគាត់មិនដក អាហ្នឹងជាបញ្ហាដែលយើងត្រូវប្រតិកម្ម ធ្វើតបតផ្សេងៗតាមផ្លូវច្បាប់ដែលមាន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងកាលពីម្សិលមិញថា កម្ពុជាបានដាក់លិខិតទៅភាគីវៀតណាមច្រើនសាហើយ ប៉ុន្តែចម្លើយពីវៀតណាម ហាក់ដូចជាមិនទាន់អាចទទួលយកបាន។ រដ្ឋាភិបាលបានយកចិត្តទុកដាក់លើបញ្ហានេះ ប៉ុន្តែភាគីវៀតណាមហាក់ដូចជាមិនសូវគោរពដល់ចំណងកិច្ចសហប្រតិបត្តិការនៃប្រទេសទាំង ២។
លោកថ្លែងថា៖ «បើគាត់ផ្ដល់តម្លៃមិត្តភាព ប្រហែលជាការតវ៉ានេះត្រូវបានយកចិត្តទុកដាក់ ហើយតង់ទាំងអស់នោះគួរត្រូវបានរើចេញហើយ មិនមែនដើម្បីបង្ការកូវីដ បែរជាយកតង់មកដាក់នៅតំបន់ព្រំដែនដែលមិនមានការឯកភាពគ្នានោះទេ។ នេះបង្ហាញចេតនាមួយមិនល្អចំពោះប្រទេសជិតខាងផងគ្នា»។
លោកបន្តថា ករណីប្រវត្តិសាស្ត្រកម្ពុជាក្រោម និងកោះត្រល់គឺជាករណីដែលធ្វើឲ្យពលរដ្ឋកម្ពុជាមិនមានទំនុកចិត្តលើវៀតណាម ដោយសារតែវៀតណាមចូលមកហើយ ច្រើនតែមិនចេញទៅវិញ។ នេះជាចំណុចដែលពលរដ្ឋកម្ពុជាត្រូវពិចារណាពីមេរៀនប្រវត្តិសាស្ត្រ៕