The Phnom Penh Post Search

Search form




Logo of Phnom Penh Post newspaper Phnom Penh Post - លោក វ៉ា គឹមហុង ឲ្យ​វៀតណាម​ពិនិត្យ​កន្លែង​បោះតង់ និង​រើ​តង់​ចេញ




លោក វ៉ា គឹមហុង ឲ្យ​វៀតណាម​ពិនិត្យ​កន្លែង​បោះតង់ និង​រើ​តង់​ចេញ

Content image - Phnom Penh Post
សកម្មភាព​នគរបាល​ពិនិត្យ​កន្លែង​ដែល​អាជ្ញាធរ​វៀតណាម​បោះតង់​តាម​ព្រំដែន​ខេត្ត​កណ្ដាល​។ រូបថត នគរបាល

លោក វ៉ា គឹមហុង ឲ្យ​វៀតណាម​ពិនិត្យ​កន្លែង​បោះតង់ និង​រើ​តង់​ចេញ

ភ្នំពេញ: លោក វ៉ា គឹមហុង ប្រធាន​គណៈកម្មការ​កិច្ចការ​ព្រំដែន​កម្ពុជា​បាន​ឲ្យ​ដឹង​កាលពី​ថ្ងៃ​អង្គារ​ថា វៀតណាម​មិន​ចាំបាច់​ស្នើឲ្យ​កម្ពុជា​ចូលរួម​ក្នុង​ការធ្វើ​អធិការកិច្ច​នៅតាម​ព្រំដែន​ដែល​ភាគី​វៀតណាម​បាន​កំពុង​បោះតង់​នោះទេ ដោយ​អះអាង​ថា វៀតណាម​គួរតែ​ទៅពិនិត្យ​ខ្លួនឯង ហើយ​ប្រញាប់​រុះរើ​តង់​ទាំងនោះ​ចេញ ព្រោះ​កម្ពុជា​បាន​ឆ្លើយតប​តាមរយៈ​ការទូត​រួចរាល់​ហើយ​។

លោក វ៉ា គឹមហុង បាន​ឲ្យ​ដឹង​ទៀតថា​៖ «​បើ​ភាគី​វៀតណាម​គាត់​ចង់​មក​មើល​ឲ្យ​គាត់​មើលទៅ ហើយ​យើង​សួរ​ទៅ​គាត់​វិញ តើ​ការ​បោះតង់​ហ្នឹង​ត្រឹមត្រូវ​ដែរ​ឬ​អត់​? ហើយ​បើ​អត់​ទេ គួរតែ​រុះរើ​ចេញ​ទៅ​។ ហើយ​ចង់​ឲ្យ​ភាគី​កម្ពុជា​ទៅ​ចូលរួម​អ្វី​ទៀត នាំ​តែ​ខាត​ពេល​ទេ ព្រោះ​យើង​បាន​ធ្វើការ​ឆ្លើយ​តាមរយៈ​កំណត់​ការទូត​រួចរាល់​ហើយ​»​។

លោក​បន្តថា ក្រសួង​ការបរទេស និង​សហប្រតិបត្តិការ​អន្តរជាតិ​បាន​ធ្វើការ​ឆ្លើយតប​រួចរាល់​ហើយ ភាគី​វៀតណាម​មិនគួរ​ស្នើ​អ្វី​បន្ថែម​ពី​កម្ពុជា​ទេ​។ អាជ្ញាធរ​ខេត្ត​កណ្ដាល​គួរតែ​ទៅ​សង្កេតមើល​ស្ថានភាព​ជាក់ស្ដែង​បន្ថែម​ទៀត ថា​តើ​ភាគី​វៀតណាម​បាន​រុះរើ​តង់​ទាំងនោះ​ចេញ​ហើយ ឬ​នៅ​? ដើម្បី​ស្វែងរក​វិធានការ​បន្តទៀត​។

លោក គង់ សោភណ្ឌ អភិបាលខេត្ត​កណ្ដាល​បាន​ឲ្យ​ដឹង​កាលពី​ថ្ងៃ​អង្គារ​ដែរ​ថា លោក​មិន​ទាន់​បាន​ឃើញ​លិខិត​ជា​ផ្លូវការ​ពី​ភាគី​វៀតណាម​នៅឡើយ​ទេ ប៉ុន្ដែ​លោក​បាន​ទទួល​ដំណឹង​តាមរយៈ​សារព័ត៌មាន​ដែរ​។ កិច្ចការងារ​នេះ ត្រូវតែ​មាន​ការសម្រេច​ណាមួយ​ពី​គណៈកម្មាធិការ​កិច្ចការ​ព្រំដែន ក្រសួង​ការបរទេស និង​សហប្រតិបត្តិការ​អន្តរជាតិ និង​ក្រសួង​មហាផ្ទៃ​។

លោក​បន្តថា​៖ «​ប្រសិន​មាន​ការសម្រេច​ពី​ដែន​សមត្ថកិច្ច​ទាំងនេះ​ខ្ញុំ​នឹង​គោរព​តាម​អនុសាសន៍​របស់​ថ្នាក់ដឹកនាំ​ឲ្យ​ស្រប​តាម​ច្បាប់ ដើម្បី​ចុះ​ទៅ​ធ្វើ​កិច្ចការងារ​ទាំងនេះ​ជាមួយ​ភាគី​វៀតណាម​»​។

លោក​បញ្ជាក់ថា​៖ «​បើ​យើង​និយាយ​ពី​ការពិភាក្សា​រវាង​ប្រទេស និង​ប្រទេស​គឺ​ទាល់តែ​មាន​ការស្នើសុំ​យោបល់​ពី​គណៈកម្មាធិការ​កិច្ចការ​ព្រំដែន ក្រសួង​ការបរទេស និង​សហប្រតិបត្តិការ​អន្តរជាតិ និង​ក្រសួង​មហាផ្ទៃ​។ បន្ទាប់មក​ខ្ញុំ​យក​បទបញ្ជា​ថ្នាក់ដឹកនាំ​ទៅ​អនុវត្ត​ក្នុង​កិច្ចការងារ​ជាមួយ​វៀតណាម​តែម្ដង​»​។

លោក ផៃ ស៊ីផាន អ្នកនាំពាក្យ​រាជរដ្ឋាភិបាល​កម្ពុជា​បាន​ឲ្យ​ដឹង​ពី​ថ្ងៃ​អង្គារ​ថា ក្រសួង​ការបរទេស និង​សហប្រតិបត្តិការ​អន្តរជាតិ​បាននិង​កំពុង​ធ្វើការ​តតាំង​តាមរយៈ​កំណត់​ការទូត​ដែល​ធ្វើឲ្យ​មាន​ផលវិជ្ជមាន​ក្នុង​កិច្ចសហប្រតិបត្តិការ​រវាង​រដ្ឋាភិបាល​ទាំង​ ២ ​ក្នុង​ការដោះស្រាយ​រឿង​ព្រំដែន​ក្នុង​ន័យ​សន្ដិសហវិជ្ជមាន​ដែល​មាន​ចែង​នៅក្នុង​រដ្ឋធម្មនុញ្ញ​កម្ពុជា​។ ដោយ​អាជ្ញាធរ​វៀតណាម​បាន​ទទួលស្គាល់​ថា ត្រង់​តំបន់​នោះ​ពិតជា​មិនទាន់​បាន​ឯកភាព​គ្នា​ដោះស្រាយ​នៅឡើយ​។

លោក​បញ្ជាក់ថា​៖ «​យើង​កំពុង​ជជែក​គ្នា​ជាមួយ​ភាគី​វៀតណាម ដើម្បី​ឲ្យ​មានការ​កំណត់​ការទូត​ជាមួយ​គ្នា​។ ការដោះស្រាយ​បញ្ហា​ព្រំដែន​គឺ​មាន​តែ​គណៈកម្មាធិការ​កិច្ចការ​ព្រំដែន​ដែល​ជា​អ្នកទទួល​បាន​ដែន​សមត្ថកិច្ច​ដោះស្រាយ​បញ្ហា​ព្រំដែន​នេះ​មិន​មាន​អ្នកណា​ក្រៅពី​គណៈកម្មាធិការ​ចម្រុះ​នេះ​ទេ ទោះ​យ៉ាងណា​យើង​មិន​យក​បញ្ហា​នេះ​ទៅ​ធ្វើជា​ជម្លោះ​ប្រជាជាតិ​ទេ​គឺ​យើង​ព្យាយាម​ដោះស្រាយ​តាមរយៈ​ការជជែក​គ្នា​។ ពលរដ្ឋ​ខ្មែរ​ទាំងអស់​មិន​គួរ​មាន​គំនិត​ច្របូកច្របល់​ដូច​ការលើក​ឡើង​របស់​បុគ្គល​មួយ​ចំនួន​ទេ​»​។

លោក វូ ក្វាង មិញ (Vu Quang Minh) ឯកអគ្គរដ្ឋទូត​នៃ​សាធារណរដ្ឋ​សង្គមនិយម​វៀតណាម​ប្រចាំ​កម្ពុជា​បាន​ឲ្យ​ដឹង​កាលពី​ថ្ងៃ​អង្គារ​ថា អាជ្ញាធរ​ខេត្ត​អាន​យ៉ាង​ (An Giang) ​បាន​ដាក់​លិខិត​ទៅ​មន្ត្រី​នគរបាល​ការពារ​ព្រំដែន​កម្ពុជា​រួចរាល់​ហើយ ដើម្បី​អញ្ជើញ​អាជ្ញាធរ​ខេត្តកណ្ដាល​ចុះ​ពិនិត្យ និង​ធ្វើ​អធិការកិច្ច​នៅ​តាម​ព្រំដែន​ដែល​សង្ស័យ​ពី​ការបោះ​តង់​របស់​វៀតណាម​។

លោក​ថា ប្រសិន​បើ​អាជ្ញាធរ​ខេត្ត​កណ្ដាល​នៅ​តែ​មិន​ទាន់​ដឹង​ពី​កិច្ចសហប្រតិបត្តិការ​​កម្ពុជា-វៀតណាម ឬ​មិនទាន់​ដឹង​ទីតាំង​ភូមិសាស្ត្រ​ច្បាស់លាស់ គួរតែ​មក​ចូលរួម​ពិភាក្សា​ជាមួយ​អាជ្ញាធរ​ខេត្ត​អានយ៉ាង ដើម្បី​ដើរ​ធ្វើ​អធិការកិច្ច​ជុំវិញ​ព្រំដែន​ទាំងអស់​គ្នា​។

លោក​ថា​៖ «​ខ្លឹមសារ​សំខាន់ៗ​គឺ​យើង​បាន​ជម្រាប​ទៅ​ក្រសួង​ការបរទេស​កម្ពុជា​រួចរាល់​ហើយ ហើយ​ប្រសិន​អាជ្ញាធរ​ខេត្តកណ្ដាល​ចង់​ចូលរួម​ធ្វើ​អធិការកិច្ច​នេះ សូម​ជូនដំណឹង​ទៅ​អាជ្ញាធរ​ខេត្ត​អាន​យ៉ាង​រយៈពេល​ ៣ ​ថ្ងៃ​មុន ដើម្បី​កំណត់​ពេលវេលា​ជាក់លាក់​ចុះ​ទីតាំង​នោះ​ផ្ទាល់​ទាំងអស់​គ្នា​៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។