ភ្នំពេញៈ លោក សម រង្ស៊ី ប្រធានស្តីទីគណបក្សសង្គ្រោះជាតិដែលត្រូវតុលាការរំលាយចង់ឲ្យមានការចោទប្រកាន់លើរូបលោកពីបទក្បត់ជាតិដូចលោក កឹម សុខា ដែរ និងសុំធ្វើជាសាក្សី ក្នុងរឿងនេះ ជាអ្វីដែលអ្នកវិភាគនិងមន្ត្រីរដ្ឋាភិបាលថា គ្រាន់តែចង់បានកេរ្តិ៍ឈ្មោះឡើងវិញប៉ុណ្ណោះ។
នៅលើហ្វេសប៊ុករបស់លោក ក៏ដូចជាអ្វីដែលលោកបានផ្ញើមកកាន់ភ្នំពេញប៉ុស្តិ៍កាលម្សិលមិញ លោក សម រង្ស៊ី បានថ្លែងថា លោកត្រូវតែប្រឈមនឹងការផ្ដន្ទាទោសលើបទក្បត់ជាតិជាមួយលោក កឹម សុខា ដែរ។
លោកថា បើលោក កឹម សុខា ត្រូវចោទថា បានឃុបឃិតជាមួយបរទេសឬជាមួយអាមេរិកនោះ ខ្លួនលោកក៏គួរតែត្រូវបានចោទបែបនេះដូចគ្នា។
លោកសរសេរថា៖ «ខ្ញុំ សម រង្ស៊ី សហស្ថាបនិក និងជាអតីតប្រធានហើយបច្ចុប្បន្នជាប្រធានស្តីទីគណបក្សសង្គ្រោះជាតិ សូមស្នើសុំជាផ្លូវការឲ្យមានការចោទប្រកាន់នូវបទចោទក្បត់ជាតិដូចគ្នាជាមួយនឹងលោក កឹម សុខា ហើយប្រឈមនឹងការផ្ដន្ទាទោសជាមួយសហការីរបស់ខ្ញុំគឺលោក កឹម សុខា»។
លោក រង្ស៊ី បានលើកហេតុផលថា ការថ្លែងរបស់លោក កឹម សុខា កាលពីឆ្នាំ ២០១៣ ដែលថាសហរដ្ឋអាមេរិកបានគាំទ្រគណបក្សប្រឆាំងតាមរយៈអង្គការសង្គមស៊ីវិលនោះ គឺធ្វើឡើងក្នុងពេលដែលលោក កឹម សុខា ជាអនុប្រធានគណបក្សសង្គ្រោះជាតិហើយរូបលោកជាប្រធាន។ លោកថា ក្នុងនាមជាប្រធានគណបក្ស លោកគឺជាអ្នកទទួលខុសត្រូវខ្ពស់បំផុតក្នុងដំណើរការសម្រេចចិត្តរបស់គណបក្ស ហើយគ្រប់គ្រងរាល់សកម្មភាពសំខាន់ៗរបស់បក្ស រួមបញ្ចូលទាំងការទទួលនិងការបែងចែកជំនួយបរទេសដែលជួយគណបក្សដើម្បីបង្កើត និងអនុវត្តយុទ្ធសាស្ត្រ។
លោកបានបន្ថែមថា លោកបានជួបជាមួយវិទ្យាស្ថាន IRI និងវិទ្យាស្ថាន NDI ដែលគាំទ្រដោយអាមេរិកច្រើនជាងលោក កឹម សុខា ជាជំនួបដែលលោកថានិយាយពីការផ្ដល់ជំនួយដល់បក្សប្រឆាំងដែលមានលក្ខណៈប្រជាធិបតេយ្យរបស់កម្ពុជា។
លោកថា៖ «បើសិនជាមួយការចោទប្រកាន់ណាមួយដែលធ្ងន់ធ្ងរដូចជាបទក្បត់ជាតិទៅលើគណបក្សសង្គ្រោះជាតិឬលើ មន្ត្រីជាន់ខ្ពស់ណាមួយរបស់គណបក្សនេះ ខ្ញុំត្រូវតែជាមនុស្សទី ១ ក្នុងការស៊ើបអង្កេតហើយនឹងប្រឈមមុខការផ្ដន្ទាទោស»។
លោកបន្ថែមថា មានផ្លូវតែមួយគត់ដែលអាចរកផ្លូវចេញពីបញ្ហាបច្ចុប្បន្នគឺឈប់ទុកលោក កឹម សុខា ជាចំណាប់ខ្មាំង ដោយទម្លាក់បទចោទពីរូបលោក។
លោក សម រង្ស៊ី ក៏បានអះអាងថា លោកសុខចិត្តធ្វើជាសាក្សីករណីលោក កឹម សុខា ដោយការធ្វើសក្ខីកម្មតាមរយៈប្រព័ន្ធ Skype ពីក្រៅប្រទេស ហើយថា តុលាការមិនចាំបាច់កោះហៅលោក គង់ គាំ បំភ្លឺទេ ព្រោះគាត់មិនដឹងរឿងច្រើនទេ។
នៅពេលភ្នំពេញប៉ុស្តិ៍ទាក់ទងតាមអ៊ីមែលពីថ្ងៃម្សិលមិញដើម្បីសួរថា តើលោកនឹងចូលបំភ្លឺផ្ទាល់ជាមួយតុលាការឬទេ? លោកសម រង្ស៊ី ឆ្លើយថា៖ «ខ្ញុំនឹងលាតត្រដាងព័ត៌មានរបស់ខ្ញុំទៅកាន់តុលាការជាមុនសិន តាមរយៈប្រព័ន្ធ Skype ប្រសិនបើពួកគេយល់ព្រម»។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញមិនឆ្លើយតបនឹងសំណួររបស់ភ្នំពេញប៉ុស្តិ៍ទេកាលពីម្សិលមិញ។
ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងថា៖ «អ្វីដែលលោក សម រង្ស៊ី និយាយគឺមានគោលបំណងនយោបាយ។ គាត់ចង់លើកប្រជាប្រិយភាពរបស់គាត់ដោយចេញមកទាមទារទទួលខុសត្រូវ។
តាមពិត បើយើងប្រៀបធៀបជាមួយលោក កឹម សុខា, លោក កឹម សុខា មានប្រជាប្រិយភាពជាង ព្រោះគាត់មិនដែលរត់ចោលប្រទេសហើយហ៊ានប្រឈមមុខច្បាប់។ លោក សម រង្ស៊ី ត្រូវគេបំភ្លេចចោលហើយ...»។
ចំពោះការស្នើសុំធ្វើជាសាក្សីក្នុងករណីលោក កឹម សុខា អ្នកនាំពាក្យរូបនេះថ្លែងថា មានតែតុលាការទេ ដែលអាចកំណត់បានថាអ្នកណាជាអ្នកផ្ដើមគំនិត អ្នកសមគំនិត អ្នកប្រព្រឹត្ត ហើយអ្នកណាដែលគួរធ្វើជាសាក្សី។
លោកថា ការស្នើសុំធ្វើសាក្សីអាចធ្វើទៅបានប្រសិនបើគាត់មានចិត្តចង់ធ្វើស្មោះ ប៉ុន្តែការធ្វើតាម Skype មិនត្រូវបានច្បាប់អនុញ្ញាតឡើយ។
លោក មាស នី អ្នកវិភាគបញ្ហាសង្គមយល់ថា ករណីចោទប្រកាន់ លោក កឹម សុខា ជាករណីនយោបាយ ហើយលោក សម រង្ស៊ី នឹងមិនចូលខ្លួនមកធ្វើសាក្សីដោយផ្ទាល់ឡើយ។
លោកថ្លែងថា៖ «នៅពេលវាជារឿងនយោបាយ មានវិធីក្នុងការហៅសាក្សីមកសួរ...»។
លោក ឡៅ ម៉ុងហៃ អ្នកវិភាគនយោបាយយល់ថាប្រសិនបើលោក សម រង្ស៊ី ពិតជាមានមនសិការយល់ថា មានកំហុសមែន គាត់គួរចូលមកកម្ពុជាដើម្បីប្រឈមនឹងការចាប់ខ្លួន។
លោកថា៖ «...ខ្ញុំចង់ឲ្យគាត់ក្លាហានត្រឡប់មកប្រគល់ខ្លួនឲ្យគេចាប់រឿងក្បត់ជាតិ។ អ្នកទោសផ្សេងទៀតនៅក្នុងប្រទេសផ្សេងៗបានធ្វើដូច្នេះរួចហើយ។ លោក សម រង្ស៊ី នឹងបង្កើតប្រវត្តិសាស្ត្រនិងផ្លាស់ប្ដូរសង្គមយើងឲ្យប្រសើរជាងនេះ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា លោក សម រង្ស៊ី ចង់ភ្ជាប់ខ្លួននឹងលោក កឹម សុខា ដើម្បីឲ្យគេឃើញថា «សម រង្ស៊ី កឹម សុខា ជាមនុស្សតែមួយ» ហើយឲ្យគេឃើញថា ជាអ្នកស្នេហាជាតិឬក្បត់ជាតិជាមួយគ្នា។
លោកថា៖ «វាជាយុទ្ធសាស្ត្ររបស់គាត់គឺគាត់ចង់ឲ្យភាគីម្ខាងទៀតខឹងច្រឡោត ហើយគាត់នឹងទទួលបានប្រយោជន៍ពីស្ថានការណ៍នយោបាយ។ នេះជាអ្វីដែលលោកបានធ្វើជាច្រើនលើករួចមកហើយ»៕