The Phnom Penh Post Search

Search form




Logo of Phnom Penh Post newspaper Phnom Penh Post - លោក សម រង្ស៊ី ជំរុញ​ឲ្យ អ ស ប ចូល​រួម​ដោះស្រាយ​បញ្ហា​បោះឆ្នោត




លោក សម រង្ស៊ី ជំរុញ​ឲ្យ អ ស ប ចូល​រួម​ដោះស្រាយ​បញ្ហា​បោះឆ្នោត

លោក សម រង្ស៊ី ជំរុញ​ឲ្យ អ ស ប ចូល​រួម​ដោះស្រាយ​បញ្ហា​បោះឆ្នោត

Content image - Phnom Penh Post

ភ្នំពេញៈ លោក សម រង្ស៊ី មេ​ដឹក​នាំ​គណបក្ស​ប្រឆាំង បាន​ប្រកាស​ពេល​លោក​ចុះ​ទៅ​សហគមន៍ បឹងកក់ កាល​ពី​ម្សិលមិញ ថា គណបក្ស​របស់​លោក​នឹង​បន្ត​ជំរុញ​ឲ្យ​មាន​ការ​ចូល​រួម​ពី​សំណាក់​អង្គការ សហ​ប្រជាជាតិ ក្នុង​ការ​ពិនិត្យ​លើ​ភាព​មិន​ប្រក្រតី​នៃ​ការ​បោះឆ្នោត​កាល​ពី​ខែ​មុន ដែល​គណបក្ស​សង្គ្រោះ​ជាតិ​អះអាង​ថា ពោរ​ពេញ​ទៅ​ដោយ​ភាព​មិន​ប្រក្រតី។

បន្ទាប់​ពី​ការ​ស្វាគមន៍​យ៉ាង​ក្លៀវក្លា នៅ​ច្រក​ចូល​នៃ​មហា​វិថី​ព្រះ​មុនីវង្ស លោក សម រង្ស៊ី បាន​ដើរ​ឆ្ពោះ​ទៅ​ផ្ទះ​សកម្មជន​លោក​ស្រី ទេព វន្នី ក្នុង​ភូមិ ២២ ដោយ​មាន​មហាជន​រាប់​រយ​នាក់​ដើរ​តាម​ក្រោយ។

នៅ​ទី​នោះ លោក សម រង្ស៊ី សន្យា​ថា​នឹង​ធ្វើ​ការ​ប្រមូល​ផ្តុំ​ដើម្បី​បន្ត​ប្រយុទ្ធ​ដើម្បី​ជ័យ​ជម្នះ ហើយ​ក៏​បាន​សន្យា​ជា​ច្រើន​ទៀត​ចំពោះ​មុខ​អ្នក​គាំទ្រ។

លោក សម រង្ស៊ី បាន​ថ្លែង​ថា៖ «នៅ​រសៀល​ម៉ោង ៤ ថ្ងៃ​អង្គារ​នេះ យើង​នឹង​ជួប​ជុំ​គ្នា​នៅ​លើ​ទីលាន​ប្រជាធិបតេយ្យ មហាមិទិ្ទញ​ដ៏​ធំ​មួយ ដើម្បី​ទាមទារ​ឲ្យ​អង្គការ​សហ​ប្រជាជាតិ​ចូល​រួម​ដោះស្រាយ​បញ្ហា​បោះឆ្នោត និង​ការពារ​ជ័យជម្នះ​របស់​យើង។ សូម​បង​ប្អូន​ចូល​រួម​ទាំង​អស់​គ្នា...យើង​ឈ្នះ​ហើយ»។

បន្ទាប់​ពី​ច្រាន​ចោល លទ្ធផល​បណ្តោះអាសន្ន​នៃ​ការ​បោះឆ្នោត​ថ្ងៃ​ទី ២៨ ខែ​កក្កដា គណបក្ស​សង្គ្រោះ​ជាតិ​បាន​អំពាវនាវ​ឲ្យ​មាន​ការ​ត្រួត​ពិនិត្យ​ជា​លក្ខណៈ​អន្តរជាតិ​លើ​ភាព​មិន​ប្រក្រតី។ ទោះ​យ៉ាង​ណា គណបក្ស​សង្គ្រោះ​ជាតិ​បាន​ធ្វើ​ពហិការ​ចំពោះ​ការ​ស៊ើប​អង្កេត​កាល​ពី​ថ្ងៃ​ចុង​សប្តាហ៍ ដោយ​លើក​មូល​ហេតុ​ថា គណៈកម្មាធិការ​ជាតិ​រៀបចំ​ការ​បោះឆ្នោត ស្ទាក់​ស្ទើរ​ក្នុង​ការ​ទទួល​យក​ការ​ចូល​រួម​ពី​អ្នក​ខាង​ក្រៅ​ដូចជា​អង្គការ​សហ​ប្រជាជាតិ។

ថ្លែង​បន្ទាប់​ពី​លោក សម រង្ស៊ី ចេញ​ពី​បឹងកក់ លោក ហូ វ៉ាន់ តំណាង​រាស្រ្ត​គណបក្ស​សង្គ្រោះ​ជាតិ​បាន​ជំរុញ​អ្នក​ទាំង​ឡាយ​ដែល​មិន​ត្រូវ​បាន​អនុញ្ញាត​ឲ្យ​បោះឆ្នោត​ឲ្យ​ចូល​រួម​ក្នុង​ការ​ប្រមូល​ផ្តុំ​នោះ។ លោក​បាន​បន្ថែម​ថា៖ «កិច្ច​ប្រជុំ​នេះ​នឹង​ផ្តោត​លើ​ថា​តើ​យើង​រៀប​សន្លឹក​ឆ្នោត​ឡើង​វិញ​ដោយ របៀប​ណា និង​ថា​តើ​យើង​អាច​បោះឆ្នោត​ឡើង​វិញ​ដោយ​របៀប​ណា?»។

ក្នុង​អំឡុង​សុន្ទរកថា ដែល​ដូច​ជា​យុទ្ធនាការ​ឃោសនា​ផង និង​ជា​សុន្ទរកថា ជ័យជម្នះ​ផង​នោះ លោក​ប្រធាន​គណបក្ស​រូប​នេះ​បាន​សន្យា​ជាមួយ​អ្នក​ភូមិ​ថា លោក​នឹង​ដោះស្រាយ​វិវាទ​ដីធ្លី និង​បញ្ហា​ដទៃ​ទៀត​នៅ​ទូទាំង​ប្រទេស «ភ្លាមៗ បន្ទាប់​ពី​អង្គការ​សហ​ប្រជាជាតិ​ប្រកាស​ថា យើង​បាន​ឈ្នះ ហើយ​ខ្ញុំ​បាន​ក្លាយ​ជា​នាយក​រដ្ឋ​មន្រ្តី»។

នៅ​ពេល​នោះ លោក សម រង្ស៊ី បាន​ថ្លែង​ថា៖ «ខ្ញុំ​នឹង​ដោះស្រាយ​បញ្ហា​ទាំង​នេះ ជូន​ប្រជា​ពលរដ្ឋ​រងគ្រោះ​ទាំង​អស់​ក្នុង​តំបន់​បឹងកក់ បុរី​កីឡា និង​ជូន​បង​ប្អូន​ក្នុង​តំបន់​ដែល​មាន​ជម្លោះ​ទាំង​អស់​ទូទាំង​ប្រទេស​ដើម្បី​ទទួល​បាន​សេចក្ដី​សុខ​សាន្ត​ទាំង​អស់​គ្នា»។

130806_01
លោក សម រង្ស៊ី ប្រធានគណបក្សសង្គ្រោះជាតិ នៅពេលលោកធ្វើដំណើរទៅសំណេះសំណាលជាមួយអ្នកភូមិបឹងកក់ ក្នុងខណ្ឌដូនពេញកាលពីថ្ងៃម្សិលមិញ ម៉ៃ វីរៈ

លោក​បាន​បន្ថែម​ថា៖ «ការ​ដោះស្រាយ​គឺ​ត្រូវ​ទាមទារ​ឲ្យ​ក្រុមហ៊ុន​ផ្ដល់​សំណង​ពេញ​លេញ​តាម តម្លៃ​ទីផ្សារ​សេរី ឬ តាម​ការ​សំណើ​សមស្រប​ណា​មួយ​របស់​បង​ប្អូន​ប្រជា​ពលរដ្ឋ ព្រោះ​ការ​អភិវឌ្ឍ​គឺ​ទាមទារ​ឲ្យ​មាន​ការ​បង្កើន​ប្រាក់​ចំណូល និង​ផល​ប្រយោជន៍​ដល់​ប្រជា​ពលរដ្ឋ។ យើង​នឹង​ធ្វើ​ការ​ស៊ើប​អង្កេត​ឲ្យ​បាន​ច្បាស់​លាស់ ថា តើ​នរណា​ជា​អ្នក​ផ្ដើម​គំនិត​ឲ្យ​មាន​ការ​លុប​បឹងកក់ ដែល​ជា​បឹង​ធម្មជាតិ ហើយ​យើង​នឹង​ចាប់​ជន​នោះ​យក​ទៅ​ដាក់​គុក»។

លោក​ថ្លែង​បន្ត​ថា ៖ «យើង​នឹង​ទាមទារ​ឲ្យ​មាន​ការ​ដោះលែង អ្នក​ស្រី យ៉ោម បុប្ផា។ ពិត​ជា​អយុត្តិធម៌​ណាស់​បង​ប្អូន​យក​ដី​គេ​ហើយ យក​ដំបង​ឆក់ មក​ឆក់ និង​វាយ​ដំ ព្រម​ទាំង​ប្រើ​ឡាន​ទឹក​បាញ់​ទៅ​លើ​គេ​ទៀត ហើយ​ថែម​ទាំង​ចាប់​គេ​ដាក់​គុក​ទៀត»។

លោក សម រង្ស៊ី មិន​មែន​ជា​មនុស្ស​តែ​ម្នាក់​ដែល​គេ​ចោមរោម​ពេល​ទៅ​ដល់​នោះ​ទេ។ អ្នក​ភូមិ​គ្រប់​វ័យ​បាន​រត់​ទៅ​ថត​រូប​ជាមួយ​នឹង​លោក​ស្រី មូរ សុខហូរ តំណាង​រាស្រ្ត និង​ព្រះ​អង្គម្ចាស់ ស៊ីសុវត្ថិ ធម្មិកោ បេក្ខជន​តំណាង​រាស្រ្ត​ក្នុង​ខេត្ត ព្រះ​សីហនុ។

លោក​ស្រី មូរ សុខហួរ បាន​ថ្លែង​ថា ស្ថានការណ៍​នៅ​បឹងកក់​ជា​វិវាទ​ដីធ្លី​មួយ​ដែល​ចាំ​បាច់​ត្រូវ​ដោះស្រាយ​ជា​បន្ទាន់។

លោក​ស្រី បាន​និយាយ​ថា៖ «ការ​វាយ​តម្លៃ​ឡើង​វិញ​លើ​សម្បទាន មិន​ត្រឹម​តែ​នៅ​ភ្នំពេញ​ទេ​គឺ​នៅ​គ្រប់​ទីកន្លែង​វា​ងាយ​ស្រួល​ធ្វើ។ បឹង​បាន​បំពេញ​រួច​ហើយ ... ប៉ុន្តែ អ្នក​មាន និង​អ្នក​ក្រ​ត្រូវ​រស់​នៅ​ទាំង​អស់​គ្នា ក្នុង​ទីក្រុង​តែ​មួយ»។

វិវាទ​ដីធ្លី​ជា​ច្រើន​នៅ​ទូទាំង​ព្រះ​រាជាណាចក្រ​កម្ពុជា រាប់​ទាំង​នៅ​បឹង​កក់ គឺ​ពាក់​ព័ន្ធ​នឹង​ក្រុមហ៊ុន​ដែល​មាន​ចំណង​ជាមួយ​នឹង​គណបក្ស​ប្រជាជន​កម្ពុជា​ដែល​កាន់​អំណាច។

យោង​តាម​អង្គការ​ក្រៅ​រដ្ឋាភិបាល​បាន​ឲ្យ​ដឹង​ថា កត្តា​ដែល​ធ្វើ​ឲ្យ​លោក សម រង្ស៊ី មាន​ប្រជាប្រិយ​ភាព គឺ​ការ​សន្យា​របស់​គណបក្ស​សង្គ្រោះ​ជាតិ​មុន​ការ​បោះឆ្នោត ដែល​ថា​នឹង​បញ្ចប់​វិវាទ​ដីធ្លី ដែល​បាន​បណ្តេញ​មនុស្ស​ជាង ១០ ភាគរយ ក្នុង​រាជធានី​ភ្នំពេញ ចាប់​តាំង​ពី​ឆ្នាំ ២០០០ មក។

ជា​ការ​សម្តែង​ការ​គាំទ្រ​ដល់​លោក សម រង្ស៊ី កាល​ពី​ម្សិលមិញ គឺ​លោក​ស្រី ផាន់ ឈុនរ៉េត ស្រ្តី​ម្នាក់​ក្នុង​ចំណោម​ស្រ្តី​បឹងកក់ ១៣ នាក់ ដែល​ជាប់​ពន្ធនាគារ​កាល​ពី​ឆ្នាំ​មុន​បាន​ថ្លែង​ថា៖ «ខ្ញុំ​សង្ឃឹម​ថា ពេល​លោក សម រង្ស៊ី ក្លាយ​ជា​នាយក​រដ្ឋ​មន្រ្តី ខ្ញុំ​នឹង​បាន​កម្មសិទិ្ធ​ដីធ្លី ហើយ​រស់​នៅ​ក្នុង​តំបន់​បឹងកក់ ដោយ​សន្តិភាព»។

ទោះ​ជា​បែប​ណា​ក្ដី រហូត​មក​ទល់ ពេល​នេះ​គណៈកម្មាធិការ ជាតិ​រៀបចំ​ការ​បោះឆ្នោត នៅ​មិន​ទាន់​បាន​ប្រកាស​នូវ​អាសនៈ​ជា បណ្ដោះ​អាសន្ន​ណា​មួយ​នៅ​ឡើយ​ទេ ខណៈ​ដែល​គណបក្ស​ធំៗ​ទាំង​ពីរ គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ អះអាង​ថា ឈ្នះ​រៀងៗ​ខ្លួន។

យោង​តាម​តារាង​លទ្ធផល​បឋម​នៃ​ការ​បោះឆ្នោត​ជ្រើស​តាំង តំណាងរាស្ត្រ​នីតិកាល​ទី៥ ឆ្នាំ​២០១៣ របស់​គ.ជ.ប បង្ហាញ​ថា ក្នុង​ចំណោម​អ្នក​បោះឆ្នោត​សរុប ដែល​មាន​ឈ្មោះ​ក្នុង​បញ្ជី​បោះឆ្នោត​ចំនួន ៩.៦៧៥.៤៥៣ នាក់ គឺ​មាន​អ្នក​បោះឆ្នោត​ឲ្យ​គណបក្ស​នយោបាយ​ប្រកួត​ប្រជែង​ទាំង ៨ សរុប ៦.៦១៦.១១០ នាក់ ក្នុង​នោះ គណបក្ស​ប្រជាជន​កម្ពុជា ទទួល​ការ​គាំទ្រ​លើ​គេ​បាន ចំនួន ៣.២២៧.៧២៩ សំឡេង​បន្ទាប់​គ្នា​គឺ​គណបក្ស​សង្គ្រោះ​ជាតិ​ទទួល​បាន ២.៩៤១.១៣៣ សំឡេង៕ TK

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។