ភ្នំពេញៈ តុលាការនឹងបើកសវនាការជម្រះក្ដីលើលោក សម រង្ស៊ី មេដឹកនាំអតីតគណបក្សប្រឆាំង ក្រោយចូលឆ្នាំថ្មី ករណីញុះញង់កុំឲ្យយោធិនស្ដាប់បង្គាប់លោកនាយករដ្ឋមន្ត្រីហ៊ុន សែន និងធ្វើឲ្យខូចទឹកចិត្តកងទ័ព។
លោកប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាកោះហៅលោកសម រង្ស៊ី ឲ្យចូលរួមសវនាការនៅសាលាដំបូងរាជធានីភ្នំពេញនៅថ្ងៃទី ២២ ខែមេសាខាងមុខ ពាក់ព័ន្ធនឹងបទចោទ «ញុះញង់កុំឲ្យយោធិនស្ដាប់បង្គាប់ និងធ្វើឲ្យខូចទឹកចិត្តកងទ័ព»។ នេះបើយោងតាមដីកាកោះហៅចុះថ្ងៃទី ១៤ មីនា ដែលភ្នំពេញប៉ុស្តិ៍ទទួលបានពីថ្ងៃព្រហស្បតិ៍ម្សិលមិញ។
លោកសម រង្ស៊ី ត្រូវបានចោទប្រកាន់ក្នុងបទទាំង ២ នេះតាមមាត្រា ៤៧១ និង៤៧២ នៃក្រមព្រហ្មទណ្ឌចំពោះការអំពាវនាវកុំឲ្យយោធិនស្ដាប់បង្គាប់ប្រព្រឹត្តកាលពីថ្ងៃទី ៩ ធ្នូ ឆ្នាំ ២០១៧។
លោកថ្លែងនៅពេលនោះថា៖ «សូមកងកម្លាំងប្រដាប់អាវុធ ពលទាហាន និងនគរបាលកុំធ្វើតាមបញ្ជាពីមេដឹកនាំផ្តាច់ការ បើគេបញ្ជាឲ្យបាញ់ប្រហារ និងសម្លាប់ប្រជាពលរដ្ឋស្លូតត្រង់»។
តាមមាត្រាទាំង ២ នេះ លោកប្រឈមនឹងការផ្តន្ទាទោសដាក់ពន្ធនាគារចន្លោះពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី៤លានរៀល ទៅ ១០ លានរៀល។
យោងតាមដីកាកោះ សវនាការជំនុំជម្រះក្តីនោះនឹងត្រូវធ្វើឡើងដោយមានលោករស់ ពិសិដ្ឋ ជាចៅក្រមជំនុំជម្រះ និងលោកប្លង់ សុផល ជាតំណាងអយ្យការ។
ដីកាកោះបានរៀបរាប់សិទ្ធិទាំង ៥ របស់ជនជាប់ចោទដែលរួមមានសិទ្ធិទទួលដឹងឮនិងដីកាកោះឲ្យចូលខ្លួន សិទ្ធិបង្ហាញភ័ស្តុតាងសំអាង សាក្សី ឬធ្វើសំណូមពរផ្សេងៗ សិទ្ធិប្ដឹងបដិសេធចៅក្រមជំនុំជម្រះ សិទ្ធិការពារខ្លួនដោយខ្លួនឯង ឬសុំមេធាវីជួយការពារ ឬពឹងអ្នកដទៃណាមួយជួយការពារខ្លួន និងសិទ្ធិនិយាយសម្តី ចុងក្រោយបង្អស់។
លោក វង្ស ភក្តី មេធាវីតំណាងកងយោធពលខេមរភូមិន្ទបានថ្លែងយ៉ាងខ្លីកាលពីម្សិលមិញថា លោកបានទទួលដីកាកោះឲ្យចូលរួមសវនាការនៅថ្ងៃទី ២២ ខែមេសា រួចហើយ។
ចំណែកលោក សំ សុគង់ មេធាវីការពារលោក សម រង្ស៊ី បានថ្លែងថាលោកមិនទាន់ទទួលបានដីកាទេគិតត្រឹមថ្ងៃព្រហស្បតិ៍ម្សិលមិញ ដូច្នេះលោកមិនអាចអត្ថាធិប្បាយបានទេ៕