.jpg)
លោក សម រង្ស៊ី ប្រធានស្តីទី អតីតគណបក្សសង្គ្រោះជាតិ។ ហុង មិនា
ភ្នំពេញៈ សាលាដំបូងរាជធានីភ្នំពេញកោះហៅលោក សម រង្ស៊ី ប្រធានស្តីទីអតីតបក្សសង្គ្រោះជាតិឱ្យចូលបំភ្លឺនៅព្រឹកថ្ងៃទី ២៦ ខែកញ្ញានេះលើបទបរិហារកេរ្តិ៍ជាសាធារណៈ និងបទញុះញង់ឱ្យប្រព្រឹត្ត បទឧក្រិដ្ឋជាអាទិ៍ដែលប្តឹងដោយលោកនាយករដ្ឋមន្ត្រី ហ៊ុន សែន។
ការកោះហៅនេះកើតឡើងខណៈលោក សម រង្ស៊ី ដែលកំពុងនិរទេសបាននិងកំពុងអំពាវនាវទៅកងកម្លាំង និងពលរដ្ឋឲ្យចូលរួមគាំទ្រដំណើរវិលត្រឡប់ចូលកម្ពុជាវិញនៅថ្ងៃទី ៩ វិច្ឆិកា ឆ្នាំ ២០១៩ នូវអ្វីដែលលោកហៅថាដើម្បីប្តូរមេដឹកនាំបច្ចុប្បន្នគឺលោក ហ៊ុន សែន សង្គ្រោះប្រជាធិបតេយ្យ។ ជាមួយគ្នានេះលោក សម រង្ស៊ី អះអាងថាគណបក្សសង្គ្រោះជាតិក៏បានត្រៀមថវិកាទុកឱ្យកងទ័ពដែលផ្តាច់ខ្លួនចាំជួយការពារពលរដ្ឋខ្មែរមកទទួលលោក នៅពេលដែលលោកវិលត្រឡប់ចូលកម្ពុជា។
ដីកាកោះថ្ងៃទី ១៨ កញ្ញា ដែលទើបផ្សព្វផ្សាយម្សិលមិញបញ្ជាក់ថា៖ «យើង កែវ សុធា តំណាងអយ្យការអមសាលាដំបូងរាជធានីភ្នំពេញអញ្ជើញឈ្មោះ សម រង្ស៊ី ឱ្យចូលទៅកាន់អយ្យការអមសាលាដំបូងរាជធានីភ្នំពេញនៅថ្ងៃទី ២៦ ខែកញ្ញា ឆ្នាំ ២០១៩ ឆ្លើយបំភ្លឺពីដំណើររឿងបរិហារកេរ្តិ៍ជាសាធារណៈ និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍។ សាមីខ្លួនត្រូវអញ្ជើញតាមលិខិតនេះឲ្យបានទាន់ពេលវេលា និងយកលិខិតផ្សេងៗដែលទាក់ទងរឿងខាងលើមកជាមួយផងប្រសិនបើមាន»។
បើតាមពាក្យបណ្តឹងឱ្យដឹងថាកាលពីយប់ថ្ងៃទី ១២ កញ្ញា លោក សម រង្ស៊ី បានធ្វើកិច្ចសម្ភាសន៍ក្នុងវេទិកាវិទ្យុអាស៊ីសេរី និងបានធ្វើការផ្សព្វផ្សាយជាសាធារណៈលើ Facebook ថា៖ «អ្នកនៅលើទឹកដីប្រទេសកម្ពុជាជាចំណាប់ខ្លាំងរបស់ ហ៊ុន សែន សូម្បីព្រះមហាក្សត្ររបស់យើងក៏ជាចំណាប់ខ្មាំងរបស់ ហ៊ុន សែន។ ដូចនេះលោកអត់ហ៊ានធ្វើអីលោកខ្លាច ហ៊ុន សែន លោកចង់តែរក្សារាជបល្ល័ង្ក។ ដូច្នេះយើងទុកព្រះអង្គមួយអន្លើយើង មិនអាចរំពឹងព្រះមហាក្សត្រដែលជាអាយ៉ងរបស់ ហ៊ុន សែន ដូចសព្វថ្ងៃនេះទេ»៕
