.jpg)
លោក សម រង្ស៊ី ក្នុងអង្គប្រជុំមួយថ្ងៃទី ២៤ នៅអាល្លឺម៉ង់។ រូប ហ្វេសប៊ុក
ភ្នំពេញៈ អតីតមេដឹកនាំបក្សប្រឆាំងអះអាងថាក្នុងនាមក្រុមខ្លួនជាអ្នកប្រជាធិបតេយ្យនឹងទៅចរចាជាមួយសហរដ្ឋអាមេរិក ដើម្បីសុំឲ្យប្រទេសមហាអំណាចមួយនេះផ្តល់មកឲ្យប្រជារាស្ត្រខ្មែរនូវលុយដ៏ច្រើនសន្ធឹកសន្ធាប់ពាក់ព័ន្ធនឹងភាពមិនប្រក្រតីដែលត្រូវបានបង្កក ឬរឹបអូសពីមន្ត្រីជាន់ខ្ពស់នៃរដ្ឋាភិបាលលោកនាយករដ្ឋមន្ត្រី ហ៊ុន សែន ប៉ុន្តែមន្ត្រីបក្សកាន់អំណាចបន្ទរថា សុំឲ្យរឹបអូសយកមកសងរាស្ត្រវិញចុះខ្លួនសាទរវិធានការនេះ។
ថ្លែងក្នុងកិច្ចសម្ភាសន៍ជាមួយវិទ្យុអាស៊ីសេរីពីម្សិលមិញ អតីតប្រធាននៃអតីតគណបក្សសង្គ្រោះជាតិដែលជាបក្សប្រឆាំងដ៏ធំលោក សម រង្ស៊ី បច្ចុប្បន្នជាប្រធានចលនាសង្គ្រោះជាតិកំពុងនិរទេសខ្លួនបានប្រៀបធៀបមេដឹកនាំ ឬមន្ត្រីជាន់ខ្ពស់រដ្ឋាភិបាលលោកនាយករដ្ឋមន្ត្រី ហ៊ុន សែន ទៅនឹងមេដឹកនាំប្រទេសហ្វីលីពីនឈ្មោះ ម៉ា កូស ដែលមានលុយរាប់លានដុល្លារអាមេរិកពាក់ព័ន្ធនឹងអំពើពុករលួយហើយយកទៅលាក់ទុកនៅធនាគារនៃសហរដ្ឋអាមេរិក ស្វ៊ីស និងប្រទេសនៅអឺរ៉ុប។
លោក រង្ស៊ី ថា ក្រោយមកលុយរបស់អតីតមេដឹកនាំប្រទេសហ្វីលីពីនរូបនោះត្រូវបានគេបង្កក និងរឹបអូសហើយបន្ទាប់មកក្រុមអ្នកប្រជាធិបតេយ្យនៃប្រទេសហ្វីលីពីនបានទៅចរចាជាមួយប្រទេសទាំងនោះដើម្បីសុំឲ្យបញ្ជូនលុយទាំងអស់នោះមកសងពលរដ្ឋហ្វីលីពីន ឬអភិវឌ្ឍប្រទេស។
ដោយឡែកសម្រាប់មន្ត្រីជាន់ខ្ពស់រដ្ឋាភិបាលលោក ហ៊ុន សែន វិញលោក សម រង្ស៊ី ថា អាមេរិកនឹងបង្កក ឬរឹបអូសលុយរាប់លានដុល្លារអាមេរិករបស់មន្ត្រីជាន់ខ្ពស់រដ្ឋាភិបាលជាបន្តទៀតក្រោយពីពួកគេត្រូវបានដាក់ក្នុងបញ្ជីខ្មៅរបស់សហរដ្ឋអាមេរិកហើយនោះ ហើយថាក្រុមលោកជាអ្នកប្រជាធិបតេយ្យនឹងធ្វើតាមរបៀបប្រទេសហ្វីលីពីនដែរដើម្បីយកលុយមកសងប្រជារាស្ត្រវិញ។
លោក រង្ស៊ី បញ្ជាក់ថា៖ «យើងក៏មានបំណងអ៊ីចឹងដែរ ដើម្បីកុំឲ្យលោក ហ៊ុន សែន និងបក្ខពួកគាត់នឹកស្មានថាបានយកលុយទៅលាក់នៅកន្លែងណាគេរកមិនឃើញ។ សម័យនេះមិនអាចលាក់អីបានយូរទេយើងនឹងទៅរកឲ្យទាល់តែឃើញហើយយកមកសងប្រជារាស្ត្រខ្មែរវិញ សងដីធ្លី សងអ្វីៗដែលប្រជារាស្ត្រខ្មែរបាត់បង់។
លោកបន្តថាឥឡូវនេះរាស្ត្រខ្មែរក្រជំពាក់ធនាគារវ័ណ្ឌក។ អ៊ីចឹងហើយបានក្រុមអ្នកប្រជាធិបតេយ្យយកលុយនោះមកសងវិញយ៉ាងហោចណាស់ក៏សងបំណុលជំនួសរាស្ត្រខ្មែរដែលជំពាក់លុយធនាគារដោយសារអំពើពុករលួយរបស់លោក ហ៊ុន សែន។
សម្រាប់មន្ត្រីជាន់ខ្ពស់ដែលលោកថាពួកគេចង់ទៅអាមេរិកដោយសារពួកគេមានសាច់ញាតិ ឬកូនចៅរបស់ពួកគេរស់នៅសហរដ្ឋអាមេរិក និងមានលុយផ្ញើនៅធនាគារទីនោះលោក រង្ស៊ី អះអាងថា៖ «បន្ទាប់ពីសហរដ្ឋអាមេរិកដាក់ពួកមន្ត្រីជាន់ខ្ពស់របស់គណបក្សប្រជាជនលើបញ្ជីខ្មៅរបស់គេ គឺគេអត់ឲ្យទៅជាន់ដីគេទៀតទេ ហើយគេឈានទៅរឹបអូសទ្រព្យសម្បត្តិចាប់ផ្តើមបង្កកទ្រព្យសម្បតិ្ត។ មិនអាចយកលុយតម្កល់ទុកនៅសហរដ្ឋអាមេរិកទៅប្រើប្រាស់បានតាមចិត្តទេ ពីព្រោះគេដឹងថាលុយនេះជាលុយមកពីអំពើពុករលួយ»។
លោកបញ្ជាក់ថា៖ «គណបក្សសង្គ្រោះជាតិ ហើយខ្ញុំ សម រង្ស៊ី នឹងជំរុញឲ្យគេប្រមូលលុយទាំងអស់នោះមកសងប្រជារាស្ត្រខ្មែរវិញ ពីព្រោះលុយនេះញើសឈាមប្រជារាស្ត្រខ្មែរ»។
ទោះជាយ៉ាងណាអ្នកនាំពាក្យគណបក្សប្រជាជនកម្ពុជាដែលជាបក្សកាន់អំណាច លោក សុខ ឥសាន ថ្លែងថាព័ត៌មានទាក់ទងនឹងការបង្កកទ្រព្យសម្បត្តិរបស់មន្ត្រីជាន់ខ្ពស់រដ្ឋាភិបាលនេះគឺគ្រាន់តែសូរសំឡេងមួយ ដែលកើតឡើងនៅពេលការបោះឆ្នោតខិតជិតមកដល់តែប៉ុណ្ណោះ ហើយថាក្រុមមន្ត្រីជាន់ខ្ពស់មិនមានលុយដល់ថ្នាក់រាប់លានតម្កល់ទុកនៅក្រៅប្រទេសនោះទេ។
លោក ឥសាន ថ្លែងថា៖ «យើងអត់មានគាំទ្រអំពើពុករលួយទេ អ៊ីចឹងលុយណាដែលបានពីអំពើពុករលួយ ហើយរកឃើញមានភ័ស្តុតាងច្បាស់លាស់ គេរឹបអូសយកមកចែកប្រជាជនយកមកដើម្បីទ្រទ្រង់សេដ្ឋកិច្ចជាតិ អាហ្នឹងយើងស្វាគមន៍ក៏ប៉ុន្តែខ្ញុំជឿជាក់ថាវាអត់មាន។ ដូច្នេះអាការរឹបអូសហ្នឹងវាអត់មានការរឹបអូសទេ ពីព្រោះវាអត់មានអីរឹបអូស»។
ពាក់ព័ន្ធនឹងការបង្កកទ្រព្យសម្បត្តិ និងដាក់ឈ្មោះមន្ត្រីជាន់ខ្ពស់ទៅក្នុងបញ្ជីខ្មៅអាមេរិកនោះលោក ឥសាន សង្កត់ធ្ងន់ថា៖ «ខ្ញុំយល់ថា វាជាឧបាយកលទុច្ចរិតរបស់មជ្ឈដ្ឋានប្រឆាំងទាំងក្នុង និងក្រៅប្រទេសនៅពេលដែលកាលបរិច្ឆេទនៃការបោះឆ្នោតកាន់តែឈានជិតចូលមកដល់។ ចាំមើលចាប់ពីថ្ងៃហ្នឹងទៅរហូតដល់ឆ្នាំណាបានគេរឹបអូសយកទ្រព្យសម្បត្តិ និងលុយកាក់ហ្នឹងបាន អាហ្នឹងយើងអបអរសាទរទាំងអស់គ្នា»។
អ្នកវិភាគនយោបាយ និងស្រាវជ្រាវកិច្ចការសង្គមលោក មាស នី មិនធ្វើអត្ថាធិប្បាយទៅលើវោហារស័ព្ទរបស់លោក សម រង្ស៊ី ទេដោយនិយាយថាជារឿងរសើប ប៉ុន្តែលោកថាប្រទេសដទៃដែលទ្រព្យសម្បត្តិរបស់មន្ត្រីថ្នាក់ដឹកនាំនៃប្រទេសនោះត្រូវបានគេបង្កក ឬរឹបអូស ដោយសារពាក់ព័ន្ធនឹងអំពើពុករលួយគឺរដ្ឋាភិបាលថ្មីនៃប្រទេសណាមួយនោះអាចទៅសុំយកលុយ ឬទ្រព្យសម្បត្តិដែលរឹបអូសទាំងអស់មកអភិវឌ្ឍប្រទេសរបស់គេបាន។
លោក មាស នី ថ្លែងថា៖ «ក៏ប៉ុនែ្តនៅក្នុងប្រទេសដទៃទៀតកាលណាមានការបង្កកទ្រព្យសម្បត្តិអ៊ីចឹងហើយគឺបានន័យថា ទ្រព្យសម្បត្តិហ្នឹងថ្ងៃក្រោយប្រទេសហ្នឹងអាចសុំគេដើម្បីយកមកអភិវឌ្ឍប្រទេសរបស់ខ្លួនបាន។ នេះវាជាទម្លាប់ធម្មតានៃការបង្កកទ្រព្យសម្បត្តិ គេមិនបង្កកយកទៅណាទេ»៕
