ភ្នំពេញៈ អតីតមេដឹកនាំនៃអតីតគណបក្សសង្គ្រោះជាតិលោក សម រង្ស៊ី ចាត់ទុកស្ថានភាពនយោបាយក្នុងឆ្នាំបោះឆ្នោតជាតិនេះ គឺល្អខ្លាំងណាស់សម្រាប់ប្រជាពលរដ្ឋខ្មែរជាអ្វីដែលលោកអះអាងថាលោកនាយករដ្ឋមន្ត្រី ហ៊ុន សែន កំពុងលេងល្បែងនយោបាយភ្លាត់ស្នៀតក្រោយពីបក្សប្រឆាំងដ៏ធំរបស់លោកត្រូវបានរំលាយ ប៉ុន្តែមន្ត្រីជាន់ខ្ពស់រដ្ឋាភិបាលថា ស្ថានភាពពិតជាល្អមែនហើយគឺល្អសម្រាប់គណបក្សកាន់អំណាច។
នៅលើហ្វេសប៊ុករបស់លោកពីម្សិលមិញក្រោយសម្ភាសជាមួយវិទ្យុអាស៊ីសេរី លោក សម រង្ស៊ី ដែលក៏ជាប្រធានចលនាសង្គ្រោះជាតិកំពុងនិរទេសខ្លួននៅក្រៅប្រទេសថ្លែងថា នេះជាលើកទី ១ ហើយដែលលោកឃើញស្ថានភាពនយោបាយនៅកម្ពុជាល្អបែបនេះ ក្រោយពីលោកធ្វើនយោបាយ ២៥ ឆ្នាំកន្លងមកហើយថាលោកនាយករដ្ឋមន្ត្រី ហ៊ុន សែន បានភ្លាត់ស្នៀតធ្ងន់ធ្ងរណាស់ក្រោយពីបានរំលាយគណបក្សសង្គ្រោះជាតិ។ លោក សម រង្ស៊ី ហាក់ដូចជា មានជំនឿទៅលើជ័យជម្នះពីការបោះឆ្នោតថ្ងៃទី ២៩ ខែកក្កដា ទោះបីជាបក្សប្រឆាំងដ៏ធំនេះមិនមានឈ្មោះក្នុងបញ្ជីបោះឆ្នោតត្រូវចូលរួមប្រកួតប្រជែងនឹងគេក៏ដោយ។
លោក សម រង្ស៊ី ថ្លែងថា៖ «ខ្ញុំមិនដែលឃើញស្ថានការណ៍ណាដែលអំណោយផលសម្រាប់ប្រជារាស្ត្រខ្មែរជាងឆ្នាំ ២០១៨ នេះទេ។ ពីព្រោះជនផ្តាច់ការបានភ្លាត់ស្នៀតយ៉ាងទម្ងន់ដោយរំលាយគណបក្សសង្គ្រោះជាតិ រំលាយគណបក្សសង្គ្រោះជាតិគឺរំលាយឆន្ទៈខ្មែរជាងពាក់កណ្តាលនគរ គឺរំលាយ និងសម្លាប់ប្រជាធិបតេយ្យតែម្តងនៅប្រទេសកម្ពុជា»។
ការដែលលោកអះអាងថាស្ថានការណ៍អំណោយផលគឺលោកសំដៅទៅលើប្រជាពលរដ្ឋកុំទៅបោះឆ្នោតថ្ងៃទី ២៩ ខែកក្កដាជាជ័យជម្នះនឹងទទួលបានយ៉ាងងាយស្រួល។
លោកបន្ថែមថាពិភពលោកនឹងមិនទទួលស្គាល់ទេ នូវទង្វើបែបនេះហើយអង្គការសហប្រជាជាតិក៏មិនទទួលស្គាល់ការបោះឆ្នោតនៅពេលមិនមានគណបក្សសង្គ្រោះជាតិដែលជាគូប្រជែងនយោបាយតែមួយគត់ទល់នឹងគណបក្សប្រជាជនកម្ពុជារបស់លោក ហ៊ុន សែន ចូលរួមប្រកួតក្នុងការបោះឆ្នោតនេះ។
លោកអះអាងថា នៅពេលមិនមានការទទួលស្គាល់ពីអន្តរជាតិនោះគឺរដ្ឋាភិបាលរបស់លោក ហ៊ុន សែន ក៏មិនមានភាពស្របច្បាប់ផងដែរ ពេលនោះហើយរដ្ឋាភិបាលមិនអាចដំណើរការបានឡើយ។
លោកថ្លែងថា៖ «ចាំតែមើលទៅក្រោយថ្ងៃ ២៩ ខែកក្កដា ក្រោយថ្ងៃបោះឆ្នោតលេងសើចហ្នឹង គ្មានអ្នកណាទទួលស្គាល់ ហ៊ុន សែន នឹងបាត់បង់ភាពស្របច្បាប់។ គាត់មិនអាចដឹកនាំប្រទេសជិះសេះលែងដៃដូចសព្វថ្ងៃបានទៀតទេ»។
លោក សម រង្ស៊ី បញ្ជាក់ថា៖ «ជាសំណាងដ៏ល្អជាទីបំផុតដែលយើងអាចរើបម្រះពីអំណាចផ្តាច់ការដែលយើងអាចនាំមកនូវ ការផ្លាស់ប្តូរជាវិជ្ជមានដោយសន្តិវិធី ដែលយើងចង់បានយូរហើយ។ យើងនឹងសម្រេចបានថ្ងៃ ២៩ កក្កដាខាងមុខនេះគ្រាន់តែកុំទៅបោះឆ្នោត វាមានអីពិបាកកុំទៅបោះឆ្នោត។ កាលយើងទៅធ្វើបាតុកម្មគេដេញវាយ ដេញចាប់ ដេញបាញ់ ពិបាកស្ទើរស្លាប់ស្ទើររស់យើងហ៊ានទៅ តែឥឡូវសុំឲ្យនៅផ្ទះប៉ុណ្ណឹងមានពិបាកអី ហើយយើងនឹងទទួលបានជ័យជម្នះដ៏ស្រួល»។
ប៉ុន្តែមន្ត្រីអ្នកនាំពាក្យក្រសួងមហាផ្ទៃលោក ខៀវ សុភ័គ បានចំអកទៅលើសម្ដីលោក សម រង្ស៊ី ហើយថាលោក រង្ស៊ី និយាយត្រូវក្នុងស្ថានភាពបែបនេះ ប៉ុន្តែថាការនិយាយត្រូវនេះគឺត្រូវស្ថានការណ៍សម្រាប់គណបក្សប្រជាជនកម្ពុជា និងលោកនាយករដ្ឋមន្ត្រី ហ៊ុន សែន ទៅវិញទេ។
លោក សុភ័គ ថ្លែងថា៖ «គាត់ថាត្រូវមានខុសអី។ ល្អមែនសម្រាប់គណបក្សប្រជាជនថ្ងៃ ២៩ កក្កដាបោះឆ្នោត។ ២ ខែយ៉ាងយូរ រាជរដ្ឋាភិបាលថ្មីនឹងកើតឡើង ហើយពូជាអ្នកអះអាងថាគ្មានមុខ សម រង្ស៊ី ទេ គ្មានមុខ ១១៨ នាក់ (មន្ត្រីជាន់ខ្ពស់របស់អតីតបក្សប្រឆាំងដែលត្រូវហាមធ្វើនយោបាយ) ក្នុងរដ្ឋសភាទេ»។
លោកបញ្ជាក់ថាទោះបីអន្តរជាតិទទួល ឬមិនទទួលស្គាល់រដ្ឋាភិបាលថ្មីរបស់លោកនាយករដ្ឋមន្ត្រី ហ៊ុន សែន ក៏ដោយគឺមិនសំខាន់ទេ ព្រោះនេះជាស្រុកខ្មែរមិនមែនអន្តរជាតិទេ ហើយថាលោក សម រង្ស៊ី មិនមានតម្លៃអ្វីទៀតទេ សូម្បីអាមេរិកាំងក៏មិនគាំទ្រលោក សម រង្ស៊ី ទៀតដែរ។
លោក ហង្ស វិទូ ប្រធានក្រុមអ្នកវិភាគវ័យក្មេងថ្លែងថាគណបក្សសង្គ្រោះជាតិ មានផ្លូវមួយគឺរង់ចាំលទ្ធផលក្រោយការបោះឆ្នោតថាតើមានអ្នកទៅបោះឆ្នោតប៉ុន្មាននាក់ហើយរដ្ឋាភិបាលថ្មីនោះមានការទទួលស្គាល់ពីអន្តរជាតិឬអត់ ហើយថាគណបក្សប្រជាជនកម្ពុជាក៏មានការព្រួយបារម្ភអំពីលទ្ធផលក្រោយការបោះឆ្នោតនោះដែរ។
លោក វិទូ បញ្ជាក់ថា៖ «គណបក្សប្រជាជនកម្ពុជាប្រហែលមានឧបសគ្គមានវិញ្ញាសាជាច្រើនដែលត្រូវដោះស្រាយឈឺក្បាលមែនទែនក្រោយបោះឆ្នោត។ វិញ្ញាសាមានច្រើន ប៉ុន្តែវិញ្ញាសាដែលគណបក្សប្រជាជនកម្ពុជាត្រូវដោះស្រាយមាន ៣ ទី ១ ថាតើគណបក្សប្រជាជនកម្ពុជាធ្វើយ៉ាងម៉េចដើម្បីសម្របសម្រួលអ្នកជាងពាក់កណ្តាលប្រទេសដែលអត់ទៅបោះឆ្នោត។ ទី ២ គាត់ត្រូវដោះស្រាយចំពោះអន្តរជាតិនៅពេលដែលសហគមន៍អន្តរជាតិគេមិនទទួលស្គាល់នូវលទ្ធផលនៃការបោះឆ្នោត តើគណបក្សប្រជាជនកម្ពុជាត្រូវដោះស្រាយបែបម៉េច? ទី ៣ តើគណបក្សប្រជាជនកម្ពុជានឹងដោះស្រាយយ៉ាងម៉េចចំពោះការបែកបាក់ជាតិ?»៕