The Phnom Penh Post Search

Search form




Logo of Phnom Penh Post newspaper Phnom Penh Post - លោក​ សម រង្ស៊ី ថា លោក ហ៊ុន សែន ​ប្តឹង​លោក​កាន់​តែ​ច្រើន​កាន់តែ​ល្អ




លោក​ សម រង្ស៊ី ថា លោក ហ៊ុន សែន ​ប្តឹង​លោក​កាន់​តែ​ច្រើន​កាន់តែ​ល្អ

Content image - Phnom Penh Post
លោក សម រង្ស៊ី មេដឹកនាំ​គណបក្ស​ប្រឆាំង​ដែល​កំពុង​និរទេស​ខ្លួនឯង​នៅ​ក្រៅ​ប្រទេស។ ហុង មិនា

លោក​ សម រង្ស៊ី ថា លោក ហ៊ុន សែន ​ប្តឹង​លោក​កាន់​តែ​ច្រើន​កាន់តែ​ល្អ

ភ្នំពេញៈ លោក សម រង្ស៊ី មេដឹកនាំ​គណបក្ស​ប្រឆាំង​បាន​ស្វាគមន៍​​បណ្តឹង​បរិហារកេរ្តិ៍​ថ្មី​មួយ​ទៀត​ដែល​ប្តឹង​ដោយ​លោក​នាយក​រដ្ឋមន្រ្តី ហ៊ុន សែន ពាក់ព័ន្ធ​នឹង​ការ​លើក​ឡើង​​ថា​លោក​នាយក​រដ្ឋមន្រ្តី​បាន​សូក​លុយ​​ចំនួន​ ១ លាន​ដុល្លារ​​ដល់​កញ្ញា​ ធី សុវណ្ណថា ដែល​ជា​សកម្មជន​នយោបាយ​​ល្បី​ឈ្មោះ​ឲ្យ​បង្ក​បញ្ហា​​ដល់​គណបក្ស​​ប្រឆាំង​ដោយ​មេបក្ស​ប្រឆាំង​រូប​នេះ​បាន​ចំអក​ថា​បណ្តឹង​កាន់​តែ​ច្រើន​កាន់​តែ​ល្អ​។

លោក គី តិច មេធាវី​របស់​លោក​នាយក​រដ្ឋមន្ត្រី​បាន​ដាក់​ពាក្យ​ប្តឹង​លោក​ សម រង្ស៊ី ទាមទារ​សំណង​ជំងឺ​ចិត្ត​ចំនួន ១ ​លាន​​ដុល្លារ​ទៅ​សាលា​ដំបូង​រាជធានី​កាលពី​ម្សិលមិញ​គឺ​មួយ​​ថ្ងៃ​បន្ទាប់ពី​កញ្ញា​ ធី សុវណ្ណថា បាន​ដាក់​ពាក្យ​បណ្តឹង​បរិហារកេរ្តិ៍​ដូច​គ្នា​ដោយ​ទាមទារ​សំណង​ជំងឺ​ចិត្ត​ចំនួន ២៥ ម៉ឺន​ដុល្លារ។

ប្រាប់​ភ្នំពេញ​ប៉ុស្តិ៍​តាម​ទូរស័ព្ទ​ពី​ប្រទេស​បារាំង​កាលពី​ម្សិលមិញ​លោក សម រង្ស៊ី ​ដែល​រស់នៅ​និរទេស​ដែល​កំពុង​អង្គុយ​នៅ​ក្នុង​រថភ្លើង​បាន​ថ្លែង​ថា​លោក​មិន​ខ្វល់​ចំពោះ​បណ្តឹង​របស់​លោក ហ៊ុន សែន ​​ដែល​ប្តឹង​ទៅ​តុលាការ​ប្រឆាំង​នឹង​រូប​លោក​​នោះ​ទេ​។ ​លោក​បាន​អះអាង​ថា​ប្រសិន​បើ​លោក ហ៊ុន សែន ​​ប្តឹង​លោក​កាន់​តែ​ច្រើន​ វា​កាន់​តែ​ប្រសើរ​ដើម្បី​ឲ្យ​សាធារណជន​​ដឹង​ការ​ពិត​។

លោក សម រង្ស៊ី​ ថ្លែង​ថា​៖ «​​គាត់​ប្តឹង​​កាន់តែ​ច្រើន​កាន់​​តែ​ល្អ​ពីព្រោះ​​មាន​ឱកាស​សម្រាប់​សាធារណជន​​យក​​ករណី​នេះ​​ទៅ​ជជែក​ពិភាក្សា​​​បាន​ទូលំ​ទូលាយ​»។ ​

លោក​បញ្ជាក់​ថា​៖ «​ពីព្រោះ​រឿង​ដែល​លើក​ឡើង​ដូច​នេះ​វា​មាន​​មូលដ្ឋាន​​ពិត​របស់​វា​។ ​ខ្ញុំ​គ្មាន​ក្តី​បារម្ភ​អ្វី​ទេ​... ​ពីព្រោះ​ខ្ញុំ​និយាយ​ការពិត​ដរាប​ណា​​ខ្ញុំ​និយាយ​ការពិត​យើង​​មិន​បារម្ភ​»។

នៅ​ក្នុង​សារ​ដែល​​ត្រូវ​បាន​គេ​ចែកចាយ​ព្រោងព្រាត​នៅ​លើ​ហ្វេសប៊ុក​កាលពី​អំឡុង​ខែ​វិច្ឆិកា​ឆ្នាំ​មុន​កញ្ញា​ ធី សុវណ្ណថា ជា «ចៅ» ​បាន​​ផ្ញើសារ​​​​ទៅ​វិញ​ទៅ​​មក​ជាមួយ​លោក​ ហ៊ុន សែន ជា​ «​តា​» ដោយ​ក្នុង​សារ​នេះ​អ្នក​ទាំង​ពីរ​បាន​ពិភាក្សា​គ្នា​ក្នុង​ការ​​ធ្វើ​ឲ្យ​គណបក្ស​សង្គ្រោះ​ជាតិ​ទន់​ខ្សោយ​​​ និង​ប្រធានបទ​ដទៃៗ​ទៀត​​។ ​​សារ​មួយ​​មាន​ពាក្យ​​​ «​តា» ​ផ្តល់​លុយ​ ១ លាន​ដុល្លារ​​ដើម្បី​​ផ្គត់ផ្គង់​ថវិកា​ដល់​ «​ការងារ​របស់​ចៅ​»​។

បើ​តាម​បណ្តឹង​​ដាក់​ទៅ​សាលា​​ដំបូង​រាជធានី​ភ្នំពេញ​កាលពី​ម្សិលមិញ​ដោយ​​​លោក គី តិច បាន​ប្តឹង​​លោក សម រង្ស៊ី ​ចំពោះ​​សុន្ទរកថា​របស់​លោក​ដែល​ថ្លែង​នៅ​ក្នុង​វេទិកា​សាធារណៈ​​មួយ​ក្នុង​ទីក្រុង​ប៉ារីស​ប្រទេស​បារាំង​កាលពី​ថ្ងៃ​ទី​ ១៤ មករា។ ​នៅ​ក្នុង​បណ្តឹង​នេះ​បាន​ប្រាប់​តុលាការ​ថា​នៅ​ក្នុង​វេទិកា​នោះ​លោក សម រង្ស៊ី បាន​ចោទ​ប្រកាន់​ថា «​លោក​​ ហ៊ុន សែន សូក​ប៉ាន់​​កញ្ញា ធី សុវណ្ណថា ចំនួន​ ១ លាន​ដុល្លារ​​ ...»។

តាមរយៈ​មេធាវី​របស់​លោក​ លោក ហ៊ុន សែន បាន​​សូម​ឲ្យ​តុលាការ​ចោទ​ប្រកាន់​ និង​ផ្តន្ទាទោស​​លោក សម រង្ស៊ី ទៅ​តាម​មាត្រា​ ៣០៥​ និង​មាត្រា​ដទៃៗ​ទៀត​​ទៅ​តាម​ក្រម​ព្រហ្មទណ្ឌ​​។ បណ្តឹង​នេះ​បាន​​សរសេរ​ថា​៖ «​​ទាមទារ​ សម រង្ស៊ី សង​ជំងឺ​ចិត្ត​ចំនួន​ ៤.០០០.០០០.០០០ ​រៀល​​ដល់​សម្តេច​តេជោ ហ៊ុន សែន​»។

នៅ​ពេល​ទាក់ទង​ពី​ម្សិលមិញ​​លោក​មេធាវី គី តិច បាន​បញ្ជាក់​ថា​មូលហេតុ​ដែល​​​លោក​ ហ៊ុន សែន ប្តឹង​លោក សម រង្ស៊ី ​គឺ​ដោយសារ​​ការ​ចោទ​ប្រកាន់​នេះ​មិន​ពិត​ហើយ​លោក សម រង្ស៊ី បាន​ចោទ​ប្រកាន់​លោក​​នាយក​រដ្ឋមន្រ្តី​ជាច្រើន​លើក​រួច​ហើយ​​​។ ​

លោក ថ្លែង​​ថា​៖ «​​នៅ​ក្នុង​បណ្តឹង​យើង​​សូម​ឲ្យ​​ [តុលាការ​] ​​ចោទប្រកាន់​​​ និង​ផ្ដន្ទាទោស​​ទៅ​តាម​ច្បាប់​​​ពី​​បទ​បរិហារកេរ្តិ៍​ជា​សាធារណៈ​។ ​ការ​ចោទប្រកាន់​នេះ​ប៉ះពាល់​កេរ្តិ៍​ឈ្មោះ​សម្តេច​តេជោ​ [​ហ៊ុន សែន​]។ ​ករណី​នេះ​​គឺ​ដដែលៗ​​មិន​ខ្លាច​»។

លោក​​បាន​បន្ថែម​ថា៖ ​​«១ ​លាន​ដុល្លារ​នៃ​ថវិកា​​នេះ​ប្រសិន​បើ​តុលាការ​​សម្រេច​ឲ្យ​លោក សម រង្ស៊ី​ សង​ជំងឺ​ចិត្ត​ដល់​សម្តេច​តេជោ ហ៊ុន សែន សម្តេច​នឹង​​យក​​ថវិកា​​នេះ​ទៅ​ជួយ​សាងសង់​ផ្ទះ​​ឲ្យ​ជនពិការ​ក្នុង​លក្ខណៈ​​មនុស្សធម៌​»​។

កញ្ញា ធី សុវណ្ណថា ដែល​បាន​ដាក់​ពាក្យ​ប្តឹង​លោក​ សម រង្ស៊ី កាលពី​ថ្ងៃ​អង្គារ​ដោយ​ទាមទារ​ប្រាក់​ជំងឺ​ចិត្ត​ចំនួន ២៥ ម៉ឺន​ដុល្លារ​នោះ​បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃ​អង្គារ​ថា​គណនី​នៅ​លើ​​ប្រព័ន្ធ​ផ្សព្វផ្សាយ​​សង្គម​​​ហ្វេសប៊ុក​របស់​នាង​ត្រូវ​បាន​គេ​ហេក​ចូល​ហើយ​​សារ​នោះ​ត្រូវ​បាន​គេ​ប្រឌិត​។

កញ្ញា​បាន​ថ្លែង​តាម​ទូរស័ព្ទ​ទៀត​ថា​៖ «​ហ្វេសប៊ុក​របស់​ខ្ញុំ​ត្រូវ​បាន​គេ​លួច​​​ចូល​កាលពី​ថ្ងៃ​ទី​ ២៤ វិច្ឆិកា​​»។ «​ភ្លាម​នោះ​ខ្ញុំ​បាន​ដាក់​ពាក្យ​បណ្តឹង​ទៅ​ក្រសួង​មហាផ្ទៃ​។ ​ឯកសារ​លេចធ្លាយ​ទាំងអស់​ត្រូវ​បាន​បង្កើត​ឡើង​ដោយ​​ហេកឃើរ​... ​គ្មាន​នរណា​ផ្តល់​លុយ​ឲ្យ​ខ្ញុំ​ទេ​»។

ពី​ឆ្នាំ​ ២០១៦ ​ដល់​ ២០១៧​ លោក សម រង្ស៊ី ​ត្រូវ​បាន​ប្តឹង​ដោយ​មន្រ្តី​ជាន់​ខ្ពស់​​របស់​គណបក្ស​ប្រជាជន​ចំនួន​ ៧ បណ្តឹង​មួយ​គឺ​បណ្តឹង​​ករណី​ញុះញង់​ពាក់ព័ន្ធ​​នឹង​ឃាតកម្ម​លើ​អ្នក​​វិភាគ​​ល្បី​ឈ្មោះ​លោក កែម ឡី និង​បណ្តឹង​ចំនួន​ ៦ ​ទៀត​​គឺជា​បណ្តឹង​បរិហារកេរ្តិ៍​​ដែល​ប្តឹង​ដោយ​ប្រធាន​រដ្ឋសភា​លោក ហេង សំរិន លោក ហ៊ុន សែន រដ្ឋមន្រ្តី​អម​នាយក​រដ្ឋមន្រ្តី​ សោម សឿន និង កញ្ញា ធី សុវណ្ណថា។ នេះ​បើ​តាម​​មេធាវី​​របស់​គណបក្ស​​សង្គ្រោះ​ជាតិ លោក សំ សុគង់។

ទោះ​យ៉ាង​ណា​ក្តី​លោក សំ សុគង់ បាន​បញ្ជាក់​ថា​រហូត​មក​​ដល់​ពេល​នេះ​លោក​​មិន​ទាន់​ទទួល​បាន​ការ​ពឹងពាក់​​​​ពី​លោក សម រង្ស៊ី ឬ​គណបក្ស​សង្គ្រោះ​ជាតិ​ឲ្យ​ធ្វើ​ជា​មេធាវី​​សម្រាប់​លោក សម រង្ស៊ី ​នៅ​ក្នុង​​ករណី​ថ្មី​នេះ​នៅ​ឡើយ​ទេ​។

អ្នក​វិភាគ​នយោបាយ​លោក​ មាស នី បាន​ថ្លែង​ថា​ប្រសិន​បើ​តុលាការ​​នៅ​តែ​ត្រូវ​បាន​ប្រើ​សម្រាប់​​ដើរតួ​ជា​ល្បែង​​ដូចនេះ​វា​បន្ទាប​តម្លៃ​យុត្តិធម៌​ក្នុង​ប្រទេស​​កម្ពុជា​។

លោក មាស នី ​បាន​បន្ត​ថា​៖ «​​ខ្ញុំ​មិន​ភ្ញាក់​ផ្អើល​​ទេ​ដោយសារ​​នេះ​ជា​ចរិត​របស់​អ្នក​នយោបាយ​ដែល​រហូត​មក​ដល់​ពេល​នេះ​យើង​បាន​ឃើញ​ថា​បើ​ទោះបី​ជា​​​​រយៈពេល​ ៣០ ​ឆ្នាំ​កន្លង​ផុត​ទៅ​អ្នក​នយោបាយ​ខ្មែរ​នៅ​តែ​មិន​ទាន់​មាន​ភាព​ចាស់​ទុំ​នយោបាយ​។ ​ការ​ប្តឹង​គ្នា​ទៅ​វិញ​ទៅ​មក​មិន​មាន​នរណា​ម្នាក់​ជា​អាជ្ញា​កណ្តាល​ផ្តល់​យុត្តិធម៌​​ ការ​ធ្វើ​ដូចនេះ​ជនរងគ្រោះ​​មិនមែន​លោក សម រង្ស៊ី ហើយ​ក៏​​មិន​មែន​លោក ហ៊ុន សែន ដែរ ជនរងគ្រោះ​គឺ​​​តម្លៃ​​នៃ​ប្រព័ន្ធ​យុត្តិធម៌​​នៃ​ជាតិ​ខ្មែរ​»។

ចំណែក​លោក គឹម សុខ អ្នក​វិភាគ​នយោបាយ​ម្នាក់​ទៀត​បាន​​ចោទ​សួរ​ថា៖ «តើ​អផ្សុក ឬ​ដាច់យ៉ៃ ឬ​រក​នឹក​មិន​ឃើញ​លេង​ល្បែង​អ្វី​ឲ្យ​សម​មើល​ជាង​នេះ​ ឬ​ទើប​នាំ​គ្នា​លើក​មេ​ដៃ​ផ្តិត​ប្តឹង​រក​លុយ ២៥ ម៉ឺន ដល់ ១ លាន​ដុល្លារ​?»។

លោក​ គឹម សុខ បាន​សរសេរ​នៅ​លើ​ហ្វេសប៊ុក​របស់​លោក​ដោយ​បាន​ចំអក​ថា​៖ «បើ​ពិត​ជា​មាន​ជំនាញ​ប្តឹង​មែន​ពួកគេ​គួរ​ចេះ​ពួត​ដៃ​គ្នា​ប្តឹង​យក​កោះ​​ត្រល់​ខ្មែរ​ដែល​យួន​កំពុង​គ្រប់គ្រង​សព្វ​ថ្ងៃ​មក​ដាក់​ជា​កម្មសិទ្ធិ​កាន់កាប់​របស់​ខ្មែរ​វិញ ហើយ​បើ​នាំ​គ្នា​ធ្វើ​បែប​នេះ​មនុស្ស​ខ្មែរ​គ្រប់​និន្នាការ​នៅ​គ្រប់​ទិសទី​ទូទាំង​ពិភពលោក​នឹង​គាំទ្រ​ព្រម​ទាំង​ពេញ​ចិត្ត​ចូល​រួម​យ៉ាង​សស្រាក់​សស្រាំ​។ អ្នក​ដឹកនាំ​អសមត្ថភាព​នឹក​មិន​ឃើញ​រឿង​ជា​ប្រយោជន៍​ជាតិ ងាក​ចុះ​សម្លឹង​ឡើង​ឃើញ​ឆ្លៀត​ប្រសប់​ប្រើ​ស្នៀត​បំបាក់​តែ​មនុស្ស​ជាតិ​ឯង​»៕ PS

រាយការណ៍​បន្ថែម​ដោយ​ ម៉ិច ដារ៉ា

អត្ថបទគួរចាប់អារម្មណ៍