ភ្នំពេញៈ លោក សម រង្ស៊ី មេដឹកនាំគណបក្ស ប្រឆាំង កាលពីម្សិលមិញ បានថ្លែងថា អភិបាលរាជធានីភ្នំពេញបន្ទាប់ គួរមកពីគណបក្សសង្គ្រោះជាតិ ដោយលើកមូលហេតុគណបក្សរបស់លោកទទួលបានសំឡេងភាគច្រើន នៅក្នុងការបោះឆ្នោត កាលពីថ្ងៃ ទី២៨ ខែ កក្កដា។
គោលគំនិតនេះ ត្រូវបានលើកឡើងក្នុងសុន្ទរកថា ទៅកាន់ក្រុមប្រឹក្សាឃុំ សង្កាត់ និងស្រុករាប់ពាន់នាក់ ដែលបានធ្វើឡើង នៅមុនកិច្ចប្រជុំ ដែលបានគ្រោងធ្វើរវាងគណបក្សជាប់ឆ្នោតទាំងពីរនៅថ្ងៃស្អែកនេះ។ លោក សម រង្ស៊ី បានថ្លែងថា បញ្ហាជុំវិញការតែងតាំងអភិបាលរាជធានី អាចលើកឡើងព្រមជាមួយនឹងរបៀបវារៈស្នូល របស់គណបក្ស ទាក់ទងនឹងការស៊ើបអង្កេត ការបោះឆ្នោត និងកំណែទម្រង់។
នៅក្នុងពិធី នៅទីស្នាក់ការគណបក្ស ក្នុងខណ្ឌ ទួលគោក លោក សម រង្ស៊ី បានថ្លែងថា គណបក្ស ប្រឆាំង គួរដឹកនាំរាជធានី ដែលខ្លួនបានឈ្នះអាសនៈ ៧ ក្នុងចំណោមអាសនៈចំនួន ១២ ក្នុងការបោះឆ្នោតខែ កក្កដា។ លោកបានបន្ថែមថា៖ «យើងទាមទារ អភិបាលរាជធានីភ្នំពេញ ត្រូវតែចេញពី [គណបក្សសង្គ្រោះជាតិ] ដើម្បីគោរពឆន្ទៈប្រជាជន ដែលចង់បានការផ្លាស់ប្តូរ»។
ទោះជាយ៉ាងណា ក្រោយមក លោក សម រង្ស៊ី បានបន្ទន់សម្តី ហើយបានប្រាប់ ភ្នំពេញ ប៉ុស្តិ៍ ថា ការតែងតាំងអភិបាល ក្នុងខេត្ត ដែលគណបក្សប្រឆាំងមានសំឡេងភាគច្រើន ក្នុងការបោះឆ្នោត គួរតម្រូវឲ្យមានការឯកភាពពីគណបក្សប្រឆាំង។ «ជាគោលការណ៍យ៉ាងហោចណាស់ក្នុងខេត្តចំនួន ៤ ដែលគណបក្សសង្គ្រោះជាតិឈ្នះការបោះឆ្នោត...យើងចង់មានសំឡេងក្នុងការតែងតាំងអភិបាល»។ «ប្រជាជនភាគច្រើន គាំទ្រគណបក្សសង្គ្រោះជាតិ ដូច្នេះ គណបក្សសង្គ្រោះជាតិ ត្រូវតែមានសំឡេង»។ លោកបន្ថែមថា ក្នុងរយៈពេលវែង គណបក្សនឹងជំរុញឲ្យមានការបោះឆ្នោតជាទូទៅសម្រាប់រាល់អភិបាល រាជធានី ខេត្តទាំងអស់។
បច្ចុប្បន្ន គណបក្សប្រជាជន តែងតាំងអភិបាលខេត្ត រាជធានី តាមរយៈក្រសួង មហាផ្ទៃ ហើយបន្ទាប់មកព្រះមហាក្សត្រចេញព្រះរាជក្រឹត្យតែងតាំង។
លោក ជាម យៀប តំណាងរាស្រ្ត គណបក្សប្រជាជន បានថ្លែងថា លោកមិនបានដឹងទេថា លោក សម រង្ស៊ី បានធ្វើការទាមទារ តំណែងអភិបាលរាជធានីនោះ។ លោកបានបន្តថា ក្នុងកិច្ចប្រជុំលើកមុន លោក សម រង្ស៊ី ចង់បានតុល្យភាពអំណាច និងតំណែងជាប្រធានរដ្ឋសភា។ «វាជាមហិច្ឆតារបស់គាត់ ប៉ុន្តែវានឹងអាស្រ័យលើគណបក្សប្រជាជន ដែលជាអ្នកឈ្នះឆ្នោត។ គាត់ចង់បានអ្វីក៏ដោយ គាត់មិនអាចមានវាទេ»។
កិច្ចពិភាក្សាថ្ងៃស្អែក ដែលជាជំនួបពិភាក្សាលើកទី ១ ចាប់តាំងពីគណបក្សប្រជាជន បានជម្នះបង្កើតរដ្ឋសភា និងរដ្ឋាភិបាលដោយឯកបក្ស កាលពីថ្ងៃទី ២៣ ខែ កញ្ញា និងបន្ទាប់ពីថ្នាក់ដឹកនាំកំពូល បានជួបគ្នានៅរដ្ឋសភា កាលពីថ្ងៃ ទី១៦-១៧ ខែ កញ្ញា នឹងជាការប្រជុំរវាងក្រុមបច្ចេកទេសមិនមែនជាកិច្ចប្រជុំមេដឹកនាំថ្នាក់កំពូលទេ។
សំណើសំខាន់ៗរបស់ គណបក្សសង្គ្រោះជាតិ រួមមានការស៊ើបអង្កេតឯករាជ្យ លើភាពមិនប្រក្រតីនៃការបោះឆ្នោត កំណែទម្រង់ការបោះឆ្នោត ផ្អែកតាមអនុសាសន៍របស់អង្គការសហប្រជាជាតិ និងអង្គការមិនមែនរដ្ឋាភិបាល និងស្នើឲ្យសមាជិកទាំង ៩ រូបនៃគណៈកម្មាធិការជាតិរៀបចំការបោះឆ្នោតលាលែងពីតំណែង។
ប៉ុន្តែ កាលពីម្សិលមិញ លោក សម រង្ស៊ី បានថ្លែងថា បញ្ហាដទៃទៀតដូចជាការតែងតាំងអភិបាល រាជធានី ខេត្ត ក៏អាចត្រូវបានពិភាក្សាផងដែរ។ «ការពិភាក្សានឹងបើកចំហបញ្ហាណា ក៏អាចលើកឡើងផងដែរ ព្រោះគ្មានបុរេលក្ខខណ្ឌទេ។ ដូច្នេះ យើងនឹងស្តាប់គ្នាទៅវិញទៅមក»។
បើទោះបីជាការទាមទាររបស់ គណបក្សសង្គ្រោះជាតិអាចមានប្រជាប្រិយភាពក៏ដោយ ក៏ប៉ុន្តែអ្នកគាំទ្រគណបក្សជាច្រើននាក់ បានចាប់ផ្តើមសម្តែងចេញនូវការមិនពេញចិត្តរបស់ខ្លួន ដែលគណបក្សប្រឆាំងកំពុងតែចរចាជាមួយនឹងគណបក្សប្រជាជន។
ឆ្លើយតប កាលពីម្សិលមិញ លោក សម រង្ស៊ី បានបំភ្លឺប្រាប់សមាជិកគណបក្សថា ការចរចាជាមួយនឹងគណបក្សប្រជាជន ស្តីពីកំណែទម្រង់ មិនមែនជាការចរចាចូលរួមក្នុងរដ្ឋសភា ឬក្នុងរដ្ឋាភិបាលទេ។ លោក សម រង្ស៊ី បានលើកឡើងថា៖ «សូមជ្រាបរវាងការប្រជុំ និងការចូលរួម ... ការប្រជុំគ្រាន់តែពិភាក្សា មិនមានន័យថា [យើង]ចូលរួម [រដ្ឋសភា រដ្ឋាភិបាល] ទេ»។
លោក សម រង្ស៊ី បានប្រាប់ ភ្នំពេញ ប៉ុស្តិ៍ ថា៖ «កិច្ចប្រជុំថ្ងៃអង្គារ គឺគ្រាន់តែជាកិច្ចប្រជុំបច្ចេកទេស ដែលវានឹងសម្រួលដល់កិច្ចពិភាក្សាផ្ទាល់ រវាងថ្នាក់ដឹកនាំកំពូលធ្វើសេចក្តីសម្រេច»។ លោកបានបន្តថា គណបក្សសង្គ្រោះជាតិនឹងទទូចថា កិច្ចប្រជុំថ្នាក់កំពូលនៅថ្ងៃអនាគត នឹងត្រូវផ្សព្វផ្សាយជាសាធារណៈ ដើម្បីឲ្យប្រជាជនឃ្លាំមើល និងតាមដានកិច្ចពិភាក្សាផងដែរ។
លោក សក់ សេដ្ឋា រដ្ឋលេខាក្រសួង មហាផ្ទៃ ដែលជាអ្នកដឹកនាំក្រុមបច្ចេកទេសសម្រាប់កិច្ចប្រជុំ ពីភាគីគណបក្សប្រជាជនបានថ្លែងថា កិច្ចពិភាក្សាអាចមានផ្លែផ្កា ប្រសិនបើគណបក្សប្រឆាំងពិតជាមានឆន្ទៈចរចាមែន។ លោកបន្ថែមថា៖ «ពេលចរចា អ្វីដែលយើងព្រមព្រៀងគ្នា យើងអាចធ្វើកំណែទម្រង់បាន។ ចំណុចដែលយើងខ្វែងគំនិតគ្នាច្រើន យើងមិនអាចធ្វើកំណែទម្រង់បានទេ»៕
រាយការណ៍បន្ថែមដោយ ឆាយ ច័ន្ទនីដា
