The Phnom Penh Post Search

Search form




Logo of Phnom Penh Post newspaper Phnom Penh Post - លោក​ សម រង្ស៊ី ​បន្ត​ឌឺ​ដង​ឲ្យ​​បក្ស​កាន់​អំណាច​​រឿង​ចាប់​ឃុំ​មន្ត្រី​សិទ្ធិ​មនុស្ស




លោក​ សម រង្ស៊ី ​បន្ត​ឌឺ​ដង​ឲ្យ​​បក្ស​កាន់​អំណាច​​រឿង​ចាប់​ឃុំ​មន្ត្រី​សិទ្ធិ​មនុស្ស

Content image - Phnom Penh Post
លោក នី ចរិយា មន្ត្រី គ.ជ.ប ពេលនាំឡើងតុលាការ។

លោក​ សម រង្ស៊ី ​បន្ត​ឌឺ​ដង​ឲ្យ​​បក្ស​កាន់​អំណាច​​រឿង​ចាប់​ឃុំ​មន្ត្រី​សិទ្ធិ​មនុស្ស

ភ្នំពេញៈ លោក​ សម ​រង្ស៊ី ​ប្រធាន​គណបក្ស​ប្រឆាំង​បាន​បន្ត​ថ្លែង​បែប​ឌឺដង​ឲ្យ​គណបក្ស​កាន់​​អំណាច​ថា​គ្រាន់​តែ​លុយ​ ៥០០​ ដុល្លារ​ធ្វើ​ឲ្យ​សកម្មជន​សិទ្ធិ​មនុស្ស​ និង​មន្ត្រី​គណៈកម្មាធិការ​ជាតិ​រៀបចំ​ការ​បោះឆ្នោត ៥ រូប​ត្រូវ​បាន​ចាប់​ដាក់​ពន្ធនាគារ​ ប៉ុន្តែ​លោក​នាយក​រដ្ឋមន្ត្រី ហ៊ុន សែន ​បាន​សូកប៉ាន់​លុយ​ចំនួន ១ លាន​ដុល្លារ​ដល់​ស្រី​ក្មេង​ម្នាក់​ដើម្បី​រក​រឿង​គណបក្ស​ប្រឆាំង​បែរ​ជា​មិន​​មាន​បញ្ហា​សម្រាប់​លោក​នាយក​រដ្ឋមន្ត្រី​​ទៅ​វិញ​។

ថ្លែង​ទៅ​កាន់​អ្នក​គាំទ្រ​នៅ​ប្រទេស​បារាំង​កាលពី​ថ្ងៃ​សៅរ៍​ប្រធាន​គណបក្ស​សង្គ្រោះ​ជាតិ​លោក​ សម រង្ស៊ី​ បាន​ប្រៀបធៀប​លុយ​ចំនួន ​៥០០​ ដុល្លារ​ដែល​ជា​ប្រាក់​មនុស្សធម៌​របស់​អង្គការ​ការពារ​សិទ្ធិ​មនុស្ស​ទៅ​នឹង​ទឹកប្រាក់​ចំនួន​មួយ​លាន​ដុល្លារ​ដែល​ជា​លុយ​ពុករលួយ​របស់​លោក ហ៊ុន សែន ប្រើប្រាស់​​ ដើម្បី​បំផ្លាញ​គណបក្ស​សង្គ្រោះ​ជាតិ​គឺជា​ការ​អនុវត្ត​ច្បាប់​ដែល​មិន​យុត្តិធម៌​សម្រាប់​សកម្មជន​សិទ្ធិ​មនុស្ស​ចំនួន ៤ រូប និង​មន្ត្រី​គណៈកម្មាធិការ​ជាតិ​រៀបចំ​ការ​បោះឆ្នោត​មួយ​រូប​ហើយ​វា​ក៏​មិន​យុត្តិធម៌​ផង​ដែរ​សម្រាប់​គណបក្ស​សង្គ្រោះ​ជាតិ​ក្នុង​ការ​ចរចា​ដើម្បី​ស្វែងរក​ដំណោះស្រាយ​នយោបាយ​មួយ​សម្រាប់​សមាជិក​គណបក្ស​របស់​ខ្លួន​ដែល​កំពុង​ជាប់​ពន្ធនាគារ​នោះ។

លោក សម ​រង្ស៊ី ​ថ្លែង​ថា៖ «រឿង​កំប៉ិកកំប៉ុក​លុយ​​ចំនួន ៥០០ ​ដុល្លារ​ធ្វើ​ឲ្យ​មនុស្ស​ចំនួន​ប្រាំ​រូប​ត្រូវ​បាន​ចាប់​ដាក់​ពន្ធនាគារ​ដែល​មាន​មន្ត្រី​សិទ្ធិមនុស្ស​អាដហុក​ និង​មន្ត្រី គជប ​មួយ​រូប​ដែល​ត្រូវ​បាន​ចោទប្រកាន់​ពី​បទ​យក​លុយ​ចំនួន ​៥០០ ដុល្លារ​ទៅ​ជួយ​ក្រុម​គ្រួសារ​របស់​ជនរងគ្រោះ​ដែល​ជាប់​ពន្ធនាគារ​ជិត​មួយ​ឆ្នាំ​មុន​»។

លោក​ សម រង្ស៊ី​ បាន​ថ្លែង​ប្រាប់​អ្នក​គាំទ្រ​ថា៖ «ហើយ​ចំពោះ​លោក​ ហ៊ុន សែន ​ដែល​បាន​សូកប៉ាន់​ ធី សុវណ្ណថា ចំនួន​មួយ​លាន​ដុល្លារ​នោះ​គឺ​គ្មាន​នរណា​ម្នាក់​ធ្វើ​អ្វី​ចំពោះ​លោក​ ហ៊ុន សែន ​ផង។ លុយ​មួយ​លាន​ដុល្លារ​គឺជា​លុយ​ពុករលួយ​សូក​ប៉ាន់​ទៅ​មនុស្ស​ម្នាក់​ដើម្បី​ធ្វើ​រឿង​អាក្រក់​បង្ក​រឿង​ដល់​គណបក្ស​សង្គ្រោះ​ជាតិ»​។

លើស​ពី​នេះ​ទៀត​លោក​ សម រង្ស៊ី​ ក៏​បាន​ថ្លែង​ប្រាប់​ទៅ​អ្នក​គាំទ្រ​ថា​លោក​ ហ៊ុន សែន​ បាន​ព្យាយាម​បំបែក​បំបាក់​រូប​លោក​ចេញ​ពី​ប្រធាន​ស្តីទី​គណបក្ស​សង្គ្រោះជាតិ​លោក​ កឹម​ សុខា ដោយ​បាន​គំរាម​កំហែង​លោក កឹម សុខា​ ឲ្យ​រៀបចំ​លិខិត​មួយ​ច្បាប់​ដើម្បី​ទាត់​លោក សម រង្ស៊ី ​ចេញ​ពី​គណបក្ស​សង្គ្រោះ​ជាតិ​ប្រសិន​បើ​លោក​ កឹម​ សុខា​ ចង់​ឲ្យ​មាន​ការ​ដោះលែង​សកម្មជន​សិទ្ធិ​មនុស្ស​ និង​មន្ត្រី​គណៈកម្មាធិការ​ជាតិ​រៀបចំ​ការ​បោះឆ្នោត​ និង​សមាជិក​របស់​ខ្លួន​ដែល​កំពុង​ជាប់​ពន្ធនាគារ​នោះ​។

សកម្មជន​សិទ្ធិ​មនុស្ស​ដែល​កំពុង​ជាប់​ពន្ធនាគារ​រួម​មាន​លោក យី​ សុខសាន្ត លោកស្រី លឹម​ មុន្នី​ លោក នី សុខា​ និង​លោក ណៃ វ៉ង់ដា ហើយ​មន្ត្រី​ គជប ​គឺ​លោក នី ចរិយា​។ ចំណែក​មន្ត្រី និង​សកម្មជន​គណបក្ស​សង្គ្រោះ​ជាតិ​ដែល​កំពុង​ជាប់​ឃុំ​រួមមាន សមាជិក​ព្រឹទ្ធសភា​លោក ហុង សុខហួរ តំណាង​រាស្ត្រ​លោក អ៊ុំ​ សំអាន​ និង​មន្ត្រី​ជាន់​ខ្ពស់​គណបក្ស​លោក មាជ សុវណ្ណារ៉ា ​និង​សមាជិក​ប្រមាណ​ជាង ១០ រូប​ផ្សេង​ទៀត។

លោក​ សម រង្ស៊ី​បន្ថែម​ថា៖ ​«នៅ​​ពេល​ដែល​អ្នក​កាសែត​សួរ​ថា​ ហេតុ​អ្វី​បាន​ជា​ចាប់​ខ្លួន​ពួកគេ [សកម្មជន​សិទ្ធិ​មនុស្ស​ និង​សមាជិក​គណបក្ស​សង្គ្រោះ​ជាតិ] ដាក់​ពន្ធនាគារ? [ហ៊ុន សែន] បាន​និយាយ​ថា ​នេះ​ជា​ករណី​របស់​តុលាការ​ស្ថិត​នៅ​ក្នុង​ដៃ​របស់​តុលាការ​គាត់​មិន​អាច​ធ្វើ​អ្វី​បាន​ទេ​។

នៅ​ពេល​ដែល​និយាយ​ពី​ករណី​លោក កឹម សុខា​ សរសេរ​លិខិត​ដើម្បី​ដក​លោក​ សម រង្ស៊ី ​ចេញ​ពី [គណបក្ស​សង្គ្រោះ​ជាតិ] ទើប​ដោះលែង​ពួកគេ​ឲ្យ​មាន​សេរីភាព​នោះ។ និយាយ​ដូច​នេះ​វា​មិន​ត្រឹមត្រូវ​ទេ។ នេះ​គេ​ហៅ​ថា​ចំណាប់​ខ្មាំង»។

ខណៈ​ដែល​លោក​ សម រង្ស៊ី​ កំពុង​បន្ត​រិះគន់​គណបក្ស​ប្រជាជន​របស់​លោក​ ហ៊ុន សែន ​នោះ​មេដឹកនាំ​គណបក្ស​ទាំង​ពីរ​បាន​ថ្លែង​ថា​​ក្រុម​ចរចា​ទាំង​ពីរ​បាន​បង្កើត​របៀបវារៈ​សម្រាប់​​ការ​ចរចា​នា​ពេល​ខាង​មុខ​រួច​ហើយ​ហើយ​ភាគី​ទាំង​ពីរ​ក៏​បាន​បញ្ជូន​របៀបវារៈ​នោះ​ទៅ​ឲ្យ​គ្នា​ទៅវិញ​ទៅមក​រួច​ហើយ​ដែរ​ ប៉ុន្តែ​ពួកគេ​នៅ​មិន​ទាន់​កំណត់​កាលបរិច្ឆេទ​សម្រាប់​ជំនួប​ចរចា​របស់​ពួកគេ​នៅ​ឡើយ​ទេ។

ឆ្លើយតប​ទៅ​នឹង​ការ​ចោទប្រកាន់​របស់​លោក​ សម រង្ស៊ី អ្នក​នាំពាក្យ​គណបក្ស​ប្រជាជន​លោក សុខ ឥសាន​ បាន​ច្រាន​ចោល​ការ​ចោទប្រកាន់​នេះ​ហើយ​លោក​បាន​ថ្លែង​ថា​សកម្មជន​សិទ្ធិ​មនុស្ស​ និង​មន្ត្រី​ គជប បាន​សហការ​ជាមួយ​មេឃុំ​មកពី​គណបក្ស​សង្គ្រោះ​ជាតិ​លោក​ ស៊ាង ចែត ដើម្បី​ទទួល​យក​លុយ​ចំនួន​ ៥០០ ដុល្លារ​ទៅ​ឲ្យ​ម្តាយ​របស់​ ស្រីមុំ​ ដែល​ត្រូវ​បាន​គេ​ចោទប្រកាន់​ថា​ជា​ស្រី​កំណាន់​របស់​លោក​ កឹម សុខា​។

លោក ឥសាន ​ថ្លែង​ថា​៖ «ប៉ុន្តែ​លុយ​ចំនួន​ ១ លាន​ដុល្លារ​ដែល​ត្រូវ​បាន​គេ​ចោទប្រកាន់​ថា​សម្តេច​នាយក​រដ្ឋមន្ត្រី [ហ៊ុន សែន] បាន​ឱ្យ​ទៅ​កញ្ញា​ ធី សុវណ្ណថា ​នោះ​គឺ​មួយ​លាន​ខ្យល់​ដែល​លោក​ សម រង្ស៊ី​ បាន​បង្កើត​ឡើង»។

លោក​បន្ថែម​ថា​ លោក​ សម រង្ស៊ី​ និង​សមាជិក​គណបក្ស​សង្គ្រោះ​ជាតិ​របស់​គាត់​កំពុង​រំលេច​ឡើង​ពី​បញ្ហា​មួយ​ចំនួន​ដើម្បី​ដាក់​បន្ទុក​លើ​រដ្ឋាភិបាល​ក្នុង​គោលបំណង​ដើម្បី​បន្ទាប​បន្ថោក​ប្រជាប្រិយភាព​របស់​គណបក្ស​ប្រជាជន​ និង​រដ្ឋាភិបាល។

លោក​ សុខ ​ឥសាន ​បាន​អះអាង​ថា​លុយ​ចំនួន ១ លាន​ដុល្លារ​ដែល​ចោទប្រកាន់​ថា ហ៊ុន សែន ​បាន​ផ្ដល់​ឱ្យ​កញ្ញា​ ធី សុវណ្ណថា ​នោះ​គឺជា​រឿង​ក្លែងក្លាយ​ដែល​បង្កើត​ឡើង​ដោយ​លោក​ សម រង្ស៊ី។

ទោះ​ជា​យ៉ាង​ណា​ដោយ​ផ្អែក​​លើ​បណ្តាញ​សង្គម​ដែល​បាន​បង្ហោះ​កាលពី​ចុង​ឆ្នាំ​មុន​បាន​បង្ហាញ​ថា​លោក ហ៊ុន សែន ​បាន​ផ្តល់​ប្រាក់​ចំនួន ១ លាន​ដុល្លារ​ទៅ​ឲ្យ​កញ្ញា ធី សុវណ្ណថា ដែល​ជា​អតីត​សកម្មជន​គណបក្ស​សង្គ្រោះ​ជាតិ​ដើម្បី​ឲ្យ​បំបែក​មេដឹកនាំ​គណបក្ស​សង្គ្រោះ​ជាតិ។

ទាក់ទង​ទៅ​នឹង​រឿង​ចរចា​រវាង​គណបក្ស​ប្រជាជន​​ដឹកនាំ​ដោយ​លោក​ឧបនាយក​រដ្ឋមន្ត្រី​ ស ខេង ​និង​គណបក្ស​សង្គ្រោះ​ជាតិ​ដែល​ដឹកនាំ​ដោយ​លោក កឹម សុខា ​នោះ​លោក ឥសាន ​និង​អ្នក​នាំពាក្យ​រដ្ឋសភា​លោក ឡេង ប៉េងឡុង​ បាន​បញ្ជាក់​កាលពី​ម្សិលមិញ​ថា​ភាគី​ទាំង​ពីរ​បាន​រៀបចំ​របៀបវារៈ​សម្រាប់​ការ​ចរចា​នា​ពេល​ខាង​មុខ​រួចរាល់​ហើយ ហើយ​របៀបវារៈ​ទាំង​នោះ​គឺ​និយាយ​អំពី​តួនាទី​របស់​សំឡេង​ភាគ​តិច​ និង​សំឡេង​ភាគច្រើន​ប៉ុន្តែ​ភាគី​ទាំង​ពីរ​នៅ​មិន​ទាន់​បាន​កំណត់​កាលបរិច្ឆេទ​សម្រាប់​ការ​ចរចា​នោះ​នៅ​ឡើយ​​ទេ។

អ្នក​វិភាគ​នយោបាយ​លោក គឹម​ សុខ ​បាន​ថ្លែង​ថា​៖ «លុយ​ចំនួន​ ៥០០ ​ដុល្លារ​របស់​ក្រុម​សិទិ្ធមនុស្ស​គឺ​ស្ថិត​នៅ​ក្រោម​ក្របខ័ណ្ឌ​នៅ​ក្នុង​ការ​ចំណាយ​ដើម្បី​ជួយ​ដល់​ជនរងគ្រោះ​ ប៉ុន្តែ​លុយ​ចំនួន ១ លាន​ដុល្លារ​របស់​លោក ហ៊ុន សែន​ ដែល​បាន​ផ្តល់​ទៅ​ឱ្យ​កញ្ញា ធី សុវណ្ណថា គឺជា​បញ្ហា​ជាតិ​ហើយ​ថា​ហេតុ​អ្វី​បាន​ជា​មិន​មាន​ការ​ស៊ើបអង្កេត​ពីព្រោះ​វា​អាច​ត្រូវ​ស្ថិត​នៅ​ក្រោម​ចំណាត់ការ​ច្បាប់​ហើយ​ទោស​អាច​នឹង​ត្រូវ​រក​ឃើញ»។

លោក​ គឹម សុខ ​ថ្លែង​ថា៖ «រឿង​នយោបាយ​ដែល​ដោះស្រាយ​នៅក្នុង​លក្ខខណ្ឌ​​មិន​ស្មើភាព​គ្នា​គណបក្ស​កាន់​អំណាច​​នឹង​គាប​សង្កត់។ ​នៅ​ពេល​ដែល​ [គណបក្ស ​ប្រជាជន ​កម្ពុជា​] រក​មិន​ឃើញ​គន្លឹះ​មួយ​ដើម្បី​លើក​ទឹកចិត្ត​ដល់​គណបក្ស​ប្រឆាំង​ឲ្យ​គូ​ប្រជែង​ធ្វើ​តាម​អ្វី​ដែល​គេ [CPP] ចង់​បាន​នោះ​ [CPP] មិន​ងាយ​ឈោង​ទៅ​រក​ការ​ចរចា​ទេ»៕ NS

អត្ថបទគួរចាប់អារម្មណ៍