.jpg)
លោក សម រង្ស៊ី និងសហការីរបស់លោក។ ហ្វេសប៊ុក សម រង្ស៊ី
ភ្នំពញៈ លោក សម រង្ស៊ី ប្រធានស្ដីទីអតីតគណបក្សសង្គ្រោះជាតិដែលមានមូលដ្ឋាននៅក្រៅប្រទេសបានប្រាប់ដល់អន្តរជាតិដែលគោរពលទ្ធិប្រជាធិបតេយ្យ និងសិទ្ធិមនុស្សកុំឲ្យយកចិត្តទុកដាក់ចំពោះដីកាទាំងឡាយចេញដោយតុលាការកម្ពុជា។ អ្នកវិភាគយល់ថា លោក រង្ស៊ី គ្រាន់តែធ្វើដើម្បីទាក់ទាញចំណាប់អារម្មណ៍ប៉ុណ្ណោះ។
លោក រង្ស៊ី អតីតប្រធានគណបក្សសង្គ្រោះជាតិដែលត្រូវតុលាការកំពូលរំលាយកាលពីចុងឆ្នាំ ២០១៧ បានសរសេរនៅលើទំព័រហ្វេសប៊ុករបស់លោកកាលពីថ្ងៃសៅរ៍ថា៖ «ប្រទេសដែលគោរពគោលការណ៍លទ្ធិប្រជាធិបតេយ្យ និងសិទិ្ធមនុស្សសូមកុំយកចិត្តទុកដាក់ចំពោះដីកាទាំងឡាយចេញដោយតុលាការអាយ៉ងនៅក្រុងភ្នំពេញ ដែលជាឧបករណ៍នយោបាយរបស់របបផ្ដាច់ការ ហ៊ុន សែន»។
ការថ្លែងរបស់លោក រង្ស៊ី ទំនងមានការព្រួយបារម្ភក្នុងការធ្វើដំណើរចូលទៅក្នុងប្រទេសមួយចំនួនដែលមានបត្យាប័នជាមួយកម្ពុជា។
លោក រង្ស៊ី ថ្លែងថា៖ «ពីព្រោះខ្ញុំប្រហែលធ្វើដំណើរនៅក្នុងប្រទេសមិនសូវមានលទ្ធិប្រជាធិបតេយ្យមួយចំនួន»។
លោក រង្ស៊ី ថ្លែងក្នុងសំណេរជាភាសាអង់គ្លេសថា៖ «អង្គការសហប្រជាជាតិ សភាអាមេរិក សភាអឺរ៉ុប សភាសិទ្ធិមនុស្សអាស៊ាន និងអង្គការសិទ្ធិមនុស្សអន្តរជាតិដូចជាអង្គការលើក លែងទោសអន្តរជាតិ និងអង្គការឃ្លាំមើលសិទ្ធិមនុស្សអន្តរជាតិ អាចបញ្ជាក់បានថា ដីកាទាំងនេះត្រូវបានចេញដោយមានហេតុផលនយោបាយសុទ្ធសាធ ហើយបង្ហាញពីការរឹត ត្បិតកាន់តែអាក្រក់នៅកម្ពុជា ក្រោមការដឹកនាំផ្ដាច់ការ របស់លោក ហ៊ុន សែន»។
លោក រង្ស៊ី បានភ្ជាប់ជាមួយនូវរូបថត ១ សន្លឹកដែលមានមន្ត្រីជាន់ខ្ពស់អតីតគណបក្សសង្គ្រោះជាតិ ៧ នាក់ផ្សេងទៀតរួមទាំងរូបលោក។ មន្ត្រីទាំងនេះរួមមានលោក ឡុង រី លោក ម៉ែន សុថាវរិន្ទ លោក អេង ឆៃអ៊ាង លោកស្រី មូរ សុខហួរ លោក អ៊ូ ច័ន្ទឫទ្ធិ លោក តុ វ៉ាន់ចាន់ និងលោក ហូរ វ៉ាន់។ អ្នកទាំង ៨ នាក់ត្រូវបានតុលាការចេញដីកាចាប់ខ្លួនកាលពីខែមីនា ដោយជាប់ចោទបទ «រួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ដីកាចាប់ខ្លួនអ្នកទាំង ៨ ធ្វើឡើងក្រោយពេលលោក សម រង្ស៊ី និងមន្ត្រីទាំង ៧ រូបទៀតបានរៀបចំការប្រជុំមួយនៅទីក្រុង Lowell រដ្ឋ Massachusetts សហរដ្ឋអាមេរិកដើម្បីរៀបចំឲ្យមានការវិលត្រឡប់មកកម្ពុជាវិញរបស់លោក សម រង្ស៊ី។ កិច្ចប្រជុំនោះបានសម្រេចនូវផែនការមួយចំនួនដូចជា ការរៃអង្គាសប្រាក់ដើម្បីសម្រាប់ការវិលត្រឡប់មកវិញរបស់ លោក សម រង្ស៊ី ការបង្កើតបណ្តាញស្វាគមន៍លោក សម រង្ស៊ី បង្កើនការងារការទូត ផ្សព្វផ្សាយព័ត៌មានអំពីបញ្ហាក្នុងប្រទេសកម្ពុជា និងការសហការជាមួយអ្នកប្រជាធិបតេយ្យទាំងអស់។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានថ្លែងថា ការលើកឡើងរបស់លោក សម រង្ស៊ី គឺគ្រាន់តែជាការធ្វើឲ្យមានការចាប់អារម្មណ៍ពីសំណាក់អន្តរជាតិប៉ុណ្ណោះ។
លោក ភា ថ្លែងថា៖ «ទី១ គាត់ (រង្ស៊ី) គ្រាន់តែគោះទឹកឲ្យមានរលក ដើម្បីឲ្យមានការចាប់អារម្មណ៍លើគាត់។ ទី២ គាត់ក៏មានការបារម្ភដែរខ្លាចរដ្ឋាភិបាលកម្ពុជាដែលមានសន្ធិសញ្ញាបត្យាប័ន ឬមួយជាមួយប៉ូលិសអាំងទែរប៉ូល ព្រោះអ្នកទោសបើគាត់ចូលមកប្រទេសណាដែលមានសន្ធិសញ្ញាបត្យាប័នជាមួយប្រទេស កម្ពុជា គេអាចនឹងស្នើសុំធ្វើបត្យាប័នដើម្បីចាប់បញ្ជូនគាត់មកកម្ពុជាបាន»។
លោក ភា បន្តថា ការអំពាវនាវរបស់លោក រង្ស៊ី មិនមានឥទ្ធិពលអ្វីទៅដល់ប្រទេសផ្សេងៗ ឬសហគមន៍អន្តរជាតិទេព្រោះគ្រាន់តែជាទស្សនៈរបស់បុគ្គលម្នាក់ប៉ុណ្ណោះ ហើយអន្តរជាតិមិនអាចជួយបានទេ។
អ្នកវិភាគនយោបាយលោក ឡៅ ម៉ុងហៃ យល់ឃើញថា លោក សម រង្ស៊ី ព្យាយាមប្រើព្រួញ ១ បាញ់បានសត្វ ២។
លោក ឡៅ ម៉ុងហៃ ថ្លែងថា ទី១ គឺលោក រង្ស៊ី បានវាយប្រហារលើរដ្ឋាភិបាល ដោយលើកឡើងពីការរឹតត្បិត ដោយទាក់ទាញការចាប់អារម្មណ៍របស់សាធារណជនមកលើរូបលោក និងសហការី ហើយទី២ គឺដើម្បីបញ្ជាក់ប្រាប់ទៅសហគមន៍អន្តរជាតិថា ការចោទប្រកាន់លើពួកគេមានចរិតនយោបាយ ហើយសហគមន៍អន្តរជាតិគួរតែកុំយកចិត្តទុកដាក់លើដីកាចាប់ខ្លួនទាំងនោះ។
លោកបន្តថា ការធ្វើដូច្នេះប្រហែលជាអាចរារាំងមិនឲ្យមានការធ្វើបត្យាប័នណាមួយ ប៉ុន្តែការបារម្ភលើការធ្វើបត្យាប័ននេះទំនងជាក្តីបារម្ភទី ២ ប៉ុណ្ណោះ ពីព្រោះអ្នកដែលជាប់ឈ្មោះក្នុងដីកាចាប់ខ្លួនខ្លះជាពលរដ្ឋឬរស់នៅក្នុងប្រទេសដែលមិនមានកិច្ចព្រមព្រៀងបត្យាប័នជាមួយកម្ពុជា។
លោកបន្តថា៖ «អ្នកខ្លះទៀតជាពលរដ្ឋកម្ពុជា ប៉ុន្តែដំណើរការនៃការធ្វើបត្យាប័នត្រូវការចំណាយពេលវែង ហើយវាអាចបង្ហាញឲ្យឃើញកាន់តែខ្លាំងអំពីភាពស្របច្បាប់នៃរដ្ឋាភិបាលកម្ពុជា និងប្រព័ន្ធតុលាការ»៕
