.jpg)
លោក សម រង្ស៊ី និងតំណាងរាស្ត្រ ៣ រូបនៃសភាអឺរ៉ុប។ រូបថត ហ្វេសប៊ុក
ភ្នំពេញៈ សហភាពអឺរ៉ុបអាចនឹងបញ្ចប់កិច្ចព្រមព្រៀងជាមួយកម្ពុជាមែនឬយ៉ាងណា ក្រោយពីមានការរិះគន់ថាប្រទេសមួយនេះមានការរំលោភសិទ្ធិមនុស្ស បិទប្រព័ន្ធផ្សព្វផ្សាយឯករាជ្យ និងរំលាយគណបក្សសង្គ្រោះជាតិ ដែលជាបក្សប្រឆាំងដ៏ធំនោះ ព្រោះបើតាមអតីតប្រធានគណបក្សប្រឆាំងនេះ អះអាងថាសហភាពអឺរ៉ុបនឹងផ្តាច់ទំនាក់ទំនងកិច្ចព្រមព្រៀងជាមួយកម្ពុជា។
នៅលើបណ្តាញសង្គមដែលបានបង្ហោះកាលពីថ្ងៃទី ៥ ខែមិថុនាលោក សម រង្ស៊ី ដែលបច្ចុប្បន្នជាប្រធានចលនាសង្គ្រោះជាតិកំពុងនិរទេសខ្លួននៅក្រៅប្រទេសបានថ្លែងពីសភាអឺរ៉ុបនៅទីក្រុងប្រ៊ុចសែលប្រទេសបែលហ្ស៊ិកទីដែលលោកបានជួបជាមួយថ្នាក់ដឹកនាំនៃសហភាពអឺរ៉ុបនៅទីនោះថាថ្នាក់ដឹកនាំនៃសហភាពអឺរ៉ុបបានប្រាប់លោកថា របបលោកនាយករដ្ឋមន្ត្រី ហ៊ុន សែន បានធ្វើឲ្យដាច់ទំនាក់ទំនងកិច្ចព្រមព្រៀងជាមួយសហភាពអឺរ៉ុប ដោយសារថាបានរំលាយគណបក្សសង្គ្រោះជាតិមិនឲ្យចូលរួមការបោះឆ្នោត ហើយរៀបចំការបោះឆ្នោតក្លែងក្លាយ។
ថ្លែងផ្ទាល់ពីសភាអឺរ៉ុបតាមរយៈវីដេអូឃ្លីបជិត ២ នាទីលោក សម រង្ស៊ី អះអាងថា៖ «នៅសភាអឺរ៉ុបនេះ ខ្ញុំទើបតែបានជួបថ្នាក់ដឹកនាំនៃសហភាពអឺរ៉ុបដែលគេបានប្រាប់ខ្ញុំថា របបលោក ហ៊ុន សែន បានធ្វើឲ្យកិច្ចព្រមព្រៀងសហប្រតិបត្តិការរវាងសហភាពអឺរ៉ុប និងប្រទេសកម្ពុជាត្រូវផ្តាច់។ ពីព្រោះកិច្ចព្រមព្រៀងនេះតម្រូវឲ្យប្រទេសកម្ពុជាដើរតាមផ្លូវប្រជាធិបតេយ្យតែរបបលោក ហ៊ុន សែន បានរំលាយគណបក្សសង្គ្រោះជាតិមិនឲ្យគណបក្សសង្គ្រោះជាតិចូលរួមក្នុងការបោះឆ្នោត ហើយរៀបចំការបោះឆ្នោតក្លែងក្លាយលេងសើច»។
លោកបន្តថា៖ «គឺលោក ហ៊ុន សែន បានសម្លាប់លទ្ធិប្រជាធិបតេយ្យនៅកម្ពុជា ដូច្នេះលោក ហ៊ុន សែន គាត់ដាក់ខ្លួនគាត់ក្រៅច្បាប់របបគាត់ក្រៅច្បាប់នៃសហភាពអឺរ៉ុប។ សហភាពអឺរ៉ុបមិនអាចបន្តកិច្ចព្រមព្រៀងសហប្រតិបត្តិការជាមួយប្រទេសកម្ពុជាបានដូចមុនទៀតទេ។ កំហុសគឺដោយសារលោក ហ៊ុន សែន ប្រើអំណាចផ្តាច់ការសម្លាប់លទ្ធិប្រជាធិបតេយ្យ»។
ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជាដែលជាបក្សកាន់អំណាចមិនទាន់ជឿថាសហភាពអឺរ៉ុបបញ្ចប់កិច្ចព្រមព្រៀងជាមួយកម្ពុជានោះទេ ហើយថានេះគ្រាន់តែជាការកុហកពលរដ្ឋពីសំណាក់លោក សម រង្ស៊ី។ ទោះជាយ៉ាងណាលោកថាសហភាពអឺរ៉ុបនឹងមានការលំបាកក្នុងការផ្តាច់កិច្ចព្រមព្រៀងជាមួយកម្ពុជា ដោយសារថាមានប្រទេសមួយចំនួនដែលជាសមាជិកសហភាពអឺរ៉ុបមិនគាំទ្រការសម្រេចបែបនេះ។
លោកថ្លែងថា៖ «ទោះបីមានមតិយ៉ាងណាដែលជាជំហររបស់សហគមន៍អឺរ៉ុប ខ្ញុំយល់ថាជាសិទ្ធិរបស់គាត់ក្នុងការសម្តែងមតិដែលពាក់ព័ន្ធនឹងសភាពការណ៍នៅកម្ពុជា។ ក៏ប៉ុន្តែខ្លឹមសារនៃការសម្តែងមតិដូចដែលទណ្ឌិត សម រង្ស៊ី និយាយនោះខ្ញុំយល់ថា មិនស្របតាមសភាពការណ៍ពិតជាក់ស្តែងដែលកំពុងកើតមាននៅក្នុងព្រះរាជាណាចក្រកម្ពុជាទេ»។
លោកបន្ថែមថា៖ «ខ្ញុំយល់ថាអាហ្នឹងជាសិទ្ធិរបស់សហគមន៍អឺរ៉ុប ក៏ប៉ុន្តែខ្ញុំយល់ថាវាមានការលំបាកបន្តិចដោយសារថាសហគមន៍អឺរ៉ុបមានគោលការណ៍កុងសង់ស៊ីស។ ក្នុងនេះយើងឃើញថាមានបណ្តាប្រទេសមួយចំនួននៅសហគមន៍អឺរ៉ុបហ្នឹងនៅតែមានជំហរគាំទ្រទង្វើដ៏ត្រឹមត្រូវរបស់រាជរដ្ឋាភិបាលកម្ពុជា»។
ប្រធានក្រុមអ្នកវិភាគវ័យក្មេងលោក ហង្ស វិទូ ថ្លែងថាលោកមិនទាន់បានទទួលព័ត៌មានផ្លូវការណាមួយអំពីការផ្តាច់ទំនាក់ទំនងសហប្រតិបត្តិការរវាងកម្ពុជា និងសហគមន៍អឺរ៉ុបនោះទេ ប៉ុន្តែថាប្រសិនបើមានការសម្រេចបែបហ្នឹងមែន គឺនឹងមានបញ្ហាធ្ងន់ធ្ងរសម្រាប់មុខមាត់កម្ពុជាដូចជាការមិនទទួលស្គាល់លទ្ធផលបោះឆ្នោត និងការដាក់ទណ្ឌកម្មក្រោយការបោះឆ្នោត ព្រោះថាអឺរ៉ុបបានជួយកម្ពុជាតាំងពីឆ្នាំ ១៩៩៣ ដើម្បីលើកកម្ពស់លទ្ធិប្រជាធិបតេយ្យ។
លោកថា៖ «ព្រោះយើងដឹងហើយអឺរ៉ុបតែគេធ្វើការសម្រេចចិត្តទៅលើរឿងអីមួយគេមិនមែនសម្រេចចិត្តតែមួយប្រទេសទេគេមានសហគមន៍អឺរ៉ុបគេហ្នឹងធំ។ អ៊ីចឹងបើសិនជាមានការរើរុះមែនអាហ្នឹងជារឿងមួយដែលរដ្ឋាភិបាលត្រូវតែព្យាយាមក្នុងការដោះស្រាយបើមិនអ៊ីចឹងទេវាអាចប៉ះពាល់ធំមែនទែន»។
សហគមន៍អឺរ៉ុបប្រចាំកម្ពុជា ម្សិលមិញនៅមិនទាន់មានការបញ្ជាក់យ៉ាងណានៅឡើយទេ៕
