.jpg)
លោក សាប៊ុង និងមន្ត្រីបរិស្ថានក្នុងតំបន់ហាមឃាត់។ ហ្វេសប៊ុក សាប៊ុង
ព្រះសីហនុៈ លោក សុខ សុវណ្ណវឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់មកពីគណបក្សខ្មែរក្រោកចាត់ទុកតំបន់មួយក្នុងស្រុកព្រៃនប់ ខេត្តព្រះសីហនុជាតំបន់អបគមន៍ ក្រោយពីក្រុមសន្តិសុខឯកជន និងមន្ត្រីដែលមានឯកសណ្ឋានអនុរក្សនៃក្រសួងបរិស្ថានបានរារាំងដំណើរចូលទៅក្នុងតំបន់នោះដោយសង្ស័យថាមានការបង្ខាំងមនុស្ស។
លោក សាប៊ុង បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា កាលពីថ្ងៃសៅរ៍ លោកបានដឹកនាំក្រុមការងារ ១ ក្រុមដោយមានការចូលរួមពីមន្ត្រីនៃទីស្តីការគណៈរដ្ឋមន្ត្រី ហើយក៏មានលិខិតបេសកកម្មចេញដោយរដ្ឋាភិបាលត្រឹមត្រូវ ដើម្បីចុះទៅដល់ទីតាំងកើតហេតុ ១ កន្លែងដែលពលរដ្ឋរាយការណ៍មកថា អាជ្ញាធរបានប្រើប្រាស់ហិង្សា និងបង្ខាំងពលរដ្ឋចន្លោះពី ៣០ ទៅ ៥០ នាក់ស្ថិតនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ។
លោក សុវណ្ណវឌ្ឍនាសាប៊ុង ថ្លែងថា៖ «ហេតុការណ៍ដែលពលរដ្ឋបានរាយការណ៍មកនេះ ខ្ញុំមិនដឹងច្បាស់ថា ពិត ឬមិនពិតយ៉ាងណាទេ ដែលជាហេតុនាំឲ្យខ្ញុំត្រូវចុះទៅដល់ទីតាំងដែលប្រជាពលរដ្ឋអះអាងដើម្បីឲ្យបានដឹងការពិត»។
លោកបញ្ជាក់ថា ប៉ុន្តែមន្ត្រីបរិស្ថានថា ដីខាងក្នុងនេះជាតំបន់ឧទ្យានជាតិរាម មិនឲ្យចូលទេ គឺសន្តិសុខតំណាងក្រុមហ៊ុនគេថាដីនេះជាដីរបស់ក្រុមហ៊ុន មិនឲ្យចូលទេ។
លោកថ្លែងថា៖ «ខ្ញុំនិយាយថា ខ្ញុំមានលិខិតបេសកកម្មពីថ្នាក់ជាតិ ហេតុអ្វីខ្ញុំចូលមិនបាន? នេះជាទង្វើបំពានដោយចេតនារបស់មន្ត្រីពាក់ព័ន្ធក្នុងការព្យាយាមបិទបាំងការពិត និងបង្កើតចលនាអបគមន៍នៅទីនេះ។ ខ្ញុំផ្តោតជាងគេគឺរឿងអបគមន៍ ព្រោះថាក្នុងហ្នឹងធ្វើអីខ្លះ? ផលិតអី ធ្វើអ្វី ប្រព្រឹត្តបទល្មើសអ្វី? បានមិនឲ្យមន្ត្រីថ្នាក់ជាតិចូល»។
លោក សុវណ្ណវឌ្ឍនាសាប៊ុង បានអះអាងថាលោកនឹងរៀបចំឯកសារចំនួន ២ ច្បាប់ដាក់ជូនថ្នាក់ដឹកនាំក្រសួងមហាផ្ទៃ និងលោកនាយករដ្ឋមន្ត្រី ហ៊ុន សែន ដើម្បីពិនិត្យជុំវិញហេតុការណ៍ទាំងនោះ។
លោក ជួន វឿន តំណាងពលរដ្ឋដែលត្រូវបានគេបង្ខាំងបានឲ្យដឹងកាលពីម្សិលមិញថាកាលពីថ្ងៃទី ៣ មករា កន្លងទៅអាជ្ញាធរក្នុងតំបន់នេះបានប្រើប្រាស់គ្រឿងចក្រ និងកម្លាំងជាច្រើនមកវាយកម្ទេចផ្ទះ និងដំណាំរបស់ប្រជាពលរដ្ឋចំនួន ១៣៤ គ្រួសារក្នុងចេតនាលុបបំបាត់ភ័ស្តុតាងដែលប្រជាពលរដ្ឋបានកាន់កាប់ដីនេះចន្លោះពី ៥ ឆ្នាំ ទៅ ១០ ឆ្នាំ មកហើយ។ ក្នុងនោះពួកគេក៏បានប្រើហិង្សា និងបង្ខាំងបិទសិទ្ធិសេរីភាពពួកគេដោយមិនអាចចេញចូល និងធ្វើដំណើរបានឡើយ។
លោក វឿន ថ្លែងថា៖ «អាជ្ញាធរវាយកម្ទេចផ្ទះរបស់ពួកយើង ហើយមិនឲ្យពួកយើងចេញមិនឲ្យពួកយើងចូលទៅអាស្រ័យផលលើទីតាំងដែលមានដំណាំមានអីនោះទេ។ ប្រជាពលរដ្ឋយើង ខែនេះយើងត្រូវការបង្កបង្កើនផល ដំណាំរបស់យើង តែគេមិនឲ្យយើងចូលទៅទេតាំងពីដើមខែមករាមក»។
លោក ជួន វឿន បានឲ្យដឹងថាកាលពីថ្ងៃម្សិលមិញ ក្រៅពីបង្ខាំងពលរដ្ឋមិនឲ្យចូលចេញក្នុងតំបន់មានជម្លោះនោះក៏មានប្រជាពលរដ្ឋចំនួន ៣ នាក់ត្រូវបានអាជ្ញាធរឃាត់ខ្លួនផងដែរ ដែលលោកមិនដឹងថា ពួកគេមានសេរីភាពឬនៅទេ?
ក្រសួងបរិស្ថានបានចេញសេចក្តីប្រកាសព័ត៌មានមួយកាលពីម្សិលមិញដោយបានអះអាងថា ក្រសួងតែងបើកចំហចំពោះកិច្ចសហប្រតិបត្តិការទាំងអស់ដល់សមាជិកឧត្តមក្រុមប្រឹក្សាពិគ្រោះ និងផ្តល់យោបល់។ ប៉ុន្តែកិច្ចសហការត្រូវមានការជូនដំណឹង និងកំណត់ពីពេលវេលាជាក់លាក់ ទើបបានអាចចុះទៅបាន មិនមែនធ្វើឡើងភ្លាមៗ ដូច្នេះនោះទេ។
សេចក្ដីប្រកាសព័ត៌មានឲ្យដឹងថា៖ «ក្រសួងបរិស្ថាន ពិតជាមានការសោកស្តាយចំពោះទង្វើគ្មានការទទួលខុសត្រូវ និងភាពមិនយល់ដឹងអំពីរបៀបរបប និងនីតិវិធីនៃការបំពេញការងារក្នុងក្របខ័ណ្ឌនៃការងាររដ្ឋបាលរបស់ប្រធានគណបក្សខ្មែរក្រោករូបនេះដែលបង្ហាញពីចរិតក្រអឺតក្រទម និងប្រើប្រាស់ពាក្យសម្តីប្រមាថ មួលបង្កាច់ ដោយគ្មានភ័ស្តុតាងជាដើម»។
សេចក្ដីប្រកាសព័ត៌មានបានអះអាងផងដែរថា ដីនៅតំបន់នោះត្រូវបានចុះបញ្ជីរដ្ឋរួចហើយ។ កាលពីឆ្នាំ ២០១៦ រដ្ឋបាលខេត្តព្រះសីហនុបានបង្កើតក្រុមការងារចម្រុះ ចុះវាស់វែង និងកំណត់អត្តសញ្ញាណក្បាលដីរបស់ប្រជាពលរដ្ឋដែលបាននិងកំពុងស្នាក់នៅ និងអាស្រ័យផលលើដីដែលប៉ះពាល់ក្នុងតំបន់វិនិយោគអភិវឌ្ឍន៍របស់ក្រុមហ៊ុន អេវើ ហ្គ្រីន និងក្រុមហ៊ុន យុះ ចៀ។
លោក ឃាង ភារម្យ អ្នកនាំពាក្យសាលាខេត្តព្រះសីហនុថ្លែងពីម្សិលមិញដោយបានបដិសេធការចោទប្រកាន់លើការបង្ខាំងមនុស្សខុសច្បាប់នេះ។ «បើមានការបង្ខាំង អាជ្ញាធរខេត្តធ្វើមុនគាត់ទៀត»៕
