ភ្នំពេញៈ រដ្ឋមន្ត្រីក្រសួងបរិស្ថានលោក សាយ សំអាល់ បានអះអាងថា ការរៀបចំទីក្រុងឱ្យមាននិរន្តរភាពគឺត្រូវរៀបចំបរិស្ថានឱ្យបានល្អដោយថ្លែងថាការសាងសង់អគារដែលបង្កលម្អងនៅក្នុងកំហាប់ខ្យល់ក៏ជាការបំពុលបរិស្ថាន ១ ផងដែរ ថ្វីបើកន្លងមកក្រសួងនេះធ្លាប់បានបញ្ជាក់ថាប្រភពនៃការបំពុលបរិស្ថានកើតពីចំហេះ ឬកត្តាផ្សេងទៀតក៏ដោយ។
ថ្លែងនៅក្នុងពិធីសម្ពោធដាក់ឱ្យប្រើប្រាស់រថយន្តត្រួតពិនិត្យគុណភាពខ្យល់នៅចំណតរថយន្តខាងត្បូង អគារមរតកតេជោពីម្សិលមិញរដ្ឋមន្ត្រីក្រសួងបរិស្ថានលោក សាយ សំអាល់ បានលើកឡើងថា៖ «ដើម្បីប្រែក្លាយទីក្រុងឱ្យទៅជាទីក្រុងឆ្លាតវៃប្រកបដោយនិរន្តរភាព យើងត្រូវរៀបចំបរិស្ថានធ្វើយ៉ាងណាឱ្យមានភាពល្អប្រសើរ ហើយយើងចង់ដឹងថា តើនៅភ្នំពេញទីណាមានខ្យល់ល្អ ទីណាមានខ្យល់មិនល្អ ហេតុនេះទើបយើងបំពាក់សម្ភារត្រួតពិនិត្យគុណភាពខ្យល់»។
លោកបានបញ្ជាក់ថា៖ «រាជធានីភ្នំពេញក៏ដូចជាក្រុងព្រះសីហនុអ៊ីចឹងដែរ ខេត្តព្រះសីហនុឥឡូវថយច្រើនហើយពាក់ព័ន្ធនឹងការបំពុលខ្យល់ ប៉ុន្តែកាលពីមុនអគារច្រើនឡើងធ្វើឱ្យមានការបង្កលម្អងនៅក្នុងកំហាប់ខ្យល់ដល់ពេលសាងសង់ហើយវាបានធូរស្បើយមួយចំនួនក្នុងការបំពុលខ្យល់ដោយការធ្វើអគារ»។
រថយន្តត្រួតពិនិត្យគុណភាពខ្យល់ដែលក្រសួងបរិស្ថានសម្ពោធដាក់ឱ្យប្រើបាស់នេះត្រូវបានលោក សាយ សំអាល់ ផ្តល់ឈ្មោះថា វិស្ណុ ត្រួតពិនិត្យគុណភាពខ្យល់។ បើតាមលោក សំអាល់ ការដាក់ឈ្មោះបែបនេះដោយយល់ឃើញថា វិស្ណុជាអ្នកការពារ អ្នកឆ្មាំ អ្នកចាំយាម ចំណែកមន្ត្រីបរិស្ថានជាអ្នកការពារ និងចាំយាមក្នុងរឿងបរិស្ថាន។
លោក ជា ស៊ីណា អគ្គនាយកនៃអគ្គនាយកដ្ឋានគាំពារបរិស្ថានបានឱ្យដឹងថា រថយន្តត្រួតពិនិត្យគុណភាពខ្យល់ថ្មីនេះជារថយន្តចល័តដំបូងបង្អស់របស់ក្រសួងបរិស្ថានទទួលបានមកពីរាជរដ្ឋាភិបាល។ វាមានសមត្ថភាពអាចត្រួតពិនិត្យចំនួន ១៦ ប៉ារ៉ាម៉ែត្រ និងអាចត្រួតពិនិត្យភាគល្អិតនៃខ្យល់ដែលមានវិជ្ឈមាត្រ ១ មីក្រូម៉ែត្រ ហៅថា PM.1 អាចឱ្យក្រសួងមានលទ្ធភាពគ្រប់គ្រាន់ក្នុងការតាមដានពិនិត្យគុណភាពខ្យល់នៅគ្រប់ទីកន្លែងក្នុងប្រទេសសម្រាប់ប្រមូលទិន្នន័យគុណភាពខ្យល់ផ្សព្វផ្សាយជូនដល់សាធារណជនឱ្យកាន់តែសុក្រឹត និងទាន់ពេល។
បើតាមលោក ស៊ីណា តាមរយៈកិច្ចសហប្រតិបត្តិការរវាងក្រសួងបរិស្ថានកម្ពុជា និងក្រសួងអេកូឡូស៊ី និងបរិស្ថានរបស់ចិននាចុងឆ្នាំ ២០២០ នេះ កម្ពុជានឹងទទួលបានជំនួយជាស្ថានីយត្រួតពិនិត្យគុណភាពខ្យល់ចំនួន ១០ គ្រឿង និង Air Quality Monitoring Center ដើម្បីឱ្យក្រសួងអាចតាមដាន និងព្យាករគុណភាពខ្យល់នៅកម្ពុជាប្រកបដោយសុក្រឹតភាព។
មន្ត្រីក្រសួងបរិស្ថានរូបនេះបានឱ្យដឹងថា នៅក្នុងអំឡុងដើមឆ្នាំ ២០២០ បញ្ហាគុណភាពខ្យល់សាធារណៈត្រូវបានប្រជាពលរដ្ឋធ្វើការតាមដានដោយយកចិត្តទុកដាក់ពិសេសបញ្ហាកំណើនភាគល្អិតនៃខ្យល់ វិជ្ឈមាត្រតូចជាង ២,៥ មីក្រូម៉ែត្រដែលហៅថា PM2.5 នៅក្នុងបរិយាកាសខ្យល់។
លោក ស៊ីណា ថ្លែងថា៖ «ឆ្លើយតបការព្រួយបារម្ភរបស់ប្រជាពលរដ្ឋ អគ្គនាយកដ្ឋានគាំពារបរិស្ថានបានយកចិត្តទុកដាក់ បង្កើនការតាមដានគុណភាពខ្យល់សាធារណៈ និងកំណត់វិធានការទប់ស្កាត់ និងកាត់បន្ថយការបំពុលខ្យល់ជាលទ្ធផលមកទល់ពេលនេះ យើងបានបំពាក់ឧបករណ៍តាមដានគុណភាពខ្យល់ស្វ័យប្រវត្តិចំនួន ៤៩ គ្រឿង រាជធានីភ្នំពេញ ១១ គ្រឿង និងខេត្តចំនួន ២៨ គ្រឿង ហើយនឹងត្រូវបំពាក់បន្តបន្ថែមចំនួន ១០ គ្រឿង»។
តាមលទ្ធផលនៃការអង្កេតតាមដានគុណភាពខ្យល់ពីស្ថានីយត្រួតពិនិត្យ គុណភាពខ្យល់ដែលក្រសួងបរិស្ថានបានដំឡើងនៅតាមបណ្តារាជធានីខេត្តទូទាំងប្រទេសបង្ហាញថា ស្ថានភាពគុណភាពខ្យល់មានការធ្លាក់ចុះ គួរឱ្យបារម្ភ ជាពិសេសកំហាប់ប៉ារ៉ាម៉ែត្រ ភាគល្អិតនិចល PM10 និង PM2.5 មានការកើនឡើងលើសកំណត់ស្តង់ដា ដែលជាហានិភ័យបង្កការប៉ះពាល់ចំពោះសុខភាពប្រជាពលរដ្ឋ។
យោងតាមសេចក្តីជូនដំណឹងរបស់ក្រសួងបរិស្ថានពីថ្ងៃ ១៧ មករា ឆ្នាំនេះបានបញ្ជាក់ថា ប្រភព និងសកម្មភាពសំខាន់ៗដែលបង្កឱ្យមានកំហាប់ភាគល្អិតនិចល PM10 និង PM2.5 មានការកើនឡើងមានជាអាទិ៍ ការបញ្ចេញផ្សែងពីរោងចក្រឧស្សាហកម្មពីយានយន្តប្រើប្រាស់ប្រេងម៉ាស៊ូត និងពីចំហេះឥន្ធនៈផ្សេងទៀត ភ្លើងឆេះព្រៃ ការដុតរានព្រៃ ការដុតវាលស្មៅ ការដុតគល់ជញ្ជ្រាំង ការដុតសំរាម ការដុតសំណល់រឹងនៅតាមទីវាល និងទីលានចាក់សំណល់ការដ្ឋានសំណង់ជាដើម៕