.jpg)
លោក សុខ ឥសាន អ្នកនាំពាក្យគណបក្សប្រជាជន។ ភ្នំពេញ ប៉ុសិ៍្ត
ភ្នំពេញៈ អ្នកនាំពាក្យគណបក្សកាន់អំណាច គឺគណបក្សប្រជាជនកម្ពុជា លោក សុខ ឥសាន បានថ្លែងថា លោកនាយករដ្ឋមន្ត្រី ហ៊ុន សែន នឹងមិនចរចាជាមួយលោក សម រង្ស៊ី ប្រធានស្ដីទីគណបក្សប្រឆាំងដែលមានមូលដ្ឋាននៅក្រៅប្រទេសនោះទេ ព្រោះលោក សម រង្ស៊ី មិនមានឋានៈអ្វីដែលមកចង់ចរចាជាមួយគណបក្សប្រជាជនទេ ហើយក៏មិនមានអ្នកណាទទួលស្គាល់ថាលោកជាប្រធាន ឬមិនជាប្រធានគណបក្សដែលត្រូវរំលាយទៅហើយ។
លោក ឥសាន ថ្លែងថា លោក សម រង្ស៊ី មានរបៀបនយោបាយកម្រិតខ្ពស់ «គឺចាញ់ដល់សន្លប់ហើយលើកដៃសុំចរចា»។ លោកបន្តថា៖ «សម្តេច ហ៊ុន សែន មិនហ៊ានជួបចរចា តាមការពិតសម្តេចតេជោខ្ពើមជួប ហើយគ្មានអីត្រូវជួបអាមនុស្សក្រៅសង្គមបែបនេះ»។
លោក សម រង្ស៊ី មិនអាចសុំការអត្ថាធិប្បាយបានទេកាលពីថ្ងៃចន្ទម្សិលមិញ។ ប៉ុន្តែកាលពីថ្ងៃសៅរ៍លោកបានបង្ហោះវីដេអូឃ្លីបដែលជាបទសម្ភាសរបស់លោកជាមួយវិទ្យុអាស៊ីសេរី។ ក្នុងបទសម្ភាសនោះ លោក សម រង្ស៊ី ត្រូវបានសួរអំពីការវិលត្រឡប់ទៅកម្ពុជាវិញ ហើយថា តើនឹងមានការចរចាជាមួយបក្សកាន់អំណាចដែរឬទេ? ឬមួយមានតែការធ្វើបាតុកម្មប្រឆាំងនឹងបក្សកាន់អំណាច?។
លោក រង្ស៊ី ថ្លែងថា៖ «យើងត្រៀមខ្លួន យើងចង់រកដំណោះស្រាយសន្តិវិធី ហើយយើងប្រើតែមធ្យោបាយអហិង្សា។ តែយើងមិនអាចនៅស្ងៀមទាល់តែគេព្រមចរចាជាមួយយើង ឥឡូវនេះគេអត់ចរចាជាមួយយើង គេរំលាយយើងគេចាប់ពួកយើងដាក់គុក គេអត់មានចង់ចរចាទេ គេមានតែចង់ធ្វើបាបយើងថែមទៀត។ ដូច្នេះយើងត្រូវរកផ្លូវអី រកវិធានការដើម្បីជំរុញដោះស្រាយដោយសន្តិវិធី ទាល់តែយើងមានកម្លាំងរបស់យើងខ្លាំងក្លា ឲ្យគេយកចិត្តទុកដាក់ ឲ្យគេព្រួយបារម្ភខ្លះទៅបានគេចរចាជាមួយយើង»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា តាមយុទ្ធសាស្ត្រសង្គ្រាម ឬនយោបាយ ការចរចាកើតឡើងលុះត្រាតែភាគីទាំងសងខាងមានកម្លាំងស្មើគ្នា។
លោកថ្លែងថា៖ «តើលោក សម រង្ស៊ី មានអំណាចអីទៅចរចាជាមួយនាយករដ្ឋមន្ត្រី ហ៊ុន សែន គឺគាត់អត់មាន។ ដូច្នេះគ្មានលទ្ធភាពអីដែលចរចាទេ គាត់មកក្នុងនាមទណ្ឌិត តែមកគឺគេចាប់ដាក់គុកហើយ។ អ៊ីចឹងការចរចាណាមួយប្រហែលអត់មានទេ»។
លោកបន្តថា៖ «បើគាត់មានឆន្ទៈចរចា គាត់មិនត្រូវដើរផ្លោងពាក្យសម្ដី សុទ្ធតែមកចាប់ ហ៊ុន សែន មកផ្ដួលរំលំហ៊ុន សែន អំពាវនាវឲ្យកងប្រដាប់អាវុធងាកមកប្រឆាំង ហ៊ុន សែន។ អ៊ីចឹងមានន័យថា គាត់គ្មានគំនិតចរចាទេ គាត់គ្រាន់តែនិយាយដើម្បីទាញការចាប់អារម្មណ៍ពីមហាជន ឬចង់បង្ហាញថាគាត់ជាអ្នកសន្តិភាព អ្នកសន្តិវិធី តែតាមពិតគាត់ជាមនុស្សហិង្សាដោយពាក្យសម្ដី បើហិង្សាដោយពាក្យសម្ដី គ្មានការអង្គុយចរចាគ្នាទេ»។
លោក មាស នី អ្នកវិភាគនយោបាយថ្លែងថា ក្នុងស្ថានភាពបច្ចុប្បន្នដែលបក្សប្រឆាំង CNRP មិនមានឥទ្ធិពលនោះ មិនមានការចរចាទេព្រោះគណបក្សកាន់អំណាចត្រូវការពេលវេលារង់ចាំមើលអតីតបក្សប្រឆាំងសិន។
លោកថ្លែងថា៖ «រឿងចរចានោះ វាអាចមាននៅខាងមុខឬមិនមាន ខ្ញុំមិនទាន់អាចទស្សន៍ទាយទេ តែកាលៈទេសៈបច្ចុប្បន្នមិនទាន់ទៅរួចទេ ព្រោះក្នុងពេលនេះ គណបក្សកាន់អំណាចហាក់មិនច្បាស់លាស់ខ្លួនឯងនៅឡើយថាតើ គណបក្សប្រឆាំងវាស្រុតទ្រុឌទ្រោមដល់ប៉ុនណា ហើយអាចឲ្យវិលមកវិញបានទេ។ ហើយបើវិលមកវិញ ហើយការបោះឆ្នោតមិនអាចឈ្នះ នោះទើបអាចប្រថុយបាន។ រឿងសំខាន់គឺថា ការអនុញ្ញាតឲ្យបក្សប្រឆាំងវិលមកវិញ មានន័យថាជាការធ្វើអត្តឃាតខ្លួនឯងរបស់គណបក្សកាន់អំណាច»។
លោកបញ្ជាក់ថា រឿងដែលសំខាន់នាពេលនេះគឺពលរដ្ឋរង់ចាំមើលថា តើគណបក្សមួយណាដែលគិតរឿងជាតិពិតប្រាកដ នោះគឺការព្យាយាមធ្វើយ៉ាងណាកុំឲ្យបាត់បង់ប្រព័ន្ធអនុគ្រោះពន្ធ EBA ដែលអាចធ្វើឲ្យប៉ះពាល់ដល់កម្មករកម្មការិនីប្រមាណ ៨០ ម៉ឺននាក់។
លោកថ្លែងថា៖ «បើគណបក្សណាមួយមិនខ្វល់រឿងការព្យួរ EBA បានន័យថាគណបក្សនោះមិនបានគិតពីរឿងជាតិទេ គិតតែពីប្រយោជន៍បក្សរបស់ខ្លួនឯង។ អ៊ីចឹងខ្ញុំគិតថា ពលរដ្ឋខ្មែរកំពុងរង់ចាំមើលជំហររបស់គណបក្សនយោបាយនាពេលនេះ»៕
