ភ្នំពេញៈ លោក សុន ឆ័យ អតីតតំណាងរាស្ត្រ អតីតគណបក្សសង្គ្រោះជាតិ និងអតីតមន្ត្រីបក្ស ២ រូបទៀត ត្រូវបានព្រះមហាក្សត្រផ្ដល់នីតិសម្បទាធ្វើនយោបាយឡើងវិញតាមការស្នើសុំ ប៉ុន្តែបន្តរក្សាស្ថិតនៅក្នុងភាពស្ងៀមស្ងាត់។
ព្រះករុណាព្រះបាទសម្ដេចព្រះបរមនាថនរោត្តម សីហមុនី កាលពីថ្ងៃព្រះហស្បតិ៍សប្ដាហ៍មុនបានផ្ដល់នីតិសម្បទាឡើងវិញដល់អតីតតំណាងរាស្ត្របក្សប្រឆាំង ១ រូប គឺលោក សុន ឆ័យ និងមន្ត្រីបក្ស ២ រូបទៀតរួមមានលោក វ៉ា សាម៉ុន និង លោក តាវ គឹមឈន។ ការផ្ដល់សិទ្ធិនយោបាយឡើងវិញនេះធ្វើឡើងតាមការទូលថ្វាយរបស់លោកនាយករដ្ឋមន្ត្រី ហ៊ុន សែន បន្ទាប់ពីអ្នកទាំង ៣ បានស្នើសុំសិទ្ធិនយោបាយឡើងវិញកាលពីថ្ងៃទី ២៧ សីហា។
សម្រាប់លោក សុន ឆ័យ ព្រះរាជក្រឹត្យរបស់ព្រះមហាក្សត្រចែងយ៉ាងដូច្នេះថា៖ «ត្រូវបានផ្ដល់នីតិសម្បទាឡើងវិញឲ្យឈ្មោះ សុន ឆ័យ ភេទប្រុសកើតថ្ងៃទី ១ មករា ឆ្នាំ ១៩៥៦ ដែលត្រូវបានហាមឃាត់មិនឲ្យធ្វើសកម្មភាពនយោបាយសម្រាប់រយៈពេល ៥ ឆ្នាំតាមអំណាចសាលដីកាលេខ ៣៤០ (ឆ) ចុះថ្ងៃទី ១៦ វិច្ឆិកា ឆ្នាំ ២០១៧ របស់តុលាការកំពូល»។
កាលពីថ្ងៃទី ២៧ ខែសីហា លោក សុន ឆ័យ និងអតីតមន្ត្រីបក្សប្រឆាំងបានសរសេរលិខិតទៅលោក ស ខេង រដ្ឋមន្ត្រីក្រសួងមហាផ្ទៃដោយស្នើសុំនីតិសម្បទាធ្វើនយោបាយឡើងវិញ។ ប៉ុន្តែលិខិតនោះមិនបានបញ្ជាក់ថា លោកនឹងធ្វើអ្វីបន្តទៀត បន្ទាប់ពីបានសិទ្ធិនេះទេ។
លោក ផាត សុផានិត អ្នកនាំពាក្យក្រសួងមហាផ្ទៃបានឲ្យដឹងថា គិតចាប់ពីមានការធ្វើវិសោធនកម្មច្បាប់ស្ដីពីនយោបាយកាលពីខែមករា ឆ្នាំ ២០១៩ មក អ្នកដែលត្រូវបានហាមឃាត់ធ្វើសកម្មភាពនយោបាយចំនួន ១២ រូបក្នុងចំណោម ១១៨ រូប បានស្នើសុំ និងទទួលបានសិទ្ធិធ្វើនយោបាយឡើងវិញ។
គណបក្សនយោបាយថ្មីចំនួន ២ ត្រូវបានបង្កើតដោយសមាជិកអតីតគណបក្សសង្គ្រោះជាតិគឺគណបក្សខ្មែរអភិរក្សនិយមរបស់លោក រៀល ខេមរិន្ទ និងគណបក្ស ខ្មែរស្រឡាញ់ជាតិរបស់លោក ជីវ កត្តា និងសមាជិកដទៃទៀត។ ថ្មីៗនេះលោក អ៊ូ ច័ន្ទរ័ត្ន ក៏គ្រោងនឹងបង្កើតគណបក្សនយោបាយថ្មីមួយទៀតដើម្បីចូលរួមបោះឆ្នោតនាពេលខាងមុខ។
លោក អ៊ូ ច័ន្ទរិទ្ធិ អតីតតំណាងរាស្ត្របក្សប្រឆាំងដែលពេលនេះកំពុងស្ថិតនៅក្រៅប្រទេសបានថ្លែងប្រាប់ពីម្សិលមិញថា៖ «និយាយដោយស្មោះ ខ្ញុំមានការសោកស្ដាយចំពោះអ្នកដែលបានទៅស្នើសុំសិទ្ធិធ្វើនយោបាយឡើងវិញ។ ចំពោះការបង្កើតគណបក្សថ្មី ឬការចូលជាមួយគណបក្សភ្លើងទៀននោះ ខ្ញុំអត់ដឹងពីជំហររបស់ពួកគាត់ទេ ព្រោះយើងមិនសូវមានការប្រាស្រ័យទាក់ទងគ្នា»។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលោក គិន ភា បានថ្លែងពីម្សិលមិញថា ការស្នើសុំសិទ្ធិធ្វើនយោបាយវិញនេះ ជាជម្រើសតែ ១ គត់ដែលពួកគាត់អាចចូលរួមក្នុងសកម្មភាពនយោបាយវិញបានដើម្បីប្រមូលបំណែកគណបក្សសង្គ្រោះជាតិដែលបែកបាក់ឲ្យមកដើរតាមគន្លងនយោបាយថ្មីមួយ។
លោកនិយាយថា៖ «តិច ឬច្រើន វាបង្ហាញពីការបែកខ្ញែកគ្នាក្នុងចំណោមអតីតអ្នកដឹកនាំសង្គ្រោះជាតិដែលបែកខ្ញែករួចស្រេចទៅហើយ គឺបែកខ្ញែកក្នុងសតិអារម្មណ៍ និងយុទ្ធសាស្ត្រនយោបាយ»៕
វីដេអូ៖