ភ្នំពេញៈ មន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់កាលពីម្សិលមិញបានអះអាងថា បរិស្ថានតំបន់ឆ្នេរនៅក្នុងខេត្តព្រះសីហនុត្រូវបានសម្អាតរួចរាល់សម្រាប់អ្នកទេសចរជាតិ និងអន្តរជាតិ ក្រោយពីសមត្ថកិច្ចចាត់វិធានការរៀបចំរបៀបរៀបរយមិនឲ្យមានប្រព័ន្ធលូបង្ហូរទឹកកខ្វក់ចូលសមុទ្រ។
នៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងរៀបចំដែនដី នគរូបនីយកម្ម និងសំណង់» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅទីស្តីការគណៈរដ្ឋមន្ត្រីកាលពីម្សិលមិញ លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់បានថ្លែងឲ្យដឹងថា ឆ្នេរឯករាជ្យ ឆ្នេរអូរឈើទាល ឆ្នេរអូរត្រេះគឺមិនមានស្ថានភាពទឹកខ្មៅស្អុយហូរចូលសមុទ្រដូចកាលពីមុនទៀតទេ។
លោក សេង ឡូត បានបញ្ជាក់ថា៖ «យើងបានដោះស្រាយបញ្ហានេះ ប្រកបដោយជោគជ័យដោយបានកសាងស្ថានីយបូមទឹកកខ្វក់ បញ្ច្រាស់យកទៅដាក់នៅក្នុងអាងដែលបានធ្វើចម្រោះហើយ (ទំហំ) ១៦ ហិកតាដែលមាន ៤ ស្ថានីយ។ ដូច្នេះពេលមានបង្ហូរមក គឺមិនហូរចូលសមុទ្រទេគឺយើងបូមបញ្ច្រាស់ទៅទុកនៅ (ស្ថានីយ ) ហើយបច្ចុប្បន្ននេះកំពុងសិក្សាថាក្នុងស្ថានីយទាំង ៤ ដែលបានរៀបចំនេះកំពុងសិក្សាឲ្យមានលទ្ធភាពចម្រោះនៅនឹងកន្លែងតែម្តង ដើម្បីកាត់បន្ថយចំណាយ ព្រោះការបូមនេះយើងត្រូវការចំណាយប្រេង។ ពេលយើងចម្រោះនៅនឹងកន្លែង ពេលលែងកខ្វក់ទៅ យើងបង្ហូរចូលសមុទ្របាន»។
លោក ឡូត បានថ្លែងថាបញ្ហាកខ្វក់ដែលកើតចេញពីការសាងសង់រំលោភលើតំបន់ឆ្នេរដែលធ្លាប់មានកាលពីមុនឆ្នាំ ២០២០ ក៏ត្រូវបានចាត់វិធានការយ៉ាងតឹងរ៉ឹងក្នុងការលុបបំបាត់ដោយកំណត់ឲ្យមានការរុះរើចេញរួចរាល់ហើយ។
លោក ឡូត ថ្លែងថា៖ «យើងដើររហូតតាមឆ្នេរ គ្មានទើសអ្វីទៀតទេ»។
លោក សេង ឡូត បានអះអាងថា ឆ្នេរសាធារណៈរបស់រដ្ឋសម្រាប់បម្រើដល់សាធារណជនទូទៅចូលទៅកម្សាន្ត និងត្រូវកែលម្អឲ្យស្របតាមខ្លឹមសារដែលបានកំណត់ថា កម្ពុជាគឺជាសមាជិកក្លិបឆ្នេរសមុទ្រស្អាតនៅលើសកលលោក។
លោក សន ចាន់ដារ៉ា សមាជិកនៃអតីតអង្គការមាតាធម្មជាតិដែលតែងឃ្លាំមើលលើបញ្ហាបរិស្ថានបានគាំទ្រជំហររបស់រដ្ឋាភិបាលក្នុងការលុបបំបាត់បាតុភាពអាក្រក់ ដែលជះឥទ្ធិពលដល់ឆ្នេរសមុទ្រ និងសមុទ្រកម្ពុជា។
លោកថ្លែងថា៖ «(ខ្ញុំ) ស្នើដល់រដ្ឋាភិបាល និងក្រសួងពាក់ព័ន្ធ គួរបង្កើនប្រសិទ្ធភាពបន្ថែមទៀតក្នុងការទប់ស្កាត់ការបង្ហូរទឹកកខ្វក់រួមទាំងការរំលោភបំពានយកតំបន់ឆ្នេរគឺគួរតែមានវិធានការឲ្យបានតឹងរ៉ឹងតំបន់ឆ្នេរគ្រប់ខេត្ត»៕