រតនគិរី មេបញ្ជាការកងរាជអាវុធហត្ថលើផ្ទៃប្រទេសនិងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិលោក សៅ សុខា នៅថ្ងៃទី ៨ សីហា នេះ បានប្រាប់មន្ត្រីកងរាជអាវុធហត្ថទាំងអស់ និងក្រុមគ្រួសារកុំយកខ្លួនទៅពាក់ព័ន្ធនឹងបទល្មើសព្រៃឈើទោះឈើមានច្បាប់ឬល្មើសច្បាប់ក៏ដោយ ខណៈការត្រួតពិនិត្យកំពុងដំណើរការ ។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសនិងជាអ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិបានថ្លែងនៅថ្ងៃ ៨ សីហានេះ ថា ខណៈលោក សៅ សុខា បានជួបសំណេះសំណាលជាមួយមន្ត្រីកងរាជអាវុធហត្ថខេត្តរតនគិរីលោកបានផ្ដាំកុំឲ្យមន្ត្រី និងក្រុមគ្រួសារពាក់ព័ន្ធជាមួយបទល្មើសព្រៃឈើទោះឈើមានច្បាប់ឬល្មើសច្បាប់ក៏ដោយ។
លោកបន្តថា លោក សៅ សុខា នឹងបន្តដឹកនាំសម្របសម្រួលចុះត្រួតពិនិត្យ និងស្តាប់សេចក្តីរាយការណ៍អំពីការទប់ស្កាត់បង្ក្រាបបទល្មើសព្រៃឈើតាមបណ្តាខេត្តត្បូងឃ្មុំ ក្រចេះ មណ្ឌលគិរី និងខេត្តរតនគិរី ចាប់ពីថ្ងៃទី ៥ ដល់ថ្ងៃទី ៨ ខែ សីហា ហើយគ្រោងនឹងបន្តដំណើរទៅខេត្តស្ទឹងត្រែងទៀត។
លោកបន្ថែមថា លោកនាយឧត្តមសេនីយ៍បានដាក់ចេញវិធានការបន្ទាន់ និងការងារបន្តជាពិសេសឲ្យមន្ត្រីរដ្ឋបាលព្រៃឈើអនុវត្តនីតិវិធីត្រឹមត្រូវដោយត្រូវត្រួតពិនិត្យណែនាំក្រុមហ៊ុនឲ្យអនុវត្តតាមកិច្ចសន្យាកិច្ចព្រមព្រៀង និងសហការឲ្យបានល្អតាមច្បាប់។
លោក អេង ហ៊ី បន្តថា ក្នុងនោះត្រូវរួបរួមគ្នាចុះល្បាតពួនស្ទាក់តាមយន្តការគណៈបញ្ជាការឯកភាពរដ្ឋបាលខេត្ត ក្រុង ស្រុក សំខាន់មន្ត្រីជំនាញទាំង ២ រដ្ឋបាលព្រៃឈើ បរិស្ថាន ត្រូវរៀបចំផែនការដឹកនាំអនុវត្តនិងមានការដឹកនាំត្រួតពិនិត្យ ពីសំណាក់ប្រធានគណៈបញ្ជាការឯកភាពនិងបន្តខិតខំប្រឹងប្រែងទប់ស្កាត់និងបង្ក្រាបបទល្មើសព្រៃឈើ។
លោកថា៖ «មធ្យោបាយដែលកែច្នៃសម្រាប់តែបំផ្លាញឈើត្រូវតែបន្តដុតបំផ្លាញចោលរីឯមធ្យោបាយប្រើប្រាស់ជាប្រយោជន៍បានរក្សាទុកនិងឈើដែលរឹបអូសការពារកុំឲ្យបាត់បង់ កុំឲ្យឆេះ រក្សាទុករង់ចាំការសម្រេច»។
លោក សយ សូណា ប្រធានមន្ទីរកសិកកម្ម រុក្ខាប្រមាញ់ និងនេសាទខេត្តរតនគិរី បានថ្លែងថា មន្ត្រីជំនាញខេត្ត បានប្រជុំជាមួយនាយឧត្តមសេនីយ៍ សៅ សុខា ក្នុងអំឡុងពេលលោកបានចុះត្រួតពិនិត្យការងារតាមបណ្ដាខេត្ត។ ក្នុងនោះ លោកបានផ្ដល់អនុសាសន៍មួយចំនួនដល់មន្ត្រីខេត្តរតនគិរី។
លោកថា៖ «គាត់ប្រាប់មន្ត្រីថ្នាក់ខេត្តរតនគិរីយើង ត្រូវពង្រឹងការងារបន្ថែមទៀត ក្នុងនោះ គាត់សង្កត់ធ្ងន់ថា ឲ្យយើងហ្នឹងផ្ដោតលើការអនុវត្តច្បាប់យ៉ាងតឹងរ៉ឹងចំពោះបុគ្គលល្មើសច្បាប់»។
លោក ឌិន ខន្នី មន្ត្រីសម្របសម្រួលផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុកប្រចាំខេត្តរតនគិរីបានថ្លែងថាសកម្មភាពកាប់បំផ្លាញព្រៃឈើនៅខេត្តនេះនៅតែបន្តមាន ប៉ុន្ដែមិនសូវមានជាទ្រង់ទ្រាយធំទេ។ប៉ុន្តែលោកក៏មិនទាន់ទទួលព័ត៌មានពីស្ដីពីការបិទទីតាំងក្រុមហ៊ុនជួញដូរឈើសិប្បកម្មកែច្នៃឈើនិងចាប់ជនល្មើសដូចនៅខេត្តមណ្ឌលគិរីទេ។
លោកបន្តថាបទល្មើសព្រៃឈើនៅខេត្តរតនគិរី មិនចាញ់នៅខេត្តមណ្ឌលគិរីទេ ប៉ុន្ដែនៅខេត្តមណ្ឌលគិរីត្រូវបានគេអនុវត្តច្បាប់បានល្អប្រសើរ «បើអនុវត្តច្បាប់ ត្រូវអនុវត្តច្បាប់ទាំងអស់គ្នាគឺពេញប្រទេសមិនមែនអនុវត្តតែខេត្តមណ្ឌលគិរីរតនគិរីស្ងាត់ឈឹងអ៊ីចឹងទេ» ។
ពាក់ព័ន្ធបទល្មើសព្រៃឈើនេះ មានឧកញ៉ា ៣ នាក់ ហើយដែលត្រូវបានលោក ហៀង សុភក្ត្រ ព្រះរាជអាជ្ញានិងលោក ម៉ម វ៉ាន់ដា តំណាងអយ្យការអមសាលាដំបូងខេត្តមណ្ឌលគិរីបានចេញដីកាកោះហៅឲ្យចូលបំភ្លឺ ក្នុងនោះមាន ឧកញ៉ា ស្រ៊ុន ម៉េងលាង ភេទប្រុស អាយុ ៥៨ ឆ្នាំ ជាម្ចាស់ក្រុមហ៊ុន ម៉េងលាង, ឧកញ៉ា តុប វីដា ភេទប្រុសជាម្ចាស់ក្រុមហ៊ុនវិជ្ជរី និងឧកញ៉ា វន់ ប៊ុនថៃ ភេទប្រុស កើតឆ្នាំ ១៩៦៤ ខណៈឧកញ៉ា ស៊ឹង សំអុល ត្រូវបានតុលាការខេត្តមណ្ឌលគិរី សម្រេចឃុំខ្លួនបណ្ដោះអាសន្ន ៕