តាកែវៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានជំរុញឱ្យក្រុមហ៊ុនកូរ៉េ ដែលម៉ៅការសាងសង់ផ្លូវជាតិលេខ ២ និងផ្លូវជាតិលេខ ២២ បន្ថែមគ្រឿងចក្រ និងធនធានមនុស្សធ្វើការឱ្យបានច្រើនថែមទៀត នៅក្នុងរដូវរាំងស្ងួតនេះ ដើម្បីបង្កើនល្បឿនសាងសង់ផ្លូវនេះឱ្យបានចប់តាមកិច្ចព្រមព្រៀង។
លោក ស៊ុន ចាន់ថុល ថ្លែងប្រាប់ក្រុមអ្នកសារព័ត៌មានក្នុងពិធីចុះពិនិត្យគុណភាពនៃការសាងសង់ផ្លូវជាតិលេខ ២ និងផ្លូវជាតិលេខ ២២ នេះកាលពីថ្ងៃទី ១៩ ខែ កុម្ភៈ ឆ្នាំ ២០២១ ថា ក្រុមហ៊ុនសាងសង់ផ្លូវជាតិនេះគឺមានរយៈពេលសាងសង់ ៣០ ខែ ដោយបានចាប់ផ្តើមសាងសង់កាលពីខែ ១០ ឆ្នាំ ២០១៩ និងបញ្ចប់នៅថ្ងៃទី ១៦ ខែ មេសា ឆ្នាំ ២០២២ ដែលរហូតមកដល់ពេលនេះ បានចំណាយពេលអស់ ៥០ ភាគរយ ប៉ុន្តែទើបសម្រេចបានត្រឹមតែ ២៧ ភាគរយនៃផែនការ។
ដោយមើលឃើញពីភាពយឺតយ៉ាវនេះលោក ស៊ុន ចាន់ថុល បានឱ្យក្រុមហ៊ុន Hashin Engineering & Constructions Co., Ltd បន្ថែមគ្រឿងចក្រ និងមនុស្សធ្វើការឱ្យបានច្រើន នៅក្នុងអំឡុងពេលនៃរដូវប្រាំងនេះ ព្រោះជាពេលវេលាដ៏ល្អក្នុងការសាងសង់ដើម្បីឱ្យបានចប់ទៅតាមកិច្ចព្រមព្រៀង។
លោកថ្លែងថា៖ «នៅពេលដែលយើងធ្វើដំណើរមកនេះ យើងសង្កេតឃើញគ្រឿងចក្រ វាមិនទាន់មានគ្រប់គ្រាន់នៅឡើយទេ ហើយពេលនេះ គឺជាឱកាសពេលវេលានៃការធ្វើផ្លូវហើយ ព្រោះវាអត់មានភ្លៀង។ យើងស្តាយពេលវេលានៅពេលរាំងស្ងួតនេះ យើងមិនមានគ្រឿងចក្រគ្រប់គ្រាន់ ដើម្បីសាងសង់ផ្លូវហ្នឹង»។
នៅក្នុងដំណើរចុះត្រួតពិនិត្យនេះលោក ស៊ុន ចាន់ថុល ក៏បានសង្កេតឃើញថា នៅកន្លែងមួយចំនួន ក្រុមហ៊ុន Hashin Engineering & Constructions Co., Ltd នេះ សាងសង់មិនទាន់មានគុណភាព និងស្តង់ដានៅឡើយទេ ហើយលោកក៏បានឱ្យក្រុមហ៊ុននេះត្រូវធ្វើយ៉ាងណាឱ្យមានគុណភាព និងស្តង់ដាតាមសៀវភៅបន្ទុកនៃការសាងសង់។ «ពេលវេលា យើងអាចពិភាក្សាគ្នាបាន នៅពេលមានការយឺតយ៉ាវ ១ ខែ ឬ ២ ខែ បើមានហេតុផលច្បាស់លាស់ ប៉ុន្តែគុណភាពគឺមិនអាចជជែកគ្នាបានទេ គឺត្រូធ្វើគិតពីគុណភាពជាចម្បង»។
បើតាមលោក ស៊ុន ចាន់ថុល ការចុះពិនិត្យនេះមិនមែនមានបំណងដើម្បីដាក់កំហុសលើក្រុមហ៊ុនទេ ក៏ប៉ុន្តែដើម្បីស្វែងរកដំណោះស្រាយបច្ចេកទេសរួមមួយ ដែលអាចទទួលយកបានពីគ្រប់ភាគីពាក់ព័ន្ធទាំងអស់។ ទោះជាយ៉ាងណា បើក្រុមហ៊ុននេះនៅតែមិនធ្វើឱ្យស្របតាមស្តង់ដា និងគុណភាពទេ ក្រសួងនឹងចេញលិខិតព្រមាន។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ឱ្យដឹងថា ទិដ្ឋភាពជារួមនៃការសាងសង់ផ្លូវជាតិលេខ ២ និងផ្លូវជាតិលេខ ២២ នេះហាក់មានស្ថានភាពយឺតយ៉ាវដោយនៅតាមបណ្តោយផ្លូវនេះមានភាពស្មុគស្មាញក្នុងការដោះស្រាយជាមួយប្រជាពលរដ្ឋដែលមានលំនៅឋានជាប់ផ្លូវ និងជំងឺកូវីដ ១៩ ក៏ជាបញ្ហាដែលធ្វើឱ្យមានភាពយឺតយ៉ាវផងដែរ។
លោកថ្លែងថា៖ «តាមពិតក្រុមហ៊ុនមិនមានចេតនាក្នុងការពន្យារពេលក្នុងការសាងសង់នោះទេ បើគេពន្យារគម្រោងសាងសង់ណាមួយ វានឹងធ្វើឱ្យគេខាតបង់ផលប្រយោជន៍នានា ព្រោះថាការប្រើប្រាស់កម្លាំងពលកម្មពាក់ព័ន្ធនឹងការចំណាយទៅលើកម្មករ»។
លើសពីនេះលោក សន ជ័យ ចង់ឱ្យទាំងម្ចាស់ម៉ៅការ និងម្ចាស់គម្រោង ត្រូវតែយកចិត្តទុកដាក់ រៀបចំប្រព័ន្ធលូ និងស្ពានដើម្បីរំដោះទឹកក្នុងរដូវវស្សា ឱ្យបានលឿនព្រោះនៅតាមបណ្តោយផ្លូវទាំង ២ នេះកន្លែងខ្លះមានឃើញតែស្ពាន ប៉ុន្តែមិនមានប្រឡាយ។
គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ២ និងផ្លូវជាតិលេខ ២២ នេះ បានបើកការដ្ឋានសាងសង់កាលថ្ងៃទី ១១ ខែ កុម្ភៈ ឆ្នាំ ២០២០ ដែលគ្រោងបញ្ចប់នៅថ្ងៃទី ១៦ មេសា ២០២២។ គម្រោងផ្លូវនេះមានប្រវែងសរុប ៧២,១៧ គីឡូម៉ែត្រ ដែលក្នុងនោះកំណាត់ផ្លូវជាតិលេខ ២ ចាប់ពីរង្វង់មូលតាខ្មៅ ដល់អូរចំបក់មានប្រវែង ៦២,៥៦ គីឡូម៉ែត្រ និងផ្លូវជាតិលេខ ២២ ពីអូរចំបក់ដល់អង្គតាសោមមានប្រវែង ៩,៦១ គីឡូម៉ែត្រ ស្ថិតក្នុងភូមិសាស្ត្រខេត្តតាកែវ៕
វីដេអូ៖