ភ្នំពេញៈ លោកទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានជំរុញឲ្យមន្ដ្រីក្រោមឱវាទពង្រឹងការងារដោះស្រាយ និងគ្រប់គ្រងដីចំណីផ្លូវឲ្យមានប្រសិទ្ធភាព និងសុវត្ថិភាពដើម្បីកាត់បន្ថយផលប៉ះពាល់នៅពេលសាងសង់ផ្លូវ និងស្នើឲ្យមន្ត្រីយកចិត្តទុកដាក់ចំពោះការរាយការណ៍ពីពលរដ្ឋជុំវិញបញ្ហាផ្លូវថ្នល់ផងដែរ ។
ការជំរុញបែបនេះបានធ្វើឡើងក្នុងពេលលោកដឹកនាំកិច្ចប្រជុំនៅទីស្ដីការក្រសួងសាធារណការ និងដឹកជញ្ជូនកាលពីថ្ងៃពុធទី ៦ ខែវិច្ឆិកា ដោយលោករដ្ឋមន្ដ្រីបានប្រាប់ឱ្យមន្ត្រីជំនាញពង្រឹងការងារគ្រប់គ្រងដីចំណីផ្លូវ ការជួសជុលថែទាំផ្លូវឲ្យកាន់តែមានប្រសិទ្ធភាព និងសុវត្ថិភាព។ ជាមួយគ្នានេះលោកក៏បានរំឭកឲ្យមានការយកចិត្តទុកដាក់ចំពោះការរាយការណ៍របស់ពលរដ្ឋផងដែរដោយលោកចង់ឲ្យប្រែក្លាយកម្មវិធីថែទាំផ្លូវ (ROAD CARE Mobile App) ទៅជាកម្មវិធីអាចរាយការណ៍អំពីគ្រោះថ្នាក់ចរាចរណ៍ ការដឹកជញ្ជូនទំនិញលើសទម្ងន់កំណត់ និងករណីគ្រោះថ្នាក់ចរាចរណ៍ជាដើម។
លោកទេសរដ្ឋមន្ត្រីបានបញ្ជាក់ថា៖ «មន្ត្រីជំនាញពាក់ព័ន្ធទាំងអស់ត្រូវពិភាក្សាផ្ទៃក្នុងឱ្យបានស៊ីជម្រៅដើម្បីប្រមូលធាតុចូលឱ្យបានគ្រប់គ្រាន់។ ត្រូវមានកិច្ចប្រជុំអន្តរក្រសួងដើម្បីរិះរកនីតិវិធីដោះស្រាយបញ្ហាដីចំណីផ្លូវ កាត់បន្ថយផលប៉ះពាល់នៅពេលសាងសង់ផ្លូវ»។
ទន្ទឹមនឹងនេះលោក ស៊ុន ចាន់ថុល ក៏បានស្នើឱ្យមន្ត្រីជំនាញទាំងអស់កែសម្រួលនីតិវិធីជួសជុល ថែទាំផ្លូវ ដើម្បីស្តារ កសាង និងជួសជុលថែទាំបណ្តាញផ្លូវថ្នល់នានាឱ្យបានល្អប្រសើរ ដើម្បីបំពេញតម្រូវការរបស់ពលរដ្ឋ និងបានណែនាំឱ្យមន្ត្រីតាមមន្ទីរទាំង ២៥ រាជធានី-ខេត្ត បញ្ចេញគ្រឿងចក្រឱ្យបានលឿនផងដែរដើម្បីពន្លឿនការជួសជុល ថែទាំផ្លូវនៅក្នុងរដូវរំហើយនេះ។ ជាពិសេសនៅតាមបណ្តាខេត្តដែលត្រូវរៀបចំការប្រណាំងកង់អន្តរជាតិ និងបុណ្យសមុទ្រនៅខេត្តកោះកុង និងខេត្តកែបជាដើម។
លោក ប៉ាល់ ចន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់កាលពីម្សិលមិញថា ការណែនាំរបស់ទេសរដ្ឋមន្ដ្រីគឺជាការពង្រឹងការងាររបស់មន្ដ្រីបន្ថែមទៀតក្នុងការស្ថាបនាផ្លូវឲ្យមានប្រសិទ្ធភាព ហើយត្រូវដោះស្រាយ និងពិនិត្យកុំឲ្យមានការរំលោភដីចំណីផ្លូវសាធារណៈរបស់រដ្ឋ ដែលជាហេតុនាំឲ្យមានការលំបាកដល់ការស្ថាបនាផ្លូវនាថ្ងៃអនាគត។
លោកថ្លែងថា៖ «ពាក់ព័ន្ធនឹងដីចំណីផ្លូវនេះ យើងមើលឃើញទាំងអស់គ្នាហើយ ព្រោះមានបងប្អូនប្រជាពលរដ្ឋយើងមួយចំនួនតែងតែធ្វើសំណង់រំលោភយកដីចំណីផ្លូវដែលបង្កឲ្យមានការកកស្ទះចរាចរណ៍ បង្កផលលំបាកដល់ការពង្រីកផ្លូវនៅពេលដែលយើងចង់ពង្រីកផ្លូវឲ្យមានទំហំធំ។ ដូច្នេះទើបពេលប្រជុំកាលពីថ្ងៃពុធ ឯកឧត្ដមទេសរដ្ឋមន្ដ្រីគាត់បានណែនាំដល់មន្ដ្រីថ្នាក់ក្រោមជាតិទាំងអស់ត្រូវយកចិត្តទុកដាក់ គ្រប់គ្រងការពារដីចំណីផ្លូវនេះតាមច្បាប់ដែលមានស្រាប់»។
លោក ចន្ទ តារា បានអះអាងថាដោយសារតែបញ្ហាសាងសង់សំណង់រំលោភចំណីផ្លូវពីសំណាក់ពលរដ្ឋមួយចំនួនតូចនេះហើយទើបពេលក្រសួងអនុវត្ដគម្រោងពង្រីកផ្លូវតែងជួបប្រទះបញ្ហាស្ទើរគ្រប់កន្លែងដែលជាហេតុធ្វើឲ្យបាត់បង់ថវិកាជាតិ ខណៈដីចំណីផ្លូវទាំងនោះគឺជាទ្រព្យសម្បត្ដិសាធារណៈរបស់រដ្ឋនោះ៕