.jpg)
សកម្មភាពពលរដ្ឋពេលមកធ្វើបណ្ណបើកបរយានយន្តកាលពីកន្លងមក។ ហេង ជីវ័ន
ភ្នំពេញៈ រដ្ឋមន្ដ្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានអំពាវនាវដល់ពលរដ្ឋដែលមានយានយន្តហើយផុតសុពលភាពបណ្ណបើកបរ និងឆៀកត្រូវនាំគ្នាទៅបន្តសុពលភាពដើម្បីកុំឲ្យមានការផាកពិន័យ និងចៀសវាងបញ្ហាគ្រោះថ្នាក់ចរាចរណ៍ ខណៈបច្ចុប្បន្នមានបណ្ណបើកបរខ្លះហួសកំណត់រហូតដល់ ៨ ឆ្នាំ មិនទាន់បានបន្ត។
លោក ស៊ុន ចាន់ថុល បានលើកឡើងបែបនេះក្នុងពេលលោកដឹកនាំមន្ដ្រីជំនាញចុះត្រួតពិនិត្យការដ្ឋានសាងសង់ផ្លូវជាតិលេខ ៥ ភាគខាងជើង (បាត់ដំបងសិរីសោភ័ណ) និងភាគខាងត្បូងកាលពីថ្ងៃទី ២៧ ឧសភា។ លោកបានថ្លែងថា ពលរដ្ឋដែលហួសសុពលភាពបណ្ណបើកបរ និងឆៀករថយន្តមិនគ្រាន់តែប្រឈមនឹងការផាកពិន័យទេ តែក៏អាចបង្កគ្រោះថ្នាក់ចរាចរណ៍ផងដែរ។
លោកថ្លែងថា៖ «សព្វថ្ងៃនេះយានយន្ត ៤៦ ភាគរយបានហួសសុពលភាពឆៀក មិនទាន់បានមកធ្វើឆៀកទេ។ សូមជម្រាបថា ក្នុងចំណោមឡានជាង ៧០ ម៉ឺនគ្រឿងមានឡានជាង ៣០ ម៉ឺនគ្រឿងមិនទាន់បានមកធ្វើឆៀកទេ...។ ខ្ញុំសូមអំពាវនាវទៅម្ចាស់យានយន្តទាំងអស់សូមមេត្តាយកឡាននោះទៅឆៀកឲ្យបានត្រឹមត្រូវ បើមិនដូច្នោះវាអាចបង្កគ្រោះថ្នាក់ចរាចរណ៍»។
លោកបន្តថា៖ «ចំពោះបណ្ណបើកបរជាង ១ លានបណ្ណ ក្នុងនោះមានជាង ៤៤ ម៉ឺនបណ្ណ ស្មើនឹង ៤៦ ភាគរយ ផុតសុពលភាពហើយ។ ដូច្នេះសូមអញ្ជើញទៅពន្យារបន្តបណ្ណបើកបរនេះ។
អ្នកខ្លះហួសសុពលភាព ៧-៨ ឆ្នាំមិនទាន់បានទៅបន្តសុពលភាព»។
លោក ស៊ុន ចាន់ថុល បានឲ្យដឹងថា បច្ចុប្បន្នក្រសួងសាធារណការបានរៀបចំប្រព័ន្ធសម្រាប់ជូនដំណឹងទៅពលរដ្ឋរួចហើយ។
ក្នុងនោះគឺរយៈពេល ១ ខែមុន បណ្ណបើកបរហួសសុពលភាពប្រព័ន្ធនឹងផ្ញើសារទៅប្រាប់ដល់ម្ចាស់យានយន្តតែម្ដង។ លោកថា រហូតមកទល់ពេលនេះគឺមានសារជាង ៩ ពាន់ហើយត្រូវបានផ្ញើទៅម្ចាស់បណ្ណបើកបរដែលផុតសុពលភាព។
លោករដ្ឋមន្ដ្រីថ្លែងថា៖ «ខ្ញុំសូមអំពាវនាវដល់អ្នកប្រើប្រាស់ផ្លូវជាតិទាំងអស់សូមចូលរួមថែរក្សាទ្រព្យសម្បត្ដិជាតិយើងដែលសម្ដេចអគ្គមហាសេនាបតីតេជោ ហ៊ុន សែន ខិតខំប្រឹងប្រែងរកថវិកាទាំងប្រាក់កម្ចី និងប្រាក់ជំនួយឥតសំណងមកកសាងហេដ្ឋារចនាសម្ព័ន្ធក្នុងប្រទេសកម្ពុជា។ ដូច្នេះយើងត្រូវតែនាំគ្នាចូលរួមថែរក្សាកុំដឹកទំនិញលើសទម្ងន់កំណត់ដោយច្បាប់ដែលធ្វើឲ្យផ្លូវជាតិរបស់យើងឆាប់ខូច និងឆាប់រេចរឹល»។
ជាមួយនេះដែរលោកបានអំពាវនាវឲ្យអ្នកបើកបរគោរពច្បាប់ចរាចរណ៍ដើម្បីចូលរួមកាត់បន្ថយគ្រោះថ្នាក់ ខណៈបច្ចុប្បន្នគិតជាមធ្យមកម្ពុជាមានមនុស្សស្លាប់ដោយគ្រោះថ្នាក់ចរាចរណ៍ ៥ នាក់ និងរបួស ១៥ នាក់ក្នុង ១ ថ្ងៃដែលនាំឲ្យខាតបង់ទាំងអាយុជីវិតមនុស្ស ទ្រព្យសម្បត្ដិជាតិ និងទ្រព្យសម្បត្ដិឯកជនប្រហែល ៣៥០ លានដុល្លារក្នុង ១ ឆ្នាំ។
លោករដ្ឋមន្ដ្រីបញ្ជាក់ថា៖ «បើជិះម៉ូតូសូមពាក់មួកសុវត្ថិភាព បើជិះឡានពាក់ខ្សែក្រវាត់សុវត្ថិភាព។ កុំបើកឡានផងនិយាយទូរស័ព្ទផង វាខុសច្បាប់។ កុំបើកបរដោយប្រើគ្រឿងស្រវឹង គ្រឿងញៀន កុំវ៉ាជែងដោយគ្មានការប្រុងប្រយ័ត្ន និងកុំបើកបរលើសល្បឿនកំណត់ដោយច្បាប់។ ទាំងនេះសុទ្ធជារឿងសំខាន់ណាស់ក្នុងការគោរពច្បាប់ចរាចរណ៍»។
បើតាមលោក ស៊ុន ចាន់ថុល បច្ចុប្បន្នក្រសួងសាធារណការកំពុងសហការជាមួយអង្គការ JICA ដើម្បីរកកាមេរ៉ាដាក់នៅតាមផ្លូវ (ផ្លូវជាតិនានា) ដើម្បីថតល្បឿនដោយស្វ័យប្រវត្ដិ ហើយបើរកឃើញអ្នកល្មើសគឺក្រុមការងារក្រសួងនឹងចេញវិក្កយបត្រផាកពិន័យដល់ផ្ទះតែម្ដង។
លោក គឹម បញ្ញា នាយកប្រចាំប្រទេសកម្ពុជានៃ AIP Foundation បានថ្លែងថា ការឆៀកយានយន្តគឺជារឿងសំខាន់ ព្រោះវាត្រូវមានការត្រួតពិនិត្យលក្ខណៈបច្ចេកទេសឲ្យបានទៀងទាត់ដែលបន្ថែមទៅលើការត្រួតពិនិត្យប្រចាំថ្ងៃដើម្បីចៀសវាងគ្រោះថ្នាក់ចរាចរណ៍។
លោកបញ្ជាក់ថា៖ «ការត្រួតពិនិត្យលក្ខណៈបច្ចេកទេសទៀងទាត់ និងមានបណ្ណបើកបរបង្ហាញថា យានយន្តរបស់គាត់មានសុវត្ថិភាព និងអ្នកបើកបរមានការទទួលស្គាល់ត្រឹមត្រូវ [តាមផ្លូវច្បាប់] និងយល់ដឹងពីសុវត្ថិភាព។ ខ្ញុំគាំទ្រចំពោះ [ការអំពាវនាវ] និងវាជារឿងប្រសើរនៅពេលដែលយើងទុកពេលវេលាសមស្របឲ្យពលរដ្ឋយើងអ៊ីចឹង»៕
