ភ្នំពេញៈ លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូននៅថ្ងៃអង្គារនេះនឹងដាក់លិខិតព្រមានផ្ទាល់ទៅក្រុមហ៊ុន ហាន់ស៊ីន (Han Shin) ដែលទទួលសាងសង់ផ្លូវជាតិលេខ ២ និងលេខ ២២ ចាប់ពីភ្នំពេញទៅខេត្ដតាកែវ ក្រោយពេលលោកចុះពិនិត្យផ្ទាល់ឃើញថាក្រុមហ៊ុននេះគ្មានសកម្មភាពក្នុងការសាងសង់ និងកំហុសបច្ចេកទេសមួយចំនួនទៀត។
លោក ស៊ុន ចាន់ថុល ថ្លែងក្នុងពេលកំពុងដឹកនាំក្រុមការងារបច្ចេកទេសចុះពិនិត្យ វឌ្ឍនភាព គម្រោងសាងសង់ផ្លូវជាតិលេខ ១១ តភ្ជាប់ពីអ្នកលឿងទៅកាន់ថ្នល់ទទឹងខេត្តត្បូងឃ្មុំប្រវែង ៩៦ គីឡូម៉ែត្រដែលគ្រោងនឹងចំណាយថវិកាសាងសង់ប្រមាណ ៩៨ លានដុល្លារនឹងគ្រោងបញ្ចប់ការសាងសង់នៅចុងឆ្នាំ ២០២០ នេះ។
លោក ចាន់ថុល បានថ្លែងថា៖ «កាលពីថ្ងៃអាទិត្យសប្ដាហ៍មុន ខ្ញុំអត់ប្រាប់អ្នកណាទាំងអស់ថា ខ្ញុំចុះពិនិត្យមើលផ្លូវលេខ ២ និងលេខ ២២។ ខ្ញុំឲ្យដឹងតែ ២ នាក់គត់គឺមន្ដ្រីមើលផ្លូវលេខ ២ និងលេខ ២២។ ខ្ញុំឲ្យដឹងតែ ២ នាក់គត់គឺមន្ដ្រីបច្ចេកទេសរបស់ខ្ញុំ។ ផ្លូវលេខ ២ ពីភ្នំពេញទៅខេត្ដតាកែវ និងផ្លូវវាងមួយទៀតគឺផ្លូវលេខ ២២។ ជាក់ស្ដែងយើងពិនិត្យឃើញមែន។ ក្រុមហ៊ុនទទួលសាងសង់ពីភ្នំពេញទៅតាកែវមានគ្រឿងចក្រតែ ២ គ្រឿងគត់ហើយគ្មានអ្នកណាធ្វើការទាំងអស់លើផ្លូវលេខ ២ និងលេខ ២២ នេះ»។
លោកថា ករណីនេះបើមិនចុះពិនិត្យដោយផ្ទាល់គឺមិនអាចដឹងនោះទេ ខណៈពេលឃើញស្ថានភាពបែបនេះលោករដ្ឋមន្ដ្រីក៏សួរដេញដោលទៅក្រុមហ៊ុនទទួលសាងសង់ ប៉ុន្ដែក្រុមហ៊ុនឆ្លើយថា គ្រឿងចក្រជាប់រវល់។
លោកបន្ដថា៖ «ប៉ុន្ដែខ្ញុំសួរថា ពេលណាអ្នកឯង (ក្រុមហ៊ុនទទួលសាងសង់) យកគ្រឿងចក្រមកសាងសង់។ បើមិនមានគ្រឿងចក្រ ហេតុអីមិនជួលគ្រឿងចក្រនៅស្រុកខ្មែរដើម្បីធ្វើផ្លូវឲ្យទាន់ពេលវេលា។ ម៉ោងនេះមិនទាន់យឺតនៅឡើយទេណា។ ប៉ុន្ដែបើយឺតនឹងមានពិន័យហើយគិតជាថ្ងៃក្នុង ១ ថ្ងៃពិន័យប៉ុន្មាន។ រឿងនេះត្រូវនិយាយឲ្យច្បាស់»។
លោករដ្ឋមន្ដ្រីបញ្ជាក់ថានឹងចុះទៅពិនិត្យផ្លូវជាបន្ដបន្ទាប់ដោយមិនមានប្រាប់មុននោះទេ។ ក្រសួងក៏មានម៉ាស៊ីនត្រួតពិនិត្យបច្ចេកទេសផ្លូវចល័តយកទៅជាមួយផងដែរ។ ពេលចុះទៅពិនិត្យឲ្យតែធ្វើផ្លូវមិនបានត្រឹមត្រូវគឺត្រូវឲ្យធ្វើឡើងវិញទាំងអស់។
លោកបានថ្លែងថា៖ «ខ្ញុំសូមជម្រាបថា ថ្ងៃស្អែកនេះ (ថ្ងៃអង្គារនេះ) លិខិតទៅដល់ហើយក្រុមហ៊ុនហាន់ស៊ីន (Han Shin)។ លិខិតព្រមានជាផ្លូវការពីខ្ញុំនឹងទៅដល់ក្រុមហ៊ុន ហាន់ស៊ីន ដែលទទួលសាងសង់ផ្លូវលេខ ២ និងលេខ ២២ នេះ។ ស្អែកចេញជាលាយលក្ខណ៍អក្សរ។ ទុកពេលវេលាឲ្យប៉ុន្មានដើម្បីដោះស្រាយបញ្ហានេះ។
បើដោះស្រាយមិនបានទេ ក្រុមហ៊ុននឹងមានបញ្ហាជាមួយក្រសួងសាធារណការ និងដឹកជញ្ជូន។ ថ្ងៃនេះមន្ដ្រីយើងខ្ញុំកំពុងសរសេរលិខិតនេះជាភាសាអង់គ្លេសជូនគាត់ហើយ។ អ៊ីចឹងស្អែកនេះ ក្រុមហ៊ុននឹងទទួលលិខិតផ្ទាល់ពីខ្ញុំតែម្ដងដោយមានបញ្ជាក់ប្រាប់ក្រុមហ៊ុនថា មានខុសអ្វីខ្លះ? ហើយក្រុមហ៊ុនលោកមានពេលវេលាប៉ុន្មានដើម្បីដោះស្រាយ?»។
លោករដ្ឋមន្ដ្រីរំឭកឲ្យដឹងថា ពីមុនក៏ធ្លាប់មានក្រុមហ៊ុនមួយដែលទទួលគម្រោងសាងសង់ផ្លូវពីចំណុចស្គន់ទៅខេត្ដសៀមរាបក្រោយពីចុះទៅពិនិត្យបានរកឃើញថា ក្រុមហ៊ុននោះមិនបានសាងសង់ត្រឹមត្រូវតាមបច្ចេកទេស។ ដូច្នេះក្រសួងក៏បញ្ជាឲ្យសាងសង់ផ្លូវនោះឡើងវិញទាំងអស់ដែរ។
មួយករណីទៀតក្រុមហ៊ុនទទួលសាងសង់ផ្លូវជាតិលេខ ២១ ចាប់ពីក្រុងតាខ្មៅទៅដល់ស្រុកកោះធំ ក្រសួងក៏សម្រេចមិនទទួលយកការសាងសង់ផ្លូវនោះដែរ ព្រោះការសាងសង់មិនមានគុណភាពហើយតម្រូវឲ្យក្រុមហ៊ុនត្រូវសាងសង់ឡើងវិញ។ លោករដ្ឋមន្ដ្រីបញ្ជាក់ថា ក្រុមហ៊ុនទទួលសាងសង់ផ្លូវថ្នល់ឲ្យតែធ្វើមិនត្រឹមត្រូវតាមស្តង់ដាគឺតម្រូវឲ្យក្រុមហ៊ុននោះធ្វើឡើងវិញ។
លោកបន្ថែមថា៖ «ប៉ុន្ដែខ្ញុំមិនចង់បានអ៊ីចឹងទេ។ ខ្ញុំចង់ឲ្យក្រុមហ៊ុនសាងសង់តាមលក្ខណៈបច្ចេកទេសឲ្យត្រឹមត្រូវតែម្ដង។ ខ្ញុំតែងតែនិយាយថា ខ្ញុំជួលគេកាត់អាវឲ្យខ្ញុំពាក់ អាវខ្ញុំពាក់មិនទាន់បាន ១ ឆ្នាំផង មានស្នាមប៉ះគ្រប់កន្លែងទាំងអស់បែបនេះ ខ្ញុំមិនចូលចិត្ដទេ។ ដូចគ្នានឹងក្រុមហ៊ុនធ្វើផ្លូវអ៊ីចឹង ប្រាប់ថាមិនអីទេ ខូចខ្ញុំជួសជុលឲ្យ ខ្ញុំអត់ ចង់បិទសម្បុកមាន់លើផ្លូវរបស់ខ្ញុំនេះទេខំធ្វើឲ្យល្អតាមស្តង់ដាទៅ»។
លោករដ្ឋមន្ដ្រី ស៊ុន ចាន់ថុល បានថ្លែងឲ្យដឹងទៀតថា ករណីមួយទៀតក្រុមហ៊ុនសាងសង់ផ្លូវពីខេត្ដកំពតទៅវាលរេញ ក្រសួងក៏បានដកអ្នកត្រួតពិនិត្យបច្ចេកទេសបរទេសចំនួន ៨ នាក់ចេញផងដែរព្រោះមិនបានត្រួតពិនិត្យមើលផ្លូវឲ្យបានត្រឹមត្រូវ៕
វីដេអូ៖