.jpg)
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីសម្ពោធបើកឱ្យប្រើប្រាស់ជាផ្លូវការហើយមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត (ឆៀក) សាខាកំបូល។ រូបថត MPWT
ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានថ្លែងថា មានរថយន្តប្រហែលជា ៣៦០ ពាន់គ្រឿង ដែលផុតសុពលភាព មិនទាន់បានយករថយន្តមកធ្វើការត្រួតពិនិត្យលក្ខណៈបច្ចេកទេស ខណៈ ៣ ខែចុងក្រោយនេះអ្នកជំនាញបានផាកពិន័យប្រមាណជិត ២ ម៉ឺនគ្រឿង ក្នុងចំណោមរថយន្តប្រមាណជាង ៨ ម៉ឺនគ្រឿងដែលបានពិនិត្យលក្ខណៈបច្ចេកទេសយានយន្ត។
ថ្លែងក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេសយានយន្តឆៀកសាខាកំបូល រាជធានីភ្នំពេញកាលពីថ្ងៃពុធលោក ស៊ុន ចាន់ថុល បានសំណូមពរឱ្យម្ចាស់យានយន្តទាំងអស់ត្រូវយករថយន្តមកឆៀកឱ្យបានទាន់ពេលវេលាចៀសវាងបង្កឱ្យមានគ្រោះថ្នាក់ចរាចរណ៍ និងចៀសវាងការផាកពិន័យផងដែរ។
បើតាមលោកទេសរដ្ឋមន្ត្រី បន្ទាប់ពីការអនុវត្តរឹតបន្តឹងការអនុវត្តច្បាប់ចរាចរណ៍ផ្លូវគោក ប្រជាពលរដ្ឋមានការភ្ញាក់រឭកច្រើន។ បច្ចុប្បន្ននេះមានទិន្នន័យយានយន្តផុតសុពលភាពត្រួតពិនិត្យលក្ខណៈបច្ចេកទេសប្រមាណ ២៨% ហើយក្រសួងបានធ្វើការផ្ញើសារ SMS ចេញទៅក្រើនរំឭកម្ចាស់យានយន្តប្រមាណ ១២ ០០០ នាក់ហើយ ហើយក៏បន្តផ្ញើសារនេះដើម្បីជូនដំណឹងទៅកាន់ពួកគាត់សំដៅចូលរួមកាត់បន្ថយគ្រោះថ្នាក់ចរាចរណ៍។
លោក ស៊ុន ចាន់ថុល អះអាងថា ក្រសួងនឹងបន្តខិតខំរកនីតិវិធីផ្សេងទៀតដើម្បីផ្តល់សេវាងាយស្រួលជូនបងប្អូនប្រជាពលរដ្ឋ និងបន្តសាងសង់ប្រព័ន្ធហេដ្ឋារចនាសម្ព័ន្ធបន្ថែមទៀតដូចជា ការពង្រីក និងពង្រឹងគុណភាពផ្លូវ ការសាងសង់ស្ពាន និងកំពង់ផែជាដើម ដើម្បីឱ្យប្រព័ន្ធដឹកជញ្ជូនមានភាពប្រកួតប្រជែងអាចដឹកជញ្ជូនបានក្នុងតម្លៃថោក និងអាចទាក់ទាញវិនិយោគិនបង្កើតការងារធ្វើ បង្កើនប្រាក់ចំណូលជូនប្រជាពលរដ្ឋផងដែរ។
លោក ឈួន វ៉ាន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោក បានឱ្យដឹងថាកាលពីម្សិលមិញថា ក្នុងរយៈពេល ៣ ខែចុងក្រោយនេះមានរថយន្តមកឆៀកជាង ៨ ម៉ឺនគ្រឿងក្នុងនោះមានរថយន្តជិត ២ ម៉ឺនគ្រឿង ដែលត្រូវពិន័យដោយសារហួសសុពលភាព។
លោក វ៉ាន់ បញ្ជាក់ថា៖ «ក្នុងការពិន័យ យើងមានការយោគយល់ណាស់ មានន័យថា រថយន្តប្រជាពលរដ្ឋហួសសុពលភាពរយៈពេលប៉ុន្មានឆ្នាំក៏ដោយ សម្រាប់ឡានតូចយើងគិតតែ ១ ឆ្នាំទេ ចំណែកឡានធំយើងគិតត្រឹមតែ ២ ឆ្នាំទេ ហើយបើសិនជាគាត់ហួសក្នុងរយៈពេលមិនដល់ ១ ឆ្នាំទេក្នុងរយៈពេល ៣ ថ្ងៃដំបូងយើងមិនគិតលុយទេ»។
លោក ឈួន វ៉ាន់ បញ្ជាក់ថាប្រសិនបើប្រជាពលរដ្ឋនៅតែរឹងរូសគេចវេះមិនព្រមចូលទៅឆៀក ក្រសួងសាធារណការ និងដឹកជញ្ជូនសហការជាមួយមន្ត្រីនគរបាលចរាចរណ៍ដើម្បីអនុវត្តច្បាប់លើដងផ្លូវ ហើយនៅពេលដែលពួកគាត់មកដល់កន្លែងមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្តក៏ត្រូវពិន័យថែម ១ សាទៀត ព្រោះហួសសុពលភាពដោយគុណជាថ្ងៃជាក់ស្តែង។
លោក វ៉ាន់ បញ្ជាក់ថាដើម្បីបង្កការងាយស្រួលដល់ប្រជាពលរដ្ឋ កន្លែងមជ្ឈមណ្ឌលឆៀកនឹងត្រូវពង្រីកបន្ថែមទៀតនៅតាមខេត្តផ្សេងៗមួយចំនួន ដូចជាខេត្តកំពង់ធំ ស្វាយរៀង បន្ទាយមានជ័យ និងខេត្តកំពត។
ការរៀបចំធ្វើកន្លែងឆៀកឡានឱ្យបានច្រើនកន្លែងនេះ គឺជាការបង្ខិតសេវាឱ្យបានកាន់តែកៀកទៅកាន់ប្រជាពលរដ្ឋ និងជាកត្តាមួយដ៏សំខាន់ដើម្បីចូលរួមចំណែកក្នុងការកាត់បន្ថយនូវបញ្ហាគ្រោះថ្នាក់ចរាចរណ៍ដែលកើតមកពីកត្តាយានជំនិះដែលខុសលក្ខណៈបច្ចេកទេស ជាក់ស្តែងមានដូចជា ហ្វ្រាំងមិនស៊ី មិនមានភ្លើង ឬកង់មិនល្អជាដើម ដូចនេះការយករថយន្តមកត្រួតពិនិត្យលក្ខណៈបច្ចេកទេសឱ្យបានត្រឹមត្រូវ គឺជាការរួមចំណែកដ៏សំខាន់មួយដើម្បីកាត់បន្ថយគ្រោះថ្នាក់ចរាចរណ៍ ដែលគិតមកដល់សព្វថ្ងៃនេះគ្រោះថ្នាក់ចរាចរណ៍នៅតែជាកង្វល់ ១ ដ៏ធំរបស់ប្រមុខថ្នាក់ដឹកនាំ។ នេះបើតាមការឱ្យដឹងពីលោកទេសរដ្ឋមន្ត្រី ស៊ុន ចាន់ថុលកាលពីថ្ងៃពុធ។
យោងតាមរបាយការណ៍ប្រចាំថ្ងៃរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានឱ្យដឹងថា គ្រោះថ្នាក់ចរាចរណ៍បានបណ្ដាលឱ្យមនុស្សស្លាប់ក្នុង ១ ថ្ងៃជាមធ្យម ៥ នាក់ និង ១១ នាក់ទៀតរងរបួស។ របាយការណ៍នេះបានឱ្យដឹងទៀតថា កត្តានាំមកនូវគ្រោះថ្នាក់ចរាចរណ៍ភាគច្រើនបង្កឡើងដោយកត្តាមនុស្ស បន្ទាប់មកកត្តាយានយន្ត និងកត្តាផ្លូវ៕
