ភ្នំពេញៈ រដ្ឋមន្ត្រីក្រសួងមហាផ្ទៃ បានបញ្ជាឲ្យអភិបាលរាជធានីខេត្ត ចាត់វិធានការពង្រឹងការការពារសន្តិសុខ និងសុវត្ថិភាព ដល់ឥស្សរជននយោបាយគ្រប់និន្នាការ អ្នកការទូត និងធុរជនផ្សេងទៀត ដែលកំពុងរស់នៅ និងកំពុងចុះបំពេញបេសកកម្មនៅតាមមូលដ្ឋាន។
តាមរយៈលិខិតណែនាំ ស្តីពីការចាត់វិធានការពង្រឹងការពារសន្តិសុខ សណ្តាប់ធ្នាប់សង្គមនិងសុវត្ថិភាពជូនប្រជាពលរដ្ឋនិងឥស្សរជននយោបាយនានា ចុះថ្ងៃទី ៤ ខែវិច្ឆិកា ឆ្នាំ ២០១៥ ដោយលោក ស ខេង បានឲ្យដឹងថា ការពង្រឹងសន្តិសុខ ស្ថិរភាពនយោបាយ និងស្ថិរភាពសង្គម គឺសំដៅលើកកម្ពស់ការគោរពសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋនៅកម្ពុជា។
លិខិតនេះ ក៏បានណែនាំឲ្យអភិបាលរាជធានីខេត្ត ចាត់ចែងការងារ ទប់ស្កាត់ និងបង្ក្រាបបទល្មើសគ្រប់ប្រភេទផងដែរ។
ការប្រកាសពង្រឹងវិធានការនេះ ត្រូវបានគេមើលឃើញថា ធ្វើឡើងបន្ទាប់ពីមានការវ៉ៃដំ បណ្តាលឲ្យរងរបួសធ្ងន់ ទៅលើតំណាងរាស្ត្រគណបក្សសង្គ្រោះជាតិពីររូប ខណៈពួកគេចេញពីប្រជុំសភា កាលពីថ្ងៃទី ២៦ ខែតុលា ក្នុងគ្រាដែលក្រុមបាតុករគាំទ្រគណបក្សប្រជាជន បានទាមទារឲ្យដកលោក កឹម សុខា ពីអនុប្រធានទី ១ រដ្ឋសភា។
លោក ខៀវ សុភ័គ អ្នកនាំពាក្យក្រសួងមហាផ្ទៃ និងលោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ មិនអាចសុំការឆ្លើយតបបានទេ កាលពីម្សិលមិញ។ ប៉ុន្តែ អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានថ្លែងថា ការប្រកាសវិធានការពង្រឹងនេះ ក៏ដើម្បីដាស់តឿនដល់សមត្ថកិច្ចគ្រប់ជាន់ថ្នាក់ ពង្រឹងនូវការការពារសុវត្ថិភាពមន្ត្រីរដ្ឋាភិបាល និងប្រជាពលរដ្ឋ ក្នុងឱកាសពិធីបុណ្យជាតិនានាផងដែរ។
លោកថា៖ «គណបក្សប្រឆាំង គឺតែងតែគិតមិនល្អចំពោះរដ្ឋាភិបាលការរក្សាសន្តិសុខក្រោយហេតុការណ៍ប៉ះគ្នានោះ គឺជាមូលហេតុមួយ តែក៏មានមូលហេតុផ្សេងដែរ ដែលត្រូវប្រកាសជាថ្មី ដើម្បីរំឭកនិងដាស់តឿនអាជ្ញាធរមានសមត្ថកិច្ច»។
តំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង បានស្វាគមន៍នូវការពង្រឹងវិធានការនេះ តែលោក នៅតែមិនមានជំនឿចិត្ត ចំពោះការអនុវត្តនោះឡើយ។
លោកថ្លែងថា៖ «បទបញ្ជានេះ មានយូរហើយ តែមកពីសមត្ថកិច្ច មិនអនុវត្ត ដូចព្រឹត្តិការណ៍នៅក្បែរសភានេះ ជាក់ស្តែង គឺជាការគ្រោងទុកមុន មិនមែនជារឿងចៃដន្យនោះទេ។ នៅថ្ងៃកើតហេតុ មុខរដ្ឋសភា គ្មានសន្តិសុខ គ្មានប៉ូលិសចរាចរណ៍ មានតែក្រុមបាតុករ និងតំណាងរាស្ត្រគណបក្សសង្គ្រោះជាតិ»។
ក្រោយពីមានហេតុការណ៍ស្ទាក់វ៉ៃអ្នកតំណាងរាស្ត្រ បង្កឲ្យរងរបួសធ្ងន់ធ្ងរ និងមានបាតុករមួយក្រុម បានទៅតវ៉ា ដោយគប់ដុំថ្ម និងដបទឹកសុទ្ធ ចូលផ្ទះ លោកកឹម សុខា ក្នុងខណ្ឌទួលគោក ដោយពុំឃើញសមត្ថកិច្ចទៅជួយទប់ស្កាត់នោះមក គណបក្សសង្គ្រោះជាតិ បានស្នើឲ្យរដ្ឋាភិបាល ជួយការពារសុវត្ថិភាពដល់អ្នកតំណាងរាស្ត្រ ដើម្បីឲ្យពួកគេ មានភាពកក់ក្តៅក្នុងការបំពេញការងារ។
ក្រោយមក នៅថ្ងៃទី ៣០ ខែតុលា តំណាងរាស្ត្រគណបក្សសង្គ្រោះជាតិ បានធ្វើពហិការប្រជុំសភា ក្នុងគ្រាដែលតំណាងរាស្ត្រមកពីគណបក្សប្រជាជនកម្ពុជាទាំង ៦៨ រូប បានបោះឆ្នោតទម្លាក់លោក កឹម សុខា ចេញពីអនុប្រធានទី១ រដ្ឋសភា៕
