ភ្នំពេញៈ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដែលកំពុងបំពេញទស្សនកិច្ចនៅក្នុងប្រទេស អាល្លឺម៉ង់ បានថ្លែងថា កម្ពុជានៅតែព្យាយាមបើកកិច្ចចរចាដើម្បីរក្សាប្រព័ន្ធអនុគ្រោះពន្ធ EBA ពីសហភាពអឺរ៉ុបនិង GSP ពីសហរដ្ឋអាមេរិក។
ការថ្លែងរបស់លោក ស ខេង ធ្វើឡើងនៅក្នុងអំឡុងពេលដែលលោកកំពុងបំពេញទស្សនកិច្ចនៅក្នុងប្រទេសអាល្លឺម៉ង់ចាប់ពីថ្ងៃទី ២៤ កញ្ញា ដល់ថ្ងៃទី ០១ ខែ តុលា ក្នុងគោលបំណង ដើម្បីពង្រឹងកិច្ចសហប្រតិបត្តិការទ្វេភាគី ជាមួយសហព័ន្ធអាល្លឺម៉ង់ និងស្វែងយល់ពីដំណើរការកំណែទម្រង់រដ្ឋបាលថ្នាក់ក្រោមជាតិរបស់អាល្លឺម៉ង់ព្រមទាំងពិភាក្សាលើប្រធានបទពាក់ព័ន្ធមួយចំនួនទៀត។
លោក ស ខេង បានថ្លែងទៅកាន់ប្រជាពលរដ្ឋខ្មែរដែលកំពុងរស់នៅសាធារណរដ្ឋសហព័ន្ធអាល្លឺម៉ង់ក្នុងជំនួបនៅសណ្ឋាគារក្នុងក្រុង SCHW-ABISCH GMUND នៃរដ្ឋសហព័ន្ធ BADEN-WURTTEMBERG កាលពីថ្ងៃទី ២៨ ខែ កញ្ញា ថា កម្ពុជានៅតែព្យាយាមបើកកិច្ចចរចាដើម្បីរក្សាការអនុគ្រោះពន្ធ EBA ពីសហភាពអឺរ៉ុប និង GSP ពីសហរដ្ឋអាមេរិក ហើយថាកម្ពុជានៅតែមានជំហរបន្តទំនាក់ទំនងការទូតល្អជាមួយនឹងអឺរ៉ុប និងអាមេរិក។
លោកបានបញ្ជាក់ថា៖ «ពាក់ព័ន្ធនឹងបញ្ហាការព្រមានដកប្រព័ន្ធអនុគ្រោះពន្ធ (EBA) ពីសហភាពអឺរ៉ុប និង (GSP) ពីសហរដ្ឋអាមេរិកកម្ពុជានៅតែព្យាយាមបើកកិច្ចចរចា ដើម្បីរក្សាការអនុគ្រោះពន្ធនេះ និងមានជំហរបន្តទំនាក់ទំនង ការទូតល្អជាមួយនឹងអាមេរិកដដែល»។
ក្រៅពីបញ្ហា EBA និង GSP លោក ស ខេង ក៏បានប្រាប់ទៅពលរដ្ឋខ្មែរដែលកំពុងរស់នៅទីនោះផងដែរថា តាមរយៈវេទិកាសាធារណៈនៅគ្រប់មូលដ្ឋាន ដែលត្រូវបានរៀបចំដោយរាជរដ្ឋាភិបាលគឺបានជួយដោះស្រាយបញ្ហាការលំបាកជាច្រើនរបស់ប្រជាពលរដ្ឋ។
លោកបានបញ្ជាក់ថា៖ «វេទិកាសាធារណៈ (ត្រូវបានធ្វើឡើង) នៅគ្រប់មូលដ្ឋាន ដើម្បីប្រមូលយកមតិយោបល់ កង្វល់ និងសំណូមពរនានាពីប្រជាពលរដ្ឋ ហើយតាមរយៈយន្តការនេះ អាជ្ញាធរថ្នាក់ជាតិ និងថ្នាក់ក្រោមជាតិបានដោះស្រាយបញ្ហាប្រជាពលរដ្ឋយ៉ាងច្រើន និងប្រកបដោយប្រសិទ្ធភាព»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានគាំទ្រការថ្លែងរបស់លោក ស ខេង ដោយលោកបញ្ជាក់ថា៖ «រាជរដ្ឋាភិបាលដឹងច្បាស់ណាស់ពីផលប្រយោជន៍ពី EBA និង GSP ដូច្នេះហើយរាជរដ្ឋាភិបាលមានឆន្ទៈក្នុងការធ្វើឲ្យសហភាពអឺរ៉ុបរក្សា EBA និងសហរដ្ឋអាមេរិករក្សា GSP សម្រាប់ប្រទេសកម្ពុជា ដោយសារតែវាជួយកម្ពុជា ក្នុងការប្រកួតប្រជែងមួយក្នុងការនាំចេញទៅកាន់ទីផ្សារសហរដ្ឋអាមេរិក និងសហភាពអឺរ៉ុប»។
ប៉ុន្តែទោះយ៉ាងណាលោក គិន ភា លើកឡើងថា រាជរដ្ឋាភិបាលកម្ពុជានឹងមិនអាចធ្វើសម្បទានណាមួយដែលប៉ះពាល់ដល់អធិបតេយ្យ និងឯករាជភាពរបស់កម្ពុជា ដើម្បីរក្សាប្រព័ន្ធអនុគ្រោះពន្ធ EBA និង GSP បានឡើយ ដោយសារតែកម្ពុជាជារដ្ឋឯករាជ្យ និងអធិបតេយ្យ។
ទន្ទឹមនឹងនេះដែរកាលពីដើមសប្តាហ៍មុនសភាពាណិជ្ជកម្មអឺរ៉ុបប្រចាំនៅកម្ពុជា បានព្រមានថា ការដកប្រព័ន្ធអនុគ្រោះពន្ធ EBA ពីកម្ពុជា វាមិនមែនគ្រាន់តែធ្វើឲ្យប៉ះពាល់ តែមកលើកម្ពុជាប៉ុណ្ណោះទេ ប៉ុន្តែវាក៏នឹងធ្វើឲ្យអន្តរាយដល់ការវិនិយោគរបស់សហភាពអឺរ៉ុបនៅកម្ពុជាធ្វើឲ្យខូចខាតទៅដល់សហគមន៍ធុរកិច្ចសហភាពអឺរ៉ុប និងថែមទាំងធ្វើឲ្យខូចដល់គំនិតផ្តួចផ្តើមអភិវឌ្ឍរបស់សហភាពអឺរ៉ុបនៅកម្ពុជាផងដែរ៕