ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានថ្លែងថាចលនាបដិវត្តន៍ពណ៌អាចកើតមានឡើងដោយសារមានភាពអសកម្ម និងការគ្រប់គ្រងខណៈពីម្សិលមិញអាជ្ញាធររាជធានីបានចាប់ឃាត់ខ្លួនសកម្មជនដីធ្លី ៥ នាក់ដែលធ្វើយុទ្ធនាការស្លៀកពាក់ខ្មៅដើម្បីទាមទារឲ្យដោះលែងមន្ត្រីសិទ្ធិមនុស្ស និងមន្ត្រី គជប ៥ រូបដែលត្រូវបានចាប់ឃុំខ្លួន។
ក្នុងពិធីខួបអនុស្សាវរីយ៍លើកទី ៧១ នៃថ្ងៃកំណើតនគរបាលជាតិកម្ពុជាពីម្សិលមិញលោក ស ខេង ថ្លែងថាសមត្ថកិច្ចគ្រាន់តែហៅក្រុមអ្នកស្លៀកពាក់ខ្មៅទៅដើម្បីសាកសួរ និងធ្វើការអប់រំតែប៉ុណ្ណោះ។
លោកក៏បានពន្យល់ពីអ្វីដែលហៅថាបដិវត្តន៍ប្រជាជន និងចលនាបដិវត្តន៍ពណ៌ដែលទាមទារឱ្យសមត្ថកិច្ចត្រូវសិក្សា និងប្រើវិធានការឱ្យបានសមស្រប។
លោកថា៖ «ប៉ុន្តែបញ្ហានេះយើងគប្បីសិក្សាស្រាវជ្រាវឱ្យយល់ច្បាស់ហើយមូលហេតុអ្វីបានជាអាចនឹងកើតមានចលនាបដិវត្តន៍ពណ៌នោះនោះជាបញ្ហាគន្លឹះ។ ក្រៅពីនោះថាតើយើងមានវិធានការយ៉ាងម៉េចដោះស្រាយ បង្ការ និងទប់ស្កាត់យ៉ាងម៉េចត្រូវរកឱ្យឃើញពីមូលហេតុ»។
លោកថា៖ «វិធានការដើម្បីដោះស្រាយបញ្ហានានាកន្លងមករបស់មន្ត្រីជំនាញយើងគឺជាវិធានការបង្ការ ទប់ស្កាត់ បង្ក្រាបដោយអនុវត្តច្បាប់ប៉ុន្តែដើម្បីបង្ការបានយើងត្រូវយល់ថាតើមកពីអ្វីបានជាអាចកើតមាន។ ក្នុងន័យនេះចង់បញ្ជាក់ថាតាមការយល់ស្តួចស្តើងរបស់ខ្ញុំយល់ថាចលនាបដិវត្តន៍ពណ៌អាចកើតមាននោះដោយសារមានភាពអសកម្ម និងការគ្រប់គ្រងរបស់យើង»។
លោកថាដើម្បីបញ្ចៀសការធ្វើបដិវត្តន៍ពណ៌មន្ត្រីទាំងអស់ត្រូវកាត់បន្ថយភាពអសកម្មរបស់ខ្លួន និងត្រូវធ្វើការដោយយុត្តិធម៌។
លោកថា៖ «បើប្រជាជនទិតៀនរឿងគ្រប់គ្រងព្រៃឈើមិនល្អយើងត្រូវដោះស្រាយធ្វើយ៉ាងម៉េចគ្រប់គ្រងព្រៃឈើឱ្យល្អដោះស្រាយដោយយុត្តិធម៌ និងឈរលើច្បាប់យើងមិនត្រូវបង្ក្រាបតែអ្នកដទៃប៉ុន្តែខ្លួនយើងធ្វើខុសតែមិនទទួលខុសត្រូវអាហ្នឹងហើយគេហៅថា “មិនយុត្តិធម៌” ទោះយើងនិយាយប្រកែកយ៉ាងម៉េចក៏ដោយ ក៏គេ (ពលរដ្ឋ) មិនស្តាប់យើងដែរបញ្ហាគឺនៅត្រង់នេះ»។
តែលោកថា៖ «អ្នកទិតៀនមិនត្រូវទាំងអស់ទេប៉ុន្តែគេតិទៀនខុសយើងបោះវាចោលទៅអាណាគេនិយាយត្រូវគួរយកមកពិចារណានេះគឺដើម្បីកសាងភាពយុត្តិធម៌ក្នុងសង្គម ភាពយុត្តិធម៌ក្នុងសង្គមធំណាស់ដែលអនុញ្ញាតឱ្យមនុស្សគ្រប់រូបឋានៈអ្វីក៏ដោយមានសិទ្ធិស្មើគ្នា»។
នៅវេលាម៉ោង ៨ និង ៣០ នាទីព្រឹកម្សិលមិញខណៈសកម្មជនដីធ្លីកំពុងប្រមូលផ្ដុំគ្នានៅចំណុចស្ដុបផ្សារដើមគរង់ចាំជួបជុំគ្នាជាមួយសកម្មជនដីធ្លីដទៃទៀតដើម្បីធ្វើយុទ្ធនាការថ្ងៃចន្ទពណ៌ខ្មៅដោយមានគម្រោងជិះម៉ូតូកង់បីទៅពន្ធនាគារព្រៃសស្រាប់តែត្រូវសមត្ថកិច្ចចាប់បញ្ជូនពួកគេទៅកាន់អធិការដ្ឋាននគរបាលខណ្ឌទួលគោក។ សកម្មជនដីធ្លីទាំង ៥ នាក់នោះរួមមានអ្នកស្រី ភោគ សុភិន,ង៉ូវ ណារី យិន ស្រ៊ីន ជាអ្នកបុរីកីឡា អ្នកស្រី ច្រាយ នីម សកម្មជនដីធ្លី ថ្មគោល និងអ្នកស្រី អ៊ីម ស្រីទូច ជាសកម្មជនដីធ្លីបឹងកក់។
ចំណែកក្រុមស្ត្រីរងគ្រោះដីធ្លីនៅសហគមន៍បឹងកក់ប្រមាណ ៣០ នាក់ស្លៀកខ្មៅបានដើរជុំវិញនៅក្នុងសហគមន៍របស់ខ្លួនដោយមានលើកបដា និងទង់ជាតិខណៈដែលអាជ្ញាធរបានដាក់កម្លាំងនៅទីនោះ និងរារាំងពួកគេមិនឱ្យដើរហែក្បួនចេញពីទីតាំងនោះ។
សកម្មជនដីធ្លីអ្នកស្រី បូវ សោភា ថ្លែងថា៖ «ពួកខ្ញុំនៅតែលើកទឹកចិត្តមន្ត្រីដែលត្រូវបានឃុំខ្លួនហើយការលាបពណ៌របស់រដ្ឋាភិបាលដែលចោទថាយើងធ្វើបដិវត្តន៍ពណ៌គឺជាភាពអាម៉ាស់បំផុតដែលចោទប្រជាពលរដ្ឋខ្លួនឯងខណៈដែលធាតុពិតគឺយើងអត់មានបំណងផ្តួលរំលំរដ្ឋាភិបាលនោះទេ»។
អ្នកស្រីបន្តថាអ្វីដែលពួកអ្នកស្រីកំពុងធ្វើគឺដើម្បីទាមទារឱ្យមានការដោះលែងមន្ត្រីអង្គការសិទ្ធិមនុស្សអាដហុក ៤ រូប និងមន្ត្រី គជប ១ រូប និងជំរុញឱ្យរដ្ឋាភិបាលគោរពសិទ្ធិមនុស្ស។
អ្នកស្រី ង៉ូវ ណារី សកម្មជនបុរីកីឡាប្រាប់ភ្នំពេញប៉ុស្តិ៍ពីអធិការដ្ឋាននគរបាលខណ្ឌទួលគោកថាសមត្ថកិច្ចបានសាកសួរពួកគាត់ទាក់ទងមូលហេតុស្លៀកខ្មៅហើយអ្នកណាគេជាអ្នកបញ្ជា? តែអ្នកស្រីបានឆ្លើយថាពួកគាត់គ្រាន់តែស្លៀកខ្មៅដើម្បីបង្ហាញការខកចិត្តចំពោះរដ្ឋាភិបាល និងទាមទារឱ្យដោះលែងមន្រី្តសិទ្ធិមនុស្សពុំមានបំណងធ្វើបដិវត្តន៍ដូចការចោទប្រកាន់ឡើយ។
អ្នកស្រីថា៖ «ទី ១ គាត់សួរខ្ញុំមានគោលបំណងអីស្លៀកខ្មៅហ្នឹងទី ២ អ្នកណាសរសេរបដា? និងទី ៣ អ្នកណាបញ្ជា? តែខ្ញុំឆ្លើយថាទាមទារឱ្យដោះលែងមន្ត្រីសិទ្ធិមនុស្ស និងដោះស្រាយបញ្ហាដីធ្លីរបស់ខ្ញុំដែលអាជ្ញាធរបានឈូសឆាយផ្ទះសំបែងរបស់ខ្ញុំ»។
បើតាមអ្នកស្រី ង៉ូវ ណារី សមត្ថកិច្ចស្នើឱ្យពួកគាត់ផ្តិតមេដៃក្នុងន័យបញ្ឈប់ធ្វើការតវ៉ាក្នុងនោះមាន បី នាក់ព្រមផ្តិតមេដៃតែពីរនាក់ទៀតគឺអ្នកស្រី ច្រាយ នីម សកម្មជនដីធ្លីថ្មគោល និងអ្នកស្រី អ៊ីម ស្រីទូច ជាសកម្មជនដីធ្លីបឹងកក់មិនព្រមផ្តិតមេដៃ។
ជាមួយគ្នានេះប្រជាពលរដ្ឋខ្មែរដែលរស់នៅឯនាយសមុទ្រក៏បានស្លៀកពាក់ខ្មៅ និងបាននាំគ្នាគាំទ្រថ្ងៃចន្ទពណ៌ខ្មៅផងដែរដើម្បីទាមទារឱ្យរដ្ឋាភិបាលខ្មែរដោះលែងមន្ត្រីសិទិ្ធមនុស្ស និងអគ្គលេខារង គ ជ ប ដែរ។
កាលពីថ្ងៃទី ៩ ខែឧសភាមន្ត្រីអង្គការសង្គមស៊ីវិលសកម្មជនដីធ្លី និងជនបរទេសសរុប ៨ នាក់ត្រូវបានសមត្ថកិច្ចឃាត់ខ្លួនពេញមួយថ្ងៃនៅពេលពួកគេពាក់អាវខ្មៅដើរទៅកាន់ពន្ធនាគារព្រៃសទាមទារឲ្យដោះលែងមន្ត្រីសិទ្ធិមនុស្សអាដហុក និងមន្ត្រី គ.ជ.ប ដែលត្រូវបានគេចាប់ឃុំ «ទាំងអយុត្តិធម៌»។
អភិបាលរងរាជធានីភ្នំពេញលោក ឃួង ស្រេង បានថ្លែងថាស្លៀកពាក់អ្វីក៏ដោយឱ្យតែខុសច្បាប់ត្រូវឃាត់ខ្លួនដើម្បីធ្វើការសាកសួរបើការសម្តែងមតិនោះប៉ះពាល់ដល់សណ្តាប់ធ្នាប់សាធារណៈ។
លោកថា៖ «គាត់មានសិទ្ធិធ្វើការសម្តែងមតិតែត្រូវជូនដំណឹងមកអាជ្ញាធរតាមច្បាប់ស្តីពីបាតុកម្មដោយសន្តិវិធីហើយគេឃាត់ខ្លួនដើម្បីណែនាំគាត់»។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលោក មឿន តុលា ដែលឃ្លាំមើលករណីនេះយល់ថារដ្ឋាភិបាលគួរពិចារណាឡើងវិញក្នុងការរឹតត្បិតសិទ្ធិសេរីភាពបញ្ចេញមតិ និងគួរដោះលែងមន្ត្រីសិទ្ធិមនុស្សដើម្បីបន្ថយភាពតានតឹង។
លោកថា៖ «និយាយពីដំណោះស្រាយវិញខ្ញុំគិតថាអ្វីដែលរដ្ឋាភិបាលគួរធ្វើត្រូវដោះលែងអ្នកទាំង ៥ នាក់ដែលកំពុងរងការឃុំខ្លួនទាំងអយុត្តិធម៌។ អ៊ីចឹងបើដោះលែងខ្ញុំគិតថាពួកសកម្មជននឹងលែងតវ៉ាទៀតហើយ»។
លោកថ្លែងទៀតថាចំណាត់ការរបស់រដ្ឋាភិបាលដែលបង្ក្រាបអ្នកស្លៀកខ្មៅនាពេលនេះនឹងធ្វើឱ្យស្ថានភាពសិទ្ធិមនុស្សធ្លាក់ចុះជាពិសេសម្ចាស់ជំនួយបរទេសគេនឹងពិចារណាមុននឹងផ្តល់ជំនួយដល់កម្ពុជា។
រហូតមកដល់ម៉ោងប្រមាណជាង ៩ យប់មិញសកម្មជនទាំង ៥ នាក់ដែលត្រូវបានចាប់ខ្លួនដោយសន្ដិសុខខណ្ឌទួលគោកនោះត្រូវបានដោះលែងវិញបន្ទាប់ពីយល់ព្រមផ្តិតមេដៃបញ្ឈប់ធ្វើការតវ៉ា៕
