The Phnom Penh Post Search

Search form




Logo of Phnom Penh Post newspaper Phnom Penh Post - លោក ស ខេង​៖ ជោគវាសនា​របស់​លោក កឹម សុខា គឺ​ស្ថិត​លើ​តុលាការ

លោក ស ខេង​៖ ជោគវាសនា​របស់​លោក កឹម សុខា គឺ​ស្ថិត​លើ​តុលាការ

Content image - Phnom Penh Post
លោក កឹម សុខា ស្ថិតក្នុងខេត្ត កំពង់ឆ្នាំង កាលពីឆ្នាំ ២០១៧។​ ALEX WILLEMYNS

លោក ស ខេង​៖ ជោគវាសនា​របស់​លោក កឹម សុខា គឺ​ស្ថិត​លើ​តុលាការ

ភ្នំពេញៈ រដ្ឋមន្ដ្រី​ក្រសួង​មហាផ្ទៃ​លោក ស ខេង បាន​បញ្ជាក់​កាលពី​ម្សិលមិញ​ថា ជោគវាសនា​របស់​លោក កឹម សុខា​គឺ​អាស្រ័យ​ទៅ​លើ​តុលាការ​ដោយ​មិន​អាច​ភ្ជាប់​ជាមួយ​វិសោធនកម្ម​ច្បាប់​ស្តីពី​គណបក្ស​នយោបាយ​ដែល​តម្រូវ​ឲ្យ​មាន​ការស្នើសុំ​ដក​បម្រាម​នយោបាយ​នោះ​បាន​ទេ​ ខណៈ​សំណុំ​រឿង​របស់​អតីត​មេបក្ស​ប្រឆាំង​រូប​នេះ​កំពុង​តែ​ស្ថិត​នៅ​ក្នុង​ដំណើរការ​នីតិវិធី​របស់​តុលាការ​នៅ​ឡើយ​។

ការ​ថ្លែង​របស់​លោក ស ខេង ធ្វើ​ឡើង​ ខណៈ​ដែល​វិសោធនកម្ម​មាត្រា ៤៥ ថ្មី (​ស្ទួន​) នៃ​ច្បាប់​ស្តីពី​គណបក្ស​នយោបាយ​ដែល​នឹង​បើក​ផ្លូវ​ដល់​អ្នក​នយោបាយ​នៃ​អតីត​គណបក្ស​សង្គ្រោះ​ជាតិ​ដែល​ត្រូវ​បាន​តុលាការ​កំពូល​ហាមឃាត់​សិទ្ធិ​ធ្វើ​សកម្មភាព​នយោបាយ​មាន​ឱកាស​ស្នើសុំ​នីតិសម្បទា​ឡើងវិញ​ត្រូវ​បាន​បញ្ជូន​ទៅ​ព្រះមហាក្សត្រ ដើម្បី​ឡាយ​ព្រះហស្តលេខា​បន្ទាប់ពី​រដ្ឋសភា​ និង​ព្រឹទ្ធសភា​បាន​អនុម័ត​រួច​។

លោក ស ខេង បាន​ថ្លែង​ប្រាប់​អ្នក​សារព័ត៌មាន​ក្រោយ​បញ្ចប់​សម័យប្រជុំ​រដ្ឋសភា​កាលពី​ម្សិលមិញ​ថា​៖ «​យើង​ត្រូវ​មើល​បញ្ហា​ពី​ដើម​មូលហេតុ​អ្វី​បាន​ជា​គាត់ (​កឹម សុខា​) ត្រូវ​បាន​សមត្ថកិច្ច​ឃាត់ខ្លួន​? ត្រូវ​មើល​មូលហេតុ​ហ្នឹង យើង​ត្រូវ​មើល​ហេតុផល​អី​រហូត​មក​ដល់​ពេល​នេះ​ដំណើរការ នីតិវិធីតុលាការ មិន​ទាន់​ចប់ ឥឡូវ​គាត់​ស្ថិត​នៅ​ក្នុង​នីតិវិធី​តុលាការ​នៅ​ឡើយ​»​។

លោក ស ខេង ក៏​បាន​ឲ្យ​ដឹង​ដែរ​ថា​រហូត​មក​ទល់​ពេល​នេះ​ក្រសួង​មហាផ្ទៃ​មិន​ទាន់​ទទួល​បាន​សំណើ​ណា​មួយ​នៃ​ការស្នើសុំ​ផ្ដល់​នីតិសម្បទា​ធ្វើ​សកម្មភាព​នយោបាយ​ឡើងវិញ​ពី​ថ្នាក់ដឹកនាំ​នៃ​អតីត​គណបក្ស​សង្គ្រោះជាតិ​នៅ​ឡើយ​ទេ​។

លោក​បញ្ជាក់​ថា​៖​ «​មិន​ទាន់​មាន​នៅ​ឡើយ​ដោយសារ​តែ​ច្បាប់​ហ្នឹង មិន​ទាន់​បាន​ព្រះករុណា​លោក​ឡាយ​ព្រះហស្តលេខា​នៅ​ឡើយ និង​ប្រកាស​ឲ្យ​ប្រើប្រាស់​ជា​ធរមាន ហើយ​ក្រោយ​ច្បាប់​ចូល​ជា​ធរមាន​យើង​នឹង​ដឹង​»​។

លោក កង គឹមហាក់ អតីត​តំណាងរាស្ត្រ​អតីត​គណបក្ស​សង្គ្រោះ​ជាតិ​បាន​ថ្លែង​ថា​ស្ថានការណ៍​នយោបាយ​អាច​នឹង​មាន​ការប្រែប្រួល​លឿន​ហើយ​ថា បើ​នីតិវិធី​តុលាការ​បាន​បញ្ចប់​ទៅ​លើ​លោក​ កឹម សុខា នោះ​វា​ជា​សញ្ញា​វិជ្ជមាន ក្នុង​ការ​បើក​ផ្លូវ​ដល់​ការ​ដោះស្រាយ វិបត្តិ​នយោបាយ​នៅ​ក្នុង​ប្រទេស​។

លោក​បញ្ជាក់​ថា​៖ «​យើង​ចាំ​មើល​ជាក់ស្តែង​ទាំងអស់​គ្នា​ទៅ​ដោយសារ​ស្ថានការណ៍​នយោបាយ​ឥឡូវ​មាន​ការ​ប្រែប្រួល​រហ័ស​។ នេះ​ជា​សញ្ញា​វិជ្ជមាន​មួយ ប្រសិន​បើ​មាន​ព័ត៌មាន​ដែល​នីតិវិធី​តុលាការ​ត្រូវ​បាន​បញ្ចប់​ឆ្ពោះ​ឈាន​ទៅ​រក​ការដោះស្រាយ​វិបតិ្ត​នយោបាយ​នៅ​ប្រទេស​យើង​»​។

លោក​មេធាវី លី ច័ន្ទតុលា មិន​អាច​ទាក់ទង​សុំ​អធិប្បាយ​ជុំវិញ​ករណី​នេះ​បាន​ទេ​កាលពី​ម្សិលមិញ ប៉ុន្តែ​លោក​មេធាវី​ សុក សំអឿន អ្នក​ជំនាញ​ផ្នែក​ច្បាប់​បាន​មើល​ឃើញ​ថា​ករណី​លោក កឹម សុខា គឺជា​ករណី​នយោបាយ​ដោយឡែក​មួយ​ពី​ការធ្វើ​វិសោធនកម្ម​ច្បាប់​មាត្រា ៤៥ ថ្មី ដែល​ច្បាប់​នេះ​បើក​សិទ្ធិ​អំណាច​ទៅ​នាយករដ្ឋមន្ដ្រី​ក្នុង​ការ​សម្រេច​ជោគវាសនា​អ្នក​ដែល​ជាប់​បម្រាម​នយោបាយ​។

លោក​បន្ថែម​ថា​៖ «​និយាយ​រួម​ទៅ​ទាល់​តែ​ព្រះមហាក្សត្រ ព្រះរាជទាន​ទោស ក៏ប៉ុន្ដែ​តាមរយៈ​ការស្នើ​របស់​លោក​នាយករដ្ឋមន្ដ្រី ដូច្នេះ​ទាល់​តែ​លោក​នាយក​រដ្ឋមន្ដ្រី​យល់​ព្រម​បាន​បាន​។ ដូច្នេះ​វា​នៅ​តែ​ជា​រឿង​នយោបាយ តែ​វា​ក៏​ជា​វិធី​ម្យ៉ាង​សម្រាប់​ការដោះស្រាយ​បញ្ហា​ទាល់ច្រក​នយោបាយ​»​។

លោក សុក សំអឿន បាន​ចាត់​ទុក​ការធ្វើ​វិសោធនកម្ម​ច្បាប់​គណបក្ស​នយោបាយ​នេះ​ថា គឺជា​ច្រកទ្វារ​នយោបាយ​សម្រាប់​ក្រុម​អ្នក​នយោបាយ​ជាប់ទោស ប៉ុន្ដែ​អ្វី​ដែល​សំខាន់​នោះ​ត្រង់​ថា តើ​អ្នក​នយោបាយ​ព្រម​បើក​ ឬ​មិន​បើក​ច្រកទ្វារ​នេះ​។

ចំពោះ​ករណី​លោក​ កឹម សុខា លោក​ សំអឿន បាន​បញ្ជាក់​ថា​៖ «​តុលាការ​ឆាប់​កាត់​ទៅ​ឲ្យ​មាន​ទោស​ទៅ ហើយ​ព្យួរទោស​ទៅ​មាន​តែ​វិធី​ហ្នឹង​»​។

កាលពី​ថ្ងៃទី​ ២៦ ខែ​ធ្នូ ឆ្នាំ ២០១៨ លោក​នាយករដ្ឋមន្ត្រី ហ៊ុន សែន បាន​ថ្លែង​ថា​បុគ្គល​អ្នកនយោបាយ​នៃ​អតីត​គណបក្ស​សង្គ្រោះ​ជាតិ​មួយ​ចំនួន​ដែល​ជាប់​បម្រាម​នយោបាយ​ត្រូវ​ស្នើសុំ​នីតិសម្បទា​ម្នាក់​ម្តងៗ​តាម​លក្ខណសម្បត្តិ​របស់​បុគ្គល​ម្នាក់ៗ​ដោយ​មិន​អាច​ស្នើសុំ​ជា​កញ្ចប់​បាន​ទេ​។

លោក កឹម សុខា ត្រូវ​បាន​ចាប់​ឃុំ​ខ្លួន​កាលពី​ថ្ងៃទី​ ៣ ខែ​កញ្ញា ឆ្នាំ​ ២០១៧ ក្រោម​ការចោទប្រកាន់​ពី​បទ​ «​ក្បត់ជាតិ​»​។ ​លោក​ត្រូវ​បាន​ដោះលែង​ពី​ពន្ធនាគារ​ត្រពាំងផ្លុង​ឲ្យ​មក​ស្នាក់នៅ​ក្នុង​ផ្ទះ​ក្រោម​ការត្រួតពិនិត្យ​របស់​តុលាការ​ បន្ទាប់ពី​ជាប់ឃុំ​នៅ​ទី​នោះ​ជិត​ ១​ ​ឆ្នាំ​៕

អត្ថបទគួរចាប់អារម្មណ៍