ភ្នំពេញៈ នាយករដ្ឋមន្ត្រីស្តីទី និងជារដ្ឋមន្ត្រីក្រសួងមហាផ្ទៃលោក ស ខេង លើកឡើងថាកន្លងមករាជរដ្ឋាភិបាលបានយកចិត្តទុកដាក់ និងលើកកម្ពស់ដល់ស្ថានភាពរស់នៅ និងការបំពេញការងាររបស់គ្រូបង្រៀនដោយដំឡើងប្រាក់បៀវត្សរ៍ និងប្រាក់បំណាច់ផ្សេងៗទៀតជាបន្តបន្ទាប់។
ការថ្លែងបែបនេះរបស់លោក ស ខេង ធ្វើឡើងក្នុងទិវាគ្រូបង្រៀនក្នុងខួបលើកទី ២២ នៅវិទ្យាស្ថានជាតិអប់រំ រាជធានីភ្នំពេញកាលពីថ្ងៃសៅរ៍។ លោកបន្តថា លើសពីនេះរាជរដ្ឋាភិបាលក៏បានផ្តល់កូតាគ្រូបង្រៀនប្រមាណ ៣ ៦០០ នាក់ ក្នុង ១ ឆ្នាំ ដើម្បីដាក់ពង្រាយនៅតាមសាលារៀនដែលខ្វះគ្រូបង្រៀន។ រាជរដ្ឋាភិបាលក៏បានសាងសង់ផ្ទះ និងផ្តល់អត្ថប្រយោជន៍ដល់គ្រូបង្រៀនផងដែរ ដើម្បីលើកកម្ពស់វិជ្ជាជីវៈ និងលក្ខខណ្ឌរស់នៅ និងការបំពេញការងាររបស់គ្រូបង្រៀន។
លោក ស ខេង ថ្លែងថា៖ «គ្រូបង្រៀនក៏បានទទួលនូវការបំប៉នសមត្ថភាព និងការលើកកម្ពស់គុណវុឌ្ឍិជាបន្តបន្ទាប់។ ឧទាហរណ៍ក្នុងពេលកន្លងមកគ្រូបឋមសិក្សាតម្រូវឱ្យចប់ត្រឹមតែកម្រិតបឋមសិក្សាប៉ុណ្ណោះ។ ប៉ុន្តែបច្ចុប្បន្ន បើចង់ក្លាយជាគ្រូបឋមសិក្សាត្រូវមានសញ្ញាបត្រមធ្យមសិក្សាទុតិយភូមិ។ នៅពេលខាងមុខដើម្បីឱ្យមានលក្ខណៈប្រហាក់ប្រហែលនឹងតំបន់ យើងនឹងខិតខំពង្រឹងសមត្ថភាពគ្រូបង្រៀនបន្ថែមទៀត»។
ជាមួយគ្នានេះតាមរយៈសុន្ទរកថា ក្នុងទិវានោះ លោក ហង់ជួន ណារ៉ុន រដ្ឋមន្ត្រីក្រសួងអប់រំបានថ្លែងថា ការឆ្ពោះទៅរកការអប់រំតាមបែបឌីជីថលគឺចាំបាច់ត្រូវការធនធានគ្រូបង្រៀនមានសមត្ថភាពមានទឹកចិត្តក្លៀវក្លាក្នុងការបង្រៀន និងផ្តល់ការអប់រំដល់សិស្សឱ្យមានគុណភាព។
លោករដ្ឋមន្ត្រីថ្លែងថា៖ «ឆ្លើយតបនឹងតម្រូវការនេះ ក្រសួងបានយកចិត្តទុកដាក់លើកកម្ពស់សមត្ថភាពគ្រូបង្រៀនតាមរយៈកំណែទម្រង់បណ្តុះបណ្តាលគ្រូដែលរួមបញ្ចូលទាំងការបណ្តុះបណ្តាលដំបូង (Pre-service) ការអភិវឌ្ឍវិជ្ជាជីវៈជាប្រចាំសម្រាប់គ្រូបង្រៀន និងនាយកសាលា»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យថ្លែងពីម្សិលមិញថាកាលពីឆ្នាំ ២០១៨ រដ្ឋាភិបាលបានចេញសេចក្តីប្រកាសពីការយកចិត្តទុកដាក់ដំឡើងប្រាក់បៀវត្សរ៍ដល់គ្រូង្រៀន។ ប៉ុន្តែសម្រាប់ឆ្នាំ ២០១៩ នេះដែលជាទិសដៅសម្រាប់ឆ្នាំ ២០២០ លោកស្រីថាមិនទាន់ឃើញមានអ្វីដែលធ្វើឱ្យគ្រូបង្រៀនគិតថារដ្ឋាភិបាលបាននិងកំពុងយកចិត្តទុកដាក់ចំពោះគ្រូបង្រៀននោះទេពីបញ្ហាប្រាក់បៀវត្សរ៍ក៏ដូចជាបញ្ហាអប់រំ ដែលកំពុងវិវឌ្ឍទៅមុខដើម្បីឈានទៅរកជោគជ័យនៅឆ្នាំ ២០២០។
លោកស្រីថ្លែងថា៖ «យើងឃើញហើយថា តាមពិតការដែលរដ្ឋាភិបាលកំពុងតែធ្វើសព្វថ្ងៃហ្នឹងផ្អែកទៅលើការពង្រឹងអំណាចខ្លួនច្រើនជាង។ មិនមែនជាបច្ចេកទេស ហើយមិនមែនជាអ្វីដែលថាធ្វើឱ្យលោកគ្រូ អ្នកគ្រូ ហើយសិស្សានុសិស្សទទួលបាននូវការសិក្សាដែលល្អនោះទេ»។
លោកស្រីបន្ថែមថាអ្វីដែលធ្វើឱ្យគ្រូបង្រៀនកាន់តែមានទឹកចិត្តបង្រៀនខ្លាំងឡើងនោះគឺ គ្រូបង្រៀនត្រូវមានប្រាក់បៀវត្សរ៍រស់នៅសមរម្យ ដើម្បីកុំឱ្យពួកគាត់មានពេលវេលាបង្កើត «មុខរបរទី ២ ទី ៣»។ សព្វថ្ងៃគ្រូបង្រៀនស្ទើរតែទាំងអស់មានមុខរបរ «ទី ២ ទី ៣ ទី ៤» ដើម្បីបង្គ្រប់ «ឆ្នាំងបាយ» របស់ពួកគាត់។
លោក Sardar Umar Alam តំណាងអង្គការយូណេស្កូប្រចាំកម្ពុជាបានថ្លែងក្នុងសេចក្តីប្រកាសព័ត៌មានកាលពីថ្ងៃសៅរ៍ថា គ្រូបង្រៀនដើរតួនាទីយ៉ាងសំខាន់ក្នុងការសម្រេចបាននូវការអប់រំប្រកបដោយគុណភាពសម្រាប់ទាំងអស់គ្នានៅក្នុងក្របខ័ណ្ឌរបៀបវារៈអប់រំឆ្នាំ ២០៣០ ពីព្រោះប្រព័ន្ធទាំងមូលពឹងផ្អែកលើពួកគេ។ ការវិនិយោគលើគ្រូបង្រៀនគឺជាការវិនិយោគដ៏ល្អបំផុតមួយដើម្បីលើកស្ទួយធនធានមនុស្សរបស់ប្រទេសណាមួយ។
សេចក្តីប្រកាសព័ត៌មានបញ្ជាក់ថា៖ «ប្រទេស កម្ពុជា កំពុងដើរលើមាគ៌ានេះតាមរយៈការផ្តល់អាទិភាពដល់ការអប់រំគ្រូបង្រៀន ជាពិសេសសម្រាប់គ្រូបង្រៀន វ័យក្មេង ដើម្បីបំពាក់ឱ្យពួកគេនូវជំនាញ ដើម្បីត្រៀមខ្លួនសម្រាប់បញ្ហាប្រឈមនៃការបង្រៀននៅសតវត្សរ៍ទី ២១ ដើម្បីជួយឱ្យសិស្សទទួលបានអត្ថប្រយោជន៍ពីការរៀនសូត្រអន្តរកម្ម និងការរីកចម្រើនបច្ចេកវិទ្យាឌីជីថល»។
លោក រស់ សុវាចា អ្នកនាំពាក្យក្រសួងអប់រំប្រាប់ភ្នំពេញប៉ុស្តិ៍ពីម្សិលមិញថា រាជរដ្ឋាភិបាលបាននិងកំពុងបន្តបង្កើនថវិកាសម្រាប់ការងារអប់រំ យុវជន និងកីឡា។ ប្រាក់បៀវត្សរ៍គ្រូបង្រៀនបានកើនឡើង ៣ ដងរួចមកហើយ ក្នុងរយ: ៦ ឆ្នាំ នៃការធ្វើកំណែទម្រង់ ហើយនឹងត្រូវបានដំឡើងតាមជំហានជាបន្តបន្ទាប់នៅពេលអនាគត។
អ្នកនាំពាក្យរូបនេះថ្លែងថា៖ «គុណភាពគ្រូបង្រៀនជាអាទិភាពយុទ្ធសាស្ត្រមួយរបស់ក្រសួងអប់រំសម្រាប់បន្តកំណែទម្រង់ឆ្នាំ ២០១៩-២០២៣ ដោយផ្តោតលើការលើកកម្ពស់គុណវុឌ្ឍិ និងជីវភាពគ្រូបង្រៀន»។
លោកបន្តទៀតថាក្រសួងអប់រំបាននិងកំពុងបន្តលើកកម្ពស់គុណភាពគ្រូបង្រៀនដោយមានកិច្ចសហការវិជ្ជមានជាមួយគ្រប់ភាគីពាក់ព័ន្ធដូចជាក្រសួង ស្ថាប័ន ដៃគូអភិវឌ្ឍន៍ សង្គមស៊ីវិល វិស័យឯកជន សហគមន៍តាមមូលដ្ឋាន មាតាបិតាសិស្ស និស្សិត និងមន្ត្រីអប់រំគ្រប់លំដាប់ថ្នាក់៕