ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃកាលពីម្សិលមិញបានថ្លែងនៅក្នុងជំនួបជាមួយដៃគូអភិវឌ្ឍន៍អង្គការក្រៅរដ្ឋាភិបាលជាង ២០០ ស្ថាប័ន ដោយបានរិះគន់ទៅលើបុគ្គលនយោបាយឬស្ថាប័នសារព័ត៌មានខ្លះដែលបានកំពុងប្រើពាក្យ «របបក្រុងភ្នំពេញ» «របបលោកហ៊ុន សែន» ជំនួសឲ្យពាក្យផ្លូវការ «រាជរដ្ឋាភិបាលនៃព្រះរាជាណាចក្រកម្ពុជា» ដែលបញ្ហានេះកំពុងមើលងាយដល់ពលរដ្ឋកម្ពុជាប្រមាណជាង ៨៣% ដែលបានចេញទៅបោះឆ្នោត ហើយបំណងលាបពណ៌ឲ្យរាជរដ្ឋាភិបាលនេះកើតឡើងមិនស្របច្បាប់។
នៅក្នុងវេទិកាស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិលលើកទី ២ ធ្វើនៅថ្ងៃទី ១៧ ខែមករា ឆ្នាំ ២០១៩ នៅក្នុងក្រសួងមហាផ្ទៃ លោក ស ខេងថ្លែងថា៖ «សព្វថ្ងៃយើងមានរាជរដ្ឋាភិបាលនៃព្រះរាជាណាចក្រកម្ពុជា រាជរដ្ឋាភិបាលកើតចេញពីការបោះឆ្នោតនិងដោយសាររបបយើងជារបបរាជានិយមអាស្រ័យរដ្ឋធម្មនុញ្ញអ៊ីចឹងគេដាក់ឈ្មោះថា រដ្ឋាភិបាលសព្វថ្ងៃនេះជារាជរដ្ឋាភិបាលនៃព្រះរាជាណាចក្រ កម្ពុជាប៉ុន្តែមានអ្នកប្រើពាក្យថា មិនមែនរាជដ្ឋាភិបាលទេ គាត់ប្រើពាក្យថា «របបក្រុងភ្នំពេញ» «របបហ៊ុន សែន» តាមខ្ញុំយល់ ដ៏ស្តួចស្តើងរបស់ខ្ញុំ ខ្ញុំគិតថាការប្រើពាក្យបែបនេះ ហាក់បីដូចជារមៀលទៅរកការកំណត់ថា របបនេះ រាជរដ្ឋាភិបាលនេះ គឺមិនស្របច្បាប់ រដ្ឋាភិបាលខុសច្បាប់»។
លោក ស ខេង បានអះអាងផងដែរថា អ្នកដែលហៅថា របបក្រុងភ្នំពេញ ត្រូវគិតពីឆន្ទៈពលរដ្ឋខ្មែរជាង ៨៣% បានចេញ ទៅបោះឆ្នោត ហើយប្រសិនបើពលរដ្ឋមិនឲ្យតម្លៃនោះទេ គឺពួកគាត់មិនទៅបោះឆ្នោតឡើយ ហើយការបោះឆ្នោតកាលពីខែកក្កដា ឆ្នាំ ២០១៨ គឺ គ្មានអំពើហិង្សា ដោយ រលូនបើទោះបីជាប្រទេសនៅសហគមន៍អឺរ៉ុប និងសហរដ្ឋអាមេរិកបានលើកឡើងពីបញ្ហានៅកម្ពុជា ប៉ុន្ដែពួកគេក៏បានសាទរ លោកនាយករដ្ឋមន្ត្រី ហ៊ុន សែន បានគ្រប់គ្រងរាជរដ្ឋាភិបាលអាណត្តិទី ៦ ដើម្បីត្រៀមខ្លួនធ្វើការជាមួយគ្នាផងដែរ ហើយឥឡូវនេះប្រទេសកម្ពុជាបាន និងកំពុងធ្វើការជាមួយប្រទេសទាំងនោះ។
លោក ស ខេង បានថ្លែងថា៖ «ការប្រើពាក្យនេះវាធ្ងន់ដែរ របបក្រុងភ្នំពេញ ពាក្យថា របបនេះ ដែលនាំឲ្យយើងភាគច្រើនគឺយើងអ្នកប្រជាធិបតេយ្យ ជាអ្នកសេរីនិយមអ៊ីចឹង ក៏ប៉ុន្ដែដល់យើង (ពួកគេ) ប្រើពាក្យនេះមកមានន័យថា ហាក់ដូចជាមិនគោរព ឆន្ទៈប្រជាពលរដ្ឋ អ៊ីចឹងផ្ទុយពីការយើងកំណត់។ ខ្ញុំនិយាយបែបនេះ ខ្ញុំមិនចង់និយាយថា សុំឲ្យឈប់ទេ នេះជាសេរីភាពរបស់ខ្ញុំ ក៏ប៉ុន្ដែនេះ ខ្ញុំគ្រាន់តែបកស្រាយ តាមការយល់ឃើញស្តួចស្តើងរបស់ខ្ញុំប៉ុណ្ណោះ»។
លោក សំបូរ មាណារ៉ា សាស្ត្រាចារ្យប្រវត្តិសាស្ត្រ បានអះអាងថា ការប្រើពាក្យទាំងនោះគ្រាន់តែនិយាយអំពីដំណើរការនៃការវិវឌ្ឍនៃការគ្រប់គ្រង នយោបាយ នៃរដ្ឋាភិបាលរបស់ប្រទេសណាមួយដែលគេមិនពេញចិត្តហើយពាក្យនេះត្រូវបានគេប្រើប្រាស់តាំងពី ដើមផងដែរ ហើយដូចជារបបប៉ុល ពត ហើយក៏គេអាចនិយាយថា របបក្រុងវ៉ាស៊ីនតោន របបក្រុងតូក្យូ ឬរបបទីក្រុងប៉េងកាំងបានដែរ។
លោក មាណារ៉ា ថ្លែងថា៖ «អ្នកដែលលើកឡើងពីរបបហ្នឹងគេគ្រាន់តែនិយាយគោលដៅក្នុងការបង្ហាញអំពីសម័យនៃអន្តរកាល នៃរដ្ឋាភិបាលណាមួយក្នុងសម័យកាលនីមួយៗតែប៉ុណ្ណោះ ដូច្នេះវាមិនមែនជាការទាស់ខុសអ្វីទេ ហើយក្នុងប្រវត្តិសាស្ត្រក៏មាននិយាយ ក៏ធ្លាប់និយាយពីរបបដែរ ដូចជារបបទីក្រុងហាណូយ របបទីក្រុង ប៉េកាំងដូច្នេះវាជាតម្លៃ នៃការប្រើប្រាស់ សម្រាប់ បញ្ជាក់អំពីក្រុមនៃរដ្ឋាភិបាលគ្រប់គ្រងនៃប្រទេសណាមួយ»។
លោកបញ្ជាក់ថា៖ «ចំពោះខ្ញុំយល់ឃើញថា សំខាន់លើពាក្យ ក៏ប៉ុន្តែពាក្យដែលយើងនិយាយនេះមិនមែនមានការមាក់ងាយ វាគ្រាន់តែបង្ហាញការមិនពេញចិត្ត បើយើងនិយាយអំពីលក្ខណៈនៃការប្រើពាក្យគឺថា វាអត់មានការខុសឆ្គងទេតែគ្រាន់តែអត្ថន័យនៃគំនិតនៃអ្នកប្រើនោះយកទៅប្រើទេ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងកាលពីម្សិលមិញដោយយោងតាមការសង្កេត បានមើលឃើញថា អ្នកដែលបានកំពុងប្រើភាសាបែបនោះមានដូចជា អង្គការក្រៅរដ្ឋាភិបាលមួយចំនួន ឬអ្នកវិភាគមួយចំនួន លោក សម រង្ស៊ី និងមានពួកប្រឆាំង វិទ្យុអាស៊ីសេរីដែលបានរៀបចំ ពាក្យវិទ្ធង្សនាដើម្បីប្រឆាំងនឹងឆន្ទៈរបស់មហាជនហើយពាក្យហ្នឹងគេតែងតែ ប្រើប្រាស់សម្រាប់ធ្វើបដិវត្តន៍ដោយគេមិនទទួលស្គាល់ឆន្ទៈរបស់មហាជនទេ។
លោក សុខ ទូច ប្រធានរាជបណ្ឌិត្យសភាកម្ពុជា ក៏បានថ្លែងរិះគន់អ្នកសារព័ត៌មាន និងអ្នកនយោបាយដែលប្រើពាក្យនេះថា ជាអ្នកសារព័ត៌មានប្រកាន់វិជ្ជាជិវៈនិងអ្នកនយោបាយដែលមានចេតនាទុច្ចរិតដោយមានហេតុផលនយោបាយដើម្បីទាក់ទាយប្រជាប្រិយភាពហើយការប្រើភាសារនេះវាផ្ទុយទៅនឹងច្បាប់កម្ពុជា។
លោក សុខ ទូច បានថ្លែងថា៖ «អ្នកដែលមាននិន្នាការនយោបាយលម្អៀងឬអ្នកដែលប្រើប្រាស់ភាសានេះដើម្បីទាក់ទាញអ្នកមិនពេញចិត្ត ឬប្រឆាំងណាមួយដើម្បីទទួលបានការគ្រាំទ្រ វាមានចេតនានយោបាយ កាលណាអ្នកនយោបាយគាត់មិនត្រូវគ្នា ឬប្រឈម គ្នាគាត់ប្រើភាសាហ្នឹងហើយប្រសិនបើអ្នកនយោបាយត្រូវគ្នាគេមិនប្រើភាសាបែបហ្នឹងទេ»៕