ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃជំរុញឱ្យភាគីពាក់ព័ន្ធបង្កើនកិច្ចសហការដោះស្រាយបញ្ហាអំពើហិង្សាលើស្ត្រីគ្រប់ទម្រង់ ខណៈរដ្ឋមន្ត្រីក្រសួងកិច្ចការនារីបារម្ភពីការកើនឡើងអំពើហិង្សាលើស្ត្រីនៅក្នុងប្រទេស ក្នុងអំឡុងពេលវិបត្តិកូវីដ ១៩ ប្រសិនបើវិធានការបង្ការ ទប់ស្កាត់ និងផ្តល់កិច្ចការពារទៅលើស្ត្រីមានការធ្លាក់ចុះ។
ការលើកឡើងទាំងនេះបានធ្វើឡើងកាលពីម្សិលមិញក្នុងពិធីប្រកាសផ្សព្វផ្សាយឱ្យប្រើប្រាស់ជាផ្លូវការនូវផែនការសកម្មភាពជាតិស្តីពីការទប់ស្កាត់អំពើហិង្សាលើស្ត្រីលើកទី៣ ឆ្នាំ ២០១៩-២០២៣ ដោយមានការចូលរួមពីមន្ត្រីពាក់ព័ន្ធគ្រប់ជាន់ថ្នាក់ទូទាំងប្រទេស និងបណ្តាអង្គការជាដៃគូអភិវឌ្ឍន៍សរុបប្រមាណ ៣០០ នាក់នៅសណ្ឋាគារ សូហ្វីតែល ភ្នំពេញ ភូគីត្រា។
នៅក្នុងឱកាសនោះលោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីបានលើកឡើងថា ប្រសិនជាវិធានការបន្តក្នុងការបង្ការ ទប់ស្កាត់ និងផ្តល់កិច្ចការពារទៅលើស្ត្រីរយៈពេល ៣ ខែ គ្មានប្រសិទ្ធភាពនោះករណីអំពើហិង្សាទាក់ទងនឹងយេនឌ័រអាចកើតមានបន្ថែមរហូតដល់ ៥ លានករណី ហើយនឹងអាចកើតមានរហូតដល់ជាង ៣១ លានករណីបន្ថែមទៀតនៅទូទាំងពិភពលោកសម្រាប់រយៈពេល ៦ ខែ។
លោកស្រីបារម្ភពីមូលហេតុដែលបណ្តាលឱ្យករណីអំពើហិង្សាទាក់ទងនឹងយេនឌ័រកើនឡើងក៏ព្រោះតែការធ្លាក់ចុះនូវការអនុវត្តវិធានការបង្ការ ទប់ស្កាត់ និងផ្តល់កិច្ចការពារការផ្តល់សេវាថែទាំ និងសេវាសង្គមផ្សេងៗដល់ជនរងគ្រោះពីអំពើហិង្សា។ បន្ថែមពីនេះការកើនឡើងនូវហានិភ័យនៃអំពើហិង្សាក្នុងគ្រួសារ ក៏ព្រោះតែភាពនៅដាច់ដោយឡែក ការចំណាយពេលនៅជាមួយគ្នា អំឡុងពេលមានបញ្ហាផ្លូវចិត្ត និងភាពតានតឹងផ្លូវអារម្មណ៍បានកើតឡើង ខណៈបាត់បង់ប្រាក់ចំណូលគ្រួសារ ការបិទសាលារៀនធ្វើឱ្យបន្ទុកក្នុងគ្រួសារមានការកើនឡើងជាដើម។
លោកស្រីនិយាយថា៖ «ការកើនឡើងនៃអំពើហិង្សាក្នុងគ្រួសារនេះនឹងធ្វើឱ្យខាតបង់ផ្នែកសេដ្ឋកិច្ច សង្គមកាន់តែមានទំហំធំធេងជាងនេះទៅទៀត។ ស្ថាប័នពាក់ព័ន្ធគួរបន្តចូលរួមផ្តល់ការគាំទ្រ និងផ្តល់កិច្ចគាំពារឱ្យបានខ្លាំងក្លាបន្ថែមទៀតក្នុងអំឡុងជួបប្រទះនូវវិបត្តិកូវីដ ១៩ ដែលជាដើមចមនៃការបង្កឱ្យមានអំពើហិង្សាក្នុងគ្រួសារមានកើនឡើង»។
លោក ស ខេង រដ្ឋមន្ត្រីក្រសួងមហាផ្ទៃបាននិយាយថា ការទប់ស្កាត់ និងលុបបំបាត់អំពើហិង្សាលើស្ត្រី គឺជាការទទួលខុសត្រូវរបស់អ្នកពាក់ព័ន្ធទាំងអស់ដែលត្រូវធ្វើកិច្ចសហប្រតិបត្តិការរួមគ្នាប្រកបដោយការប្តេជ្ញាចិត្តខ្ពស់ក្នុងការផ្តល់កិច្ចការពារជូនជនរងគ្រោះឱ្យបានទាន់ពេលវេលា មានប្រសិទ្ធភាពខ្ពស់ និងប្រកបដោយបរិយាប័ន្ន។
លោកបញ្ជាក់ថា៖ «បញ្ហាអំពើហិង្សាក្នុងគ្រួសារ ការរំលោភសេពសន្ថវៈអំពើជួញដូរមនុស្ស និងអំពើធ្វើអាជីវកម្មផ្លូវភេទលើស្ត្រី និងកុមារ ព្រមទាំងបញ្ហាគ្រឿងញៀន នៅតែជាកង្វល់ចំពោះមុខរបស់យើងនៅឡើយ»។
លោកបញ្ជាក់ថា បញ្ហាទាំងអស់នេះទាមទារឱ្យអ្នកពាក់ព័ន្ធទាំងអស់ត្រូវបន្តយកចិត្តទុកដាក់ខិតខំប្រឹងប្រែងពុះពារជម្នះ និងដោះស្រាយប្រកបដោយយុត្តិធម៌ និងកាន់តែមានប្រសិទ្ធភាពថែមទៀត ដើម្បីឱ្យប្រជាជន ជាពិសេសស្ត្រីដែលមានចំនួនរហូតដល់ ៥២ ភាគរយ នៃប្រជាជនសរុបអាចរស់នៅប្រកបដោយការគោរពសិទិ្ធ សេចក្តីសុខ និងសុវត្ថិភាពក្នុងជីវិត និងភាពសុខដុមរមនាក្នុងសង្គម។
លោក ស ខេង ជឿជាក់ថា ផែនការសកម្មភាពជាតិស្តីពីការទប់ស្កាត់អំពើហិង្សាលើស្ត្រី ២០១៩-២០២៣ នឹងក្លាយជាផែនទីតម្រង់ទិសដ៏ស័ក្តិសិទ្ធិមួយដែលនឹងជួយជំរុញបន្ថែមទៀតក្នុងការអនុវត្តការងារទប់ស្កាត់ និងលុបបំបាត់អំពើហិង្សាលើស្ត្រីគ្រប់ទម្រង់ឱ្យកាន់តែសម្រេចបានឆាប់រហ័សតាមការរំពឹងទុក។
លោកស្រី Pauline Tamesis ប្រធានអង្គការសហប្រជាជាតិប្រចាំកម្ពុជាបាននិយាយថា ស្ត្រីបំពេញតួនាទីដ៏សំខាន់ក្នុងសង្គមកម្ពុជា និងជាឆ្អឹងខ្នងទ្រទ្រង់ការអភិវឌ្ឍសេដ្ឋកិច្ច និងសង្គម ដូច្នេះការចូលរួមស្មើភាពរបស់ស្ត្រីគឺជាកត្តាសំខាន់ដើម្បីធានាឱ្យមានស្ថិរភាព និងជួយទប់ស្កាត់ជម្លោះ។ ប៉ុន្តែលោកស្រី មើលឃើញថាស្ត្រីនៅតែទទួលរងគ្រោះអំពីការរើសអើង និងការប្រើប្រាស់អំពើហិង្សា ខណៈស្ត្រីកម្ពុជាចំនួន ៣ នាក់ គឺមានម្នាក់ទទួលរងអំពើហិង្សាក្នុងទម្រង់មួយអាចជាអំពើហិង្សាផ្លូវកាយ ផ្លូវចិត្ត ពីសំណាក់ដៃគូស្និទ្ធស្នាលរបស់ពួកគេ។
បន្ថែមពីនេះក្នុងអំឡុងពេលទទួលរងនូវវិបត្តិកូវីដ ១៩ លោកស្រី Pauline និយាយថា ស្ត្រី និងក្មេងស្រីកាន់តែទទួលរងនូវផលប៉ះពាល់ធ្ងន់ធ្ងរ ក៏ព្រោះតែវិស័យសម្បូរដោយស្ត្រី និងក្មេងស្រីធ្វើការដូចវិស័យកាត់ដេរ ទេសចរណ៍ ត្រូវបានបាត់បង់ការងារមុនគេ ហើយក្មេងស្រីកាន់តែច្រើនបានបោះបង់ការសិក្សា។
លោកស្រីបញ្ជាក់ថា៖ «គួរឱ្យសោកសៅជាងនេះទៅទៀត ការឆ្លងរាលដាលជាសកលនៃជំងឺកូវីដ ១៩ នាំឱ្យមានការកើនឡើងនូវអំពើហិង្សាលើស្ត្រី និងក្មេងស្រីក្នុងគ្រប់រូបភាព និងអាចធ្វើឱ្យមានការធ្លាក់ចុះសមិទ្ធផលនៃការសម្រេចបានតាមគោលដៅអភិវឌ្ឍន៍ដោយចីរភាពកន្លងមក។ យើងចាំបាច់ត្រូវធានាឱ្យមានការបន្តការយកចិត្តទុកដាក់លើស្ត្រី និងក្មេងស្រី»៕