.jpg)
លោក ស ខេង នៅក្នុងពិធីនៅខេត្តព្រៃវែងពីម្សិលមិញ។ សហការី
ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃ បានប្រាប់ឲ្យក្រុមការងារថ្នាក់ជាតិ ស្ដាប់មតិពលរដ្ឋ ជាជាងមកអង្គុយនៅក្នុងអង្គប្រជុំថ្នាក់ខេត្តហើយត្រឡប់មកភ្នំពេញវិញ ដែលធ្វើឲ្យខាតពេលវេលានិងខាតសាំងរថយន្ត និងបានជំរុញឲ្យមន្ត្រីស្តាប់នូវមតិជំទាស់ ជាជាងស្តាប់នូវមតិបញ្ជោរ។
លោក ស ខេង បានថ្លែងរំឭកដល់មន្ត្រីរបស់លោក ក្នុងពេលលោកធ្វើជាអធិបតី ក្នុងពិធីប្រកាសចូលកាន់តំណែង ក្រុមប្រឹក្សាខេត្តព្រៃវែង នាព្រឹកថ្ងៃព្រហស្បតិ៍ ទី ១៣ ខែ មិថុនា ម្សិលមិញ។
លោកថ្លែងថា៖ «ចៀសវាងក្រុមការងារថ្នាក់ជាតិ គ្រាន់តែមកអង្គុយស្ដាប់ប្រធានអង្គប្រជុំនិយាយ រួចចេញពីហ្នឹងទៅ ទៅផ្ទះ (នៅ) ភ្នំពេញ។ ដល់ពេលដល់ថ្ងៃខែប្រជុំ មកកន្លែងហ្នឹងទៀត ស្ដាប់ប្រធានអង្គប្រជុំនិយាយទៀត និយាយចប់ទៅផ្ទះវិញដដែល។ សួរមើលថា ចំណេញឬខាត»។
លោកបន្តថា៖ «ខ្ញុំគិតថា វាអត់អីចំណេញទេ។ វាខាតពេលវេលា និងខាតសាំងចុះឡើង ហើយបូកទាំងខាតមិនបានបំពេញការងារនៅនឹងក្រសួងផង។ ប៉ុន្តែវាអាចចំណេញត្រង់ថា ក្នុងពេលនោះ គាត់ឆ្លៀតឱកាសស្អីទៅ យើងមិនដឹង។ តែនិយាយអ៊ីចឹងមិនមែនទាំងអស់គ្នាទេ។ អត់ទេឥឡូវសុំកែទម្រង់អាហ្នឹង»។
លោកបានផ្ដល់ជាអនុសាសន៍ថា ក្រុមការងារចុះជួយថ្នាក់ជាតិ ក៏ដូចជាក្រុមការងាររបស់គណបក្សប្រជាជនដែលចុះជួបពលរដ្ឋនៅចុងសប្ដាហ៍ ក៏ត្រូវចុះស្ដាប់មតិរបស់ពលរដ្ឋដូចគ្នាដែរ។
លោកថា ពលរដ្ឋដែលចូលរួមក្នុងវេទិកាសាធារណៈ មានមកពីនិន្នាការនយោបាយផ្សេងៗដែលអាចនឹងធ្វើឲ្យមន្ត្រីរងសម្ពាធ។ ក្នុងស្ថានភាពបែបនេះ លោកស្នើឲ្យមន្ត្រីដោះស្រាយបញ្ហារបស់ពលរដ្ឋ ដោយមិនគិតពីនិន្នាការនយោបាយ។
លោកបញ្ជាក់ថា៖ «អ៊ីចឹងមុននឹងចូលអង្គប្រជុំ ឯកឧត្តមលោកជំទាវ អស់លោក លោកស្រីត្រូវទៅធ្វើវេទិកាសាធារណៈសិន ប្រមូលយកព័ត៌មានប្រមូលអីពីហ្នឹងមកសិនលទ្ធផលពីនោះមកសិន បានមកបូកសរុបអង្គុយនិយាយជាមួយគ្នា។ រួចហើយទទួលបានគោលការណ៍ថ្មីផែនការថ្មីគាត់ទៅដោះស្រាយទៀត។ យើងមិនអាចស្កប់ស្កល់ហើយបាត់ការប្រុងប្រយ័ត្នទេ»។
លោក ស ខេង ក៏បានថ្លែងបញ្ហានេះកាលពីថ្ងៃពុធ ទី ១២ ខែ មិថុនា ២០១៩ ពេលលោកធ្វើជាអធិបតីក្នុងពិធីប្រកាសចូលកាន់តំណែងនៃក្រុមប្រឹក្សារាជធានីភ្នំពេញផងដែរ។ លោកថា សុខចិត្តស្ដាប់ពាក្យរិះគន់ ជាជាងពាក្យបញ្ជោរ ហើយស្នើឲ្យមន្ត្រីស្ដាប់ប្រតិកម្មរបស់ប្រជាពលរដ្ឋ ហើយយកបញ្ហារបស់ពលរដ្ឋមកដោះស្រាយ ដើម្បីរក្សាបាននូវស្ថិរភាព។
លោកថ្លែងថា៖ «ពីព្រោះយើងសុខចិត្តស្ដាប់នូវមតិជំទាស់ ជាជាងស្ដាប់នូវមតិបញ្ជោរយើង។ ខ្ញុំគិតថា អ៊ីចឹង។ យើងស្ដាប់មតិជំទាស់បានច្រើនជួយយើងបានច្រើនណាស់។ ឯការស្ដាប់មតិបញ្ជោរយើងគ្រាន់តែបានម៉ាបញ្ជោរទេ អត់មានបានអីទៀតទេ។ មិនស្រួលជោរទៅដើរខុសទៀត»។
លោកបន្ថែមថា ការបើកវេទិកាសាធារណៈត្រូវធ្វើឲ្យមានភាពសាមញ្ញ ដើម្បីឲ្យពលរដ្ឋហ៊ានបញ្ចេញមតិ។
អ្នកវិភាគបញ្ហាសង្គម លោក មាស នី ថ្លែងថា លោកគាំទ្រ ការលើកឡើងរបស់លោក ស ខេង ដោយលោកថា លោក ស ខេង ដឹងរឿងពិតច្រើន ពាក់ព័ន្ធនឹងមន្ត្រីដែលចុះទៅមូលដ្ឋាន។
លោកថា តាមលោកដឹងក្រុមការងារដែលចុះជួយថ្នាក់មូលដ្ឋាន ច្រើនតែយកពេលជួបជុំជាមួយពលរដ្ឋ ទៅនិយាយពីរឿងបក្សរបស់ខ្លួនច្រើនជាងស្ដាប់កង្វល់របស់ពលរដ្ឋ។
លោកថា ពេលខ្លះមន្ត្រីមិនសូវបាននិយាយអ្វីច្រើនទេ គឺត្រឹមតែនាំពាក្យផ្ដាំផ្ញើពីលោកនាយករដ្ឋមន្ត្រី ហើយមិនសូវបាននិយាយពីគោលនយោបាយរបស់ខ្លួនឲ្យពលរដ្ឋយល់។
លោកថ្លែងថា៖ «អ៊ីចឹង ការចុះហ្នឹងគ្រាន់តែចុះទៅសូត្រអ្វី ដែលជាគម្ពីរដើមរបស់គណបក្ស ជាជាងការចុះទៅជួយពលរដ្ឋរបស់ខ្លួន។ យើងទទួលស្គាល់ថា មានការជួយជាមនុស្សធម៌ច្រើន តែដំណើរភាគច្រើននៃអ្នកចុះមូលដ្ឋាន គឺពង្រឹងគណបក្សរបស់ខ្លួន ជាជាងចុះទៅស្ដាប់កង្វល់របស់ពលរដ្ឋហើយពេលខ្លះ ក៏មិនមានទុកពេលឲ្យពលរដ្ឋនិយាយ»។
លោក មាស នី ក៏ស្វាគមន៍ដល់ការស្នើរបស់លោកស ខេង ឲ្យមន្ត្រីស្ដាប់ការជំទាស់ ឬការរិះគន់ជាជាងពាក្យបញ្ជោរ ដោយលោកថា វប្បធម៌ថ្មី ទទួលយកការរិះគន់នេះ គួរតែធ្វើឲ្យបានពិតប្រាកដ ដោយមិនត្រឹមថានោះទេ។ លោកថា ពាក្យរិះគន់ហាក់ដូចជាត្រូវបានគិតថា ជាពាក្យអាក្រក់ក្នុងបរិបទនយោបាយកម្ពុជា។
លោកបន្តថា៖ «ខ្ញុំគិតថា នៅពេលយើងបង្កើតវប្បធម៌មួយបើកចំហ ខ្ញុំគិតថា អ្នកហ៊ានប្រាប់ក៏ហ៊ានប្រាប់ ហើយរដ្ឋាភិបាលក៏អាចឆ្លើយតបសមស្របពាក់ព័ន្ធបញ្ហាសង្គមនយោបាយរបស់ខ្លួន»។
លោក សុខ ទូច ប្រធានរាជបណ្ឌិត្យសភាកម្ពុជា បានស្វាគមន៍ការលើកឡើងរបស់លោក ស ខេង ដោយលោកថ្លែងថា តាមពិតរឿងនេះ គួរត្រូវបានធ្វើតាំងពីយូរហើយ ព្រោះជាធម្មតា ការចុះទៅមូលដ្ឋាន គឺដើម្បីឲ្យមន្ត្រីផ្សារភ្ជាប់ទៅនឹងថ្នាក់មូលដ្ឋាន។
លោកបន្តថា បន្ថែមលើការស្ដាប់គំនិតមហាជនក្រុមការងារ ឬថ្នាក់ដឹកនាំ ត្រូវបូកផ្សំគំនិតរបស់ខ្លួនទៅនឹងគំនិតមហាជន ហើយធ្វើការប្រៀបធៀបគ្នានិងពិភាក្សាជាមួយថ្នាក់ខេត្ត និងស្រុក បន្ទាប់មកលើកជាយុទ្ធសាស្ត្រ ដើម្បីដោះស្រាយឲ្យទទួលបានជោគជ័យ។
លោកថ្លែងថា តាមការស្រាវជ្រាវរបស់លោក អ្វីដែលលោក ស ខេង បានលើកឡើងនោះ ត្រូវបានគេអនុវត្តហើយជោគជ័យ នៅក្នុងប្រទេសចំនួន ៤ រួចហើយ គឺនៅប្រទេស ជប៉ុន កូរ៉េ ខាងត្បូង ថៃ និងបច្ចុប្បន្ននេះកំពុងត្រូវបានអនុវត្តនៅវៀតណាម។
លោកថ្លែងថា៖ «ជួនកាលប្រជាជនមើលបញ្ហាអត់ឃើញទេ អ្នកដែលមើលឃើញគឺអ្នកដែលចុះទៅ ហើយមានចំណេះដឹង អ្នកមានបទពិសោធ ហើយមិនមែនចេះតែថាទេ គឺត្រូវផ្ដល់គំនិត ផ្ដល់យុទ្ធសាស្ត្រ និងផ្ដល់ចក្ខុវិស័យឲ្យ»៕
