The Phnom Penh Post Search

Search form




Logo of Phnom Penh Post newspaper Phnom Penh Post - លោក ស ខេង ជំរុញ​ឲ្យ​ការ​ប្រឡង​រើស​មន្ត្រី​ធ្វើ​ដូច​ការ​ប្រឡង​បាក់ឌុប

លោក ស ខេង ជំរុញ​ឲ្យ​ការ​ប្រឡង​រើស​មន្ត្រី​ធ្វើ​ដូច​ការ​ប្រឡង​បាក់ឌុប

លោក ស ខេង រដ្ឋ​មន្ត្រី​ក្រសួង​មហាផ្ទៃ នៅ​ក្នុង​ពិធី​មួយ​កាល​ពី​ពេល​កន្លង​មក។
លោក ស ខេង រដ្ឋ​មន្ត្រី​ក្រសួង​មហាផ្ទៃ នៅ​ក្នុង​ពិធី​មួយ​កាល​ពី​ពេល​កន្លង​មក។ ភ្នំពេញ ប៉ុស្តិ៍

លោក ស ខេង ជំរុញ​ឲ្យ​ការ​ប្រឡង​រើស​មន្ត្រី​ធ្វើ​ដូច​ការ​ប្រឡង​បាក់ឌុប

ភ្នំពេញៈ ប្រមុខ​រដ្ឋាភិបាល​ស្តីទី បាន​ជំរុញ​ឲ្យ​ក្រសួង និង​ស្ថាប័ន​រដ្ឋ​ពង្រឹង​ដំណើរ​ការ​ប្រឡង​ជ្រើស​រើស​មន្រ្តី​ក្របខ័ណ្ឌ​ចូល​បម្រើ​ការងារ​រដ្ឋ ត្រូវ​យក​គំរូ​តាម​ការ​អនុវត្ត​របស់​ក្រសួង​អប់រំ ក្នុង​ការ​ប្រឡង​បាក់ឌុប ឆ្នាំ​នេះ​ដើម្បី​ជ្រើស​រើស​មនុស្ស​ពូកែ​មាន​សមត្ថភាព​ពិត​ប្រាកដ ចៀស​វាង​ការ​និយម​បក្ខពួក និង​ការ​ប្រព្រឹត្ត​អំពើ​ពុក​រលួយ។

ក្នុង​ពិធី​ចែក​សញ្ញាបត្រ​ដល់​និស្សិត​នៃ​សាកល​វិទ្យាល័យ​ធនធាន​មនុស្ស កាល​ពី​ម្សិលមិញ លោក ស ខេង នាយក​រដ្ឋ​មន្រ្តី​ស្តីទី និង​ជា​រដ្ឋ​មន្រ្តី​ក្រសួង​មហាផ្ទៃ​បាន​ថ្លែង​ថា ការ​ប្រឡង​បាក់ឌុប កន្លង​ទៅ​ពិត​ជា​បាន​ឆ្លុះ​បញ្ចាំង​ពី​កំណែ​ទម្រង់​នៃ​ប្រព័ន្ធ​អប់រំ បើ​ទោះ​បី​ជា​ការ​រឹត​បន្តឹង​ពេល​ប្រឡង​ទទួល​រង​ការ​រិះគន់​ក្តី។

លោក​យល់​ថា ការ​ពង្រឹង​នេះ ពិត​ជា​បាន​ដាស់​នូវ​ស្មារតី​ឲ្យ​សិស្ស និង​អាណា​ព្យាបាល​ចាប់​អារម្មណ៍ និង​យក​ចិត្ត​ទុក​ដាក់​ដើម្បី​លើក​កម្ពស់​ការ​អប់រំ និង​ប្រឹង​ប្រែង​រៀនសូត្រ។

លោក​បញ្ជាក់​ថា៖ «បើ​សិន​ជា​យើង​មិន​ចាប់​ផ្តើម​យើង​ក៏​រក​មិន​ឃើញ​នូវ​បទ​ពិសោធ និង​កំណែ​ទម្រង់​បែប​ណា​មួយ​ដែរ អ៊ីចឹង​ហើយ នេះ​គឺ​ជា​ការ​ចាប់​ផ្តើម​មួយ​ដ៏​ល្អ​ដែល​យើង​អាច​ប្រមើល​មើល​ទៅ​លើ​កំណែ​ទម្រង់​នៃ​កម្មវិធី​សិក្សា​គុណភាព​អប់រំ និង​សម្ភារ​សិក្សា​ជាដើម»។

លោក ស ខេង បាន​ចាត់​ទុក​លទ្ធផល​នៃ​ការ​ប្រឡង​បាក់ឌុប​ថា ជា​គំរូ​មួយ​ដែល​ស្ថាប័ន​រដ្ឋ​ទាំង​អស់ គួរ​អនុវត្ត​តាម ដើម្បី​ទទួល​បាន​មនុស្ស​មាន​សមត្ថភាព​ពេញ​លេញ​ចូល​បម្រើ​ការងារ និង​កាត់​បន្ថយ​នូវ​ភាព​មិន​ប្រក្រតី ដូច​ជា​អំពើ​ពុក​រលួយ​ការ​ជ្រើស​រើស​ដោយ​បក្ខ​ពួក​និយម ឬ​គ្រួសារ​និយម​ជាដើម។ លោក​បញ្ជាក់​ថា៖ «ជាក់​ស្តែង ករណី​ប្រឡង​ថ្នាក់ ទី១២ ថ្មីៗ​នេះ ក្មេងៗ​ប្រឡង​ជាប់​និទ្ទេស A សុទ្ធ​តែ​ជា​កូន​កសិករ តែ​មាន​សមត្ថភាព ដូច​នេះ ដើម្បី​ឲ្យ​ស្ថាប័ន​រដ្ឋ អនុវត្ត​ការងារ​មាន​ប្រសិទ្ធភាព ក្រសួង​ទាំង​អស់ ក៏​នឹង​ត្រូវ​អនុវត្ត​ទៅ​តាម​វិធាន​ការ​នេះ​ដែរ រឹត​បន្តឹង​ការ​ប្រឡង ដើម្បី​បាន​មនុស្ស​ពូកែ»។

រដ្ឋ​មន្រ្តី​ក្រសួង​មុខងារ​សាធារណៈ លោក ពេជ្រ ប៊ុនធិន បាន​ថ្លែង​ថា តាម​គោល​ការណ៍​ច្បាប់ ក្រសួង​មុខងារ​សាធារណៈ មាន​សិទ្ធិ​ចាត់​តាំង​តំណាង​ចូល​រួម​ត្រួត​ពិនិត្យ​ការ​ប្រឡង​ក្របខ័ណ្ឌ​មន្រ្តី​រាជការ តែ​មិន​អាច​លូក​ដៃ​ក្នុង​ការ​ពង្រឹង​នីតិវិធី និង​ដំណើរ​ការ​ប្រឡង​របស់​ក្រសួង​ដទៃ​ទេ។

លោក​បញ្ជាក់​ថា៖ «ដើម្បី​ធានា​តម្លាភាព​និង​ភាព​សុក្រឹត​ពេល​ប្រឡង គឺ​តម្រូវ​ឲ្យ​ក្រសួង​នីមួយៗ​ពង្រឹង​ដោយ​ខ្លួន​ឯង ដើម្បី​មុខ​មាត់​ខ្លួន​ឯង»។

អ្នក​នាំ​ពាក្យ​គណបក្ស​សង្គ្រោះ​ជាតិ លោក យឹម សុវណ្ណ បាន​ថ្លែង​ថា ការ​ធ្វើ​កំណែ​ទម្រង់​គប្បី​ចាប់​ផ្តើម​ពី​មូលដ្ឋាន​គ្រឹះ​មក ហើយ​ការ​ទប់​ស្កាត់​អំពើ​ពុក​រលួយ ក៏​គួរ​តែ​ចាប់​ផ្តើម​ពី​មន្រ្តី​ធំៗ​ផង​ដែរ។

លោក​បន្ត​ថា៖ «វា​សឹង​តែ​ចង់​យឺត​ពេល បើ​គិត​ចាប់​ពី ឆ្នាំ ៩៣ មក ២០ ឆ្នាំ​ជាង​ហើយ ប៉ុន្តែ​មិន​អី​ទេ បាន​ភ្ញាក់​រឭក​ជា​ការ​ល្អ​ហើយ​គួរ​ស្រូត​ឲ្យ​បាន​ឆាប់​ទៅ​ជា​ការ​ល្អ»។

ប្រធាន​គណៈកម្មាធិការ​កម្ពុជា​ឯករាជ្យ ប្រឆាំង​អំពើ​ពុក​រលួយ លោក​ស្រី ម៉ម ស៊ីថា សង្កេត​ឃើញ​ថា ការ​ទទួល​បាន​មុខ​តំណែង​ចូល​បម្រើ​ក្របខ័ណ្ឌ​ការងារ​រដ្ឋ​កន្លង​មក ភាគ​ច្រើន​គឺ​ចូល​តាម​រយៈ​សែ​ស្រឡាយ និង​បក្ខពួក​ដែល​នេះ​បង្ហាញ​ពី​កម្សោយ​នៃ​ការ​អនុវត្ត​ច្បាប់​ប្រឆាំង​អំពើ​ពុក​រលួយ៕

អត្ថបទគួរចាប់អារម្មណ៍