.jpg)
លោក ស ខេង នៅក្នុងកិច្ចប្រជុំម្សិលមិញ។ រូបថត ក្រសួងមហាផ្ទៃ
ភ្នំពេញៈ លោក ស ខេង រដ្ឋមន្ដ្រីក្រសួងមហាផ្ទៃកាលពីថ្ងៃពុធម្សិលមិញបានដឹកនាំកិច្ចប្រជុំពិគ្រោះយោបល់ដើម្បីពិនិត្យលទ្ធភាពក្នុងការឆ្លើយតបទៅនឹងតម្រូវការរយៈពេលខ្លី មធ្យម និងវែងរបស់ពលករចំណាកស្រុកដែលទើបវិលត្រឡប់មកស្រុកវិញប្រមាណជាង ៨៥ ០០០ នាក់ ក្នុងស្ថានភាពការរីករាលដាលនៃជំងឺកូវីដ ១៩ នាពេលបច្ចុប្បន្ន។
លោក ស ខេង ថ្លែងក្នុងពេលបើកកិច្ចប្រជុំដែលធ្វើឡើងនៅទីស្ដីការក្រសួងមហាផ្ទៃថា ការប្រជុំថ្ងៃនេះគឺផ្អែកតាមការប្រគល់ភារកិច្ចរបស់លោកនាយករដ្ឋមន្ដ្រី ហ៊ុន សែន ដើម្បីពិភាក្សាស្វែងរកចំណុចគន្លឹះដោះស្រាយបញ្ហាក្នុងស្ថានភាពមានវិបត្ដិកូវីដ ១៩ និងផលប៉ះពាល់នានាក្នុងការរក្សាស្ថិរភាព សុវត្ថិភាពសង្គមក្នុងរយៈពេលខ្លី មធ្យម និងវែងទៅមុខទៀត។
លោកថ្លែងថា៖ «ជាពិសេសកិច្ចប្រជុំនេះគឺទាក់ទងដល់ទេសន្តរប្រវេសន៍មានពលករដែលបានវិលត្រឡប់មកពីបណ្ដាប្រទេសនានា ជាពិសេសគឺប្រទេសថៃ ចូលមកកម្ពុជាវិញ គិតមកដល់ពេលនេះគឺមានចំនួនជាង ៨៥ ០០០ នាក់ហើយដែលនៅរាយប៉ាយតាមបណ្ដាខេត្ដ។ ពលករទាំងនោះមួយចំនួនពុំមានលទ្ធភាពក្នុងការផ្គត់ផ្គង់ជីវភាពរយៈពេលវែងនោះទេ»។
បើតាមលោក ស ខេង ជាទូទៅពលករទាំងនោះតែងតែរំពឹងចង់វិលត្រឡប់ទៅធ្វើការនៅប្រទេសគេវិញ ដើម្បីបានប្រាក់ចំណូលសម្រាប់សម្រាលបន្ទុកគ្រួសារ។ នៅក្នុងស្ថានភាពបច្ចុប្បន្នរដ្ឋាភិបាលមិនអាចអនុញ្ញាតឱ្យពួកគាត់ចេញចូលឆ្លងកាត់ព្រំដែនបានឡើយ ព្រោះថាប្រទេសថៃក៏បានបិទព្រំដែនហើយការរាតត្បាតនៃជំងឺកូវីដ ១៩ នៅថៃក៏មានបញ្ហាធ្ងន់ធ្ងរនៅឡើយ។ «ជារួម ថៃបានដាក់ប្រទេសស្ថិតក្នុងគ្រាអាសន្ន។ ដូច្នេះផ្នែកជាច្រើនត្រូវបានបិទ។ អ៊ីចឹងហើយកម្មករគឺមិនអាចវិលត្រឡប់ទៅវិញ»។
លោកលើកឡើងថាកិច្ចប្រជុំពិភាក្សាគ្នាជុំវិញបញ្ហានេះក៏មានការចូលរួមពីមន្ដ្រីនៃអង្គការសហប្រជាជាតិដោយបានគូសបញ្ជាក់អំពីការគាំទ្រ និងចូលរួមជាមួយរាជរដ្ឋាភិបាលក្នុងការដោះស្រាយបញ្ហានេះ។ ក្រៅពីនេះកិច្ចប្រជុំក៏មិនមែនតែសម្រាប់តែពលករទេសន្តប្រវេសន៍នោះទេគឺសម្រាប់សង្គមរបស់កម្ពុជារួមផងដែរ។
លោក ស ខេង បញ្ជាក់ថា៖ «កន្លងទៅរាជរដ្ឋាភិបាលដឹកនាំដោយសម្ដេចតេជោគឺបានដាក់ចេញនូវគោលការណ៍ វិធានការនានាជាបន្តបន្ទាប់ ហើយក្រសួងស្ថាប័នពាក់ព័ន្ធនានាក៏បានដាក់ចេញនូវគោលការណ៍ វិធានការណ៍ជាក់ស្ដែងជាបន្តបន្ទាប់ផងដែរ។ ក្រសួងសុខាភិបាលក៏បាននាំមុខក្នុងការទប់ស្កាត់ជំងឺកូវីដ១៩នេះដោយមានការព្យាបាលជំងឺនេះ»។
ចំណែកក្រសួងសេដ្ឋកិច្ច និងហិរញ្ញវត្ថុក៏បានចេញនូវសេចក្ដីសម្រេចជាបន្តបន្ទាប់ ដើម្បីដោះស្រាយទាក់ទងទៅនឹងបញ្ហាសេដ្ឋកិច្ច សង្គម។ «យើងឃើញថា យន្តការនានាត្រូវបានរៀបចំឡើង ហើយក៏បានដំណើរការបើទោះបីថាកន្លែងខ្លះមិនទាន់បានដំណើរការបានល្អ ប៉ុន្ដែជាទូទៅគឺបានដំណើរការ»។
បើតាមរបាយការណ៍ក្រសួងមហាផ្ទៃកិច្ចប្រជុំនេះក៏ដើម្បីពិនិត្យលទ្ធភាព ក្នុងការឆ្លើយតបទៅនឹងតម្រូវការរយៈពេលខ្លី មធ្យម និងវែងរបស់ពលករចំណាកស្រុកក្នុងស្ថានភាពរីករាលដាលនៃជំងឺកូវីដ១៩ ពាក់ព័ន្ធការងារអន្តរក្រសួង និងគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ)។
ក្រសួងបញ្ជាក់ថា៖ «កិច្ចប្រជុំនេះមានគោលបំណងដោយផ្តោតលើបញ្ហាប្រឈមជាក់លាក់ក្នុងការគ្រប់គ្រងហានិភ័យចំពោះប្រជាពលរដ្ឋដែលងាយរងគ្រោះ ជាពិសេសពលករចំណាកស្រុកដែលទើបវិលត្រឡប់មកវិញទៅកាន់គ្រួសារ និងសហគមន៍របស់ពួកគេ។ កិច្ចប្រជុំនេះក៏ជួយឱ្យយើងរៀបចំវិធានការក្នុងការទប់ស្កាត់ ការផ្ទុះរាតត្បាតនៃជំងឺកូវីដ១៩ ទ្រង់ទ្រាយធំនៅក្នុងសហគមន៍ ជាពិសេសផ្តោតលើប្រជាពលរដ្ឋដែលងាយរងគ្រោះ»។
លោកស្រី ជូ ប៊ុនអេង រដ្ឋលេខាធិការ ក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស បានលើកឡើងក្នុងកិច្ចប្រជុំនេះដែរថា ពលរដ្ឋដែលទើបត្រឡប់មកពីចំណាកស្រុកវិញ ក៏បានក្លាយជាបន្ទុកគ្រួសារក្នុងស្រុក និងមិនអាចត្រឡប់ទៅប្រទេសគោលដៅវិញបានឆាប់ៗនោះទេ។ ពោលគឺត្រូវរង់ចាំដល់បញ្ហាកូវីដ១៩នេះចប់ជាស្ថាពរ។
លោកស្រីបន្តថា៖ «អាស្រ័យហេតុនេះដោយស្ថានភាពសេដ្ឋកិច្ច និងសង្គមមានការប្រែប្រួលនឹងអាចជះឥទ្ធិពលក្នុងរយៈពេលវែងបែបនេះ គ.ជ.ប.ជ និងគ្រួសារ អង្គការសហប្រជាជាតិផ្នែកការងារពាក់ព័ន្ធនឹងសុវត្ថិភាពពលករ រិះរកវិធានការដែលត្រូវឆ្លើយតបបន្ទាន់ និងប៉ាន់ប្រមាណក្នុងរយៈពេលមធ្យម និងរយៈពេលវែងក្នុងការឆ្លើយតបទៅនឹងផលប៉ះពាល់នៃវិបត្តិកូវីដ ១៩ នេះ ដែលអាចក្លាយទៅជាអសន្តិសុខសង្គម»។
លោកស្រី ប៉ូលីន តាមេស៊ីស (Pauline Tamesis) អ្នកសម្របសម្រួលអង្គការសហប្រជាជាតិប្រចាំកម្ពុជាបានថ្លែងក្នុងកិច្ចប្រជុំនេះដែរថា WHO គឺបានផ្តល់នូវទិសដៅជាយុទ្ធសាស្ដ្រការបន្តប៉ាន់ប្រមាណដំបូន្មាន បច្ចេកទេស និងកិច្ចគាំទ្រផ្នែកប្រតិបត្ដិការដល់រដ្ឋាភិបាលកម្ពុជាតាមរយៈក្រសួងសុខាភិបាលដើម្បីឆ្លើយតបទៅនឹងបញ្ហាជំងឺកូវីដ១៩នេះ។
លោកស្រីថ្លែងថា៖ «យើងរីករាយចំពោះរដ្ឋាភិបាលដែលបានផ្ដល់ការព្យាបាលទៅដល់អ្នកជំងឺកូវីដ ១៩ ទាំងអស់ដោយមិនយកកម្រៃ។ ចំណុចនេះកាន់តែអាចធានាបានថា ប្រទេស កម្ពុជា ពលរដ្ឋដែលឆ្លងជំងឺនេះអាចទទួលបាននូវការថែទាំ។ មានន័យថា គឺយើងត្រូវរកវិធីប្រកបដោយនវានុវត្ដន៍ដើម្បីប្រយុទ្ធប្រឆាំងនឹងបញ្ហាការរីករាលដាលជំងឺកូវីដ១៩នេះ»។
លោកស្រីបន្តថា៖ «យើងនឹងបន្ដធ្វើសកម្មភាពរួមគ្នាដោយសាមគ្គីភាព ដើម្បីឆ្លើយតបទៅនឹងការទប់ស្កាត់ករណីការរីករាលដាលកូវីដ ១៩ នេះ។ រួមកម្លាំងគ្នាគឺយើងអាចឈ្នះនូវការរាតត្បាតជាសកលនៃជំងឺនេះ។ ការឆ្លងរាតត្បាតជាសកលនៃជំងឺនេះបានបង្រៀនយើងនូវមេរៀនមួយគឺវិនិយោគទៅលើសុខភាព និងការត្រៀមទប់ទល់ទៅនឹងការឆ្លងរីករាលដាលវាជាការវិនិយោគទៅលើការអភិវឌ្ឍសង្គម និងសន្ដិសុខមនុស្ស»៕
