.jpg)
លោក ស ខេង រដ្ឋមន្ត្រីក្រសួងមហាផ្ទៃ ថ្លែងក្នុងកិច្ចប្រជុំកាលពីម្សិលមិញ។ រូបថត Sar Kheng Page
ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានណែនាំឲ្យក្រុមជំនាញរវាងក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុរៀបចំលិខិតបទដ្ឋានគតិយុត្តឲ្យបានរួចរាល់ ដើម្បីដាក់ដំណើរការការតភ្ជាប់ទិន្នន័យរវាងប្រព័ន្ធទិន្នន័យអគ្គនាយកដ្ឋានអត្តសញ្ញាណកម្ម និងប្រព័ន្ធផ្លាស់ប្ដូរទិន្នន័យ (CamDX) សម្រាប់បម្រើដល់ការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (IT Platform)។
ការណែនាំនេះបានធ្វើឡើងកាលពីម្សិលមិញនៅអំឡុងពេលលោក ស ខេង បានអញ្ជើញដឹកនាំកិច្ចប្រជុំស្ដាប់របាយការណ៍ស្ដីពីការបញ្ចូលការងារតភ្ជាប់ទាញយកទិន្នន័យទាំងនេះនាទីស្ដីការក្រសួងមហាផ្ទៃដែលមានមន្ត្រីពាក់ព័ន្ធជាច្រើនរូបចូលរួម។
លោក ស ខេង បានថ្លែងយ៉ាងដូច្នេះថា៖ «ការរៀបចំលិខិតបទដ្ឋានគតិយុត្ត គួរតែរៀបចំជាអនុក្រឹត្យ ព្រោះការរៀបចំប្រកាសអន្តរក្រសួងនឹងនាំឱ្យមានប្រកាសច្រើន ដោយសារទិន្នន័យរបស់អគ្គនាយកដ្ឋានអត្តសញ្ញាណកម្មនឹងត្រូវភ្ជាប់ជាមួយនឹងទិន្នន័យក្រសួងស្ថាប័នពាក់ព័ន្ធនានារបស់រដ្ឋជាច្រើនទៀត»។
លោកបន្ថែមថា ការគ្រប់គ្រងនូវកម្មវិធីនេះគឺគួរតែធ្វើជាសេចក្ដីព្រាងអនុក្រឹត្យ ដើម្បីពង្រីកវិសាលភាព អនុវត្តក្នុងក្របខ័ណ្ឌរាជរដ្ឋាភិបាលទាំងមូលតែម្ដងស្របពេលដែលលោកបានវាយតម្លៃខ្ពស់ ចំពោះវឌ្ឍនភាពនៃដំណើរការភ្ជាប់ទិន្នន័យរវាងអគ្គនាយកដ្ឋានអត្តសញ្ញាណកម្ម និងក្រសួងសេដ្ឋកិច្ច និងហិរញ្ញវត្ថុនេះ។
ប្រព័ន្ធ CamDX គឺជាថ្នាលសម្រាប់ផ្លាស់ប្ដូរទិន្នន័យមានលក្ខណៈឯកភាវូបនីយកម្ម និងយកលំនាំតាមកម្មវិធីស្តង់ដាដែលប្រទេសអេស្តូនីបានប្រើប្រាស់។ នេះបើតាមបទបង្ហាញបន្ថែមពីមន្ត្រីជាន់ខ្ពស់នៃអគ្គនាយកដ្ឋានអត្តសញ្ញាណកម្មដែលបង្ហោះលើគេហទំព័រក្រសួងមហាផ្ទៃ។
តាមរយៈបទពិសោធជោគជ័យរបស់អេស្តូនីក្នុងការរៀបចំរដ្ឋាភិបាលបែប E-Government ការភ្ជាប់ទិន្នន័យនេះមានចំណុចពិសេស ៥ រួមមាន ការប្រើប្រាស់ទម្រង់ប្រព័ន្ធអេកូស៊ីស្ទេមផ្ដល់សុវត្ថិភាពខ្ពស់ក្នុងការផ្លាស់ប្ដូរទិន្នន័យមិនជ្រៀតជ្រែកការគ្រប់គ្រងទិន្នន័យរបស់ស្ថាប័នម្ចាស់ទិន្នន័យមានប្រព័ន្ធតាមដានមើលការប្រើប្រាស់ តែមិនអាចមើលខ្លឹមសារនៃទិន្នន័យ និងការអនុលោមតាមគោលការណ៍ផ្លាស់ប្ដូរទិន្នន័យតាមទម្រង់ API។ នេះបើតាម ក្រសួងមហាផ្ទៃ។
លោក កង សាខន អគ្គនាយកនៃអគ្គនាយកដ្ឋានអត្តសញ្ញាណកម្មលើកឡើងក្នុងអង្គប្រជុំនោះថា ការភ្ជាប់ទិន្នន័យ (CamDX) បានធ្វើឡើងបន្ទាប់ពីក្រសួងសេដ្ឋកិច្ច និងហិរញ្ញវត្ថុដាក់សំណើមកកាន់រដ្ឋាភិបាល ដើម្បីឲ្យអគ្គនាយកដ្ឋានអត្តសញ្ញាណកម្មទទួលការផ្ដល់កិច្ចសហការជាមួយក្រសួងសេដ្ឋកិច្ចក្នុងការបង្កើតក្រុមការងារអន្តរក្រសួង ដោយមានការចូលរួមគាំទ្រពីក្រុមហ៊ុនឯកជន។
លោក បន្តថាមកដល់ពេលនេះ បន្ទាប់ពីមានការភ្ជាប់ប្រព័ន្ធទិន្នន័យជាមួយអគ្គនាយកដ្ឋានអត្តសញ្ញាណកម្មមានក្រុមហ៊ុនជាង ១០០ ហើយដែលត្រូវបានក្រសួងសេដ្ឋកិច្ចដាក់សំណើផ្ទៀងផ្ទាត់អត្តសញ្ញាណអ្នកស្នើសុំចុះបញ្ជីក្រុមហ៊ុន។
ប៉ុន្តែលោកថា នេះគ្រាន់តែការអនុវត្តសាកល្បងរបស់ក្រសួងសេដ្ឋកិច្ច និងអគ្គនាយកដ្ឋានអត្តសញ្ញាណកម្មតែប៉ុណ្ណោះពោលគឺមិនទាន់ដាក់ឱ្យដំណើរការជាផ្លូវការនៅឡើយទេ ដោយសារតែក្រុមការងារត្រូវរៀបចំបទដ្ឋានគតិយុត្តិជាក់លាក់ជាមុនសិន។
លោកបញ្ជាក់ថា ការទាញយកទិន្នន័យពីអគ្គនាយកដ្ឋានអត្តសញ្ញាណកម្មនេះ ក៏មានការតម្រឹមដែនកំណត់មួយច្បាស់លាស់ដែរ ដោយមិនអាចប្រើប្រាស់ឱ្យលើសពីអ្វីដែលបានឯកភាពគ្នានោះទេ ហើយរាល់ការស្នើសុំដែលលើសពីនេះគឺត្រូវមានការឆ្លងកាត់ការពិភាក្សាគ្នាជាមុនសិន។
លោកបន្តថា៖ «សុំឱ្យមានការរៀបចំលិខិតបទដ្ឋានគតិយុត្តក្នុងកម្រិតណាមួយ ឬអាចជាប្រកាសអន្តរក្រសួងមុននឹងឈានទៅដាក់ឱ្យដំណើរការ ការភ្ជាប់ទិន្នន័យនេះ និងសំណើមួយចំនួនទៀត ដើម្បីគាំទ្រឱ្យដំណើរការភ្ជាប់ទិន្នន័យនេះបានប្រព្រឹត្តទៅដោយជោគជ័យ»៕
