ភ្នំពេញៈ លោកឧបនាយករដ្ឋមន្ត្រី ស ខេង រដ្ឋមន្រ្ដីក្រសួងមហាផ្ទៃ កាលពីថ្ងៃសុក្រសប្ដាហ៍មុន បានណែនាំដល់មន្រ្ដីនគរបាលទាំងអស់ពី «ការគ្រប់គ្រងប្រើប្រាស់ក្របខ័ណ្ឌមន្រ្ដីនគរបាលជាតិ ការគ្រប់គ្រងប្រើប្រាស់អាវុធជាតិផ្ទុះ» ដើម្បីរក្សានូវសេចក្តីថ្លៃថ្នូរ សីលធម៌ វិជ្ជាជីវៈ ក្នុងការអនុវត្តតួនាទីឲ្យកាន់តែមានប្រសិទ្ធភាព និងសុវត្ថិភាពដល់ប្រទេសជាតិ និងពលរដ្ឋ។
លោក ស ខេង បានណែនាំដល់អគ្គស្នងការនគរបាលជាតិ និងស្នងការនគរបាលរាជធានី-ខេត្ត ថា ការគ្រប់គ្រង និងការប្រើប្រាស់អាវុធត្រូវ អនុវត្តឲ្យបានត្រឹមត្រូវតាមការកំណត់របស់អគ្គស្នងការដ្ឋាននគរបាលជាតិ និងច្បាប់ស្តីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ។
លោកបានបញ្ជាក់ថា៖ «ការគ្រប់គ្រងអាវុធក្នុងអង្គភាពរបស់ខ្លួន ត្រូវយកចិត្តទុកដាក់ឲ្យបានហ្មត់ចត់ អំពីបរិមាណ និងគុណភាព ហើយត្រូវធ្វើរបាយការណ៍ ជាប្រចាំមកអគ្គស្នងការដ្ឋាននគរបាលជាតិ និងក្រសួងមហាផ្ទៃតាមការកំណត់»។
ជាមួយនេះដែរ លោកបានណែនាំដល់គ្រប់អង្គភាព ត្រូវធានាឲ្យបាននូវការប្រើប្រាស់កម្លាំងនគរបាលដោយមិនត្រូវយកទៅបម្រើការងារតាមក្រុមហ៊ុន រោងចក្រ សហគ្រាសឯកជនឬជាលក្ខណៈបុគ្គលឯកជនដោយគ្មានអនុញ្ញាតពីថ្នាក់ដឹកនាំឡើយ ជាពិសេសក្លិបកម្សាន្ត ខារ៉ាអូខេ និងកាស៊ីណូជាដើម។ចំពោះការប្រើប្រាស់មធ្យោបាយរបស់អង្គភាព ជាពិសេសម៉ូតូបើកផ្លូវ ឬរថយន្តស៊ីរ៉ែន លោក ស ខេង ក៏បានហាមយកទៅ ហែហមក្រុមហ៊ុនឬបុគ្គលឯកជន ដោយពុំមានការអនុញ្ញាតពីអគ្គស្នងការដ្ឋាននគរបាលជាតិ និងក្រសួងមហាផ្ទៃ។
លោកថា៖ «ប្រធានអង្គភាពគ្រប់ឋានានុក្រម មានកាតព្វកិច្ចទទួលខុសត្រូវក្នុងការអនុវត្ត តាមខ្លឹមសារនៃសេចក្តីណែនាំនេះក្នុងករណីប្រព្រឹត្តផ្ទុយ ត្រូវទទួលខុសត្រូវទាំងស្រុងចំពោះមុខក្រសួងមហាផ្ទៃ និងច្បាប់ជាធរមាន»។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ភ្នំពេញប៉ុស្ដិ៍កាលពីថ្ងៃអាទិត្យម្សិលមិញថា ក្រសួងមហាផ្ទៃបានសង្កេតឃើញមានបញ្ហាមួយចំនួនកើតឡើង និងទទួលបានមតិពីមហាជនជុំវិញបញ្ហាខាងលើទើបក្រសួងណែនាំបន្ថែមដល់មន្រ្ដីឲ្យអនុវត្ដតួនាទីបានត្រឹមត្រូវ។
លោកថា៖ «ពេលខ្លះអ្នកដែលមិនត្រូវបានប្រើប្រាស់ម៉ូតូស៊ីរ៉ែនគ្រាន់ជាអ្នកវិនិយោគទុនធម្មតាចុះពីយន្តហោះ ឃើញមានម៉ូតូស៊ីរ៉ែនមកដល់។ ដូច្នេះយើងឃើញមានបញ្ហាបែបនេះទើបមានការណែនាំឲ្យបានច្បាស់លាស់ដើម្បីឲ្យការប្រើប្រាស់ម៉ូតូស៊ីរ៉ែន ឡានស៊ីរ៉ែនឲ្យចំទិសដៅត្រឹមត្រូវតាមច្បាប់។ មិនមែនបុគ្គលណាពេលចុះមកពីយន្ដហោះ ទៅចេញស៊ីរ៉ែនឲ្យ ឬក៏មានអន្តរាគមន៍ពីលោកនេះ លោកនោះ អ្នកធំនេះ អ្នកធំនោះ គឺមិនបានដាច់ខាត»។
ដោយឡែក ការគ្រប់គ្រងអាវុធជាតិផ្ទុះវិញ លោក ខៀវ សុភ័គ បានថ្លែងថា បញ្ហានេះក្រសួងក៏បានសង្កេតឃើញ និងទទួលព័ត៌មានពីសាធារណជនពីភាពមិនត្រឹមត្រូវរបស់បុគ្គលមួយចំនួនផងដែរ ទើបមានការរឹតបន្តឹងបន្ថែមបែបនេះ។
លោកថា៖ «សូមអរគុណដល់បណ្ដាញសង្គមដែលបានផ្ដល់ព័ត៌មានដល់សមត្ថកិច្ចមកទាន់ពេល។យើងឃើញថាអ្នកខ្លះជាបុគ្គលដែលមិនត្រូវបានអនុញ្ញាតឲ្យប្រើកាំភ្លើង ស្រាប់តែមានសម្ញែងកាំភ្លើងដាក់គ្នានៅកន្លែងតុផឹកស៊ីក៏មាន យើងឃើញមានតាមរូបភាពបែបនេះ»។
លោក ខៀវ សុភ័គ បានអំពាវនាវដល់ពលរដ្ឋផងដែរថា ប្រសិនបើឃើញព័ត៌មានជុំវិញករណីសមត្ថកិច្ចប្រើប្រាស់អាវុធជាតិផ្ទុះមិនត្រឹមត្រូវ សូមឲ្យផ្ដិតយករូបភាព និងផ្ញើតាមរយៈបណ្ដាញសង្គមទៅគេហទំព័រហ្វេសប៊ុករបស់ក្រសួងមហាផ្ទៃ លោក ស ខេង និងហ្វេសប៊ុកអាជ្ញាធរសមត្ថកិច្ច នោះនឹងមានកិច្ចអន្តរាគមន៍ភ្លាមៗមិនខាន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា និងជាអ្នកវិភាគ បានលើកឡើងថា កន្លងមកក្រសួងមហាផ្ទៃមានលិខិតបទដ្ឋានជាច្រើនរួចហើយជុំវិញការប្រើប្រាស់និងបម្រាមការប្រើប្រាស់អាវុធជាតិផ្ទុះបែបនេះ។ ចំណែកសេចក្ដីណែនាំនេះគ្រាន់តែជំរុញឲ្យសមត្ថកិច្ចអនុវត្ដច្បាប់ឲ្យបានតឹងរ៉ឹងបន្ថែមទៀតប៉ុណ្ណោះ។
លោកបានថ្លែងថា៖ «យើងមានការណែនាំច្រើន ប៉ុន្ដែវាមិនសូវមានប្រសិទ្ធភាព។ យើងសង្កេតឃើញថា នៅតែមានការប្រើប្រាស់អាវុធ បាញ់បោះសេរី នៅតែមាន ការប្រើប្រាស់មធ្យោបាយសាធារណៈដូចជា ឡានស្លាកលេខនគរបាលជាដើម យកទៅប្រើប្រាស់ជាផលប្រយោជន៍ឯកជន ចំណែកនគរបាលក៏នៅតែឃើញមានទៅយាមតាមកន្លែងកម្សាន្ដ ផ្ទះអ្នកនេះ ផ្ទះអ្នកនោះដែរ ឯការអនុវត្ដច្បាប់នៅមិនទាន់មានប្រសិទ្ធភាពនៅឡើយ»។
លោក គិន ភា ចង់ឲ្យអនុវត្ដនីតិវិធីច្បាប់តឹងរ៉ឹងបន្ថែមដល់សមត្ថកិច្ចណាដែលអនុវត្ដការងារផ្ទុយពីនិតីវិធីច្បាប់ ដើម្បីកសាងទំនុកចិត្ដពីមហាជន បើមិនដូច្នេះទេនឹងធ្វើឲ្យបាត់បង់ជំនឿលើសមត្ថកិច្ចពីសំណាក់ពលរដ្ឋ៕