.jpg)
លោក ស ខេង រដ្ឋមន្ត្រីក្រសួងមហាផ្ទៃក្នុងសន្និសីទកាសែតកន្លងមក។ ហ៊ាន រង្សី
ភ្នំពេញ៖ លោក ស ខេង ឧបនាយករដ្ឋមន្ត្រី និងជារដ្ឋមន្រ្ដីក្រសួងមហាផ្ទៃ បានណែនាំដល់មន្ត្រីនៅគ្រប់បណ្ដា អគ្គ.ជំនាញពាក់ព័ន្ធនានាចំណុះក្រសួងមហាផ្ទៃ រដ្ឋបាល និងស្នងការដ្ឋាននគរបាលរាជធានី-ខេត្ដ ត្រូវយកចិត្ដទុកដាក់តាមដាន និងដោះស្រាយបញ្ហាជូនប្រជាពលរដ្ឋប្រកបដោយតម្លាភាព និងយុត្ដិធម៌។
យោងតាមសេចក្ដីណែនាំស្ដីពី «ការយកចិត្ដទុកដាក់ដោះស្រាយបញ្ហាជូនប្រជាពលរដ្ឋ» របស់លោក ស ខេង ដល់គ្រប់បណ្ដាអគ្គ.ជំនាញពាក់ព័ន្ធនានា ចំណុះក្រសួង រដ្ឋបាល និងស្នងការដ្ឋាននគរបាលរាជធានី-ខេត្ដ កាលពីថ្ងៃទី ២៣ ខែកញ្ញា បានឲ្យដឹងថា កន្លងមកក្រសួងបានទទួលយកការដោះស្រាយបណ្ដឹង សំណើ សំណូមពរ មតិយោបល់ ការថ្នាំងថ្នាក់ ឬក្ដីកង្វល់របស់ប្រជាពលរដ្ឋដែលពាក់ព័ន្ធនឹងសមត្ថកិច្ចរបស់ក្រសួងមហាផ្ទៃ តាមរយៈការដាក់លិខិតចូលមកក្រសួងមហាផ្ទៃ គេហទំព័រហ្វេសប៊ុករបស់ លោក ស ខេង និងការដកស្រង់សារព័ត៌មាន និងបណ្ដាញទំនាក់ទំនងសង្គមនានា ដើម្បីបញ្ជូនទៅឲ្យអង្គភាពជំនាញពាក់ព័ន្ធចំណុះក្រសួង និងរដ្ឋបាលរាជធានី-ខេត្ដ ធ្វើការដោះស្រាយ។
លោក ស ខេង ចាត់ទុកថា៖ «នេះជាវិធីផ្ដល់សេវាជូនប្រជាពលរដ្ឋមួយដ៏សំខាន់។ ដោយពិនិត្យឃើញថា ការដោះស្រាយបញ្ហាខាងលើមួយចំនួនទទួលបានលទ្ធផលល្អប្រសើរ និងបានឆ្លើយតបទាន់ពេលជូនប្រជាពលរដ្ឋ និងបញ្ហាមួយចំនួនទៀតមិនទាន់ទទួលបានលទ្ធផលនៅឡើយ»។
លោកបញ្ជាក់ថា៖ «ត្រូវធ្វើការដោះស្រាយហើយដោះស្រាយទៀត រហូតទទួលបានលទ្ធផលចប់ ឱ្យបានត្រឹមត្រូវប្រកបដោយតម្លាភាព និងយុត្ដិធម៌ និងត្រូវធ្វើរបាយការណ៍អំពីលទ្ធផលនៃការដោះស្រាយជូនមកក្រសួងមហាផ្ទៃវិញ ដើម្បីក្រសួងមានវិធានការបន្ត»។
ក្រុមការងារតាមដានអំពីការដោះស្រាយមតិយោបល់ ឬសំណូមពររបស់មហាជន ក្នុងគេហទំព័រហ្វេសប៊ុករបស់លោក ស ខេង កាលពីថ្ងៃទី ១៤ ខែកញ្ញា បានបង្ហាញរបាយការណ៍បូកសរុបលទ្ធផលក្នុងខែកក្កដា និងខែសីហា ថា បានទទួលមតិយោបល់ និងសំណូមពររបស់មហាជនចំនួន ៣៣៧ ករណី ក្នុងនោះបានដោះស្រាយចំនួន ៦៨ ករណី និងកំពុងដោះស្រាយចំនួន ១៨០ ករណី។
លោក ជា សុគន្ធា ប្រធានក្រុមការងារតាមដានអំពីការដោះស្រាយមតិយោបល់ ឬសំណូមពររបស់មហាជនក្នុងគេហទំព័រហ្វេសប៊ុករបស់លោក ស ខេង បានប្រាប់ភ្នំពេញ ប៉ុស្ដិ៍ កាលពីម្សិលមិញថា មតិយោបល់ ឬបណ្ដឹងដែលមហាជនបានផ្ញើមកពីតាមបណ្ដារាជធានី-ខេត្ដ ភាគច្រើនជាករណីសន្ដិសុខសណ្ដាប់ធ្នាប់។ ប៉ុន្ដែក៏មានករណីបញ្ហាវិវាទដីធ្លីមួយចំនួនផងដែរ។
លោកបញ្ជាក់ថា៖ «ការណែនាំរបស់សម្ដេចក្រឡាហោម [ស ខេង] ទៅដល់បណ្ដា អគ្គ.ជំនាញពាក់ព័ន្ធនានាចំណុះក្រសួង រដ្ឋបាល និងស្នងការដ្ឋាននគរបាលរាជធានី-ខេត្ដ ដើម្បីយកចិត្ដទុកដាក់ដោះស្រាយបន្ថែមទៀត ជូនប្រជាពលរដ្ឋដែលបានដាក់បណ្ដឹងមកនោះឱ្យបានល្អប្រសើរថែមទៀត។ ការណែនាំនេះ គឺសំដៅដល់បញ្ហារួមដែលប្រជាពលរដ្ឋបានដាក់បណ្ដឹងមកក្រសួងទាំងអស់។ នេះជាការយកចិត្ដទុកដាក់របស់សម្ដេចក្នុងការដោះស្រាយបញ្ហាជូនពលរដ្ឋ»។
លោក ស៊ឹង សែនករុណា មន្ត្រីអង្កេតជាន់ខ្ពស់ នៃសមាគមការពារសិទ្ធិមនុស្ស អាដហុក សាទរចំពោះការណែនាំរបស់លោក ស ខេង នេះ។ លោកបានថ្លែងថា៖ «យើងសង្ឃឹមថា ក្រោយពីការចេញលិខិតនេះ អាជ្ញាធរមានសមត្ថកិច្ច ដែលកំពុងដោះស្រាយបញ្ហាជូនប្រជាពលរដ្ឋ គួរតែមានការពន្លឿន និងយកចិត្ដទុកដាក់ តាមការណែនាំរបស់សម្ដេចក្រឡាហោមនេះ។ យើងក៏ចាំមើល និងតាមដានផងដែរថា តើក្រោយពីការណែនាំរបស់សម្ដេចក្រឡាហោមបែបនេះហើយ នៅមានការមិនពេញចិត្ដ ចំពោះការមិនយកចិត្ដទុកដាក់ពីមន្រ្ដីអាជ្ញាធរថ្នាក់ក្រោមនេះ ឬយ៉ាងណាទៀតនោះបន្ថែមទៀត»។
លោក សាន សុខសីហា អ្នកនាំពាក្យស្នងការនគរបាលរាជធានីភ្នំពេញថ្លែងពីម្សិលមិញថា ស្នងការនគរបាលរាជធានីបានទទួលសេចក្ដីណែនាំរបស់ លោក ស ខេង រួចហើយ។ ស្របពេលជាមួយគ្នានេះ ស្នងការនគរបាលរាជធានីភ្នំពេញ ក៏តែងតែបានអនុវត្ដជាប្រចាំ ចំពោះការដោះស្រាយ តាមដាន បណ្ដឹង មតិយោបល់ របស់ប្រជាពលរដ្ឋនៅលើហ្វេសប៊ុកថ្នាក់នាំជាន់ខ្ពស់ និងហ្វេសប៊ុករបស់ស្នងការដ្ឋាននគរបាលរាជធានីភ្នំពេញផ្ទាល់ផងដែរ។
លោកបញ្ជាក់ថា៖ «ប្រជាពលរដ្ឋតែងតែដាក់បណ្ដឹង និងមានមតិយោបល់ដោយផ្ទាល់មកកាន់ស្នងការដ្ឋាននគរបាលរាជធានីភ្នំពេញ ហើយក្រុមការងារប្រតិកម្មរហ័សយើង បានតាមដាន និងចុះដោះស្រាយផ្ទាល់ជូនដល់ប្រជាពលរដ្ឋភ្លាមៗ ពិសេសលើករណីសន្ដិសុខសណ្ដាប់ធ្នាប់។ ដូច្នេះមិនសូវផ្ដល់ការលំបាកដល់ពលរដ្ឋដាក់បណ្ដឹង ឬមតិយោបល់ផ្ទាល់ដល់ហ្វេសប៊ុកថ្នាក់ដឹកនាំទេ»៕
