.jpg)
រដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា រដ្ឋាភិបាលមិនពាក់ព័ន្ធនឹងការលាបពណ៌ក្រុមអង្គការសង្គមស៊ីវិលទេ។ ផា លីណា
ភ្នំពញៈ រដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា រដ្ឋាភិបាលមិនពាក់ព័ន្ធនឹងការលាបពណ៌ក្រុមអង្គការសង្គមស៊ីវិល ថា ជាបក្សប្រឆាំងឬចូលរួមចលនាបដិវត្តន៍ពណ៌នោះទេ ដោយអះអាងថា ការលើកឡើងនាពេលកន្លងមក គឺជារឿងបុគ្គល ហើយថា លោកគាំទ្រ ១០០ ភាគរយ ក្នុងការបញ្ឈប់ការចោទប្រកាន់គ្នានេះ។
លោកថ្លែងបដិសេធបែបនេះ ឆ្លើយតបនឹងសំណើរបស់ក្រុមអង្គការសង្គមស៊ីវិល ដែលស្នើមកកាន់រដ្ឋាភិបាល ឲ្យលុបចោលនូវការលាបពណ៌លើអង្គការសង្គមស៊ីវិលដែលកាលពី មុនបោះឆ្នោតជាតិ ឆ្នាំ ២០១៨ ទីស្តីការគណៈរដ្ឋមន្ត្រី បានចេញផ្សាយសៀវភៅ «ស» ដោយចោទអង្គការសង្គមស៊ីវិលជាង ៣០០ បានចូលរួមក្នុងបដិវត្តន៍ពណ៌ ដើម្បីផ្ដួលរំលំរដ្ឋាភិបាល។ បន្ទាប់មក មន្ត្រីរដ្ឋាភិបាលកម្ពុជាមួយចំនួនក៏លើកឡើងស្រដៀងគ្នានេះថា ពួកគេជាក្រុមប្រឆាំង។
ឆ្លើយតបទៅក្រុមអ្នកកាសែតយ៉ាងខ្លីក្រោយបញ្ចប់ការថ្លែងសុន្ទរកថារបស់លោកក្នុងជំនួបលើកទី ២ ជាមួយក្រុមអង្គការសង្គមស៊ីវិល នាទីស្ដីការក្រសួងមហាផ្ទៃពីម្សិលមិញ លោក ស ខេង បានថ្លែងថា ការលើកឡើងនានាពាក់ព័ន្ធនឹងបញ្ហានេះកន្លងមកគឺជា «រឿងបុគ្គល»។
លោកសង្កត់បន្ថែមថា៖ «អាហ្នឹងគ្មានអ្នកណាលាបពណ៌គាត់ទេ តែគាត់ចូលរួម គឺជាការទទួលខុសត្រូវចំពោះមុខច្បាប់ហើយ»។
លោក ស ខេង បានថ្លែងចំពោះមុខក្រុមអង្គការសង្គមស៊ីវិលជាង ២០០ ស្ថាប័នថា ខ្លួនគាំទ្រ ១០០ ភាគរយចំពោះការបញ្ឈប់ការលាបពណ៌គ្នានេះ។
លោកបញ្ជាក់ថា៖ «រាជរដ្ឋាភិបាលមិន [បានចោទ] ដែរ ក្រែងអង្គការសង្គមស៊ីវិលមួយៗ ម្នាក់ៗនោះ គាត់លាបពណ៌ខ្លួនគាត់ នេះជារឿងរបស់គាត់។ ចង់និយាយថាម៉េច បើគាត់ធ្វើសកម្មភាពទៅ វាខុសពីច្បាប់ ហើយដល់គេធ្វើតាមច្បាប់ទៅ គាត់ថាគេលាបពណ៌ អាហ្នឹងក្រែងវាមិនត្រូវ។ ខ្ញុំគាំទ្របើសិនជាអង្គការមួយដែលសកម្ម ធ្វើការងារដើម្បីសង្គម ដើម្បីជាតិ ទោះបីធ្វើក្នុងវិស័យណាក៏ដោយ វិស័យតស៊ូមតិ សិទ្ធិមនុស្សគេធ្វើត្រឹមត្រូវតាមច្បាប់ អ្នកណាទៅលាបពណ៌ អ្នកនោះខុស អាហ្នឹងយើងនិយាយឲ្យច្បាស់ជាមួយគ្នា»។
លោក ស ខេង អះអាងថា រហូតមកដល់ឆ្នាំ ២០១៨ កន្លងទៅនេះ ក្រសួងមហាផ្ទៃ មិនដែលទទួលបានពាក្យបណ្តឹងជាក់លាក់ណាមួយពីក្រុមអង្គការសង្គមស៊ីវិល ដើម្បីសុំអន្តរាគមន៍ពីការចោទប្រកាន់ការលាបពណ៌ទេ ខណៈក្រុមសង្គមស៊ីវិលទាំងនោះគួរមានភាពជាក់លាក់ ឬលិខិតជាផ្លូវការដាក់មកក្រសួង បើមានករណីបែបនេះ កុំឲ្យចេះតែលើកឡើងដោយគ្មានភ័ស្តុតាង។
កញ្ញាស្រី សុធាវី នាយិកាអង្គការក្រុមការងារដើម្បីដោះស្រាយទំនាស់ ហៅកាត់ថា ACT បានអះអាងថា នេះគឺជាក្តីបារម្ភរបស់ក្រុមអង្គការសង្គមស៊ីវិល ខណៈពួកគេគ្រាន់តែធ្វើសកម្មភាពរបស់ខ្លួន ដើម្បីឲ្យមានភាពប្រសើរឡើងនៅក្នុងសង្គម តែត្រូវបានរឹតត្បឹត។ កញ្ញា បន្តថា ការដែលសង្គមស៊ីវិល លើកបែបនេះព្រោះតែកន្លងទៅ សង្គមស៊ីវិលជាច្រើនដែលធ្វើការងាររបស់ខ្លួន ត្រូវបានមន្ត្រីរដ្ឋាភិបាលមួយចំនួនចោទប្រកាន់។
កញ្ញាថា៖ «ព័ត៌មានទាំងអស់ហ្នឹង ត្រូវបានលើកឡើងដោយមន្ត្រីរដ្ឋាភិបាលធ្វើការចោទប្រកាន់មកអង្គការសង្គមស៊ីវិល អ៊ឹចឹងហើយ បានអង្គការសង្គមស៊ីវិលបានលើកឡើងថា មានការលាបពណ៌ ដោយសារយើងមើលឃើញថា ប្រភពហ្នឹងគឺចេញពីខ្សែបណ្តាញពីរដ្ឋាភិបាល»។
ទីស្តីការគណៈរដ្ឋមន្ត្រី ដែលបានចាត់ទុកអង្គការមិនមែនរដ្ឋាភិបាលធំៗមួយចំនួនជាក្រុមប្រឆាំង រួមមានសមាគមការពារសិទ្ធិមនុស្សអាដហុក អង្គការលីកាដូ អង្គការខុម ហ្រ្វែល និងនិកហ្វិចជាដើម ថាបានជាប់ពាក់ព័ន្ធនឹងបដិវត្តន៍ពណ៌។
លោក សំ គន្ធាមី នាយកប្រតិបត្តិអង្គការនិកហ្វិច ដែលពុំមានវត្តមានក្នុងជំនួបនោះ បានអះអាងថា បន្ទាប់ពីអង្គការខ្លួនបានជាប់ឈ្មោះក្នុងសៀវភៅស ដែលចោទថា មានជាប់ពាក់ព័ន្ធនឹងការធ្វើបដិវត្តន៍ពណ៌ រាល់សកម្មភាពដែលក្រុមការងារលោកត្រូវបំពេញត្រូវបានរឹតត្បឹត។ លោក ចង់ឲ្យរដ្ឋាភិបាល បញ្ឈប់បញ្ហាទាំងនេះ និងបង្កលក្ខណៈងាយស្រួលដល់ពួកខ្លួនវិញ។
លោកបញ្ជាក់ថា៖ «តាំងពីនិកហ្វិចមានឈ្មោះក្នុងសៀវភៅ «ស» ហ្នឹង ខ្ញុំពិបាកធ្វើការ ហើយក្រុមការងាររបស់ខ្ញុំ បានសុំឈប់អស់នៅតាមបណ្តាខេត្ត បន្ទាប់ពីឃើញព័ត៌មាននេះ។ ព័ត៌មាននេះបានផ្សព្វផ្សាយទៅតាមថ្នាក់ក្រោមជាតិ រួចហើយពួកគាត់បានលាឈប់ ព្រោះតែបារម្ភ យើងធ្វើការតាមវិជ្ជាជីវៈ តែមានឈ្មោះក្នុងបញ្ជីខ្មៅ»។
ប៉ុន្តែ បើតាមលោក ស ខេង អះអាងកាលពីម្សិលមិញ រហូតមកដល់ពេលនេះ គឺគ្មានអង្គការសង្គមស៊ីវិលណា ដែលក្រសួងបានដាក់ឈ្មោះក្នុងបញ្ជីខ្មៅនោះទេ លើកលែងតែអង្គការសង្គមស៊ីវិលទាំងនោះ បានស្នើសុំលុបឈ្មោះដោយខ្លួនឯង។
លោក សឿង សារឿន នាយកប្រតិបត្តិគណៈកម្មាធិការសហប្រតិបត្តិការដើម្បីកម្ពុជាដែលតំណាងឲ្យក្រុមអង្គការសង្គមស៊ីវិលជាង ២០០ ស្ថាប័ន បានលើកឡើងថា នេះជាការពិត ដែលថា ក្រសួងមហាផ្ទៃមិនបានលាបពណ៌មកលើក្រុមសង្គមស៊ីវិល តែមានស្ថាប័នរដ្ឋាភិបាលដទៃទៀតបានលើកឡើងកន្លងមក ទើបពួកយើងស្នើឲ្យស្ថាប័នទាំងនោះ គួរបញ្ឈប់ការលាបពណ៌នេះ។
លោកបញ្ជាក់ថា៖ «ឯកសារដែលពាក់ព័ន្ធ (សៀវភៅ «ស») មានរួចអស់ហើយ តែមកដល់ឥឡូវនេះ វាគឺជារឿងមួយដែលយើងត្រូវជជែកគ្នាថា តើគួរតែបន្ត និងប្រើប្រាស់ឯកសារហ្នឹងជាយន្តការសម្រាប់លាបពណ៌គ្នាទៅវិញទៅមកទៀត ឬយ៉ាងណា? ឬត្រូវលុបចោលពីរបៀបដែលយើងធ្វើការកាលពីអតីតកាល ហើយយើងស្វែងរកវិធីរួមគ្នាដើម្បីអភិវឌ្ឍប្រទេស»។
បើតាម លោក សឿង សារឿន ក្រៅតែពីចង់ឲ្យរដ្ឋាភិបាលឈប់លាបពណ៌មកលើពួកគេ ក្រុមអង្គការសង្គមស៊ីវិលទាំងជាង ៣០០ នោះ ក៏បានឯកភាពគ្នា ស្នើទៅក្រសួងមហាផ្ទៃចំនួន ១២ ចំណុច ដើម្បីធានាដល់សិទ្ធិសេរីភាពរបស់អង្គការសមាគម ដែលក្នុងនោះមានដូចជា បញ្ហារឹតត្បិតសេរីភាពសង្គមស៊ីវិល ការដាក់បញ្ចូលសង្គមស៊ីវិលចូលក្នុងការងារបច្ចេកទេស និងការធ្វើវិសោធនកម្មច្បាប់ស្តីពីអង្គការសមាគមជាដើម។
លោក ឱក សេរីសោភក្ដិ៍ អ្នកវិភាគបញ្ហាសង្គម មើលឃើញថា ជាការប្រសើរណាស់ដែល លោក ស ខេង ប្រកាសជាសាធារណៈ រឿងការលាបពណ៌នេះ ដែលជាការដោះស្រាយមន្ទិលសង្ស័យមួយដល់សាធារណជន។
លោកបន្ដថាតាមបណ្ដាញសង្គមហ្វេសប៊ុក មិនត្រឹមតែសង្គមស៊ីវិលប៉ុណ្ណោះទេ ដែលយល់ឃើញអ៊ីចឹង សូម្បីតែខាងសាធរណជន ក៏យល់ឃើញដែរ ព្រោះកាលពីឆ្នាំ ២០១៧ ទាក់ទងទៅនឹងគណបក្ស និងចលនាថ្ងៃចន្ទអាវខ្មៅ ការចោទសង្គមស៊ីវិលអីហ្នឹង បានធ្វើឲ្យសាធារណជនយល់ថា មានការលាបពណ៌ ដូច្នេះហើយទើប លោក ស ខេង និយាយជាសាធារណៈថា វាអត់មានការលាបពណ៌។
លោកបន្ថែមថា៖ «ចំណុចមួយដែលខ្ញុំចាប់បាន សម្ដេចមានប្រសាសន៍ថា ជួនកាលមានសង្គមស៊ីវិលខ្លះបានទៅធ្វើកិច្ចការ ដែលខ្លួនឯងមិនគួរធ្វើ។ ព្រោះពេលដែលខ្លួនឯងចុះឈ្មោះនៅក្រសួងមហាផ្ទៃហ្នឹងគឺថា ត្រូវធ្វើនេះធ្វើនោះជាដើម តែដល់ពេលទៅធ្វើជាក់ស្ដែងគឺមិនបានធ្វើទៅតាមអ្វីដែលខ្លួនឯងចុះបញ្ជីជាផ្លូវការ ទៅធ្វើខុសពីអ្វីដែលជាបេសកកម្មរបស់ខ្លួនទៅវិញ»។
លោក ឱក សេរីសោភកិ៍្ត បានបញ្ជាក់ថា៖ «ដូច្នេះហើយបានសម្ដេច ស ខេង មានប្រសាសន៍ថា លោក (សង្គមស៊ីវិល) ខ្លួនឯងហ្នឹងលាបពណ៌ខ្លួនឯង នៅក្នុងរឿងនេះ»៕
