The Phnom Penh Post Search

Search form




Logo of Phnom Penh Post newspaper Phnom Penh Post - លោក ស​ ខេង ​ថា​សមត្ថកិច្ច​នៅ​តែ​តាម​រក​អ្នក​គំរាម​សម្លាប់​លោក កឹម ​សុខា

លោក ស​ ខេង ​ថា​សមត្ថកិច្ច​នៅ​តែ​តាម​រក​អ្នក​គំរាម​សម្លាប់​លោក កឹម ​សុខា

លោក ស ខេង រដ្ឋមន្ដ្រី​ក្រសួង​មហាផ្ទៃ​។
លោក ស ខេង រដ្ឋមន្ដ្រី​ក្រសួង​មហាផ្ទៃ​។ ផា លីណា

លោក ស​ ខេង ​ថា​សមត្ថកិច្ច​នៅ​តែ​តាម​រក​អ្នក​គំរាម​សម្លាប់​លោក កឹម ​សុខា

ភ្នំពេញៈ លោក ស ខេង រដ្ឋមន្ត្រី​ក្រសួង​មហាផ្ទៃ​បាន​អះអាង​ថា​សមត្ថកិច្ច​ជំនាញ​នៅ​តែ​បន្ត​ស្វែងរក​អ្នក​គំរាម​សម្លាប់​លោក កឹម សុខា អនុប្រធាន​គណបក្ស​សង្គ្រោះ​ជាតិ​នៅលើ​ហ្វេសប៊ុក​ខណៈ​ដែល​អ្នក​គំរាម​សម្លាប់​លោក សុខ ទូច ប្រធាន​ក្រុម​ស្រាវជ្រាវ​នៃ​រាជបណ្ឌិត្យ​សភា និង​អ្នក​ប្រកាស​បដិវត្ត​ពណ៌​តាម​បណ្តាញ​សង្គម​ហ្វេសប៊ុក​ដូច​គ្នា​ត្រូវ​បាន​ចាប់​ខ្លួន​បញ្ជូន​ទៅ​តុលាការ​។

ក្នុង​សិក្ខាសាលា​ស្តីពី​ប្រព័ន្ធ​សន្តិសុខ​ដើម្បី​ធានា​នូវ​សុវត្ថិភាព និង​សន្តិសុខ​ចំពោះ​អាយុ​ជីវិត និង​ទ្រព្យសម្បត្តិ​របស់​ប្រជាពលរដ្ឋ​កាលពី​ម្សិលមិញ​លោក ស ខេង បាន​ថ្លែង​ថា​ផ្អែក​តាម​រដ្ឋធម្មនុញ្ញ​​មាត្រា ៤១ កម្ពុជា​ប្រកាន់​នូវ​របប​ប្រជាធិបតេយ្យ​សេរី​ពហុបក្ស​មាន​សិទ្ធិ​ក្នុង​ការ​ធ្វើ​នយោបាយ​បញ្ចេញ​មតិ​ការ​ប្រមូល​ផ្តុំ​ហើយ​សកម្មភាព​ទាំងអស់​ត្រូវ​បាន​លើក​កម្ពស់​ប៉ុន្តែ​ការ​ប្រើប្រាស់​សិទ្ធិ​នេះ​មិន​អាច​ធ្វើឲ្យ​ប៉ះពាល់​ដល់​កិត្តិយស​របស់​អ្នក​ដទៃ​ឡើយ។

លោក​បាន​ស្រាយ​បំភ្លឺ​ចំពោះ​ករណី​ឃាត់​ខ្លួន​អ្នក​ប្រើប្រាស់​អ៊ីនធឺណិត​ដែល​ប្រកាស​​បដិវត្តន៍​ពណ៌ និង​អ្នក​គំរាម​សម្លាប់​លោក សុខ ទូច គឺ​សមត្ថកិច្ច​គ្រាន់តែ​អនុវត្ត​នូវ​តួនាទី​របស់​ខ្លួន​តែ​ប៉ុណ្ណោះ។

លោក​ថា៖ «ខ្ញុំ​គិត​ថា​ទុក​ឲ្យ​អ្នក​ច្បាប់​បកស្រាយ​ប៉ុន្តែ​ត្រង់​ថា​អ្នក​ធ្វើការ​សន្តិសុខ​ធម្មតា​មាន​ការ​គំរាម​កំហែង​ដល់​អាយុ​ជីវិត​យើង​ត្រូវ​​ទទួល​ខុសត្រូវ​ហើយ​ត្រូវ​តែ​ស្រាវជ្រាវ​ដើម្បី​នាំ​មក​បញ្ជូន​ទៅ​តុលាការ​ហើយ​តុលាការ​កាត់​សេចក្តី​ថា​ម៉េច​អា​ហ្នឹង​ជា​រឿង​របស់​តុលាការ»។

ករណី​គំរាម​សម្លាប់​ទៅ​លើ​លោក កឹម សុខា លោក​ឧបនាយករដ្ឋមន្ត្រី​បាន​អះអាង​ដែរ​ថា​អាជ្ញាធរ​មិន​បាន​ព្រងើយ​កន្តើយ​នោះ​ទេ​ហើយ​សមត្ថកិច្ច​ជំនាញ​បាន​កំពុង​តាមដាន​ចាត់​វិធាន​រក​មុខ​អ្នក​​គំរាម​សម្លាប់​យ៉ាង​យក​ចិត្ត​ទុកដាក់។ លោក​ថា៖ «រឿង​ខ្លះ​យើង​រក​ឃើញ​រឿង​ខ្លះ​យើង​អត់​ទាន់​រក​ឃើញ​ទេ​យើង​​នឹង​បន្ត​ករណី​ខ្លះ​ដែល​រក​មិន​ទាន់​ឃើញ​នោះ»។

ចំណែក​អ្នក​នាំ​ពាក្យ​អគ្គស្នងការ​នគរបាល​ជាតិ​លោក គៀត ច័ន្ទថារិទ្ធ បាន​ឲ្យ​ដឹង​ថា​កន្លង​មក​សមត្ថកិច្ច​បាន​កោះ​ហៅ​លោក ផែង វណ្ណៈ មន្ត្រី​ក្រសួង​មហាផ្ទៃ​ដែល​ជា​ម្ចាស់​គណនី​ផ្តើម​បង្ហោះ​រូបភាព​គំរាម​សម្លាប់​លោក កឹម សុខា ទៅ​សួរ​នាំ និង​បាន​ស្រាវជ្រាវ​​រកឃើញ​ថា​មាន​ជនសង្ស័យ​ផ្សេង​លួច​ចូល​ប្រើប្រាស់​គណនី​នោះ​ហើយ​ការ​សរសេរ​គឺ​ប្រើប្រាស់ IP អ៊ីនធឺណិត​នៅ​ក្រៅ​ប្រទេស​មិនមែន​នៅ​កម្ពុជា​នោះ​ទេ។

លោក​ថា៖ «តាំងពី​ដំបូង​ម្ល៉េះ​គឺ​ថា Facebook ចេញ​ពី Account ផែង វណ្ណៈ យើង​បាន​ចាត់ការ​ស្រាវជ្រាវ​ភ្លាមៗ​ហៅ​មក​​សួរ​នាំ​ធ្វើ​កំណត់​ហេតុ​បើ​សិន​ជា​គាត់​ចង់​ធ្វើ​សកម្មភាព​គាត់​មិនមែន​ប្រើ Account របស់​ខ្លួន​ទៅ​ធ្វើ​អ៊ីចឹង​ទេ​ដំបូង​យើង​មិន​​ជឿ​គាត់​ទេ​ហើយ​អង្គភាព​ជំនាញ​បាន​ពិនិត្យ​អង្កេត​រឿង​ហ្នឹង​មាន​អ្នក​លួច Account គាត់​ទាល់​តែ​ពិនិត្យ IP ឃើញ​ថា IP ពី​ស្រុក​ក្រៅ​មក»។

លោក កឹម សុខា ត្រូវ​បាន​រង​ការ​គំរាម​សម្លាប់​តាម​បណ្តេញ​ហ្វេសប៊ុក​ដោយ​មាន​រូបភាព​​គ្រាប់​កាំភ្លើង​ចំនួន ៧ គ្រាប់​កាំភ្លើង​ខ្លី​មួយ​ដើម និង​ការ​ប្រមាថ​ដោយ​ពាក្យ​សម្តី​ផ្តើម​ចេញ​ពី​គណនី​ហ្វេសប៊ុក​ឈ្មោះ​លោក ផែង វណ្ណៈ ដែល​គេ​ស្គាល់​ថា​ជា​ប៉ូលិស​ក្រសួង​មហាផ្ទៃ​កាលពី​ថ្ងៃ​ទី ៤ ខែ​ធ្នូ ឆ្នាំ​ ២០១៣ ក្នុង​គ្រា​ដែល​គណបក្ស​សង្គ្រោះ​ជាតិ​ធ្វើ​ពហិការ​ប្រជុំ​សភា​ក្រោម​ហេតុផល​ថា​លទ្ធផល​បោះឆ្នោត​មាន​ភាព​មិន​ប្រក្រតី។

លោក ផែង វណ្ណៈ មាន​តួនាទី​ជា​នាយរង​ការិយាល័យ​បណ្តុះបណ្តាល និង​វិក្រឹតការ​នៃ​ស្នងការដ្ឋាន​នគរបាល​រាជធានី​ភ្នំពេញ​បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​ករណី​នេះ​លោក​បាន​ចូល​បំភ្លឺ​ភ្លាមៗ​បន្ទាប់ពី​រង​ការ​ចោទប្រកាន់​កាលពី​ចុង​ឆ្នាំ ២០១៣ ហើយ​លោក​ក៏​នៅ​តែ​បន្ត​សហការ​ជាមួយ​សមត្ថកិច្ច​ក្នុង​ករណី​ចាំបាច់។

លោក​បន្ត​ថា៖ «ខ្ញុំ​ជា​មន្ត្រី​អ្នក​អនុវត្ត​ច្បាប់​ខ្ញុំ​មិន​ទៅ​ល្ងង់​ធ្វើ​បែប​នោះ​ដោយ​បើក​ចំហ​អ៊ីចឹង​នោះ​ទេ​ខ្ញុំ​គិត​ថា ទី ១ អាច​មាន​គេ Hack Account របស់​ខ្ញុំ ទី ២ គឺ​គេ​ប្រើ Account ក្លែងក្លាយ​ដាក់​ឈ្មោះ​ខ្ញុំ។ ខ្ញុំ​ត្រៀម​សហការ​គ្រប់​ពេល​បើ​សមត្ថកិច្ច​ត្រូវ​ការ»។

នាយខុទ្ទកាល័យ​លោក កឹម សុខា លោក មុត ចន្ថា បាន​ស្វាគមន៍​ចំពោះ​ដំណើរការ​ស៊ើបអង្កេត​របស់​សមត្ថកិច្ច​បើ​ទោះបី​ជា​លោក​គិត​ថា​ហាក់​យូរ​បន្តិច​ក្តី។

លោក​ថ្លែង​ថា ​គណបក្ស​ប្រឆាំង​នៅ​តែ​ជំរុញ​ឲ្យ​សមត្ថកិច្ច​វែក​មុខ​ជនល្មើស និង​អនុវត្ត​ការងារ​នេះ​ប្រកប​ដោយ​តម្លាភាព។ «អ៊ីចឹង​យើង​មាន​តែ​រង់ចាំ​មើល»​។

តាមរយៈ​រូបភាព​គំរាម​នោះ​ក្រោយ​មក​គណបក្ស​សង្គ្រោះ​ជាតិ​បាន​ដាក់​លិខិត​ជា​ផ្លូវការ​ប្តឹង​ទៅ​កាន់​រដ្ឋមន្ត្រី​ក្រសួង​មហាផ្ទៃ​សុំ​អន្តរាគមន៍​ចាប់​ខ្លួន​ជនសង្ស័យ​ប៉ុន្តែ​រហូត​មក​ទល់​ពេល​នេះ​មាន​រយៈពេល​ជិត​ ២ ​ឆ្នាំ​ហើយ​នៅ​មិន​ទាន់​ឃើញ​មាន​សញ្ញាណ​​វិជ្ជមាន​ណា​មួយ​ពី​ការ​ចាប់​ខ្លួន​ជនសង្ស័យ​មក​ផ្តន្ទាទោស​នៅ​ឡើយ​ទេ​៕

អត្ថបទគួរចាប់អារម្មណ៍