The Phnom Penh Post Search

Search form

Logo of Phnom Penh Post newspaper Phnom Penh Post - លោក ស ខេង ​ទទួល​ស្គាល់​ថា ​ការ​អនុវត្ត​ច្បាប់​នៅ​ខ្វះ​ចន្លោះ

លោក ស ខេង ​ទទួល​ស្គាល់​ថា ​ការ​អនុវត្ត​ច្បាប់​នៅ​ខ្វះ​ចន្លោះ

Content image - Phnom Penh Post
លោក ស ខេង ថ្លែង​សុន្ទរកថា​ក្នុង​សិក្ខាសាលា​កាលពី​ម្សិលមិញ​។ ហេង ជីវ័ន

លោក ស ខេង ​ទទួល​ស្គាល់​ថា ​ការ​អនុវត្ត​ច្បាប់​នៅ​ខ្វះ​ចន្លោះ

ភ្នំពេញៈ រដ្ឋមន្ត្រី​ក្រសួង​មហាផ្ទៃ និង​ជា​ប្រធាន​គណៈកម្មាធិការ​ជាតិ​ប្រឆាំង​អំពើ​ជួញដូរ​មនុស្ស​លោក ស ខេង បាន​ទទួល​ស្គាល់​ថា​ការ​អនុវត្ត​ច្បាប់​ទៅ​លើ​ការ​ជួញដូរ​មនុស្ស​នៅ​មាន​ការ​ខ្វះ​ចន្លោះ​ហើយ​បាន​​ជំរុញ​ឱ្យ​ស្ថាប័ន​ពាក់ព័ន្ធ​ពង្រឹង​ការ​អនុវត្ត​ច្បាប់​​​ជា​បន្ទាន់​ដើម្បី​ទប់ស្កាត់​ការ​ជួញដូរ​ដែល​កំពុង​តែ​បន្ត​កើត​ឡើង​។

លោក​ ស ខេង បាន​ថ្លែង​បែប​នេះ​នៅក្នុង​សិក្ខាសាលា​ពិគ្រោះ​យោបល់​ថ្នាក់​ជាតិ​ស្តីពី​ការ​ពង្រឹង​ការ​អនុវត្ត​ច្បាប់​ដើម្បី​យុត្តិធម៌​ជនរងគ្រោះ​ដោយ​អំពើ​ជួញដូរ​មនុស្ស​ដែល​ធ្វើ​ឡើង​កាលពី​ម្សិលមិញ​នៅ​សណ្ឋាគារ​អាំងទែរ​កុងទីណង់តាល់​ដែល​មាន​សមាសភាព​មន្ត្រី​ពាក់ព័ន្ធ​ជាច្រើន​ចូលរួម។

មន្ត្រី​ទាំង​នោះ​មក​ពី​ក្រសួង​ការងារ​ក្រសួង​សង្គមកិច្ច ក្រសួង​កិច្ចការ​នារី​ ក្រសួង​យុត្តិធម៌ ស្នងការដ្ឋាន​នគរបាល​ជាតិ ក្រសួង​ការបរទេស ក្រសួង​ការពារ​ជាតិ និង​ចៅក្រម ព្រះរាជអាជ្ញា​រាជធានី​ខេត្ត​ព្រម​ទាំង​​អង្គការ​​ពាក់ព័ន្ធ​ផ្នែក​ច្បាប់​សរុប​ចំនួន ១២៥ នាក់។ ការ​រៀបចំ​សិក្ខា​សាលា​នេះ​ឡើង​គឺ​ដើម្បី​សិក្សា​អំពី​ស្ថានភាព​ជាក់ស្តែង​ដែល​មាន​នៅក្នុង​សង្គម​កម្ពុជា​ពាក់ព័ន្ធ​នឹង​ការ​អនុវត្ត​ច្បាប់​ស្តីពី​ការ​បង្ក្រាប​អំពើ​ជួញដូរ​មនុស្ស និង​អំពើ​ធ្វើ​អាជីវកម្ម​ផ្លូវ​ភេទ​។

លោក ស ខេង បាន​ថ្លែង​ទៀត​ថា​ស្ថានប័ន​នីមួយៗ​ដែល​ជាប់​ពាក់ព័ន្ធ​ត្រូវ​មាន​តួនាទី​អនុវត្ត​ច្បាប់​ឱ្យ​បាន​ល្អ​ប្រសើរ​ដើម្បី​ចៀសវាង​ការ​ថ្នាំងថ្នាក់​ពី​ពលរដ្ឋ​រឿង​ការ​ទប់ស្កាត់​ការ​ជួញដូរ​មនុស្ស។

លោក​បញ្ជាក់​ថា៖ «បញ្ហា​ទាំង​នេះ​បាន​បង្កើត​ឱ្យ​មាន​នូវ​ការ​ថ្នាំងថ្នាក់​ពី​ពលរដ្ឋ​រងគ្រោះ​កាន់តែ​ច្រើន​ឡើង​ដែល​​ទាមទារ​ឱ្យ​មាន​ការ​ពិនិត្យ​ និង​ពិភាក្សា​គ្នា​ឡើង​វិញ​អំពី​បែបបទ នីតិវិធី និង​ភាព​ខ្វះ​ចន្លោះ​នៃ​ការ​អនុវត្ត​ដែល​គប្បី​កែលម្អ​ជាបន្ទាន់​ដើម្បី​ជា​គន្លឹះ​ដោះស្រាយ​បញ្ហា និង​ឆ្លើយតប​ទៅ​នឹង​ពលរដ្ឋ​រងគ្រោះ»។

ក្នុង​នោះ​លោក​​ជំរុញ​ឱ្យ​ក្រសួង​ការងារ​ត្រូវ​ខិតខំ​​រក​សំណង​ឱ្យ​ជនរងគ្រោះ​ខណៈ​ស្នើ​ឱ្យ​តុលាការ​រឹតបន្តឹង​ការ​កាត់​ទោស​អ្នក​ជួញដូរ​មនុស្ស​ឱ្យ​បាន​ម៉ឺងម៉ាត់។

លោក​បន្ត​ថា៖ ​«ត្រូវ​ផ្លាស់ប្តូរ​យោបល់​គ្នា​ឱ្យ​ល្អិតល្អន់ ការ​ដោះស្រាយ​វិវាទ និង​ការ​ផ្តល់​សំណង​តាម​នីតិវិធី​របស់​ក្រសួង​ការងារ​ជាពិសេស​ក្នុង​ចំណោម​ពលករ​ដែល​ទៅ​ធ្វើការ​នៅ​ក្រៅ​ប្រទេស ដំណើរការ​ផ្តន្ទាទោស​របស់​តុលាការ​ចំពោះ​បទល្មើស​​ជួញដូរ​មនុស្ស ការ​ផ្តល់​សេវា​ផ្នែក​សង្គមកិច្ច​ដើម្បី​ឱ្យ​ជនរងគ្រោះ​ទទួល​បាន​ការ​គាំទ្រ​ផ្នែក​ច្បាប់ និង​យុត្តិធម៌»។

លោក​ក៏​ទទួល​ស្គាល់​ពី​ភាព​ខ្វះ​ចន្លោះ​នៃ​​ការ​អនុវត្ត​ច្បាប់​ផង​ដែរ​​ដោយ​ថា «ប្រជាពលរដ្ឋ​ដែល​មាន​បញ្ហា​មិន​អាច​រក​អ្នក​ជួយ​បាន​ព្រោះ​គាត់​មិន​ដឹង​ទាក់ទង​អ្នក​ណា​ដែល​អាច​​ផ្តល់​យោបល់ ឬ​ណែនាំ​ឱ្យ​ជួយ​គាត់​បាន និង​អ្នក​ខ្លះ​ទៀត​ត្រូវ​បាន​គេ​បោក​បញ្ឆោត​ ឬ​ ជួញដូរ ឬ​កេងប្រវ័ញ្ច ប្រើ​ហិង្សា​រំលោភ​បំពាន ដែល​ទាមទារ​ឱ្យ​អាជ្ញាធរ​ជួយ​អន្តរាគមន៍ និង​ត្រូវការ​ឱ្យ​តុលាការ​ផ្តល់​​យុត្តិធម៌»។

រដ្ឋមន្ត្រី​ក្រសួង​សង្គមកិច្ច​លោក វង សូត ថ្លែង​ក្នុង​សុន្ទរកថា៖ «ក្រសួង​សង្គមកិច្ច​​បាន​​ទទួល​ជនរងគ្រោះ និង​ងាយ​រងគ្រោះ​ដោយ​អំពើ​ជួញដូរ​មនុស្ស​ដែល​​ធ្វើ​មាតុភូមិ​និវត្តន៍​ពី​ប្រទេស​ថៃ និង​វៀតណាម​ចំនួន ២០២ នាក់​ក្នុង​នោះ​មកពី​វៀតណាម ១០៩ នាក់ និង​បាន​កំពុង​សហការ​ជាមួយ​ភាគី​ថៃ​រៀបចំ​សាងសង់​មជ្ឃមណ្ឌល​សំចត​ប៉ោយប៉ែត​ដើម្បី​ធានា​ការ​ទទួល​ជនរងគ្រោះ​ និង​ពលករ​ខុស​ច្បាប់​ដែល​ភាគី​ថៃ​បាន​បញ្ជូន​មក​»។

ប៉ុន្តែ​លោក វង សូត បញ្ជាក់​ថា​ក្រសួង​របស់​លោក​នៅ​ជួប​បញ្ហា​មួយ​ចំនួន​រួម​មាន​ខ្វះ​មជ្ឈមណ្ឌល​រដ្ឋ​សម្រាប់​ស្តារ​នីតិសម្បទា​ជនរងគ្រោះ​ដោយសារ​អំពើ​ជួញដូរ​មនុស្ស រដ្ឋបាល​ឃុំ-សង្កាត់​ភាគច្រើន​មិន​មាន​មូលនិធិ​គ្រប់គ្រាន់​កញ្ចប់​ថវិកា​នៅ​មាន​កម្រិត​ជនរងគ្រោះ​មិន​មាន​ទំនុក​ចិត្ត និង​មិន​​យល់​អំពី​ប្រព័ន្ធ​យុត្តិធម៌​»​។

ចំណែក​លោកស្រី ជូ ប៊ុនអេង អនុប្រធាន​អចិន្រៃ្តយ៍​គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស​បាន​ថ្លែង​ថា​៖ ​«ទោះបី​ជា​មាន​ច្បាប់​ច្រើន​យ៉ាង​ណា​ក្តី​ក៏​ការ​អនុវត្ត​នៅ​តែ​មិន​ទាន់​អាច​ធ្វើ​ឱ្យ​បទល្មើស​ថមថយ​ហើយ​កើត​មាន​ដដែល​ទៅ​លើ​ជន​រងគ្រោះ​កាន់តែ​ច្រើន​ជាពិសេស​ជនរងគ្រោះ​កម្រ​បាន​ទទួល​នូវ​សំណង​បដិទាន​សមស្រប​សម្រាប់​ប៉ះប៉ូវ​ការ​ខូចខាត​ណាស់»។

ប្រធាន​គ្រប់គ្រង​ផ្នែក​អង្កេត​នៃ​អង្គការ​លីកាដូ​លោក អំ សំអាត យល់​ឃើញ​ថា​ការ​អនុវត្ត​ច្បាប់​របស់​មន្រ្តី​ជំនាញ​នៅ​មាន​កម្រិត​នៅ​ឡើយ​ ខណៈ​លោក​ថា ​ក្រសួង​ទាំងអស់​គួរ​ជជែក​គ្នា​ដើម្បី​ស្វែងរក​ដំណោះស្រាយ​រួម​គ្នា​បំពេញ​ចន្លោះ​ដែល​ខ្វះខាត​នោះ​។​

លោក​ សំអាត​ បាន​បញ្ជាក់​ថា​៖ «​យើង​ខ្វះ​ការ​ផ្តល់​បច្ចេកទេស​ជំនាញ​សម្រាប់​ការ​អនុវត្ត​ច្បាប់​ខ្លះ​មាន​ចន្លោះ​ប្រហោង​តែ​យើង​ត្រូវ​អនុវត្ត​ច្បាប់​ដែល​មាន​ស្រាប់​ឱ្យ​បាន​តឹងរ៉ឹង​ចំពោះ​ជន​ណា​ដែល​ពាក់ព័ន្ធ​ជួញដូរ​មនុស្ស​ទោះបី​តាមរយៈ​ក្រុមហ៊ុន ឬ​អាជ្ញាធរ​ដែល​​ជាប់​ពាក់ព័ន្ធ»។

អនុរដ្ឋលេខាធិការ​ក្រសួង​យុត្តិធម៌​លោកស្រី ខៀវ សុផានី បាន​ថ្លែង​ថា​បើ​ទោះ​ជា​សមត្ថកិច្ច​ខំ​ទប់ស្កាត់​អំពើ​ជួញដូរ​​មនុស្ស​តែ​ករណី​នេះ​នៅ​មាន​ចំនួន​ច្រើន​មក​ដល់​​​ឆ្នាំ ២០១៦ ខណៈ​ក្រសួង​​ទទួល​​ស្គាល់​ថា​មាន​ឧបសគ្គ​ច្រើន​ក្នុង​ការ​ជំរុញ​ឱ្យ​ជនរងគ្រោះ​ចូលរួម​ក្នុង​នីតិវិធី​នៃ​ដំណើរ​រឿង​ក្តី​ជួញដូរ។

លោកស្រី​បន្ត​ថា​ គិត​ត្រឹម​​ខែ​ កញ្ញា ​ឆ្នាំ ២០១៦ នេះ «សំណុំ​រឿង​ដែល​ស្ថិត​នៅ​ព្រះរាជអាជ្ញា​មាន​ចំនួន ៤៨ សំណុំ​រឿង​ចាត់​ការ​រួច​បាន ២២ ​សំណុំ​រឿង​ដែល​មាន​ជនល្មើស​ ៥១ ​នាក់​ក្នុង​​នោះ​​បរទេស​ម្នាក់​ស្ថិត​នៅ​ចៅក្រម​ស៊ើបសួរ​មាន ៦៤ សំណុំ​រឿង​ចាត់ការ​បាន ១១ ជន​ត្រូវ​ចោទ ៩៣ ​នាក់ និង​ជនរងគ្រោះ ៦៧ នាក់​ស្ថិត​នៅ​ចៅក្រម​ជំនុំជម្រះ​មាន ៨៨ សំណុំ​រឿង​ចាត់ការ​បាន ៧ ជនជាប់ចោទ ១០០ នាក់​បរទេស ៣ នាក់ និង​ជនរងគ្រោះ ៩៥ នាក់​»​។

រដ្ឋមន្ត្រី​ក្រសួង​ការងារ​លោក អ៊ិត សំហេង បាន​ឲ្យ​ដឹង​ដែរ​ថា​ក្រសួង​ក៏​បាន​ចាត់​តាំង​ឱ្យ​មន្ត្រី​អធិការកិច្ច​ឃ្លាំ​មើល​ការ​អនុវត្ត​របស់​ទីភ្នាក់ងារ​ជ្រើសរើស​ពលករ​ឯកជន​ជាប់​​ជា​ប្រចាំ​ដើម្បី​ការពារ​ពលករ​ដែល​ត្រូវ​គេ​បោក​បញ្ឆោត​តែ​ភាព​​អសកម្ម​នៅ​តែ​បន្ត​កើត​មាន​ក្នុង​ដំណើរការ​នេះ​។ ​«អំពើ​អសកម្ម​របស់​ទីភ្នាក់ងារ​ឯកជន​ដែល​បាន​ធ្វើឲ្យ​កើត​មាន​ឡើង​នូវ​ការ​កេងប្រវ័ញ្ច និង​ការ​ជួញដូរ​កម្លាំង​ពលកម្ម​ក៏​ដូចជា​ការ​ជួញដូរ​មនុស្ស​ទោះបី​ជា​ករណី​នេះ​តិចតួច​ក៏ដោយ»។ ​

លោក​ឱ្យ​ដឹង​ដែរ​ថា​ តាមរយៈ​របាយការណ៍​ក្នុង​ឆ្នាំ ២០១៦ ​ពលករ​ចំនួន​ ១៨៧ នាក់​បាន​ដាក់​ពាក្យ​ប្តឹង​ក្រុមហ៊ុន​ចំនួន ២៨ ក្នុង​នោះ​សំណុំ​រឿង ៥៤ ទាមទារ​សងការ​ខូចខាត​ដោយសារ​ក្រុមហ៊ុន មិន​អនុវត្ត​តាម​កិច្ចសន្យា​សេវា​រក​ការងារ​ឲ្យ​ធ្វើ​៕

អត្ថបទគួរចាប់អារម្មណ៍