.jpg)
លោក កែន សត្ថា អភិបាលខេត្តកែបដែលផុតអាណត្តិ។ ហុង មិនា
ភ្នំពេញៈ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃនឹងធ្វើជាអធិបតីនៅក្នុងពិធីផ្ទេរតំណែងអភិបាលខេត្តកែបនៅព្រឹកថ្ងៃសុក្រនេះពីលោក កែន សត្ថា ដែលបានផុតអាណត្តិជំនួសដោយលោក សោម ពិសិដ្ឋ អភិបាលរងខេត្តកែប ហើយលោក កែន សត្ថា ត្រូវបានព្រះមហាក្សត្រតែងតាំងតំណែងថ្មី ជារដ្ឋលេខាធិការនៃទីស្តីការគណៈរដ្ឋមន្ត្រី។
លោក អ៊ឹង វុទ្ធី នាយករដ្ឋបាលសាលាខេត្តកែបបានប្រាប់ភ្នំពេញប៉ុស្តិ៍ពីម្សិលមិញថា លោក កែន សត្ថា ត្រូវបានបញ្ចប់មុខតំណែងដោយយោងតាមលិខិតមួយច្បាប់ចុះថ្ងៃទី ២៧ ខែឧសភារបស់អគ្គនាយកដ្ឋានរដ្ឋបាលនៃក្រសួងមហាផ្ទៃ។
លោកបន្តថា ពិធីប្រកាសឲ្យចូលកាន់តំណែងអភិបាលខេត្តថ្មីនេះនឹងត្រូវធ្វើឡើងក្រោមអធិបតីភាពលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃដោយមានការចូលរួមពីថ្នាក់ដឹកនាំខេត្ត មន្ទីរ អង្គភាព និងកងកម្លាំងប្រដាប់អាវុធនៅសាលប្រជុំសាលាខេត្តកែប។ «ខ្ញុំកំពុងមមាញឹករៀបចំពិធីប្រកាសចូលកាន់តំណែងថ្មីនេះ។ ដូច្នេះខ្ញុំមិនទាន់អាចជម្រាបជូនបានបន្ថែមទៀតទេ»។
លោក កែន សត្ថា អភិបាលខេត្តកែបដែលនឹងត្រូវបញ្ចប់តួនាទីប្រាប់ភ្នំពេញប៉ុស្តិ៍ពីម្សិលមិញថា ការផ្លាស់ប្តូរនេះក៏ព្រោះតែលោកបានផុតអាណត្តិដែលមានចែងក្នុងច្បាប់ស្តីពីការគ្រប់គ្រងរាជធានី-ខេត្តដែលតម្រូវឲ្យអភិបាលខេត្ត មានសិទ្ធិកាន់មុខតំណែងអភិបាលខេត្តចំនួន ២ អាណត្តិប៉ុណ្ណោះ ហើយមួយអាណត្តិមានរយៈពេល ៤ ឆ្នាំ។
លោកបញ្ជាក់ថា៖ «ហើយដូចជាខ្ញុំអី អស់ (អាណត្តិ) ហើយដែលខ្ញុំបានចូលកាន់តំណែងតាមរយៈព្រះរាជក្រឹត្យហ្នឹងតាំងពីខែសីហា ឆ្នាំ ២០១២។ វាអត់មានអ្វីចម្លែកទេ បើកាលណាយើងអស់អាណត្តិ អភិបាលខេត្តថ្មី គេឡើង គេនឹងធ្វើការងាររបស់យើងបន្តហើយ»។
លោក សត្ថា បានលើកឡើងពីការពេញចិត្តក្នុងការបំពេញតួនាទីជាអភិបាលខេត្តកែបដែលនាំឲ្យខេត្តនេះមានការរីកចម្រើនស្ទើរគ្រប់វិស័យហើយលោករំពឹងថា អភិបាលខេត្តថ្មីនឹងបំពេញការងាររបស់ខ្លួនបានល្អបន្តទៀត។
លោក កែន សត្ថា បានរៀបរាប់ពីសមិទ្ធផលជាច្រើនដែលខេត្តសម្រេចបានក្រោមការដឹកនាំរបស់លោកដូចជា ទទួលបានហេដ្ឋារចនាសម្ព័ន្ធល្អ ពលរដ្ឋទទួលបានភ្លើងប្រើប្រាស់ជាង ៧៦ ភាគរយការបម្រើសេវាសាធារណៈជូនពលរដ្ឋបានទាន់ពេលវេលា និងការទទួលបានទឹកសាបប្រើប្រាស់ ស្ទើរទាំងគ្រប់ស្រុក ខណ្ឌ។
លោកបញ្ជាក់ថា៖ «ខេត្តកែបរបស់យើងមានការប្រែប្រួលផ្លាស់ប្តូររីកចម្រើនច្រើនអាចនិយាយបានក្នុងវិស័យសន្តិសុខសណ្តាប់ធ្នាប់ទៅកាន់ភ្ញៀវជាតិអន្តរជាតិ ជាពិសេសប្រជាពលរដ្ឋរបស់យើងឲ្យមានសេចក្តីសុខសាន្ត ដោយរស់នៅមិនមានការភ័យព្រួយ»។
តាមព្រះរាជក្រឹត្យរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី កាលពីថ្ងៃទី ២៧ ខែឧសភា ដែលត្រូវបានផ្សព្វផ្សាយជាសាធារណៈកាលពីម្សិលមិញបានសម្រេចត្រាស់បង្គាប់តែងតាំងលោក កែន សត្ថា ជារដ្ឋលេខាធិការនៃទីស្តីការគណៈរដ្ឋមន្ត្រី។ តាមព្រះរាជក្រឹត្យដដែលការសម្រេចនេះយោងតាមសំណើទូលថ្វាយពីលោកនាយករដ្ឋមន្ត្រី ហ៊ុន សែន។
ជាមួយគ្នានេះយោងតាមលិខិតដែលចុះហត្ថលេខាដោយលោក ស ខេង កាលពីថ្ងៃទី ២៥ ខែឧសភា ក៏បានសម្រេចផ្ទេរភារកិច្ច និងតែងតាំងមុខតំណែងលោក សម្បត្តិ សុធារដ្ឋ ពីស្នងការរងទទួលផែនអត្តសញ្ញាណកម្មនៃស្នងការដ្ឋាននគរបាលខេត្តកំពតទៅជាស្នងការនៃស្នងការដ្ឋាននគរបាលខេត្តកែបជំនួសលោក បែន តារា ដែលត្រូវបានតែងតាំងជាអនុប្រធាននាយកដ្ឋានកណ្តាល នគរបាលព្រំដែនផងដែរ៕
