.jpg)
លោក ស ខេង រដ្ឋមន្ត្រីក្រសួងមហាផ្ទៃ និងអនុប្រធានគណបក្សប្រជាជន គោរពដល់អ្នកចូលរួមក្នុងវេទិកាកន្លងមក។ ហេង ជីវ័ន
ភ្នំពេញៈ លោក ស ខេង រដ្ឋមន្ដ្រីក្រសួងមហាផ្ទៃ និងជាអនុប្រធាន គណបក្សប្រជាជនកម្ពុជាបានថ្លែងដោយបង្គាប់ឲ្យមន្ត្រីនៅក្នុងបក្សកាន់រដ្ឋាភិបាលខិតខំធ្វើអំពើល្អ តាមរយៈការពារសិទ្ធិ និងផលប្រយោជន៍របស់ប្រជាជនដើម្បីទទួលបានការគាំទ្រ។
ក្នុងពិធីសម្ពោធដាក់ឲ្យប្រើប្រាស់អគារស្នាក់ការ សាលប្រជុំ និងសមិទ្ធផលនានារបស់គណបក្សប្រជាជនកម្ពុជានៅស្រុកព្រះស្តេច ខេត្តព្រៃវែងនាថ្ងៃទី ៨ ខែមករា ឆ្នាំ ២០២០ លោក ស ខេង បានថ្លែងថាក្រោយឆ្នាំ ១៩៧៩ មកទល់ពេលបច្ចុប្បន្ននេះគណបក្សប្រជាជននៅបន្ដរក្សាឧត្តមគតិរបស់ខ្លួនជាពិសេសមន្ដ្រីតែងតែរួមសុខរួមទុក្ខជាមួយពលរដ្ឋជាប់ជាប្រចាំនៅតាមមូលដ្ឋាន។
លោកបានបន្តថា គណបក្សប្រជាជនតែងគិតគូរ សុខទុក្ខរបស់ប្រជាពលរដ្ឋដោយបានកសាងប្រព័ន្ធធារាសាស្ត្រទឹកសម្រាប់ប្រជាពលរដ្ឋ បង្កបង្កើនផល ផ្លូវដើរ សាលារៀន អគ្គិសនី មន្ទីរពេទ្យ តាមរយៈការដាក់ចេញនូវគោលនយោបាយ គោលការណ៍ផ្សេងៗឲ្យវាស្របស្ថានភាព ជាក់ស្តែងផង តាមរយៈមន្ត្រីរបស់ខ្លួន មន្ត្រីថ្នាក់ជាតិចុះជួបប្រជាជនជាប្រចាំ។
លោកបានបញ្ជាក់ថា៖ «ខ្ញុំចង់បញ្ជាក់ថា យើងគណបក្សប្រជាជនកម្ពុជាមិនបានភ្លេចពីកំណើតទេ មិនភ្លេចពីឧត្តមគតិរបស់ខ្លួនទេគឺជានិច្ចកាលឈរនៅជាមួយប្រជាជន ស្លាប់រស់នៅជាមួយប្រជាជន ហើយមិនរត់ចោលប្រជាជន នេះជាការពិតជាក់ស្ដែងមិនមែនយើងចេះតែថា ចេះតែនិយាយទេ គឺយើងបានធ្វើ និងកំពុងធ្វើ ហើយយើងនឹងធ្វើតទៅមុខទៀត»។
លោកបានបន្ដថា៖ «គណបក្សប្រជានកម្ពុជាយើងជាគណបក្សប្រកាន់ខ្ជាប់នូវឧត្តមគតិរបស់ខ្លួនតាំងពីដើមរៀងរហូតមកដល់បច្ចុប្បន្ននេះ។ ឧត្តមគតិរបស់ខ្លួនចង់និយាយថា ការតស៊ូរបស់ខ្លួនគឺដើម្បីជាតិ ដើម្បីប្រជាជន និងប្រជាពលរដ្ឋ ដើម្បីសុខសន្ដិភាព ស្ថិរភាព និងការអភិវឌ្ឍប្រទេសជាតិ»។
លោកក៏បានឲ្យដឹងបន្ថែមថា នៅរបបប្រល័យពូជសាសន៍ ប៉ុលពត ក្រោមការដឹកនាំរបស់គណបក្សកុម្មុយនីស្តកម្ពុជាដែលមានពួកប៉ុលពតជាមេខ្លោង បានធ្វើបាបពលរដ្ឋយ៉ាងច្រើនហើយនៅពេលដែលពួកគេត្រូវការពលរដ្ឋ ពួកគេដើរកៀរគរ និងនិយាយលួងលោមពលរដ្ឋ ដើម្បីមកគាំទ្រខ្លួនដល់ពេលខ្លួនឡើងកាន់អំណាចបានសម្លាប់ពលរដ្ឋដោយគ្មានហេតុផល។ ដូច្នេះនិយាយបានថាពួកគេ «ក្បត់ឆន្ទៈ និងក្បត់ឧត្តមគតិខ្លួនឯង»។
លោកក៏បានបញ្ជាឲ្យមន្ត្រីគណបក្សខិតខំធ្វើអំពើល្អតាមរយៈការពារសិទ្ធិ និងការពារផលប្រយោជន៍របស់ប្រជាជនដើម្បីទទួលបានការគាំទ្រ និងត្រូវខិតខំថែរក្សា ពង្រឹង និងពង្រីកសមាជិករបស់ខ្លួនបន្ថែមទៀត។
លោកបានថ្លែងថា៖ «សំខាន់គេស្វែងរកអ្នកគាំទ្រឲ្យបានច្រើន ដើម្បីស្វែងរកអ្នកគាំទ្រឲ្យបានច្រើន តើយើងត្រូវធ្វើម៉េច គឺ យើងត្រូវធ្វើអំពើល្អមិនគំរាមកំហែង មិនបោកប្រាស់ គាបសង្កត់មិនរំលោភអំណាចទៅលើប្រជាជន បញ្ហាដីធ្លី បញ្ហាផ្សេងៗទៀតជាដើម ហើយយើងត្រូវបម្រើគាត់ ទោះបីជាគាត់មិនមែនជាសមាជិក»។
លោកបានអះអាងថា ការធ្វើអំពើល្អតាមរយៈការពារសិទិ្ធ និងការពារផលប្រយោជន៍ឲ្យប្រជាជនហ្នឹងដែលជួយគណបក្សទទួលសំឡេងគាំទ្រច្រើនដែលឈានទៅដល់ការទទួលបានជោគជ័យក្នុងការបោះឆ្នោត ហើយអះអាងថា ការទទួលជោគជ័យក្នុងការបោះឆ្នោតមិនស្ថិតនៅលើបរិមាណសមាជិកនោះទេតែវាអាស្រ័យទៅលើគុណភាពអ្នកគាំទ្រពិតប្រាកដ។
លោកថ្លែងថា៖ «ឥឡូវយើងមើលជាក់ស្តែងនៅក្នុងស្រុក ព្រះស្តេចយើងមានចំនួនសមាជិកបក្សប៉ុន្មាន?...ខ្ញុំថាយ៉ាងហោចណាស់ក៏ ៣០ ០០០ ដែរ ប៉ុន្តែនៅពេលបោះឲ្យយើង តើគាត់បោះឲ្យយើងបានប៉ុន្មាន? ប្រហែល ២០ ០០០ មិនដល់ផង ខ្ញុំឧទាហរណ៍ទេ ខ្ញុំសុំទោសចុះយើងសួរថា ១០ ០០០ ឬ ១០ ០០០ ជាងនាក់ទៀតទៅទីណា? នេះវាបញ្ជាក់ឲ្យឃើញគុណភាពនៃសមាជិកយើង។ ពិតមែនគាត់ សមាជិកយើងមែន តែយើងបម្រើគាត់ មិនល្អ គាត់ថ្នាំងថ្នាក់ជាមួយយើង។ ដល់ពេលបោះឆ្នោត បោះសម្ងាត់ គាត់ថាទេខ្ញុំមិនបោះឲ្យទេទោះបីជាបក្សខ្ញុំតែធ្វើផ្តេសផ្តាស់ចំពោះខ្ញុំ ខ្ញុំមិនបោះឲ្យទេអាហ្នឹងវាមួយជ្រុង ហើយជ្រុងមួយទៀត ដោយសារតែយើងចេះតែបូកលេខវាកើន អ៊ីចឹងទៅមិនមែនតែស្រុកព្រះស្តេចមួយទេ ស្រុក និងខេត្តមួយចំនួនផ្សេងទៀតក៏អ៊ីចឹងដែរ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាបានយល់ស្របថា ការធ្វើអំពើល្អ និងការពារផលប្រយោជន៍ប្រជាជនតែថាកន្លងទៅក៏មានមន្ត្រីគណបក្សប្រជាជនមួយចំនួនបានធ្វើឲ្យប៉ះពាល់ដល់សិទ្ធិ និងផលប្រយោជន៍របស់ប្រជាជនដែលបានធ្វើឲ្យគណបក្សប្រជាជនបាត់បង់អ្នកគាំទ្រមួយចំនួន។
លោកបានបញ្ជាក់ថា៖ «ចាប់ពីពេលនេះតទៅគណបក្សប្រជាជននឹងមានផែនការគឺសមាជិកម្នាក់ស្មើនឹងសន្លឹកឆ្នោតមួយសន្លឹកដែលត្រូវចម្រាញ់ យកគុណភាពសមាជិកបក្ស។ យើងត្រូវធ្វើឲ្យប្រាកដក្នុងចិត្តអ្នកហ្នឹង គឺស្មោះស្ម័គ្រនឹងបក្សពិតប្រាកដទើបបញ្ចូលទៅជាសមាជិកគណបក្ស»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថា គណបក្សប្រជាជនមិនបានស្លាប់រស់ជាមួយពលរដ្ឋនោះទេ នាពេលកន្លងទៅការនេះហើយដែលធ្វើឲ្យប្រជាពលរដ្ឋងាកមកគាំទ្រគណបក្សប្រឆាំង ហើយការនេះប្រសិនបើគណបក្សប្រជាជនមិនបញ្ឈប់ការធ្វើបាប និងគាបសង្កត់ប្រជាជននោះទេគណបក្សប្រជាជននឹងមានការលំបាកក្នុងការទទួលជោគជ័យការបោះឆ្នោត។
លោកបានបញ្ជាក់ថា៖ «កន្លងមកយើងឃើញប្រជាពលរដ្ឋបានស្រែកយំដោយសារតែមន្ត្រីគណបក្សកាន់អំណាចពាក់ព័ន្ធនឹងរឿងដីធ្លីរឿងផ្ទះសំបែង រឿងអយុត្តិធម៌នៅក្នុងសង្គម និងបានធ្វើឲ្យប៉ះពាល់ដល់ផលប្រយោជន៍ប្រជាពលរដ្ឋ»៕
