ភ្នំពេញៈ មន្ត្រីជាន់ខ្ពស់រាជរដ្ឋាភិបាល និងដៃគូអភិវឌ្ឍន៍នៅក្នុងអង្គការសង្គមស៊ីវិលប្រមាណជា ៥០០ នាក់ បានជួបប្រជុំគ្នាកាលពីម្សិលមិញនៅសាលប្រជុំក្រសួងមហាផ្ទៃដើម្បីជំរុញការធ្វើសកម្មភាពស្របតាមច្បាប់ដោយសេរី គ្មានការគំរាមកំហែង និងមិនលម្អៀងក្នុងការពង្រឹងលទ្ធិប្រជាធិបតេយ្យ នីតិរដ្ឋ និងលម្ហនយោបាយនៅកម្ពុជា។
លោក ស ខេង រដ្ឋមន្ត្រីក្រសួងមហាផ្ទៃបានថ្លែងសុន្ទរកថានៅក្នុងពិធីបើកវេទិកាស្ដីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិលថា៖ «អង្គការសង្គមស៊ីវិលទាំងក្នុងស្រុក និងបរទេសបានដើរតួនាទីយ៉ាងសំខាន់ក្នុងការផ្ដល់ និងគាំទ្រដល់សេវាសង្គមនៅតាមមូលដ្ឋានជនបទ និងសហគមន៍ដាច់ស្រយាល និងធ្វើសកម្មភាពនៅគ្រប់រាជធានី ខេត្តទូទាំងប្រទេសក្នុងវិស័យសំខាន់ៗដែលពាក់ព័ន្ធនឹងសេដ្ឋកិច្ច សង្គម នៅក្នុងប្រទេស»។
លោក រដ្ឋមន្ត្រី បានថ្លែងថា៖ «អង្គការសង្គមស៊ីវិលក៏បានចូលរួមផងដែរក្នុងការតស៊ូមតិទាមទារឲ្យមានកំណែទម្រង់រដ្ឋ ដើម្បីលើកកម្ពស់សុខភាព ការអប់រំ អភិបាលកិច្ច សិទ្ធិមនុស្ស ប្រព័ន្ធយុត្តិធម៌ ធនធានធម្មជាតិ បរិស្ថាន និងសេវាសង្គម។ល។»។
លោក ស ខេង ក៏បានអះអាងថាក្នុងឆមាសទី ១ ឆ្នាំ ២០១៩ ក្រសួងមហាផ្ទៃបានពិនិត្យឃើញថាសមាគម និងអង្គការមិនមែនរដ្ឋាភិបាលរួមទាំងសហគមន៍នានានៅមូលដ្ឋានមានសិទ្ធិសេរីភាពពេញលេញក្នុងការធ្វើសកម្មភាពស្របតាមច្បាប់ជាធរមានដោយមិនតម្រូវឲ្យជូនដំណឹងជាមុនក្នុងរយៈពេលយ៉ាងតិច ៣ ថ្ងៃទៅអាជ្ញាធរមូលដ្ឋានទៀតឡើយ ព្រោះអាជ្ញាធរមូលដ្ឋានហាក់មានការយល់ដឹងច្រើន និងផ្ដល់កិច្ចសហការកាន់តែប្រសើរ។
ទន្ទឹមនឹងនេះដែរលោករដ្ឋមន្ត្រីក្រសួងមហាផ្ទៃក៏បានច្រានចោលទាំងស្រុង ចំពោះរបាយការណ៍របស់អង្គការក្នុងស្រុកមួយដែលបានលើកឡើងថា ៦ ខែ ឆ្នាំ ២០១៩ អាជ្ញាធរបានរឹតត្បិត និងរារាំងសកម្មភាពអង្គការសង្គមស៊ីវិលរហូតដល់ ៧១ ករណីដោយលោកបានអះអាងថាក្នុងអំឡុងឆមាសទី ១ ឆ្នាំ ២០១៩ នេះក្រសួងមហាផ្ទៃតាមរយៈយន្តការក្រុមការងារអន្តរក្រសួងបានទទួលរបាយការណ៍តែប្រមាណចំនួន ០៥ ឬ ០៦ ករណីតែប៉ុណ្ណោះដែលពាក់ព័ន្ធនឹងការរារាំងសកម្មភាពរបស់សមាគម អង្គការមិនមែនរដ្ឋាភិបាល និងសហគមន៍នៅតាមមូលដ្ឋាន។
លោក ស ខេង ថ្លែងថា៖ «ពាក់ព័ន្ធនឹងចំណុចនេះ ខ្ញុំហាក់ពុំយល់ទាល់តែសោះថា ហេតុអ្វីបានជាអង្គការសង្គមស៊ីវិលទាំងនោះមិនរាយការណ៍ ឬស្នើសុំកិច្ចសហការពីក្រុមការងារអន្តរក្រសួង ឬរដ្ឋបាលរាជធានី ខេត្ត ដើម្បីជួយសម្របសម្រួលដោះស្រាយបញ្ហាដែលបានកើតឡើង។ តើករណីបែបនេះបង្ហាញពីភាពជាដៃគូមាន លក្ខណៈស្មោះត្រង់ និងពិតប្រាកដដែរឬទេ?»។
យោងតាមសុន្ទរកថារបស់លោក ស ខេង បានថ្លែងថារហូតមកដល់ខែ សីហា ឆ្នាំ ២០១៩ នេះមានសមាគម និងអង្គការមិនមែនរដ្ឋាភិបាលក្នុងស្រុកដែលបានតម្កល់សំណុំឯកសារ និងចុះបញ្ជីចំនួនសរុប ៥ ៤៨៣ ក្នុងនោះសមាគម ចំនួន ២ ២០៣ និងអង្គការមិនមែនរដ្ឋាភិបាលចំនួន ៣ ២៨០ និងមានសមាគម និងអង្គការមិនមែនរដ្ឋាភិបាលចំនួន ៨១ ត្រូវបានលុបឈ្មោះចេញពីបញ្ជីនៅក្រសួងមហាផ្ទៃតាមសំណើរបស់សាមី សមាគម និងអង្គការមិនមែន រដ្ឋាភិបាល។
លោក ស ខេង ថ្លែងថា៖ «ចំនួននៃការបង្កើតសមាគម និងអង្គការមិនមែនរដ្ឋាភិបាលក្នុងស្រុកថ្មីប្រចាំខែ មិនមានការថយចុះដូចការព្រួយបារម្ភរបស់មជ្ឈដ្ឋានមួយចំនួនដែលជាញឹកញាប់ តែងតែចោទប្រកាន់មកលើ រាជរដ្ឋាភិបាលកម្ពុជាពីការរឹតត្បិតសិទ្ធិសេរីភាពក្នុងការបង្កើតសមាគម និងអង្គការមិនមែនរដ្ឋាភិបាលរួមទាំងសិទ្ធិសេរីភាពនៃការបញ្ចេញមតិនោះឡើយ»។
លោករដ្ឋមន្ត្រីក៏បានស្នើដល់ដៃគូអភិវឌ្ឍន៍អង្គការសង្គមស៊ីវិលបន្តការគាំទ្រ និងចូលរួមជាមួយរាជរដ្ឋាភិបាលកម្ពុជាក្នុងការលើកកម្ពស់ លទ្ធិប្រជាធិបតេយ្យ សេរីពហុបក្ស ពង្រឹងសុខសន្តិភាព ស្ថិរភាពសង្គម និងការអភិវឌ្ឍ សេដ្ឋកិច្ចជាតិឲ្យកាន់តែរីកចម្រើន និងរុងរឿង។
លោក ស ខេង ក៏បានបញ្ជាឲ្យអាជ្ញាធរមូលដ្ឋានត្រូវបន្តសម្របសម្រួល និងបង្កលក្ខណៈងាយស្រួលដល់អង្គការសង្គមស៊ីវិលដែលបានចុះបញ្ជីត្រឹមត្រូវនៅក្រសួងមហាផ្ទៃ ព្រមទាំងសមាគម និងអង្គការមិនមែនរដ្ឋាភិបាលបរទេស ដែលបានចុះអនុស្សរណៈនៅក្រសួងការបរទេសក្នុងការធ្វើសកម្មភាពដោយសេរី គ្មានការគំរាមកំហែង និងមិនលម្អៀងស្របតាមច្បាប់ស្តីពីសមាគម និងអង្គការមិនមែនរដ្ឋាភិបាល ច្បាប់ និងលិខិតបទដ្ឋានគតិយុត្តនានាជាធរមាន។
លោក ថេង សាវឿន អគ្គលេខាធិការសម្ព័ន្ធសហគមន៍កសិករកម្ពុជាដែលបានចូលរួមក្នុងពិធីបើកវេទិកានោះដែរបានថ្លែងនៅក្រៅវេទិកាដោយស្វាគមន៍នូវបទបញ្ជារបស់លោករដ្ឋមន្ត្រីដែលណែនាំឲ្យមន្ត្រីមូលដ្ឋានបន្ត បង្កលក្ខណៈងាយស្រួលដល់អង្គការសង្គមស៊ីវិលនឹងជួយបង្កើនកិច្ចសហប្រតិបត្តិការរវាងអង្គការសង្គមស៊ីវិលជាមួយនឹងអាជ្ញាធរមូលដ្ឋាន និងជួយបង្កើនប្រសិទ្ធភាពការងារក្នុងការងារក្នុងការដោះស្រាយបញ្ហាផ្សេងៗដល់ប្រជាជននៅមូលដ្ឋាន។
លោក សារឿន បន្តថា៖ «ការយល់ដឹងរបស់អាជ្ញាធរមូលដ្ឋាននៅមានកម្រិតទៅលើអនុសាសន៍របស់សម្តេចក្រឡាហោម យើងសង្ឃឹមថាបន្ទាប់ពីការណែនាំនេះអាជ្ញាធរមូលដ្ឋាននឹងយល់ដឹងបានច្រើនដោយកន្លងមកមានមន្ត្រីខ្លះបានអនុវត្តផ្ទុយទៅនឹងសេចក្តីប្រកាសរបស់ក្រសួង។ យើងទទួលស្គាល់ថា មានភាពល្អប្រសើរជាងមុនតែតំបន់ខ្លះនៅតែមានការរឹតត្បិតនៅឡើយ ដោយសារតែការយល់ដឹងរបស់សមត្ថកិច្ចនៅមានកម្រិត»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកដែលចូលរួមក្នុងវេទិកានោះដែរ បានថ្លែងថាការលើកឡើងរបស់លោក ស ខេង ដែលបានអះអាងថាពុំមានការរឹតត្បិតមិនបានឆ្លុះបញ្ចាំងពីការពិតទេ។
លោក សែនករុណា បានអះអាងដោយលើកឡើងថាលោកមានភ័ស្ដុតាងដែលកម្លាំងមួយចំនួនបានរឹតត្បិត និងរារាំងសកម្មភាពរបស់អង្គការមួយចំនួនរួមទាំងអង្គការមិនឲ្យធ្វើសកម្មភាពផ្សេងៗ។
លោកថ្លែងថា៖ «យើងមានការសម្រង់របាយការណ៍ច្បាស់លាស់ដែលឆ្លុះបញ្ជាំងពីការពិត តែយើងមិនដឹងថាគេ (ក្រសួងមហាផ្ទៃ) ប្រើវិធីសាស្ត្រយ៉ាងណាដើម្បីធ្វើការប្រមូលទិន្ន័យសម្រាប់ក្រសួងនោះទេ»។
លោក សែនករុណា ថ្លែងថា៖ «ថ្នាក់ជាតិគួរតែមានវិធានការលើអាជ្ញាធរ ឬមន្ត្រីសមត្ថកិច្ចរូបណាដែលប្រព្រឹត្តផ្ទុយពីសេចក្តីណែនាំរបស់មហាផ្ទៃ ដើម្បីឲ្យអ្នកទាំងអស់នោះបញ្ឈប់អំពើរឹតត្បិត និងរាងចាល ដោយសារតែកន្លងមកមានអាជ្ញាធរមូលដ្ឋានមួយចំនួនបានរំលោភទៅលើសេចក្តីណែនាំ និងបទបញ្ជារបស់រដ្ឋមន្ត្រី»៕