កំពង់ឆ្នាំង: ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃលោក ស ខេង បានចេញបញ្ជាឱ្យលោក ឈួរ ច័ន្ទឌឿន អភិបាលខេត្តកំពង់ឆ្នាំង អនុវត្តវិធានការចុះរុះរើរបង ខ្ទម និងរោងដែលសង់ទន្ទ្រាន និងកាន់កាប់ដីរដ្ឋជិត ២ ពាន់ហិកតាដោយខុសច្បាប់នៅក្នុងដែនជម្រកសត្វព្រៃភ្នំឱរ៉ាល់ប៉ែកខាងស្រុកទឹកផុស ដើម្បីដកហូតដីទុកជាសម្បត្តិរដ្ឋវិញ។
តាមលិខិត ១ ច្បាប់ ជម្រាបជូនលោក ឈួរ ច័ន្ទឌឿន ចុះថ្ងៃទី ១២ ខែតុលា ដែល ភ្នំពេញ ប៉ុស្ដិ៍ ទទួលបានពីម្សិលមិញ ក្រសួងមហាផ្ទៃបានបង្ហាញការគាំទ្រ ចំពោះចំណាត់ការរបស់រដ្ឋបាលខេត្តក្នុងការចាត់វិធានការបញ្ឈប់សកម្មភាពជនល្មើសដែលបានរុករានទន្ទ្រានកាន់កាប់ដីដោយខុសច្បាប់ស្ថិតនៅក្នុងដែនជម្រកសត្វព្រៃភ្នំឱរ៉ាល់។
លិខិតបន្តថា ទន្ទឹមនេះក្រសួងមហាផ្ទៃសូមធ្វើការណែនាំដល់រដ្ឋបាលខេត្តកំពង់ឆ្នាំងត្រូវបន្តស្រាវជ្រាវ និងចាត់វិធានការច្បាប់ចំពោះមេខ្លោងដែលបានញុះញង់ឱ្យប្រជាពលរដ្ឋចូលកាប់រានទន្ទ្រានដីព្រៃ និងកាន់កាប់ដីដោយខុសច្បាប់នៅក្នុងដែនជម្រកសត្វព្រៃភ្នំឱរ៉ាល់។ ត្រូវបន្តយកចិត្តទុកដាក់ក្នុងការបង្ការ បង្ក្រាប និងទប់ស្កាត់ការកាប់រានទន្ទ្រានដីព្រៃយកធ្វើជាកម្មសិទ្ធិក្នុងដែនសមត្ថកិច្ចរបស់ខ្លួន ស្របតាមលិខិតលេខ ១៩-៦៣ សជណ ចុះថ្ងៃទី ៨ ខែកក្កដា ឆ្នាំ ២០២០ របស់ក្រសួងមហាផ្ទៃស្ដីពីការជំរុញការទប់ស្កាត់ការកាប់រានទន្ទ្រានយកដីដោយខុសច្បាប់នៅក្នុងតំបន់ការពារធម្មជាតិ។
លើសពីនេះអាជ្ញាធរខេត្តត្រូវបន្តសហការជាមួយក្រសួងស្ថាប័ន និងអង្គភាពពាក់ព័ន្ធក្នុងការបង្ការបង្ក្រាប និងទប់ស្កាត់ការកាប់រានទន្ទ្រានដីព្រៃឱ្យបានល្អប្រសើរ និងធ្វើសេចក្តីរាយការណ៍អំពីវឌ្ឍនភាពការងារមកក្រសួងមហាផ្ទៃ និងក្រសួងស្ថាប័នជំនាញពាក់ព័ន្ធ ដើម្បីពិនិត្យ និងមានវិធានការបង្ក្រាបទប់ស្កាត់ទាន់ពេលវេលា និងមានប្រសិទ្ធភាព។
លោក ឈួរ ច័ន្ទឌឿន ថ្លែងពីម្សិលមិញថា រដ្ឋបាលខេត្តកំពង់ឆ្នាំងបានចាត់វិធានការអនុវត្តតាមអនុសាសន៍របស់ក្រសួងមហាផ្ទៃរួចរាល់ហើយ ដោយបានដកហូតដីព្រៃនៃដែនជម្រកសត្វព្រៃភ្នំឱរ៉ាល់ជិត ២ ពាន់ហិកតាទុកជាសម្បតិ្តរដ្ឋវិញ។ អាជ្ញាធរបាននិងកំពុងយកកូនឈើប្រណីតមួយចំនួនទៅដាំលើដីដែលក្រុមជនខិលខូចកាប់ទន្ទ្រាននោះ។
លោកបន្តថា សមត្ថកិច្ចកំពុងធ្វើការស៊ើបអង្កេត ស្រាវជ្រាវរកជនខិលខូចដែលបាននាំគ្នាទៅឈូសឆាយ កាប់ទន្ទ្រានព្រៃឈើយកដីនៅក្នុងតំបន់នោះ ដោយមានសំណុំរឿងខ្លះត្រូវបានកំណត់អត្តសញ្ញាណជនខិលខូចរួចហើយ ប៉ុន្ដែលោកមិនទាន់អាចបង្ហាញអត្តសញ្ញាណពេលនេះបានទេ ដើម្បីឈានទៅតាមចាប់ខ្លួនមកផ្តន្ទាទោសតាមច្បាប់។
លោកបញ្ជាក់ថា៖ «ខ្ញុំសុំលាក់អត្តសញ្ញាណសិន ដើម្បីយើងធ្វើកុំឱ្យជនខិលខូចដឹងខ្លួនរត់គេច អ៊ីចឹងខ្ញុំសុំលាក់។ យើងនឹងកសាងសំណុំរឿងបញ្ជូនទៅតុលាការខេត្តកំពង់ឆ្នាំង ហើយតុលាការគេចាត់ចំណាត់ការមកសមត្ថកិច្ច ទើបសមត្ថកិច្ចយើងនឹងអនុវត្តតាមដីកាទៅនាំខ្លួនពួកគេតាមដីកាមកផ្ដន្ទាទោសតាមច្បាប់»។
បើតាមលោក ច័ន្ទឌឿន ទំហំដីជិត ២ ពាន់ហិកតានេះ ត្រូវបានជនខិលខូចឆ្លៀតឱកាសនាំគ្នាយកត្រាក់ទ័រ រណារយន្ត គោយន្តធ្វើការកាប់រានឈូសឆាយរំលោភយកដីព្រៃដែនជម្រកសត្វព្រៃភ្នំឱរ៉ាល់ ខណៈដែលអាជ្ញាធរកំពុងរវល់ទប់ស្កាត់ការរាតត្បាតជំងឺកូវីដ ១៩។ បន្ទាប់ពីឈូសឆាយ ពួកគេបានយកដើមចេក និងដើមឈើហូបផ្លែមួយចំនួនទៅដាំលើដីនោះ ដោយមានបោះបង្គោលកំណត់ព្រំដី សង់រោង ខ្ទម ដើម្បីធ្វើជាកម្មសិទ្ធិ។
លោក សំ ចាន់គា មន្ត្រីសម្របសម្រួលសមាគមអាដហុកប្រចាំខេត្តកំពង់ឆ្នាំង និងពោធិ៍សាត់បានគាំទ្រចំពោះចំណាត់ការរបស់អាជ្ញាធរ និងរាជរដ្ឋាភិបាល ប៉ុន្ដែលោកជំរុញឱ្យចាត់វិធានការមានតម្លាភាពដោយសារកន្លងមកធ្លាប់មានការដកហូតដីទាំងអយុត្តិធម៌។ ការដកហូតដីទាំងអយុត្តិធម៌នេះធ្វើឱ្យមានការរិះគន់ទៅលើចំណាត់ការរបស់អាជ្ញាធរ។
លោកបញ្ជាក់ថា៖ «កន្លងមក យើងឃើញមានការដកហូតនេះ ខ្វះតម្លាភាពណាស់ គឺកន្លែងដីដែលអ្នកធំ អ្នកមានអំណាចកាន់កាប់ គឺមិនត្រូវបានដកហូត ឬចាត់វិធានការតាមច្បាប់ទេ ប៉ុន្ដែកន្លែងដីដែលមានពលរដ្ឋក្រីក្រតាំងទីលំនៅ បែរជាមានអាជ្ញាធរចុះទៅបង្ក្រាប ឬបណ្ដេញចេញពីដីនោះ។ អ៊ីចឹងក្នុងនាមយើងជាសង្គមស៊ីវិល ប្រសិនមានករណីខុសច្បាប់ ត្រូវតែចាត់វិធានការដូចៗគ្នា និយាយរួមគឺយើងចង់ឱ្យមានតម្លាភាព»។
ប៉ុន្តែលោក ឈួរ ច័ន្ទឌឿន លើកឡើងថា អាជ្ញាធរមិនមានការលើកលែង ចំពោះជនខិលខូចរំលោភយកដីព្រៃ ឬដីរបស់រដ្ឋដោយខុសច្បាប់នោះទេ។ អាជ្ញាធរបានអនុវត្តច្បាប់យ៉ាងតឹងរ៉ឹង ចំពោះបុគ្គលល្មើសច្បាប់ទាំងអស់ បើទោះបីជាបុគ្គលនោះជាអ្នកមានអំណាច ឬពលរដ្ឋសាមញ្ញក៏ដោយ៕