ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃ បានបញ្ជាឲ្យសមត្ថកិច្ចជំនាញធ្វើការបង្កកទ្រព្យសម្បត្តិរបស់ឧក្រិដ្ឋជនដែលសង្ស័យថា ជាប់ពាក់ព័ន្ធនឹងការជួញដូរមនុស្ស និងការកាប់ឈើខុសច្បាប់។
នៅក្នុងវេទិកាជាតិ អន្តរសាសនានៅកម្ពុជាលើកទី៣ ដើម្បីប្រយុទ្ធប្រឆាំងអំពើជួញដូរមនុស្ស នៅមជ្ឈមណ្ឌលសន្និបាត និងពិព័រណ៍កោះពេជ្រកាលពីថ្ងៃពុធ ដែលមានការចូលរួមពីមន្ត្រីប្រយុទ្ធប្រឆាំងអំពើជួញដូរមនុស្ស ក្រសួងធម្មការ និងសាសនា និងអង្គការការីតាសកម្ពុជា ថ្នាក់ដឹកនាំ សាសនារួមមាន ព្រះពុទ្ធសាសនា អ៊ិស្លាមសាសនា កាតូលិក និងគ្រិស្តបរិស័ទ និងអង្គការមិនមែនរដ្ឋាភិបាលដែលធ្វើការងារប្រយុទ្ធប្រឆាំងអំពើជួញដូរមនុស្សនៅកម្ពុជា លោក ស ខេង ថ្លែងថា អ្នករកស៊ីជួញដូរមនុស្សមិនមែនអ្នកក្រទេ គឺអ្នកមានលុយ អ្នកមានទ្រព្យសម្បត្តិ ប៉ុន្តែលោភលន់ មិនចេះចប់មិនចេះហើយដោយប្រើមធ្យោបាយទៅបោកបញ្ឆោតអ្នកដែលគ្មានលទ្ធភាព អ្នកដែលគ្មានការចេះដឹង គ្មានការអប់រំ ឬជីវភាពខ្សត់ខ្សោយ ហើយលោកក៏បញ្ជាឲ្យសមត្ថកិច្ចធ្វើការ បង្កកទ្រព្យសម្បត្តិឧក្រិដ្ឋជនដែលបានប្រព្រឹត្តអំពើជួញដូរមនុស្ស និងការកាប់ឈើខុសច្បាប់។
លោក ស ខេង ថ្លែងថា៖ «ការជួញដូរគ្រឿងញៀនក្តី ការជួញដូរមនុស្សក្តី រកស៊ីឈើខុសច្បាប់នេះក្តី បើយើងគ្រាន់តែចាប់បានមក យកមនុស្សហ្នឹងទៅកាត់ទោស ប៉ុន្តែអាចចរាចរលុយនោះ ដែលលុយវាខ្មៅស្រាប់នោះ យើងអត់មានបង្កកទុក វាអត់មានប្រយោជន៍ទេ»។
លោក ស ខេង បានអះអាងផងដែរថាមូលហេតុបណ្តាលឱ្យមានការជួញដូរមនុស្ស ពីព្រោះជីវភាពរស់នៅរបស់ពលរដ្ឋ ដូចភាពក្រីក្រ ការលំបាក ខ្វះអាហារូបត្ថម្ភ ជីវភាពខ្សត់ខ្សោយមិនបានទទួលបានការអប់រំ នេះជាចំណុចខ្សោយមួយដែលជនខិលខូច ជនលោភលន់ ឬក៏ឧក្រិដ្ឋជនឆក់យកឱកាសនេះដើម្បីបោកបញ្ឆោត និងជួញដូរ។
យោងតាមរបាយការណ៍របស់ គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានឲ្យដឹងថានៅក្នុងរយៈពេល ៦ ខែដើមឆ្នាំ ២០១៩ នេះ សមត្ថកិច្ចបានធ្វើការបង្ក្រាបអំពើជួញដូរមនុស្ស និងអំពើជួញដូរផ្លូវភេទបានចំនួន ៧៨ ករណី គឺមានការកើនឡើង ២៥ ភាគរយ និងបានជួយសង្គ្រោះជនរងគ្រោះបានចំនួន ២៦៣ នាក់ គឺកើនឡើង ១៤៨ ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំ ២០១៨។
របាយការណ៍ដដែលនេះបានឲ្យដឹងថា តុលាការរាជធានី-ខេត្ត បានធ្វើចំណាត់ការរឿងក្ដីបានផ្ដន្ទាទោសដាក់ពន្ធនាគារក្នុងឃុំ ១០១ នាក់ នៅក្រៅឃុំ ២៥ នាក់ និងកំពុងចាត់ការមានចំនួន ៦៣ ករណី។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានឲ្យដឹងថា អំពើជួញដូរមនុស្ស ដែលបានថែ្លងក្នុងវេទិកាជាតិនេះដែរថា អំពើជួញដូរមនុស្សមិនត្រឹមតែប៉ះពាល់ដល់ជនដែលត្រូវបានគេជួញដូរនោះទេតែក៏បានប៉ះពាល់ក្រុមគ្រួសារជនរងគ្រោះផងដែរ។
លោកស្រីថ្លែងថា៖ «នៅក្នុងព្រះរាជាណាចក្រកម្ពុជា រាជរដ្ឋាភិបាលបានប្រឹងប្រែងជម្នះគ្រប់ឧបសគ្គក្នុងការបង្ការ ទប់ស្កាត់ បង្ក្រាប សង្គ្រោះ ផ្តន្ទាទោស និងការពារជនរងគ្រោះយ៉ាងសកម្ម។ ដោយឡែកក្នុងរយៈពេល ៦ ខែដើមឆ្នាំនេះ ការអប់រំផ្សព្វផ្សាយ និងសកម្មភាពបង្ការទប់ស្កាត់ ត្រូវបានយកចិត្តទុកដាក់ និងធ្វើឡើងតាមគ្រប់រូបភាពទាំងកិច្ចការពារផ្លូវច្បាប់ ការអប់រំផ្សព្វផ្សាយដោយផ្ទាល់ និងដោយប្រយោល»។
ទន្ទឹមនេះដែរលោក ស ខេង បានថ្លែងថា ក្រសួងការបរទេសសហរដ្ឋអាមេរិកនៅក្នុងឆ្នាំ ២០១៩ នេះ បានទម្លាក់ចំណាត់ថ្នាក់នៃប្រសិទ្ធភាពនៃការប្រយុទ្ធប្រឆាំងការជួញដូរមនុស្សរបស់ប្រទេស កម្ពុជា ពីកម្រិត ២ (ធម្មតា) ទៅកម្រិត ២ ស្ថិតក្រោមការឃ្លាំមើល ឬ (Tier 2 Watch list) ហើយលោកឧបនាយករដ្ឋមន្ត្រីក៏បានអំពាវនាវដល់សមត្ថកិច្ច អ្នកតំណាងសាសនាព្រះពុទ្ធ សាសនាកាតូលិក និងសាសនាអ៊ិស្លាម ធ្វើសកម្មភាពរួមគ្នាធ្វើយ៉ាងណាឲ្យចំណាត់ថ្នាក់នៃការប្រយុទ្ធប្រឆាំងការជួញដូរមនុស្សរបស់ប្រទេស កម្ពុជា ប្រសើរឡើងវិញ៕