ភ្នំពេញៈ រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃព្រហស្បតិ៍ម្សិលមិញបានបញ្ជាឲ្យអាជ្ញាធរធ្វើការស៊ើបអង្កេតការជាប់ពាក់ព័ន្ធរវាងករណីរត់ពន្ធអាវុធទៅប្រទេសថៃ កាលពីពេលថ្មីៗ និងករណីមួយកាលពីឆ្នាំមុន ដែលនេះហាក់បីដូចជាផ្ទុយនឹងការអះអាងកាលពីពេលមុនរបស់ក្រសួងការពារជាតិដែលថាអាវុធទាំងនោះមិនមានចេញពីប្រទេសកម្ពុជាទេ។
ក្នុងអំឡុងសុន្ទរកថាមួយក្នុងខេត្តក្រចេះលោក ខេង បានថ្លែងថា «នៅមានបញ្ហា» ពាក់ព័ន្ធនឹងការរត់ពន្ធអាវុធ ហើយថាករណីភាគច្រើនបំផុតកើតឡើងរវាងកម្ពុជា និងថៃ។ លោកបន្តថា៖ «ថៃបានបង្ក្រាបលើករណីនេះ និងបានចាប់ខ្លួនខ្លះ ប៉ុន្តែមិនទាន់បានចាប់ខ្លួនមេគំនិតនៅឡើយទេ»។
បន្ទាប់មកលោកថ្លែងថារបាយការណ៍មួយដែលបង្ហាញថា ករណីមួយកាលពីពាក់កណ្តាលខែមេសាដែលក្នុងនោះជនជាតិថៃម្នាក់ត្រូវបានចាប់ខ្លួននៅជិតព្រំដែនកម្ពុជាអាចនឹងពាក់ព័ន្ធនឹងករណីមួយកាលពីឆ្នាំ ២០១៧។
កាលពីខែមិថុនា និងកក្កដាឆ្នាំមុនសមាជិកមួយចំនួនរបស់ក្រុមរត់ពន្ធអាវុធ ត្រូវបានចាប់ខ្លួនទាំងនៅថៃ និងកម្ពុជា។ ក្នុងចំណោមអ្នកដែលត្រូវបានចាប់ខ្លួនទាំងនោះរួមមានអនុសេនីយទោម្នាក់នៅក្រសួងមហាផ្ទៃដែលជាសាច់ញាតិសាច់ថ្លៃលោក ទៀ បាញ់ រដ្ឋមន្ត្រីក្រសួងការពារជាតិ និងលោក ប៊ុន លើត អតីតអភិបាលខេត្តកោះកុង និងនគរបាលថៃម្នាក់ដែលមានឋានៈអនុសេនីយទោ។
លោក ស ខេង បានថ្លែងថា៖ «សូមពិនិត្យមើល និងបញ្ចប់ករណីនេះ»។ «ប្រសិនបើយើងលាក់បាំងករណីនេះ ឬមិនជីកកកាយ វានៅតែកើតឡើង»។
អ្នកនាំពាក្យក្រសួងមហាផ្ទៃលោក ខៀវ សុភ័គ បានថ្លែងថាលោកមិនមានព័ត៌មានថ្មីអំពីការស៊ើបអង្កេតនេះទេ។
អ្នកនាំពាក្យក្រសួងការពារជាតិលោក ឈុំ សុជាតិ ដែលបានថ្លែងនៅក្នុងហ្វេសប៊ុកថា អាវុធទាំងនោះមិនចេញពីប្រទេសកម្ពុជា និងបានថ្លែងថាលោកនៅតែរក្សាជំហររបស់លោក ប៉ុន្តែមិនអាចធ្វើការសន្និដ្ឋានពីមុនការបញ្ចប់ការស៊ើបអង្កេតបានទេ។ លោកថ្លែងថា៖ «យើងមិនប្រើប្រាស់អាវុធប្រភេទនេះទេ។ យើងព្យាយាមស្វែងយល់។ យើងរីករាយប្រយុទ្ធនឹងប្រភពនោះ»។
អាវុធដែលត្រូវបានរឹបអូសក្នុងអំឡុងការចាប់ខ្លួននោះរួមមានកាំភ្លើងវែងម៉ាក M-16 ចំនួន ៤ ដើម ដែលមានរួចហើយនៅក្នុងប្រទេសកម្ពុជា ហើយអាវុធ ២ ដើមទៀតគឺកាំភ្លើងវែងម៉ាក Type-95៕