ព្រះសីហនុៈ លោក ស ខេង រដ្ឋមន្ត្រីក្រសួងមហាផ្ទៃ បានប្រកាសចាត់វិធានការលើបុគ្គលពាក់ព័ន្ធនៃឧបទ្ទវហេតុរលំបាក់សំណង់អគារ ៧ ជាន់ នៅខេត្តព្រះសីហនុ យកមកទទួលខុសត្រូវតាមផ្លូវច្បាប់ ស្របពេលអាជ្ញាធរនឹងបញ្ចូនជនសង្ស័យជាជនជាតិចិន ៣ នាក់ និងខ្មែរម្នាក់ ជាអ្នកទទួលខុសត្រូវលើសំណង់អគារនេះទៅតុលាការ ខណៈសង្គមស៊ីវិល ទាមទារឲ្យមានការទទួលខុសត្រូវពីមន្ត្រីរដ្ឋាភិបាលចំពោះ ការបណ្តែតបណ្តោយឲ្យមានការសាងសង់អគារដែលបណ្តាលឲ្យរលំបាក់សង្កត់មនុស្សស្លាប់និងរបួសជាង ៤០ នាក់នេះ។
គិតមកដល់ល្ងាចម្សិលមិញ មានជនរងគ្រោះយ៉ាងហោចណាស់ ១៩ នាក់ ហើយត្រូវបានរកឃើញថា បានបាត់បង់ជីវិត និង ២៤ នាក់ទៀត បានរងរបួសធ្ងន់ស្រាល ក្នុងឧបទ្ទវហេតុ រលំបាក់សំណង់អគារ ៧ ជាន់ នៅខេត្តព្រះសីហនុបន្ទាប់ពីក្រុមអ្នកជួយសង្គ្រោះ បានបន្តការរុករកទាំងថ្ងៃ ទាំងយប់ ចាប់តាំងពីអគារនេះ បានរលំបាក់កាលពីព្រឹកព្រលឹមថ្ងៃសៅរ៍មក នៅពេលដែលកម្មករសំណង់ជាច្រើននាក់ កំពុងស្នាក់នៅបណ្តោះអាសន្នក្នុងអគារនេះ។
លោក ស ខេង បានចេញលិខិតមួយកាលពីម្សិលមិញ ដោយបានចូលរួមសោកស្តាយ និងចែករំលែកមរណទុក្ខដល់ក្រុមគ្រួសារ ដែលបានបាត់បង់ជីវិតក្នុងហេតុកការណ៍នេះ។ ជាមួយគ្នានេះ លោកក៏បានបញ្ជាក់ថា ក្រុមការងាររបស់អាជ្ញាធរមានសមត្ថកិច្ច កំពុងបន្តខិតខំយ៉ាងសស្រោកសស្រាំដោយបានប្រមូលផ្តុំកម្លាំង និងមធ្យោបាយ ដើម្បីពន្លឿនប្រតិបត្តិការស្វែងរក និងជួយសង្គ្រោះជនរងគ្រោះដែលបាត់ខ្លួន ហើយជនដែលជាប់ពាក់ព័ន្ធ នឹងមិនអាចរួចខ្លួនឡើយ។
លោកបញ្ជាក់ថា៖ «ទន្ទឹមនេះ តាមរយៈយន្តការអន្តរក្រសួង ខ្ញុំនឹងចាត់វិធានការជាក់ស្តែង ចំពោះមុខដទៃទៀត ដោយត្រូវបន្តជំរុញស្រាវជ្រាវ និងស្វែងរកឲ្យឃើញនូវដើមហេតុ ដែលនាំឲ្យកើតមានសោកនាដកម្មដ៏អាណោចអាធ័មនេះ ព្រមទាំងចាត់វិធានការលើបុគ្គលពាក់ព័ន្ធដើម្បីទទួលខុសត្រូវតាមផ្លូវច្បាប់»។
លោក ជួន ណារិន្ទ ស្នងការខេត្តព្រះសីហនុ បានឲ្យភ្នំពេញប៉ុស្តិ៍ដឹងពីម្សិលមិញថា យ៉ាងហោចណាស់ មានជនរងគ្រោះចំនួន ១៨ នាក់ ដែលត្រូវបាន រកឃើញស្លាប់ ពីគំនរអគារបាក់ និងមានចំនួន ២៤ នាក់ បានរងរបួស។
លោកបន្តថា បើគ្មានឧបសគ្គណាទេនោះ ក្រុមការងារ នឹងបន្តការរុករក ដើម្បីស្វែងរកជនរងគ្រោះទាំងយប់បន្តទៀត។ ជាមួយគ្នានេះ លោក ជួន ណារិន្ទ ក៏ឲ្យដឹងផងដែរថា ជនសង្ស័យជាជនជាតិចិន ៣ នាក់ និងខ្មែរម្នាក់ ដែលជាអ្នកទទួលខុសត្រូវ លើសំណង់អគារនេះ នឹងត្រូវបញ្ជូនទៅតុលាការ ដើម្បីចាត់ការតាមនីតិវិធី។
លោកបញ្ជាក់ថា៖ «អ្នកទាំង ៤ នាក់ហ្នឹង ខ្ញុំគ្រាន់តែឃាត់ខ្លួនបណ្តោះអាសន្ន ដើម្បីធ្វើការតាមនីតិវិធី ដោយមិនទាន់មានការចោទប្រកាន់ពីបទល្មើសណាមួយទេព្រោះទុកឲ្យស្ថាប័នតុលាការជាអ្នកចោទលើរឿងនេះ ព្រោះរឿងនេះ ត្រូវមាត្រាខ្លះ ដើម្បីធ្វើការចោទប្រកាន់ ព្រោះពួកគាត់ជាអ្នកទទួលខុសត្រូវអគារហ្នឹង»។
ទោះបីយ៉ាងណា លោកមិនបានឆ្លើយតបនោះទេ នៅពេលសួរថា តើនឹងមានមន្ត្រីកម្រិតណា នឹងជាប់ពាក់ព័ន្ធចំពោះឧបទ្ទវហេតុនេះ ដោយអះអាងថា ហួសដែនសមត្ថកិច្ចរបស់លោក ហើយអ្វីដែលអាជ្ញាធរផ្តោតការយកចិត្តទុកដាក់ខ្លាំងនៅពេលនេះ គឺការជួយសង្គ្រោះជនរងគ្រោះពីគំនរអគារ ព្រោះរហូតមកដល់រសៀលថ្ងៃអាទិត្យម្សិលមិញការជីកកកាយលើគំនរបាក់បែក ទើបតែធ្វើឡើងដល់ជាន់ទី ៥ ប៉ុណ្ណោះ។
លោកបញ្ជាក់ថា៖ «យើងកាយដល់ជាន់ទី៥ ហើយឥឡូវ កំពុងអនុវត្តដល់ជាន់ទី៤ ទៀត ព្រោះជនរងគ្រោះមានការស្នាក់នៅត្រឹមជាន់ទី៤ ចុះ ហើយជាន់ទី៤ មិនសូវមានទេ គឺមានច្រើន នៅជាន់ទី៣ ជាន់់ទី២ និងជាន់ទី១»។
ជនរងគ្រោះម្នាក់ សុំមិនបញ្ចេញឈ្មោះ បាននិយាយអំឡុងពេលសម្រាកនៅមន្ទីរពេទ្យថា ពួកគេដែលមានគ្នាប្រមាណ ៥ នាក់ កំពុងតែសម្រាកនៅក្នុងបន្ទប់មួយនៃអគារនោះ ស្រាប់តែឮសំឡេងបាក់ស្រុតតែម្តង។ យ៉ាងណាជនរងគ្រោះរូបនោះ បានបញ្ជាក់ថា ពួកគេនៅក្នុងបន្ទប់ បានរួចខ្លួនពីការបាក់រលំទាំងអស់ ខណៈមានមនុស្សជាច្រើនកំពុងសម្រាកក្នុងអគារនេះ។
បុរសវ័យជាង ២០ ឆ្នាំរូបនេះ បានរៀបរាប់តាមខ្សែរវីដេអូដែលភ្នំពេញប៉ុស្តិ៍ទទួលបានថា៖ «ខ្ញុំស្មានតែពិតានបាក់ធ្លាក់ពីលើមក ដល់តែពេលខ្ញុំងើបទៅ ក៏វារលំមកតែម្តង វាស្រុតចូលគ្នាតែម្តង ហើយខ្ញុំរួចចេញមកបាន ព្រោះតែវាមានចន្លោះដែក ២ ទល់គ្នា ជាមួយធ្នីម នឹងប្លង់សេ ហើយវាមានប្រហោងអាចចេញ រួច ពួកខ្ញុំលូនចេញតាមហ្នឹងមក។ បានដឹងថា វាស្រុតបាក់មក»។
បើតាមមន្ត្រីមន្ទីរពេទ្យខេត្តព្រះសីហនុម្នាក់ ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ពីម្សិលមិញថា បន្ទាប់ពីក្រុមប្រតិបត្តិការ បានជួយសង្គ្រោះ និងបានដឹកសាកសពជនរងគ្រោះបញ្ជូនមកតម្កល់ទុកនៅ មន្ទីរពេទ្យខេត្ត គឺនៅរសៀល ថ្ងៃអាទិត្យ គ្រួសារសពជនរងគ្រោះទាំង ១៨ នាក់ បានមកទទួលយកសាកសពទៅធ្វើបុណ្យតាមប្រពៃណីអស់ហើយ។
លោកបញ្ជាក់ថា៖ «ខ្ញុំចង់ជម្រាបថា រហូតមកដល់ពេលនេះ អ្នកស្លាប់ហ្នឹង គ្រួសារសពអីមកបំពេញបែបបទ ហើយបានដឹកទៅស្រុកកំណើតអស់ហើយ ។ យើងមានឡានមានអី ដឹកពួកគាត់ដល់ស្រុកកំណើត»។
កាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន បានសរសេរបង្ហោះនៅលើហ្វេសប៊ុករបស់លោកដោយបាន ចូលរួមរំលែកទុក្ខដល់ក្រុមគ្រួសារសព ហើយក៏បានប្រកាសបញ្ចេញថវិកាជាតិជួយដល់ក្រុមគ្រួសារអ្នកស្លាប់ក្នុង ១ នាក់ ចំនួន ៤០ លានរៀល (សែសិបលានរៀល) ១ ម៉ឺនដុល្លារ (១០ ០០០ ដុល្លារ)។ ចំពោះអ្នកត្រូវរបួសទាំងអស់ គឺត្រូវទទួលបានការព្យាបាលដោយឥតគិតថ្លៃ នៅតាមមន្ទីរពេទ្យរដ្ឋ និងទទួលបានជំនួយឧបត្ថម្ភក្នុងមួយនាក់ចំនួន ៥ លានរៀល (ប្រាំលានរៀល)។
លោកស្រី ជៀប សុធារី អ្នកសម្របសម្រួលអង្គការសិទ្ធិមនុស្សអាដហុក ប្រចាំខេត្តព្រះសីហនុបានថ្លែងប្រាប់ភ្នំពេញប៉ុស្តិ៍ពីម្សិលមិញថា ការជួយជនរងគ្រោះ គឺជារឿងសំខាន់ តែចំពោះការស្វែងរកជនដែលទទួលខុសត្រូវចំពោះឧបទ្ទវហេតុនេះ ក៏ជារឿងមួយចាំបាច់ផងដែរ។
លោកស្រីបញ្ជាក់ថា លោកស្រី មិនចង់ឃើញមានចំណាត់ការតែលើក្រុមជនជាតិចិន និងជានជាតិខ្មែរទាំង ៤ រូបនេះនោះទេ ព្រោះការអសមត្ថភាពរបស់អាជ្ញាធរ ក្នុងករណីនេះ ក៏ជាការទទួលខុសត្រូវមួយ ដែលគួរតែមានវិធានការជាបន្ទាន់ផងដែរ។
លោកស្រីបញ្ជាក់ថា៖ «ខេត្តនេះ យើងឃើញមានការជ្រោមជ្រែងពីស្ថាប័នជាច្រើន ហេតុអ្វីបានបណ្តែតបណ្តោយឲ្យមានហេតុការណ៍នេះ ហើយរដ្ឋាភិបាលបានប្រគល់តួនាទី និងមុខតំណែងឲ្យពួកគេមើលការខុសត្រូវគ្រប់គ្រង ហើយបើអគារនេះមិនមានការអនុញ្ញាតហេតុអ្វីអាចបន្តសាងសង់បាន»។
កន្លងទៅអាជ្ញាធរខេត្តព្រះសីហនុ ធ្លាប់បានបញ្ជាក់ប្រាប់សារព័ត៌មានក្នុងស្រុកជាបន្តបន្ទាប់ថា សំណង់អគារខាងលើដែលមានម្ចាស់ឈ្មោះ ជីង គ័ង ជាជនជាតិចិន បានសាងសង់លើផ្ទៃដីទំហំ ៥៨៣ ម៉ែត្រក្រឡា មិនមានច្បាប់អនុញ្ញាតនោះទេ ហើយអាជ្ញាធរធ្លាប់បានហាមឃាត់មិនឱ្យសាងសង់ចំនួន ២ ដងរួចទៅហើយ ប៉ុន្តែម្ចាស់សំណង់មិនចូលរួមសហការ។
ជាមួយនឹងការលើកឡើងបែបនេះ លោកស្រី ជៀប សុធារី បានសម្តែងការព្រួយបារម្ភដោយចោទសួរថា តើនឹងមានសំណង់អគារប៉ុន្មានទៀត ដែលសាងសង់ឡើងដោយជនជាតិចិន ហើយមិនមានច្បាប់អនុញ្ញាតបែបនេះ៕