ភ្នំពេញៈ រដ្ឋមន្ដ្រីក្រសួងមហាផ្ទៃលោក ស ខេង ពីម្សិលមិញបានប្រកាសថា ថវិកាសម្រាប់រដ្ឋបាលថ្នាក់ក្រោមជាតិនៅឆ្នាំ ២០២០ នឹងបើកតាមប្រព័ន្ធធនាគារ ដើម្បីឲ្យមានតម្លាភាពដែលអាចទប់ស្កាត់អំពើពុករលួយ និងបញ្ឈប់អ្នករត់ការបើកប្រាក់ខែឲ្យម្ចាស់សាមីក្នុងបំណងយកភាគរយ ហើយព្រមានថា មន្ត្រីមិនត្រូវប្រើអំណាចរំលោភទៅលើអំណាចដើម្បីប្រយោជន៍បុគ្គលនោះទេ។
លោក ស ខេង ថ្លែងបែបនេះក្នុងពិធីផ្សព្វផ្សាយការអនុវត្តអនុក្រឹត្យស្ដីពីមុខងារ និងរចនាសម្ព័ន្ធរបស់រដ្ឋបាលក្រុង-ស្រុក-ខណ្ឌ និងអនុក្រឹត្យស្ដីពីការប្រគល់មុខងារគ្រប់គ្រង និងផ្តល់សេវាសុខាភិបាលទៅឲ្យរដ្ឋបាលរាជធានី-ខេត្តនៅថ្ងៃទី ១៧ ខែធ្នូ ដែលមានការចូលរួមពីស្ថាប័នព្រឹទ្ធសភា រដ្ឋសភាតំណាងក្រសួងស្ថាប័ននៃរាជរដ្ឋាភិបាល រដ្ឋបាលថ្នាក់ក្រោមជាតិដៃគូអភិវឌ្ឍន៍ វិស័យឯកជន និងអង្គការសង្គមស៊ីវិលប្រមាណជិត ១ ០០០ នាក់នៅក្រសួងមហាផ្ទៃ។
លោកថ្លែងថាផ្អែកលើគម្រោងប៉ាន់ស្មានសម្រាប់ឆ្នាំ ២០២០ ខាងមុខរដ្ឋនឹងវិភាជថវិកាប្រមាណ ៨០០ លានដុល្លារ ទៅឲ្យរដ្ឋបាលថ្នាក់ក្រោមជាតិ។ ចំនួននេះពុំទាន់គិតបញ្ចូលនូវការវិភាជពីថវិកាទៅឲ្យរដ្ឋបាលរាជធានី ខេត្ត ក្រុង ស្រុក ខណ្ឌនីមួយៗបន្ថែមទៀតសម្រាប់មុខងារដែលត្រូវផ្ទេរទៅឲ្យរដ្ឋបាលទាំងនេះនោះទេ។
លោកបន្តថា ថវិកាបន្ថែមនេះកំពុងត្រូវបានរៀបចំកំណត់ដោយក្រសួងសេដ្ឋកិច្ច និងហិរញ្ញវត្ថុ ដើម្បីផ្ទេរត្រង់ទៅឲ្យរដ្ឋបាលថ្នាក់ក្រោមជាតិគ្រប់គ្រងចាត់ចែង និងប្រើប្រាស់។ ដូច្នេះចំនួនថវិកាវិភាជថវិការដ្ឋទៅឲ្យរដ្ឋបាលថ្នាក់ក្រោមជាតិសម្រាប់ឆ្នាំ ២០២០ នឹងអាចកើនឡើងរហូតដល់ទៅ ១ ០០០ លានដុល្លារ។
លោកមានប្រសាសន៍ថា៖ «ទន្ទឹមនឹងការត្រេកអរ យើងក៏មានការព្រួយបារម្ភដែរ ពីព្រោះពេលណាយើងចាយផ្តេសផ្តាសទៅនឹងមានរឿងរ៉ាវទៀត។ លុយនេះ មិនមែនបើកដាក់កាតាបយកទៅទេ លុយហ្នឹងគឺថាហោះតាមរលកធាតុអាកាស (កុងធនាគារ)។ អត់មានក្រោមតុ អត់មានចរចា អត់កើតទេ។ បើឃុំ-សង្កាត់ មួយបានប៉ុន្មាន ស្រុក-ក្រុង មួយបានប៉ុន្មានហោះទៅតាមហ្នុងហើយអត់មានចរចាកាត់ភាគរយទេ»។
លោកសង្កត់ធ្ងន់ថា៖ «វាកាត់បន្ថយនូវអំពើពុករលួយបានកាន់តែច្រើន។ នេះជាអ្វីដែលយើងចង់បាន។ រដ្ឋបាលថ្នាក់ក្រោមជាតិទាំងខេត្ត ស្រុក ក្រុង ខណ្ឌ ទាំងឃុំ សង្កាត់ពេលហ្នឹងត្រូវទទួលខុសត្រូវខ្លាំង ថាតើការចាយហ្នឹងត្រឹមត្រូវ ឬមិនត្រឹមត្រូវចាយសល់ ឬអស់។ បើមិនអស់លុយ មិនឲ្យទៀតទេ តែបើអស់លុយហើយ តែមិនបានសមិទ្ធផលជាដុំកំភួនក៏មិនឲ្យដែរ និយាយគ្នាឲ្យច្បាស់រឿងហ្នឹង។ យក (ថវិកា) ហ្នឹងគឺថាមិនត្រូវចាយផ្តេសផ្តាសទេ គឺគូសវាសឲ្យដើរ ចាយទៅលើអ្វីខ្លះរួចហើយធ្វើគណនេយ្យភាពជាមួយប្រជាពលរដ្ឋខ្លួនគេ»។
លោក ស ខេង ក៏បានឲ្យដឹងដែរថា ការធ្វើវិមជ្ឈការគឺដើម្បីផ្ទេរសិទ្ធិអំណាច មុខងារ និងធនធានទៅឱ្យរដ្ឋបាលថ្នាក់ក្រោមជាតិទទួលខុសត្រូវលើការគ្រប់គ្រងការចាត់ចែងសម្រាប់ការផ្តល់សេវាសាធារណៈ និងការអភិវឌ្ឍមូលដ្ឋាន។
ប្រការនេះ បានធ្វើឱ្យរដ្ឋបាលថ្នាក់ក្រោមជាតិដែលនៅកៀកជិតប្រជាពលរដ្ឋមានលទ្ធភាពមានភាពម្ចាស់ការ និងការទទួលខុសត្រូវច្បាស់លាស់ក្នុងការផ្តល់សេវាសាធារណៈ និងការអភិវឌ្ឍមូលដ្ឋានដើម្បីឆ្លើយតបទៅនឹងតម្រូវការ និងដោះស្រាយនូវបញ្ហាប្រឈមជាក់ស្តែងនានារបស់ប្រជាពលរដ្ឋនៅតាមមូលដ្ឋាននីមួយៗឱ្យបានទាន់ពេលវេលាប្រកបដោយប្រសិទ្ធភាព តម្លាភាព គណនេយ្យភាព បរិយាប័ន្ន និងសមធម៌សង្គម និងដើម្បីបង្កើនធនធាន និងការចូលរួមរបស់សហគមន៍ និងប្រជាពលរដ្ឋសម្រាប់ការអភិវឌ្ឍមូលដ្ឋាន។
ជាមួយគ្នានេះដែរលោកក៏បានប្រាប់ដល់មន្ត្រីមូលដ្ឋានថ្នាក់ក្រោមជាតិមិនត្រូវឃុបឃិត អនុញ្ញាតឲ្យមានការផ្ទេរ ឬដោះដូរតួនាទីតាមទំនើងចិត្តចង់។ លោកសង្កត់ធ្ងន់ថា មិនត្រូវរំលោភទៅលើអំណាចរបស់ខ្លួនដើម្បីបម្រើផលប្រយោជន៍របស់ខ្លួននោះទេ ហើយព្រមានថា ក្រសួងមហាផ្ទៃនឹងចាត់វិធានការតាមច្បាប់ ប្រសិនបើរកឃើញបុគ្គលដែលបានប្រព្រឹត្តបែបនេះ។
លោកបញ្ជាក់ថា៖ «ធ្វើអ៊ីចឹងៗអីអត់បានទេអាជ្ញាធររដ្ឋបាលយើង។ គេថាប្រើអំណាចដោយរំលោភ។ វាជារឿងផលប្រយោជន៍ ដើម្បីផលប្រយោជន៍ របស់ខ្លួនប្រើអំណាចដោយរំលោភ»។
លោក ស ខេង ឲ្យដឹងថា ក្រសួងសេដ្ឋកិច្ច និងហិរញ្ញវត្ថុ និងលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) ត្រូវបន្តខិតខំសម្របសម្រួលជាមួយក្រសួង ស្ថាប័នពាក់ព័ន្ធនានាក្នុងការកំណត់អំពីចំនួនថវិកាជាក់លាក់រួមមានថវិកាសម្រាប់បន្ទុកបុគ្គលិក ថវិកាសម្រាប់ប្រតិបត្តិការ និងថវិកាសម្រាប់អនុវត្ត មុខងារដែលបានផ្ទេរទៅឱ្យរដ្ឋបាលថ្នាក់ក្រោមជាតិ ព្រមទាំងការរៀបចំលិខិតបទដ្ឋានបច្ចេកទេសនានា ដើម្បីផ្ទេរធនធានទាំងនេះឱ្យបានទាន់ពេលវេលាទៅឱ្យរដ្ឋបាលរាជធានី ខេត្ត និងក្រុង ស្រុក ខណ្ឌក្នុងការចាប់ផ្តើមបំពេញមុខងារដែលបានផ្ទេរឱ្យទាំងនោះចាប់ពីដើមឆ្នាំ ២០២០ តទៅ។
ជាមួយគ្នានេះក៏ត្រូវពិនិត្យ និងកែសម្រួលនូវប្រព័ន្ធគ្រប់គ្រងហិរញ្ញវត្ថុរបស់រដ្ឋបាលរាជធានី ខេត្ត ក្រុង ស្រុក ខណ្ឌឱ្យឆ្លើយតបទៅនឹងរចនាសម្ព័ន្ធគ្រប់គ្រងថ្មីនៃរដ្ឋបាលទាំងនោះផងដែរ។
លោកបញ្ជាក់ថា៖ «ក្នុងករណីទ្រព្យសម្បត្តិជាអចលនទ្រព្យមួយចំនួន ដែលពុំអាចមានលទ្ធភាពរៀបចំផ្ទេរទាន់ពេលវេលា ក្រសួង ស្ថាប័ននានា ត្រូវអនុញ្ញាតឱ្យរដ្ឋបាលថ្នាក់ក្រោមជាតិប្រើប្រាស់នូវទ្រព្យសម្បត្តិទាំងនោះជាបណ្តោះអាសន្ន និងត្រូវបន្តរៀបចំផ្ទេរទ្រព្យសម្បត្តិឱ្យបានមុនដំណាច់ឆមាសទី ១ ឆ្នាំ ២០២០ ខាងមុខនេះ។
នាយកកម្មវិធីនៃអង្គការតម្លាភាពលោក ពេជ្រ ពិសី ស្វាគមន៍វិធានការរបស់ គជអប ដែលរៀបចំថវិកាសម្រាប់រដ្ឋបាលថ្នាក់ក្រោមជាតិតាមប្រព័ន្ធធនាគារ ដោយចាត់ទុកថាជាផ្នែកមួយនៃការជួយលើកស្ទួយតម្លាភាព និងកាត់បន្ថយអំពើពុករលួយ។
លោកបញ្ជាក់ថា៖ «ពេលណាយើងធ្វើការបើកថវិកា ឬប្រាក់បៀវត្សរ៍ ឬលុយចំណាយផ្សេងៗក្តីតាមប្រព័ន្ធធនាគារ វាធ្វើឲ្យមានតម្លាភាពជាជាងយើងកាន់ជាសាច់ប្រាក់។ នេះគឺជាជំហានមួយល្អដែរ ប៉ុន្តែពេលដែលគេដកលុយពីធនាគាទៅប្រើហ្នឹង តើអ្នកដែលត្រួតពិនិត្យតាមដានការចាយលុយហ្នឹងតាមយន្តការអ្វី?»។
ពាក់ព័ន្ធទៅនឹងការរំលោភអំណាចវិញលោកនិយាយថា៖ «ការរំលោភអំណាចយើងឃើញថា ជាទូទៅកើតមានច្រើនចំពោះ មន្ត្រីថ្នាក់ជាតិ និងថ្នាក់ក្រោមជាតិ ដែលរំលោភអំណាចដើម្បីទទួលបានផលប្រយោជន៍ខ្លួនឯង។ វាជាទម្រង់មួយនៃអំពើពុករលួយ ហើយក្រសួងមហាផ្ទៃគាត់មានវិធានការទប់ស្កាត់ ធ្វើម៉េចកុំឲ្យមន្ត្រីគាត់ប្រើអំណាច និងរំលោភបំពានអំណាច វាជាជំហានមួយដែលយើងស្វាគមន៍ តែការលើកមតិយោបល់ និងអំពាវនាវសុំ វាមិនទាន់គ្រប់គ្រាន់ទេ ទាល់តែបង្កើតយន្តការតាមដានមន្ត្រីរបស់ខ្លួនដើម្បីកុំឲ្យមានការរំលោភអំណាច»៕
វីដេអូ៖