.jpg)
លោក ស ខេង ក្នុងពិធីសម្ពោធស្ពាននៅខេត្តបាត់ដំបង ពីម្សិលមិញ។ រូបថត ហ្វេសប៊ុក សម្តេច ស ខេង
បាត់ដំបងៈ ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ លោក ស ខេង ពីម្សិលមិញ បានអំពាវនាវប្រជាពលរដ្ឋកុំឱ្យជឿ និងពាក់ព័ន្ធជាមួយនឹងការឃោសនា របស់អ្នកនយោបាយខ្លះអូសទាញនាំឱ្យចូលរួមធ្វើបាតុកម្ម ប្រឆាំងនឹងរាជរដ្ឋាភិបាល ដែលកើតចេញពីការបោះឆ្នោតត្រឹមត្រូវ។
ការអំពាវនាវរបស់លោក ស ខេង ធ្វើឡើង ក្រោយពីអ្នកប្រើប្រាស់បណ្តាញសង្គមមួយចំនួនបានសរសេរនៅលើហ្វេសប៊ុករបស់ពួកគេថា ពួកគេនឹងទៅទទួលស្វាគមន៍ការវិលត្រឡប់របស់លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ និងថ្នាក់ដឹកនាំបក្សនេះ នៅពេលមេដឹកនាំបក្សប្រឆាំងទាំងនេះធ្វើមាតុភូមិនិវត្តន៍មកកម្ពុជាវិញ។ ម្យ៉ាងវិញទៀត ក៏វាស្របពេលដែលអគ្គមេបញ្ជាការ កងកម្លាំងប្រដាប់អាវុធ មានទាំងអគ្គស្នងការនគរបាលជាតិ និងអគ្គមេបញ្ជាការកងយោធពលខេមរភូមិន្ទ បានប្រជុំត្រៀមកម្លាំងអនុវត្តដីការបស់តុលាការ ត្រៀមចាប់លោក សម រង្ស៊ី និងថ្នាក់ដឹកនាំគណបក្សប្រឆាំងមួយនេះ។
ក្នុងពិធីសម្ពោធ បើកឲ្យប្រើប្រាស់ជាផ្លូវការ ស្ពានច្រាំងចោត ខេត្តបាត់ដំបង ពីម្សិលមិញ លោក ស ខេង ថ្លែងថា ប្រទេស កម្ពុជា មានសុខសន្ដិភាពពេញលេញ ដូច្នេះពលរដ្ឋត្រូវគិតរកស៊ីបន្ថែមទៀត ដើម្បីឲ្យជីវភាពកាន់តែធូរធារ ដោយកុំពាក់ព័ន្ធ និងចូលរួមធ្វើសកម្មភាពតាមការឃោសនារបស់អ្នកនយោបាយមួយចំនួន។ ការលើកឡើងបែបនេះ ត្រូវបានគេដឹងថា លោកចង់សំដៅទៅលោក សម រង្ស៊ី ដែលបានប្រកាសជាច្រើនដងថា លោក និងមន្ត្រីជាន់ខ្ពស់របស់លោកនឹងវិលចូលស្រុកក្នុងឆ្នាំនេះ។
លោក ស ខេង បញ្ជាក់ថា៖ «នៅក្នុងពេលដែលយើងកំពុងតែមានសុខសន្តិភាពបែបនេះ យើងគួរតែរួមគ្នាគិតដើម្បីកសាង ជីវភាពរបស់យើងឲ្យសម្បូរសប្បាយ។ កុំទៅជឿការឃោសនា អូសទាញពីមជ្ឈដ្ឋានអ្នកនយោបាយខ្លះ ដែលគេមានបំណងនឹងកៀរគរ និងប្រមែប្រមូលប្រជាពលរដ្ឋដែលគាំទ្រគេហើយទៅប្រឆាំងរដ្ឋាភិបាល តាមរយៈមហាបាតុកម្ម។ល។»។
លោកបន្ថែមថា កន្លងទៅប្រទេស កម្ពុជា បានរៀនសូត្រពីការធ្លាក់ក្នុងភ្លើងសង្គ្រាម ដោយសារតែតាមរយៈការឃោសនា។ ប្រជាពលរដ្ឋត្រូវខិតខំជួយថែរក្សាការពារនូវការអភិវឌ្ឍ និងការរីកចម្រើនរបស់រដ្ឋាភិបាលកម្ពុជាសព្វថ្ងៃនេះដែលកើតចេញពីការបោះឆ្នោត។ ប្រជាជនជាង ៨០ ភាគរយ បានទៅបោះឆ្នោត ដោយគ្មានអំពើហិង្សា របួសស្នាម ឬស្លាប់នោះទេ ហើយមានការទទួលស្គាល់ពីអន្តរជាតិ បើទោះបីប្រទេសតិចតួចខ្លះមិនបានទទួលស្គាល់ក្តី។
លោកបន្ថែមថា៖ «ស្រុកយើងកំពុងតែមានសុខសន្តិភាពពេញលេញ អត់មានទ័ពក្រៅច្បាប់ ឬគេហៅថាឧទ្ទាមក្រៅច្បាប់ ដើម្បីមកធ្វើសង្គ្រាមជាមួយនឹងរដ្ឋាភិបាល ដែលនាំឲ្យរដ្ឋាភិបាលកៀរគរកម្លាំងកងទ័ព ឬក៏រើសទ័ពពីកូនចៅប្រជាជនទៅច្បាំងនោះទេ។ នេះគឺជាភ័ព្វសំណាងរបស់យើងល្អណាស់ ហើយវាជាជោគជ័យរបស់យើងទាំងអស់គ្នា និងរបស់ជាតិយើងដែលយើងមានមោទនភាព។ ប្រសិនបើមកដល់ពេលនេះ យើងមិនទាន់មានសុខសន្តិភាព គឺយើងមិនអាចមានពេលធ្វើអ្វីបានទេ»។
លោក ស ខេង បន្តថា បើមានការតវ៉ាផ្ដួលរំលំរដ្ឋាភិបាលនោះ វាហាក់ដូចជាការរុះរើកម្ពុជា ហើយចាប់ផ្ដើមកសាងឡើងសារជាថ្មី ហើយមិនដឹងថាពេលណាដែលកម្ពុជាអាចបានស្មើស្ថានភាពបច្ចុប្បន្នទេ។
ដោយមិនសំដៅចំឈ្មោះ លោក សម រង្ស៊ី ឬគណបក្សសង្គ្រោះជាតិ លោក ស ខេង ថ្លែងថា៖ «ឧទាហរណ៍ថា បើយើងនាំគ្នារវល់ថា អូ ឥឡូវនេះនាំគ្នាគិតគូរត្រៀមដើម្បីនឹងស្វាគមន៍មេបក្សនេះមេបក្សនោះដែលតុលាការបានរំលាយហើយ រួចហើយមកធ្វើបាតុកម្មផ្ដួលរំលំរដ្ឋាភិបាល យើងអត់បានគិតអីទេក្នុងជីវភាពរស់នៅរបស់យើង»។
លោកបន្តថា៖«អ៊ីចឹងពេលនេះខ្ញុំស្នើថា យើងគិតពីរឿងថា កូនយើងបានរៀន ឬមិនបានរៀន។ គិតពីរឿងមុខរបររបស់យើងនេះ កសិកម្មក្ដី ពាណិជ្ជកម្មក្ដី សេវាកម្មក្ដី តើវាមានការរីកចម្រើនទៅមុខ ឬអត់។ យើងមានផ្ទះសំបែងរស់នៅគ្រប់គ្រាន់ឬនៅ យើងមានមធ្យោបាយធ្វើដំណើរគ្រប់គ្រាន់ឬនៅ។ សុខភាពរបស់យើងវាយ៉ាងម៉េច ត្រូវដោះស្រាយរបៀបម៉េច ហើយស្នើទៅរដ្ឋាភិបាល ទៅក្រុមការងារដើម្បីជួយអន្តរាគមន៍រឿងអីខ្លះ»។
លោកថា អ្វីដែលរដ្ឋាភិបាលកំពុងធ្វើ គឺជួយឲ្យពលរដ្ឋមានខ្សែក ខ្សែដៃ ម៉ូតូ និងសម្លៀកបំពាក់ ហើយញញឹមទៅមានទឹកមុខស្រស់ស្រាយ។ រដ្ឋាភិបាលមិនដែលគិតយកសម្បត្តិទាំងនោះ ទៅដាក់ជារបស់រួមដូចកាលសម័យខ្មែរក្រហមទេ។
លោកថា កាលពីបោះឆ្នោតឆ្នាំ ២០១៣ រដ្ឋបានខាតបង់ថវិកា ធនធានសម្បើមណាស់ដើម្បីការពារសន្តិសុខពាក់ព័ន្ធនឹងការមិនទទួលយកលទ្ធផលនៃការបោះឆ្នោត និងបាតុកម្មរយៈពេលជិត ១ ឆ្នាំ។ លោកបន្តថា អាជ្ញាធរអាចការពារមិនឲ្យមានការស្លាប់ដោយការធ្វើបាតុកម្ម លើកលែងតែអ្នកបះបោរនៅផ្លូវវេងស្រេងដែលរដ្ឋាភិបាលមានការសោកស្ដាយយ៉ាងខ្លាំង។
លោកបានថ្លែងរំឭកពីព្រឹត្តិការណ៍ផ្លូវវេងស្រេងថា៖ «ព្រឹកហ្នឹងមានបញ្ហា ខ្ញុំបញ្ជាឲ្យបិទទីលានប្រជាធិបតេយ្យ អត់ឲ្យមានទីលានប្រជាធិបតេយ្យទៀតទេ។ មិនមែនអត់ឲ្យមានទេ តែមិនឲ្យជួបជុំនៅទីលានប្រជាធិបតេយ្យ។ តាំងពីហ្នឹងមកបិទឈឹងទៅ ដល់បិទទៅមានអ្នកសួរថា អង្កាល់បើកវិញ។ ខ្ញុំថា ទាល់តែគណបក្សហ្នឹងចូលសភា បើមិនចូលសភាទេ អត់បើកជូនទេ។ ឥឡូវគាត់មកចង់ធ្វើអារបៀបហ្នឹងវិញ តែពលរដ្ឋយើងមិនឆោតដល់ថ្នាក់ហ្នឹងទេ»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិ ថ្លែងពីម្សិលមិញ គាំទ្រការលើកឡើងរបស់លោក ស ខេង។ លោកនិយាយថា ការអំពាវនាវរបស់គណបក្សប្រឆាំងអាចនឹងនាំធ្វើបាតុកម្មប្រឆាំងទៅនឹងរាជរដ្ឋាភិបាលដែលឈានដល់ការបង្កឲ្យមានការចលាចល និងស្ថិរភាពនយោបាយដែលធ្វើឲ្យប៉ះពាល់ដល់សេដ្ឋកិច្ចជាតិ ប្រទេសជាតិ។
លោកថ្លែងថា៖ «ការប្រកួតប្រជែងគ្នាបែបនេះមិនបានផ្តល់នូវផលប្រយោជន៍សម្រាប់ប្រទេសជាតិទេ ហើយគួរតែងាកមកការជជែកគ្នាវិញ។ ការលើកឡើងរបស់លោក សម រង្ស៊ី នឹងធ្វើឲ្យប្រទេសស្ថិតក្នុងស្ថានភាពមិនល្អដោយប៉ះពាល់ដល់ដំណើរការសេដ្ឋកិច្ច ការវិនិយោគ និងមុខមាត់ប្រទេសផង»។
ទន្ទឹមនឹងនេះដែរ លោកក៏បានស្នើឲ្យគណបក្សដឹកនាំប្រទេស និងគណបក្សប្រឆាំង ងាកមករកតុចរចា ដើម្បីដោះស្រាយវិបត្តិនយោបាយដែលបាននឹងកំពុងកើតមាន ដើម្បីផលប្រយោជន៍ប្រជាជន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជាថ្លែងថា សាររបស់លោករដ្ឋមន្ដ្រីក្រសួងមហាផ្ទៃបែបនេះ ជាការក្រើនរំឭក និងព្រមានទៅដល់អ្នកដែលមានបំណងចង់បង្កើតឱ្យមានចលនាបដិវត្តន៍ពណ៌ពីមហាជន ដែលចង់ផ្តួលរំលំរដ្ឋាភិបាល។
លោកបន្តថា៖ «សាររបស់សម្តេច ស ខេង គឺវាច្បាស់ហើយ គឺសំដៅទៅលោក សម រង្ស៊ី និងអតីតគណបក្សប្រឆាំងដោយសារយើងឃើញកន្លងទៅថ្មីៗនេះ លោក សម រង្ស៊ី តែងតែបញ្ចេញសារម្តងហើយម្តងទៀត ដែលមានលក្ខណៈចាក់ដោត បំបែកបំបាក់ប្រជាជន និងបំបែកបំបាក់គណបក្សប្រជាជន និងញុះញង់ប្រជាពលរដ្ឋឲ្យធ្វើអ្វីមួយដែលនាំមកនូវភាពមហន្តរាយដល់ប្រទេសជាតិ។ សាររបស់សម្តេចមានសារៈសំខាន់សម្រាប់ប្រជាពលរដ្ឋជាមូលដ្ឋានក្នុងការពិចារណា»។
អ្នកវិភាគនយោបាយ លោក ឡៅ ម៉ុងហៃ បានថ្លែងថា ការធ្វើបាតុកម្មដោយសន្តិវិធីបូករួមទាំងបាតុកម្មប្រឆាំងរដ្ឋាភិបាលផងនោះ គឺជាការអនុវត្តសិទ្ធិសេរីភាពនៃការបញ្ចេញមតិរបស់ប្រជាពលរដ្ឋ ដែលធានាដោយរដ្ឋធម្មនុញ្ញ ដរាបណាការអនុវត្តសិទ្ធិនោះមិនប៉ះពាល់ដល់សិទ្ធិ សេចក្ដីថ្លៃថ្នូរអ្នកដទៃ ដូចបានចែងក្នុងមាត្រា ៣១ និងមិនប៉ះពាល់ដល់ប្រពៃណី សង្គម សណ្ដាប់ធ្នាប់សាធារណៈ និងសន្តិសុខជាតិ ដូចមានចែងក្នុងមាត្រា ៤១។
អ្នកវិភាគរូបនេះបានថ្លែងថា៖ «រដ្ឋាភិបាលអាចអំពាវនាវដល់ពលរដ្ឋមិនឲ្យធ្វើបាតុកម្ម។ ប៉ុន្តែវាជាការរំលោភរដ្ឋធម្មនុញ្ញដែលទៅហាមឃាត់ពួកគាត់ ហើយព្យួរសិទ្ធិនោះ ប្រសិនបើប្រទេស ឬទីតាំងជាក់លាក់ណាមួយដែលហាមធ្វើបាតុកម្មនោះ មិនត្រូវបានប្រកាសឲ្យបានច្បាស់ថា ត្រូវបានដាក់ក្នុងភាពអាសន្ន»៕
